Berita aika Tabu, Te Mwaaka ao Taian Berita

Te Oota ae Kakukurei—Kirtland Tembora, iroun Glen S. Hopkinson, e aki kariakaki kaweakina

Bukin Tera a Mwaiti Tembora?

"A tia ni taetae ni burabetiaki irouia ake a maiu ngkoa imwaaira bwa a na kaona aon te aba taian tembora i Meangin ao Maiakin Amerika, aba aika a uarereke n te Betebeke, Eurobe, ao taabo riki tabeua," e taku Beretitenti Ezra Taft Benson (1899-1994) irabwi ririki n nako. “Ngkana e na katiaaki te mwakuri ni kamaiu inanon taina, a na kainnanoaki bubua tembora.”

E taku Beretitenti Russell M. Nelson, ti katei tembora ni katawei n boong aikai "bukina bwa e a tia n tua nakoira te Uea bwa ti na karaoia Taian kakabwaia n te tembora e buoka ikoikotakin Iteraera n iteran te rabuna aika uoua. Kakabwaia aikai a buokiia naba aomata ake a na buoka katauraoan te aonaaba ibukin Kauaokin te Uea!"

N ana tataro ni katabuan te Kirtland Tembora, e tataro Iotebwa Timiti "bwa aomata ni kabane ake a na rin ni mataroan ana auti te Uea a konaa n namakina mwaakana. …

“Ao ti butiia, Tamara ae Tabu, bwa am taan mwakuri a aonga ni waaki man te auti aei n otangaaki n mwaakam, ao bwa aram e aonga ni mena i aoia ao mimitongim e katoomimia, ” (Reirei ao Berita aika Tabu 109:13, 22; kaairaki katuruturuana; taraa naba te kibu 23).

Ngkana I wareki kiibu akanne, I iangoa miin Nibwaai ni boong aika kaitira. Taraa taekana ae ai aron anne: “Ao e koro bukina bwa Ngai ae Nibwaai, I noorakorakoran mwaakan Ana Tiibu te Teei te Atua, ae ruo nako aoia aomata aika itiakiaika kaain ana ekaretia te Tiibu te Teei, ma i aoia ana aomata i nanon ana berita ae tabu te Uea, ake a maenako nako i aon te aonaba ni kabuta; ao a otangaia n te raoiroi ma mwaakan te Atua ao te mimitong ae korakora” (1 Nibwaai 14:14; kaairaki katuruturuana).

I kakoauaa bwa tembora ni boong aika kaitira iai kakaawakiia ni kakoroa nanon ana taetae ni burabeti Nibwaai ao a kakaawaki nakon te kamanomano ao te mwaaka are e beritanaki nakoia ake a kakaonimaki imwaain te Kauaoki.

Tabeua te ririki n nako, ngke I beku bwa te bitiobi n te uoote n te reirei ae rietata, E anaaki nanou iroun te ataeinaine temanna n au uoote. E teimatoa neiei n anaa nanou. Kam na kina bwa Beretitenti Emily Belle Freeman, te Beretitenti ni Kabuta n te Bootaki n Ataeinnaine. N ana marooro n te maungatabu ni kabuta ae nako, e reireia bwa rinanon te tembora, e tabekiira rake iai Iesu Kristo nakon te aro n tamnei ae rietaata riki.

"Ni katoaa te tai are I rin iai ni mataroan Ana auti, I rinanon reitakiu ma ngaia n te berita ae nano ma Ngaia," E taku Beretitenti Freeman. “I kaitiakaki n Tamneina entaau ma mwaakana, ao kamatoaaki ibukin te beku ni katean Abanueana."

E taetae n taainako Beretitenti Nelson ibukin mwaakan Iesu Kristo are e tauraoi rinanon berita aika a tabu n tembora. “Kabaeam ma te Tia Kamaiu e nanonaki bwa ko a karekea Bon korakorana ao mwaakana ni kamaiu,” e taku. E reirei naba Beretitenti Nelson:

"Ni kawakinan ara berita aika tabu n te tembora, ti karekea mwaakan te Uea ni korakora. I nanon te tembora, ti karekei kamanoara man taian karawawata n te aonaaba."

“Ana otenanti aika a kakaawaki te [Tia Kamaiu] a kabaeira nakoina rinanon berita aika tabu n te nakoanibonga. Ngkanne, ngkai ti kaawakin ara berita aika a tabu, E bwaintangiraira n Mwaakana n kamarurung ao n kakorakora. Ao o, ti kainnanoa mwaakana ni boong aika i mwaara."

"Te mwaaka n tamnei ao te riai ae a kainnanoia ara botanaomata ngkai ao ni boong aika i mwaaira bon mwaakan te Atua te Tama ao Natina, ae Iesu Kristo. Ti karekea mwaakaia man karaoan ao kawakinan berita aika tabu ma ngaiia."

E tabe nanon Tamara are i karawa irouia tarira ao mwaanea, bukina bwa ti maeka n te aonaba ae rangi ni buakaka. N akean te mwaaka anne, ti na bon aki kona n “kaaina te bong are e na roko iai” ke “n tei ngkana e kaoti” (Maraki 3:2). Ti aki ataia bwa n ningai te bong arei, ma a tia ni kanakoaki ana taan uarongorongo ni "katauraoa te kawai" imwain rokona (Maraki 3:1). Ma ngkai, e aki tiku n raoi te aonaaba n tataninga te bong anne.

Ti kainnanoa te mwaaka are e beritanaki nakoia ake a kakaonimaki bwa aana buokira:

• Ti kariaia te Atua bwa boton maiura.

• Raira nanom ao kaaniko nakon te Uea.

• Kakabwaia, te rau, kairiiri, ao te mwakuri ni ibuobuoki.

• "Tokanikai i aon kataakira, kaririiaki, ao tamaroa riki man maraki n naano" (taraa Motiaea 3:19).

• Kunea te rau ao te kimwareirei iroun Kristo ngkai ti nakonako ni kawain te berita.

• Katauraoi "nakon bongin te kabuokaki" ao man aia kanganga aomata aika a buakaka" (Reirei ao Berita aika Tabu 109:46).

• Katiaa ana mwakuri te Uea imwain Kauaokina.

Tamnein te Tucson Arizona Tembora ae raweaki iroun James Whiney Young

Taan Bairea te Kamaiuaki

A na mwakuri ao mimitonginTamara are i Karawa bwa e na "karekea te aki mamate ao te maiu ae akea tokina ibukin te aomata (Mote1:39). A tei tembora n tatabeua nako i aon te aba bwa a na kakoaua te Atua n te babaire ni kamaiu, are kaotaki n mwiokan te Tia Kamaiu ae kakaawaki nakon te mwakuri ao te mimitong anne.

N otangaaki ma mwaakana, ni kabane te mwaane ao te aine are e kawakina ana berita ae tabu-mareaki ke e aki-are e kaawakina ana berita aika tabu ma te kakaonimaki e na bon kakabwaiaaki n te maiu aei ao n te maiu ae na roko.

E a tia ni berita Beretitenti Nelson: "T toki ibukira n tatabemaniira bwa ti na keiaki n entaau ma te mwaaka i nanon ana auti te Uea, kabaeaki bwa utu, kakaonimaki nakon berita aika tabu ake a karaoaki i nanon te tembora are e na katauira ibukin ana bwaitituaraoi te Atua ae te kabanea n tamaroa—anne are bon te maiu are akea tokina. Otenanti n te tembora ao berita aika tabu ake ko karaoi ikekei bon kiingin kakorakorakin maium, am mare ao am utu, ao am konabwai ni kaitarai ana mwakuri te tia kakaitara. Am nebonebo n te tembora ao am mwakuri n ibuobuoki ikekei ibukiia am bakatibu e na kakabwaiako ma rikiraken am kaotioti ao te rau ao e na karikirakea am motinnano n teimatoa i aon te kawain te beritai."

Ngkai ana Abotoro te Uea Iesu Kristo, I kakoaua bwa a koaua bwaai aikai.