Mga Kasugtanan, Gahum, kag mga Promisa

A Glorious Light—Kirtland Temple [Isa ka Mahimayaon nga Kasanag—Templo sang Kirtland], ni Glen S. Hopkinson, indi pwede kopyahon

Ngaa Kadamo Katama sang mga Templo?

“Ang nagliligad nga mga propeta nagpropesiya nga ang mga templo magapuno sang Norte kag Sur nga mga Amerika, mga isla sang Pasipiko, Europa, kag bisan diin,” siling ni Pangulong Eza Taft Benson (1899–1994) pila na ka dekada ang nagligad. “Kon ining buluhaton sang pagluwas himuon sa kadakuon gid sini, ginatos ka templo ang kinahanglanon.”

Siling ni Pangulong Russell M. Nelson nagapatindog kita sang mga templo sa indi matupungan nga kadasigon karon “tungod ginsugo kita sang Ginuo. Ang mga bugay sang templo nagabulig sa pagtipon sang Israel para sa mga buhi kag mga patay. Ining mga bugay nagabulig man sa paghanda sang katawhan nga magabulig sa paghanda sang kalibutan para sa Ikaduha nga Pagkari sang Ginuo!”

Sa pangamuyo niya sa pagdedikar sang Templo sang Kirtland, nangamuyo si Joseph Smith “nga ang tanan nga tawo nga magsulod sa balay sang Ginuo makabatyag sang imo gahum. …

“Kag nagapangabay kami sa imo, Balaan nga Amay, nga ang imo mga alagad maghalin sa sining balay, nga naarmasan sang imo gahum, kag ang imo ngalan mangin yara sa ila, kag ang imo himaya magapalibot sa ila, kag ang imo mga anghel magabantay sa ila” (Doktrina kag mga Kasugtanan 109:13, 22; emphasis gindugang; tan-awa man sa bersikulo 23).

Kon mabasahan ko ina nga mga bersikulo, madumduman ko ang palanan-awon ni Nefi parte sa ulihing mga adlaw. Tandai ang kaanggid nga mga tinaga: “Kag natabo ini nga ako, si Nefi, nakakita sang gahum sang Kordero sang Dios, nga nagpanaog ini sa mga santos sang simbahan sang Kordero, kag sa katawhan sang kasugtanan sang Ginuo, nga ginpanglapta sa bug-os nga ibabaw sang duta; kag naarmasan sila sang pagkamatarong kag kaupod ang gahum sang Dios sa dako nga himaya” (1 Nefi 14:14; emphasis gindugang).

Nagapati ako nga ang mga templo sa ulihing mga adlaw may importante nga papel sa pagtuman sang propesiya ni Nefi kag sentro sang proteksyon kag gahum nga ginpromisa sa mga matinuohon antes sa Ikaduhang Pagkari.

Pila ka tuig na ang nagligad, samtang nagaserbisyo ako bilang bishop sa isa ka university ward, may nanamian gid ako nga dalaga sa akon ward. Nanamian ako gihapon sa iya. Kilala ninyo sia nga si Presidente Emily Belle Freeman, Young Women General President. Sang nagligad lang nga mensahe sa pangkabilogan nga komperensya, nagtudlo sia nga paagi sa templo, ginaalsa kita ni Jesucristo sa mas mataas nga lebel sang espiritwalidad.

“Tagsa nga magtabok ako sa salamputan sang Iya balay, nagakaeksperiyensyahan ko ang mas madalom nga relasyon sa Iya,” siling ni Pangulong Freeman. “Ginapakabalaan ako sang Iya Espiritu, ginahatagan sang Iya gahum, kaggina-set apart sa pagtukod sang Iya ginharian.”

Masami naghambal si Pangulong Nelson parte sa gahum ni Jesucristo nga maangkon paagi sa mga kasugtanan sa templo. “Ang paghigot sang inyo kaugalingon sa Manluluwas nagakahulugan nga matigayon ninyo ang Iya kusog kag nagatubos nga gahum,” siling niya. Gintudlo man ni Pangulong Nelson:

“Kon ginatuman naton ang aton mga kasugtanan sa templo, mas dako ang aton tsansa nga maangkon ang nagapabaskog nga gahum sang Ginuo. Sa templo, nagabaton kita sang proteksyon gikan sa mga pagpamintas sang kalibutan.“

“Ang importante gid nga mga ordinansa [sang Manluluwas] nagabugkos sa aton sa Iya paagi sa sagrado nga mga kasugtanan sang priesthood. Dayon, samtang aton ginatipigan ang aton mga kasugtanan, ginabugayan Niya kita sang Iya nagapabakod nga gahum. Kag o, daw ano naton kakinahanglan ang Iya gahum sa mga adlaw nga maabot.”

“Ang moral kag espiritwal nga gahum nga kinahanglan sang aton katawhan sa karon nga panahon kag sa palaabuton nga inadlaw amo ang gahum sang Dios nga Amay kag sang Iya Anak, nga si Jesucristo. Maangkon naton ang Ila gahum paagi sa paghimo kag pagtuman sang mga kasugtanan upod sa Ila.”

Importante ang langitnon nga gahum, mga kauturan, tungod nagapangabuhi kita sa malain katama nga kalibutan. Kon wala inang gahum, indi kita “makaagwanta sa sadto nga adlaw kon mag-abot sia” ukon “mabuhi kon mag-abot sia” (Malaquias 3:2). Wala kita makahibalo kon san-o matabo ang adlaw nga ina, pero ang Iya mensahero napadala na para “ihanda ang alagyan” para sa Iya pag-abot (Malaquias 3:1). Samtang, ang kalibutan wala nagadalhay nga kalmado pakadto sa sina nga adlaw.

Kinahanglan naton sang gahum nga ginpromisa sa mga matinuohon para mabuligan kita:

• Tugoti ang Dios nga magpangibabaw sa aton mga kabuhi.

• Maghinulsol kag mas magpalapit sa Ginuo.

• Magbugay, magpaumpaw, magpanguna, kag mag-alagad.

• “Pakigbatu-i ang aton mga pagtilaw, mga tentasyon, kag mga kapaslawan sing mas maayo” (tan-awa sa Mosias 3:19).

• Magpangita sang kalinong kag kalipay kay Cristo samtang nagalakat kita sa dalan sang kasugtanan.

• Maghanda para sa “adlaw sang pagsunog” kag “kalamidad nga matabo sa mga malain” (Doktrina kag mga Kasugtanan 109:46).

• Tumana ang buluhaton sang Ginuo antes sang Iya Ikaduha nga Pagkari.

Litrato sang bubungan sang Templo sang Tucson Arizona ni James Whitney Young

Mga Bantay sang Kaluwasan

Ang buluhaton kag himaya sang Amay nga Langitnon amo ang “ipahanabo ang pagkawala’y kamatayon kag kabuhi nga wala’y katapusan sang tawo” (Moises 1:39). Ang tagsa ka templo nagatindog bilang dutan-on nga bantay sang plano sang kaluwasan sang Dios, nga nagatudlo sa sentro nga papel sang Manluluwas sa sina nga buluhaton kag himaya.

Naarmasan sang Iya gahum, ang tagsa ka lalaki kag babayi nga nagatuman sang kasugtanan—kasado ukon indi kasado—nga tampad nga nagatuman sang mga kasugtanan sa templo pagabugayan sa sining kabuhi kag sa palaabuton nga kabuhi.

Si Pangulong Nelson nagpromisa: “Ang katumanan nga ginatinguhaan sang tagsa sa aton amo ang masangkapan sang gahum sa puluy-an sang Ginuo, maselyuhan bilang mga pamilya, mangin matutom sa mga kasugtanan nga ginhimo sa templo nga magahimo sa aton nga kwalipikado sa pinakadako nga regalo sang Dios—ang kabuhi nga wala katapusan. Ang mga ordinansa sa templo kag ang mga kasugtanan nga ginahimo ninyo didto amo ang yabi sa pagpabakod sang inyo kabuhi, sang inyo pag-asawahay kag pamilya, kag sang inyo ikasarang nga pakigbatuan ang mga pag-atake sang kaaway. Ang inyo pagsimba sa templo kag ang inyo pag-alagad didto para sa inyo mga katigulangan magabugay sa inyo sang mas dako nga personal nga rebelasyon kag katawhay kag magapabakod sang inyo pangako nga magpabilin sa dalan sang kasugtanan.”

Bilang Apostoles sang Ginuong Jesucristo, nagapamatuod ako nga ining mga butang matuod.