“Tej Kev Khi Lus, lub Hwj Chim, thiab tej Lus Cog Tseg,” Liahona, Kaum Hli Ntuj 2025.
Zaj Lus hauv Liahona Txhua Hli, Kaum Hli Ntuj 2025
Tej Kev Khi Lus, lub Hwj Chim, thiab tej Lus Cog Tseg
Lub tuam tsev yeej tseem ceeb rau lub hwj chim thiab kev pov hwm uas tus Tswv tau cog lus tias cov neeg rau siab ntseeg yuav txais ua ntej tus Tswv Yexus Khetos txoj Kev Los Zaum Ob.
Daim duab txog Joseph Smith los ntawm Dan Burr
Thaum lub Tsib Hlis Ntuj xyoo 1833, kuv yawg koob thib plaub Asahel Perry thiab ib co phooj ywg txij ntawm New York sab qaum teb mus rau Kirtland, Ohio. Lawv tsis yog mej zeej ntawm lub Koom Txoos uas nyuam qhuav tau muab txum tim rov qab los, tiam sis lawv xav ntsib tus Yaj Saub Joseph Smith. Lawv tuaj txog thau pib muaj thawj pawg sab laj kom sib tham txog kev ua lub Tuam Tsev Kirtland.
Thaum lawv qhib lub rooj sab laj, tus Yaj Saub tau hais tias yuav ua li cas kom ua lub tuam tsev. Ces nws hais kom tib neeg nyob ntawd hais tias lawv xav li cas txog ib txoj hauj lwm loj npaum li ntawd. Neeg feem coob teb hais tias lub Koom Txoos tsis muaj nyiaj txaus ua ib txoj hauj lwm zoo li no. Lawv hais kom ua ib lub tuam tsev uas me dua thiab pheej yig zog.
Thaum lawv tseem sib tham, Yawg Koob Perry thiab nws cov phooj ywg sib tham ua ke, rho lawv cov nyiaj, thiab muab suav. Lawv puas tau muaj txaus them nqi rau lawv rov qab mus tsev thiab pub nyiaj rau kev ua lub tuam tsev? Ob peb feeb tom qab ntawd, kuv yawg koob mus rau Joseph Smith, rho ib lub npib kub tsib duas, thiab muab rau tus Yaj Saub. (Hnub no ib lub npib zoo li ntawd yuav muaj nqi li ob peb puas duas!)
Joseph tau sawv rau ntawm pawg sab laj thiab tuav tus npib kub. Ces nws siv zog hais tias, “txoj haujl wm twb pib lawm thiab [tusTswv] lub Tsev los yuav ua raws li tus Tswv [Yexus Khetos] tus yam ntxwv, thiab peb yuav tau cov koob hmoov uas nyob mus ib txhis.”
Tsis ntev tom qab ntawd tsev neeg Perry tau koom lub Koom Txoos hauv Kirtland, tau txais cov koob hmoov ntawm lub tuam tsev ob peb xyoos tom qab ntawd nyob hauv lub Tuam Tsev Nauvoo, ces hla cov tiaj nras mus rau Utah.
Txog lub sij hawm tau muab lub Tuam Tsev Kirtland fij tseg nyob rau xyoo 1836, yeej me dhau kom haum txhua tus Neeg Ntseeg hauv Hnub Nyoog Kawg uas xav mus saib. Thaum lub Koom Txoos loj tuaj ntxiv, cov Neeg Ntseeg coob ntxiv yuav tsum nyob nraum zoov thaum lawv tuaj rau kev sib ntsib. Thawj Tswj Hwm James E. Faust (1920-2007), tus uas yog kuv ceg txheem ntseeg tus thawj tswj hwm thaum kuv yog ib tug hluas thiab kuv tus xib hwb thaum nws hu kuv ua ib tug Tuam Thawj Coj nyob rau xyoo 2007, tau hais li no txog lub Koom Txoos lub tuam tsev thib ob.
“Ua ntej tau ua lub Tuam Tsev Nauvoo tiav lawv nybo rau xyoo 1846 Haiv Neeg Ntseeg yuav nyob nraum zoov thaum lawv sib ntsib, feem ntau lawv nyob ze lub tuam tsev, kom hnov tau tej yam uas Joseph thiab lwm tus thawj coj hauv lub Koom Txoos yuav hais. Tej lub sij hawm muaj txhiab txhiab tus neeg uas tuaj rau tej kev sib ntsib ntawd”—tej lub sij hawm huab cua tsis zoo thiab.
“Ib yam li [Txwj Laug] George A. Smith hais tias, ‘Nyob hauv tus Yaj Saub Joseph lub caij nyoog … [lub Koom Txoos] tau vam meej nyob nraum zoo.’”
Peb zoo siab uas niaj hnub no, Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg vam meej nyob nraum zoov, nyob hauv tsev, thiab nyob thoob plaws lub ntiaj teb. Txoj kev vam meej ntawd kuj suav peb txoj kev ua cov tuam tsev sai dua li yav tas los “raws li [tus Tswv Yexus Khetos] tus yam ntxwv”—ib tug yam ntxwv uas yeej muaj kev foom koob hmoov, kev fij tseg, kev ntseeg, thiab kev txi.
Txoj Kev Kaj uas Muaj Yeeb Koob—Lub Tuam Tsev Kirtland, los ntawm Glen S. Hopkinson, tsis pub luam
Vim Li Cas Muaj cov Tuam Tsev Ntau?
Ob peb caug xyoo dhau los Thawj Tswj Hwm Ezra Taft Benson (1899–1994) tau hais tias, “Cov yaj saub dhau los tau qhia txog yav tom ntej hais tias yuav muaj ntau lub tuam tsev nyob thoob plaws Amelikas Sab Qaum Teb, Sab Qaum Teb, cov pov txwv hauv Dej Hiav Txwv Pacific, Yulauv, thiab lwm qhov chaw.” Yog tias yuav ua txoj hauj lwm loj no, ces yuav tsum muaj ntau pua lub tuam tsev.”
Thawj Tswj Hwm Russell M. Nelson tau hais tias peb ua cov tuam tsev sai dua li yav tas los “vim tus Tswv tau qhia peb kom ua li no.” Cov koob hmoov ntawm lub tuam tsev pab muab Ixayees sau los ua ke nyob ob sab ntawm daim ntaub thaiv. Cov koob hmoov no kuj pab npaj ib haiv neeg uas yuav npaj lub ntiaj teb rau tus Tswv txoj Kev Los Zaum Ob!”
Nyob hauv nws zaj lus thov Vajtswv muab lub Tuam Tsev Kirtland fij tseg, Joseph Smith tau thov kom “txhua tus neeg uas nkag los rau hauv lub qhov rooj ntawm tus Tswv lub tsev yuav hnov koj lub hwj chim. …
“Thiab peb thov koj, Leej Txiv Dawb Huv, kom koj cov tub qhe yuav tawm hauv lub tsev no mus muaj koj lub hwj chim ua ntaj riam thaiv lawv, thiab kom muaj koj lub npe nyob nrog lawv, thiab koj lub yeeb koob nyob puag ncig lawv, thiab koj tej tim tswv saib xyuas lawv” (Lus Qhuab Qhia thiab Kev Khi Lus 109:13,22; ntxiv qhov uas ntawv qaij; kuj saib nqe 23).
Thaum kuv nyeem tej nqe no, ua rau kuv xav txog Nifais txoj kev ua yog toog pom hnub nyoog kawg no. Cia li xav seb cov lus no yuav luag zoo ib yam: “Thiab tau muaj tias kuv, Nifais, pom Vajtswv tus Me Nyuam Yaj lub hwj chim, pom tias lub hwj chim ntawd tau nqis los rau cov ntseeg ntawm tus Me Nyuam Yaj lub koom txoos, thiab rau tus Tswv cov neeg khi lus, cov uas tau tawg khiav ri niab mus thoob plaws hauv lub ntiaj teb; thiab lawv tau muab txoj kev ncaj ncees thiab Vajtswv lub hwj chim uas muaj yeeb koob heev los ua ntaj riam thaiv lawv” (1 Nifais 14:14; ntxiv qhov uas ntawv qaij).
Kuv ntseeg tias cov tuam tsev hauv hnub nyoog kawg yeej tseem ceeb kom muaj raws li Nifais txoj kev qhia txog yav tom ntej thiab yuav pab pov hwm thiab muab hwj chim rau cov neeg rau siab ntseeg ua ntej txoj Kev Los Zaum Ob.
Ntau xyoo tas los, thaum kuv yog tus npisov hauv ib pawg ntseeg ntawm lub tsev kawm ntawv qib siab, muaj ib tug ntxhais hluas hauv kuv pawg ntseeg uas kuv xav tias muaj txuj ci heev. Kuv tseem xav li ntawd. Nej paub nws lub npe hu ua Thawj Tswj Hwm Emily Belle Freeman, Koom Haum Ntxhais Hluas tus Tuam Thawj Tswj Hwm. Nyob hauv ib zaj lus uas nws hais hauv lub tuam rooj sab laj, nws qhia tias dhau los ntawm lub tuam tsev, Yexus Khetos ua rau peb sab ntsuj plig nce mus siab.
Thawj Tswj Hwm Freeman hais tias, “Txhua zaus kuv nkag mus hauv Nws lub tsev, kuv txoj kev sib raug zoo thiab khi lus nrog Nws tob dua. “Nws tus Ntsuj Plig ua rau kuv hloov ua neeg dawb huv, txais Nws lub hwj chim ua vaj txiaj ntsim, thiab tus Tswv muab kuv tsa los kom txhim tsa Nws lub nceeg vaj.”
Lub Hwj Chim uas Tau Cog Lus
Thawj Tswj Hwm Nelson tau hais ntau zaus txog Yexus Khetos lub hwj chim uas muaj dhau los ntawm lub tuam tsev tej kev khi lus. Nws tau hais tias, “qhov uas nej kwv tus Cawm Seej tus quab txhais tias nej txais tau Nws lub dag zog thiab lub hwj chim txhiv dim.” Thawj Tswj Hwm Nelson kuj tau qhia hais tias:
“Thaum peb ua raws li peb tej kev khi lus ntawm lub tuam tsev, peb txais tau tus Tswv lub hwj chim uas ntxiv zog rau peb zuj zus. Nyob hauv lub tuam tsev, peb txais kev tiv thaiv kom txhob raug neeg ntiaj teb tej kev tawm tsam.”
“[Tus Cawm Seej] cov kab ke khi peb rau Nws los ntawm tej kev khi lus pov thawj hwj uas dawb ceev. Ces thaum peb ua raws li peb tej kev khi lus, Nws pub ntxiaj ntsim rau peb los ntawm Nws lub hwj chim uas txhawb peb dag zog. Thiab peb yeej yuav xav tau Nws lub hwj chim nyob rau yav tom ntej.”
“Lub hwj chim coj ncaj ncees thiab lub hwj chim ntawm sab ntsuj plig uas peb cov neeg xav tau tam sim no thiab nyob rau yav tom ntej yog lub hwj chim ntawm Vajtswv Leej Txiv thiab Nws Leej Tub, Yexus Khetos. Peb txais tau Nkawd lub hwj chim thaum peb nrog Nkawd khi lus thiab. ua raws li tej kev khi lus ntawd.”
Cov kwv tij thiab cov muam, lub hwj chim saum ntuj ceeb tsheej muaj nqis heev vim peb nyob hauv ib lub ntiaj teb uas phem heev. Yog tsis muaj lub hwj chim ntawd, peb yeej yuav tsis muaj peev xwm “tiv taus hnub uas nws los” los sis “sawv tau thaum nws tshwm sim los” (Malakis 3:2). Peb tsis paub yog hnub twg, tiam sis Nws tus tub xa xov los kuj txais kev txib los kom “npaj tus Tswv txoj kev” los (Malakis 3:1). Tiam sis, tsis yog txhua yam hauv ntiaj teb yuav mus zoo mus txog hnub ntawd.
Peb xav tau lub hwj chim uas tus Tswv tau cog lus yuav muab rau cov neeg rau siab ntseeg kom pab peb:
-
Cia Vajtswv yeej hauv peb lub neej.
-
Hloov siab lees txim thiab muab siab npuab tus Tswv ntxiv.
-
Foom koob hmoov rau lwm tus, nplij lawv lub siab, coj lawv kev, thiab txhawb pab lawv.
-
“Txhawb peb lub zog kom nyiaj dhau peb tej kev sim siab, kev ntxias, thiab kev mob lub siab” (saib Mauxiyas 3:19).
-
Muaj kev kaj siab lug thiab kev xyiv fab los ntawm Khetos thaum peb ua raws li peb tej kev khi lus.
-
Npaj rau “hnub uas yuav kub hnyiab” thiab “cov neeg phem txoj kev puas tsuaj” (Lus Qhuab Qhia thiab Kev Khi Lus 109:46).
-
Ua tus Tswv txoj hauj lwm tiav ua ntej Nws txoj Kev Los Zaum Ob.
Daim duab txog lub hau ntawm lub Tuam Tsev Tucson Arizona los ntawm James Whitney Young
Cov Saib Xyuas Kev Cawm Seej
Leej Txiv Saum Ntuj Ceeb Tsheej txoj hauj lwm thiab lub yeeb koob yog kom “ua kom tib neeg tsis txawj tuag thiab kom tau txoj sia nyob mus ib txhis” (Mauxes 1:39). Txhua lub tuam tsev yeej zoo li ib tug uas saib xyuas Vajtswv txoj hau kev cawm seej, uas taw tes rau tus Cawm Seej lub luag hauj lwm hauv txoj hauj lwm thiab lub yeeb koob ntawd.
Thaum muaj Nws lub hwj chim, txhua tus txiv neej thiab poj niam uas ua raws li lawv khi lus—tsis hais cov uas tau yuav poj niam los yuav txiv los tsis yuav los yog—txhua tus uas rau siab ua raws li lawv tej kev khi lus ntawm lub tuam tsev yuav tau koob hmoov hauv lub neej no thiab hauv lub neej tom ntej.
Thawj Tswj Hwm Nelson tau cog lus tias: “Qhov kawg uas peb txhua tus xav tau yog kev txais vaj txiaj ntsim lub hwj chim nyob hauv tus Tswv lub tsev, nrog tsev neeg sib khi ua ke, ua raws nraim li tej kev khi lus uas ua hauv lub tuam tsev uas ua rau peb tsim nyog txais Vajtswv lub txiaj ntsim zoo kawg nkaus—uas yog txoj sia nyob mus ib txhis. Cov kab ke hauv lub tuam tsev thiab kev khi lus uas nej ua yeej yog qhov uas yuav txhawb nej lub neej, nej txoj kev sib yuav thiab tsev neeg lub zog, thiab pab nej tiv taus tus yeeb ncuab txoj kev tawm tsam. Nej txoj kev teev tiam Vajtswv nyob hauv lub tuam tsev thiab nej txoj kev pab nej cov poj koob yawm txwv yuav ua rau nej txais kev tshwm sim thiab nyob kaj siab lug thiab pab nej ua raws li nej tej kev khi lus.”
Vim kuv yog tus Tswv Yexus Khetos ib tug Thwj Tim, kuv ua tim khawv tias tej no muaj tseeb.
© 2025 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, October 2025. Hmong. 19611 295