Veiyalayalati, Kaukauwa, kei na Yalayala

A Rarama Lagilagi—Valetabu e Katiladi, mai vei Glen S. Hopkinson, me na kua ni lavetaki

Na Cava sa Levu Kina na Valetabu?

"Era parofisaitaka o ira na sa liu vei keda ni valetabu ena robota na veivanua ena Vualiku kei na Ceva kei Amerika, na veiyanuyanu ena Pasivika, Iurope, kei na veivanua tale eso," a kaya o Peresitedi Eza Taft Benson (1899–1994) ena vica vata na yabaki sa oti. "Kevaka me na vakayacori na cakacaka ni veivueti oqo ena kena ivakarau e dodonu me vakakina, ena gadrevi e drau vaka drau na valetabu."

E kaya o Peresitedi Russell M. Nelson nida sa tara valetabu vakatotolo sara tiko nikua "baleta ni sa vakaroti keda na Turaga meda vakayacora vakakina. Na veivakalougatataki ni valetabu e veivuke me vakasoqoni ira vata na Isireli ena yasa ruarua ni ilati. Na veivakalougatataki oqo ena vukea talega na nodra vakarautaki na tamata era na veivuke ena kena vakarautaki na vuravura me baleta na iKarua ni Lako Mai ni Turaga!"

Ena nona masu ni veivakatabui ena Valetabu e Katiladi, a masu o Josefa Simici "nio ira kece na tamata era na curuma na ilago ni vale ni Turaga mera vakila na nomuni kaukauwa. …

"Keimami sa kerei kemuni, na Tamai keimami Yalosavasava, mera na lako yani na nomuni tamata mai na vale oqo ka vakaiyaragi tu ena nomuni kaukaua, ka me tu vata tu kei ira na yacamuni, ka vakavolivoliti ira na nomuni lagilagi, ka vakatawai ira na nomuni agilosi" (Vunau kei na Veiyalayalati 109:13, 22; vakamatatataki; raica talega na tikina e 23).

Niu wilika na veitikina oqori, au nanuma na raivotu nei Nifai me baleta na veisiga e muri oqo. Era via tautauvata na vosa: "Ka sa yaco niu sa raica, koi au ko Nifai, na kaukauwa ni Lami ni Kalou, ni sa sobuti ira na yalododonu ni lotu ni Lami, kei ira talega na nona tamata ni veiyalayalati na Turaga, ka ra sa veiseyaki tu e dela i vuravura; ka ra sa vakaiyaragi tu ena ivalavala dodonu kei na kaukaua ni Kalou ena lagilagi cecere" (1 Nifai 14:14; vakamatatataki).

Au vakabauta ni valetabu ni gauna oqo e tiko na nodra itavi bibi ena kena vakavotukanataki na parofisai nei Nifai ka sa iusutu ni veitaqomaki kei na kaukaua a yalataki kivei ira na yalodina ni bera na iKarua ni Lako Mai.

Ena vica na yabaki sa oti, niu a veiqaravi tu vaka bisopi ni dua na tabanalevu ni univesiti, au a vakauqeti mai vua edua na goneyalewa ena noqu tabanalevu. E se vakauqeti au tiko ga. Ona kilai koya me o Peresitedi Emily Belle Freeman, na Peresitedi Raraba ni Goneyalewa. Ena nona vosa ena dua na koniferedi raraba wale tiko ga qo, a vakavulica o koya ni ena valetabu, e laveti keda cake o Jisu Karisito ki na dua na itagede vakayalo e cecere cake.

"Ena veigauna yadua au kosova kina na ilago ni Nona vale, au sotava na isema titobu ni veiyalayalati vata kei Koya," a kaya o Peresitedi Freeman. "Au sa vakasavasavataki ena Nona Yalotabu, vaqaqacotaki ena Nona kaukaua, ka vakatikori meu tara cake na Nona matanitu."

Sa dau vosa vakawasoma o Peresitedi Nelson me baleta na kaukauwa i Jisu Karisito e vakarautaki tu ena veiyalayalati ni valetabu. "Na vauci vata kei na iVakabula e kena ibalebale nio sa rawa ni vakaivotavota ena Nona kaukaua kei na kaukaua veivueti," a kaya okoya. E vakatavulica talega o Peresitedi Nelson:

"Nida maroroya na noda veiyalayalati ni valetabu, eda na rawata vakalevu cake na kaukauwa veivaqaqacotaki ni Turaga. Ena valetabu, eda ciqoma kina na veitaqomaki mai na veivakacacani ni vuravura."

"Na cakacaka vakalotu bibi ni [iVakabula] e vauci keda Vua ena veiyalayalati tabu ni matabete. Ia, ni da maroroya na noda veiyalayalati, ena vakalougatataki keda ena Nona kaukaua ni veivakabulai, kei na veivaqaqacotaki. Isa, eda na gadreva vakaidina sara na Nona kaukaua ena veisiga sa tu e matada."

"Na kaukauwa savasava ka vakayalo era gadreva na noda tamata ena gauna sara ga oqo kei na veisiga sa tu mai liu sai koya na kaukaua ni Kalou na Tamada kei na Luvena, o Jisu Karisito. Eda rawata na Nodrau kaukauwa ena noda cakava ka maroroya na veiyalayalati vata kei Rau."

Na kaukauwa vakalomalagi e gadrevi, kemuni na taciqu kei na ganequ, baleta nida bula tiko ena dua na vuravura ca sara. Kevaka e sega na kaukaua oya, eda na sega ni "yalodei ena siga ni nona lako mai" se "tu rawa ni sa rairai mai ko koya" (Malakai 3:2). Eda sega ni kila na gauna cava ena yaco kina na siga oya, ia sa talai oti mai na Nona italai me "caramaka na sala" ni Nona lako mai (Malakai 3:1). Ia, e sega ni toso maravu tiko na vuravura ki na siga oya.

Eda gadreva na kaukauwa a yalataki kivei ira na yalodina me vukei keda:

• Me qaqa na Kalou ena noda bula.

• Veivutuni ka toro voleka vua na Turaga.

• Vakalougatataka, vakaceguya, tubera, ka veiqaravi.

• "Vorata na noda vakatovolei, na veitemaki, kei na mosi ni yalo vakavinaka cake"

• Kunea na vakacegu kei na reki vei Karisito nida lako ena salatu ni veiyalayalati.

• Vakavakarau "kina siga ni veivakarusai ena bukawaqa" kei "na veivakarusai ena yaco vei ira na tamata ivalavala ca" (Vunau kei na Veiyalayalati 109:46).

• Vakaotivi na cakacaka ni Turaga ni bera na iKarua ni Nona Lako Mai.

iTaba ni delavuvu ni valetabu e Tucson Arizona mai vei James Whitney Young

Sotia Yadra ni Veivakabulai

Na nona cakacaka kei na nona lagilagi na Tamada Vakalomalagi oya "mera tawamate rawa na tamata kecega ka rawata na bula tawamudu" (Mosese 1:39). Na veivaletabu yadua era sa sotia yadra e vuravura ni yavu ni veivakabulai ni Kalou, ka dusia tiko na itavi bibi ni iVakabula ena cakacaka kei na lagilagi o ya.

Nira vakaiyaragi tu ena Nona kaukaua, o ira na kece na tagane kei na yalewa era maroroya na veiyalayalati—vakawati se sega—ka ra maroroya ena yalodina na veiyalayalati ni valetabu era na vakalougatataki ena bula oqo kei na bula sa bera mai.

O Peresitedi Nelson e yalataka ni: "iCavacava eda sasaga tiko kina vakayadua, oya meda vaqaqacotaki ena kaukaua ena dua na vale ni Turaga, vauci vakamatavuvale, yalodina ki na veiyalayalati e vakayacori ena valetabu meda rawa ni rawata kina na isolisoli cecere duadua ni Kalou—na bula tawamudu. Na cakacaka vakalotu ni valetabu kei na veiyalayalati o cakava e kea e idola me vaqaqacotaki kina na nomu bula, nomu vakawati kei na matavuvale, ka vorata rawa kina na nona ravuravu na vunica. Na nomu sokalou ena valetabu kei na nomu veiqaravi e kea me baleti ira na nomu qase e liu ena vakalougatataki iko me vakalevutaki na ivakatakila yadua kei na vakacegu, ka na vaqaqacotaka na nomu yalayala mo tiko ga ena salatu ni veiyalayalati."

Me vaka edua na iApositolo ni Turaga o Jisu Karisito, au vakadinadinataka ni dina na veika oqo.