Ahyɛmudzi, Tum, na Anohoba horow

Elder Ronald A. Rasband ne Kasaa

Ɔkã Asomafo Duebien no hɔn Quorum ho

Tum na bambɔ a wɔdze ma anokwafo ansaana Ewuradze Jesus Christ ne Mbae a Otsĩa Ebien no nye temple n’adze tsitsir.

Joseph Smith a ogyina Kirtland Temple no enyim ho nsaano mfonyin

Esusow Aketseaba 1833 mu no, me nana kansowa a ɔtɔdo anan Ashel Perry na n’anyɛnkofo tuu kwan fi New York etsifi dze kɔr Kirtland, Ohio. Nna wɔnnyɛ Asɔr a wɔdze asan ananmu fofor no ne mba, naaso nna wɔpɛ dɛ wohyia Nkɔnhyɛnyi Joseph Smith. Wodur hɔ ntsɛmara ma wɔkɔr baguabɔ a odzi kan a wohyiae dze yɛɛ mpɛnsampɛnsamu wɔ Kirtland Temple ne nsii ho.

Wɔhyɛɛ baguabɔ no ase no, Nkɔnhyɛnyi no dze temple ne nsii ho asɛm no too gua. Nkyii ɔsee hɔn a nna wɔwɔ hɔ no dɛ wɔnkyerɛ hɔn nkãtse a nna wonya fa dwumadzi kɛse a ɔtse dɛm ho. Dodow noara kyerɛɛ dɛ Asɔr no nnyi sika koraa a wɔdze bedzi dwumadzi a ɔtse dɛm. Wosusuu dɛ wobesi dan kakrabaa, a no bo nnyɛ dzen.

Ber a nna mpɛnsampɛnsamu no rokɔ do no, Nanabanyin Perry nye n’anyɛnkofo tuu egyina, woyiyii hɔn sika, na wɔdze sɔɔw do. Ana nna wɔwɔ sika a oye dɛ wɔdze botua hɔn ahɛntsẽadze dze asan na woeyi ntoboa ama temple ne nsii a? Sima kakra ekyir no, me nanabanyin bɛɛn Joseph Smith, yii dɔla enum sika kɔkɔɔ, na ɔdze maa Nkɔnhyɛnyi no. (Sika a ɔtse dɛm ndɛ no bɔsom bo dɔla aha aha!)

Joseph gyinaa baguafo no enyim na ɔmaa sika no do kyerɛe. Nkyii, ɔrekasa ahoɔdzen mu no, ɔkãa dɛ "edwuma no ahyɛ ase na wobesi [Ewuradze ne] Fie no dɛ mbrɛ nhwɛdo a wɔdze mae no tse" a Ewuradze Jesus Christ dze mae no.

Annkyɛr na Perry ebusua no kɔdɔɔm Asɔr no wɔ Kirtland, mfe kakra ekyir no wonyaa hɔn temple nhyira horow wɔ Nauvoo Temple, na ekyir no wotwaa sar no dze kɔr Utah.

Mber sõe ma wotuu Kirtland Temple no hyɛɛ Nyame nsa wɔ afe 1836 mu no, nna osuar koraa dɛ Nda a Odzi Ekyir Ahotseweefo no a nna wɔpɛ dɛ wɔkɔ tu hyɛ Nyame nsa ase no nyinara no bɔkɔ mu. Mber a nna Asɔr no rinyin no, dɛmara na nna Ahotseweefo a nna ɔwɔ dɛ wɔyɛ nhyiamu horow wɔ abowano no hɔn dodow yɛɛ kɛse. President James E. Faust (1920–2007), a ɔsoom dɛ me stake president mber a nna meyɛ aberantsɛba no na dɛ mo nhwɛdonyi mber a wɔfrɛɛ me dɛ Wiadze Mfɛndzanan Tumdzifo wɔ afe 2007 mu no, kãa n’adzehu a ɔfa Asɔr no ne temple a otsĩa ebien ho dɛ:

"Ansaana wobowie Nauvoo Temple ne nsii wɔ afe 1846 mu no, nna Ahotseweefo no hyia abowano, ɔtaa dɛ bea a ɔbɛn temple no, dze tsie Joseph na Asɔr baanodzifo a wɔrekasa no. Nna ɔtɔfabi a mpempem na wɔkɔ nhyiamu horow no"—ɔtɔfabi mpo a wɔ ber a wimu nnyɛ mu.

"Dɛ mbrɛ [Elder] George A. Smith hunii wɔ n’afɛdzi mu no, "Nkɔnhyɛnyi Joseph ne nda mu no … [Asɔr no] yɛɛ prɔmprɔm papaapa wɔ abowano."

Hɛn enyi sɔ dɛ wɔ hɛn nda mu no, Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no reyɛ prɔmprɔm wɔ abowano, adan mu, na wɔ wiadze nyina mu. Temple dodow ne nsii kã prɔmprɔmyɛ no ho wɔ ɔhar kwan do a bi mbaa da mu "dɛ mbrɛ nhwɛdo a wɔdze mae no tse"—nhyira horow, etuhoakyɛ, gyedzi, na afɔrbɔ akã nhwɛdo no ho aber nyina.

Enyimnyam Kan—Kirtland Temple, Glen Hopkinson na ɔyɛɛ nsaano mfonyin no, ɔnnsɛ dɛ wokope

Na Temple Bebereebe Yi Ɛ?

"Hɛn akandzifo ahyɛ nkɔm dɛ temple besisi America Etsifi na America Anaafo, Pacific, Europe esupruwdo nsaase do nyinara, na beebiara," President Eza Taft Benson (1899–1994) kãa no mfe beberee abasen kɔ no. "Sɛ ɔpon edwuma yi otwar dɛ wɔyɛ no wɔ kwan dodow a ɔsɛ fata do a, nna temple ɔha ɔha na wobehia."

President Russell M. Nelson kãa dɛ yerisisi temple wɔ ɔhar kwan do a bi mbaa da ndɛ "osiandɛ Ewuradze akyerɛkyerɛ hɛn dɛ yɛnyɛ dɛm. Temple ne nhyira horow no boa ma yɛboaboa Israel ano wɔ ntwamutam n’afã ebien no. Nhyira horow yinom so boa ma yesiesie nkorɔfo a wɔbɔboa esiesie wiadze no ama Ewuradze ne Mbae a Otsĩa Ebien no!"

No tu hyɛ Nyame nsa mpaabɔ mu no, Joseph Smith bɔɔ mpaa "dɛ nkorɔfo nyinara a wɔbɛhɛn Ewuradze ne fi yi mu no aatse wo tum . …

"Na yɛserɛ wo, Egya Krɔnkrɔn, dɛ ma wo nkowaa mfi wo fi yi mu mpuei dɛ wo tum no ayɛ hɔn akontar, na ma wo dzin nda hɔn do, na w’enyimnyam ntwa hɔn ho nhyia, na w’abɔfoe wɔnhwɛ hɔn do" (Nkyerɛkyerɛ na Ahyɛmudzi 109:13, 22; woetsĩ mu akã ho; hwɛ nyiyimu 23 so).

Sɛ mekenkan nyiyimu no a, modwendwen Nephi ne nda a odzi ekyir enyido-adzehu no ho. Hyɛ nsɛm a ɔnye no dzi nsɛ no nsew: "Na ɔbaa dɛ emi, Nephi muhun Nyame Eguambaa no no tum, dɛ oesian aba Eguambaa no n’asɔrmba a wɔyɛ ahotseweefo no do, nye Ewuradze n’ahyɛmu mba no a wɔapetse wɔ asaase nyinara no do na wɔdze ndzeyɛtsenenee na enyimnyam tum kɛse ayɛ akontar" (1 Nephi 14:14; woetsĩ mu akã ho).

Megye dzi dɛ nda a odzi ekyir temple horow dzi dwuma a ohia tsitsir wɔ Nephi no nkɔnhyɛsɛm ne mãhyɛ mu na wɔyɛ bambɔ na tum hɔn kutuwdo-bo a wɔdze abɔ anokwafo anohoba ansaana Mbae a Otsĩa Ebien no.

Mfe pii abasen kɔ no, ber a nna mosom wɔ esũapɔn ward bi dɛ ne bishop no, m’enyi sɔɔ young woman bi a nna ɔwɔ mo ward. M’enyi da ho sɔ no. Hom nyim no dɛ President Emily Belle Freeman, Wiadze Mfɛdzanan Young Women President. Wiadze mfɛndzanan ehyiadzi a ɔnnkyɛree kasa mu no, ɔkyerɛkyerɛɛ dɛ ɔnam temple do no, Jesus Christ pegya hɛn kɔ sunsum mu bea ɔkrɔn yie.

President Freeman kãa dɛ: "Ber biara a mehɛn Ne fie no, menye No nya ahyɛmudzi nkitahodzi a ɔdɔ bun mu yie." "No Sunsum tsew mo ho, Ɔdze No tum hyira me, na Ɔdze me si hɔ dɛ menkyekyer N’ahenman."

Tum Anohoba

President Nelson ataa akasa afa Jesus Christ no tum a ɔwɔ hɔ a ɔnam temple ahyɛmudzi horow do. Ɔkãa dɛ "Yɛnye Agyenkwa no roto kɔndua kyerɛ dɛ yɛwɔ N’ ahoɔdzen na ɔpon tum ho kwan. President Nelson akyerɛkyerɛ so dɛ:

"Ber a yesie hɛn temple ahyɛmudzi horow no, yenya Ewuradze n’ahoɔdzen tum ho kwan yie kɛsenara. Temple mu no, yenya bambɔ fi wiadze n’ekutukubɔ ho."

"[Agyenkwa N’]ayɛdze horow a ohia tsitsir no ɔnam asɔfodzi ahyɛmudzi horow krɔnkrɔn no do kyekyer No fam hɛn ho. Nkyii, ber a yesie hɛn ahyɛmudzi horow no, Ɔdze N’ ayarsa, ahoɔdzen tum no hyira hɛn. Na o, mbrɛ yebesi behia No tum wɔ nda a ɔreba no mu a."

"Suban pa na sunsum mu tum a hɛn nkorɔfo hia no seseiara na ma nda a ɔreba no mu nye Nyankopɔn Egya na Ne Ba, Jesus Christ hɔn tum. Yenya kwan wɔ Hɔn tum ho ber a yɛnye Hɔn yɛ ahyɛmudzi horow na yesie."

Nuambanyin na nkyerɛbaa, Ɔsor tum hia, osiandɛ yɛtse emumuyɛ ankasa wiadze mu. Dɛm tum no nnkã ho a, yennkotum "egyina ne mbae da no enyim” anaa "na sɛ opue a, woana begyina" (Malachi 3:2). Yennyim da no, na N’abɔfoe no wɔasoma no dadaw dɛ "o[m]besiesie kwan" no mma Ne mbae (Malachi 3:1). Naaso, wiadze no ronnkɔ no bɔkɔɔ nnkɔ dɛm da no.

Yehia tum no a wɔdze bɔɔ anokwafo anohoba no ma wɔaboa hɛn:

Yɛmma Nyankopɔn ndzi nyim wɔ hɛn abrabɔ mu.
Yennu hɛnho na yɛntwe mbɛn Ewuradze yie.
Yenhyira, yɛnkyekye werɛ, yendzi kan, na yɛnsom.
"Yɛnsɔw hɛn nsɔhwɛ, ngyegye, na ayawdzi yie" (hwɛ Mosiah 3:19).
Yennya asomdwee na dɛwdzi wɔ Christ mu ber a yɛnantsew ahyɛmudzi anamɔkwan no do.
Yensiesie hɛnho mma "ɔhyew da no" na "emumuyɛfo hɔn mbusu no" (Nkyerɛkyerɛ na Ahyɛmudzi 109:46).
Yenwie Ewuradze n’edwuma ansaana Ne Mbae a Otsĩa Ebien no asõ.

Tucson Arizona temple no sor ho mfonyin a James Whitney Young twae

Nkwagye Aweɔmfo

Ɔsor Egya n’edwuma na n’enyimnyam nye "dɛ [ɔ]dze nyimpa ne bɛkyebo na onnyiewiei nkwa bɔbɔ adze" (Moses 1:39). Temple kor biara gyina dɛ Nyankopɔn no nkwagye ho nhyehyɛɛ asaase do ɔweɔmfo, a ɔkyerɛ dze kɔ Agyenkwa n’edwuma son wɔ dɛm edwuma na enyimnyam mu ho.

Yɛdze No tum ayɛ akontar no, ahyɛmudzi-sienyi ɔbarimba na ɔbaa biara—wɔawar anaa ɔnnwaree— a osie temple ahyɛmudzi horow nokwar mu no, wobehyira no wɔ abrabɔ yi mu na abrabɔ a ɔreba no mu.

President Nelson abɔ anohoba dɛ: "Botae a hɛn mu kor biara per nye dɛ wɔdze tum behyira hɛn wɔ Ewuradze ne fie, wɔasɔw hɛn ano dɛ ebusua ebusua, yɛayɛ ahyɛmudzi horow a yedzi no wɔ temple ho anokwafo a ɔbɛma yɛafata Nyankopɔn n’akyɛdze kɛsenara no—ɔyɛ onnyiewiei nkwa. Temple ayɛdze na ahyɛmudzi horow a eyɛ no wɔ hɔ no nye dza ohia tsitsir a ɔbɛhyɛ w’abrabɔ, w’awar na w’ebusua, na w’ahom dɛ edze betsĩa ɔsɛɛfo no ɔkõtsĩa no dzen. W’asɔryɛ wɔ temple na wo som wɔ hɔ ma wo ewuakɔr no dze ankorankor nyikyerɛ mpontu na asomdwee behyira wo na ɔahyɛ wo enyimpisi dzen ma etsim wɔ ahyɛmudzi anamɔnkwan no do."

Dɛ Ewuradze Jesus Christ no Ɔsomafo no, megye dase dɛ ndzɛmba yinom yɛ nokwar.

© 2025 by Intellectual Reserve, Inc. All rights reserved. Wotsintsimii wɔ USA Ngyiresi Borɔfo Kasa ngyetomu: 6/19 Nkyerɛasee ngyetomu: 6/19 Bosoom Bosoom Liahona Amandzeɛɛbɔ, Ɔbɛsɛ 2025ne Nkyerɛasee Fante. 19611 502