“Pwon mi pin, Manaman, me Pwon,” Liahona, Oct. 2025.
Porousen Liahona Iteiten maram, October 2025
Pwon mi pin, Manaman, me Pwon
Ewe tempel ina ionapen ewe pwonen manaman me eppet ngeni ekkewe mi tupwon me mwen ewe Oruwen Wareto an ewe Samon Jises Kraist.
Sassingin Joseph Smith seni Dan Burr
Non May 1833, aruwanun-tettenin-semei chinnap Ashahel Perry me ekkoch chienan ra sai seni ennefenin New York ngeni Kirtland, Ohio. Esap ir chon ewe minafon Mwichefen mi niwinsefanito, nge ra mochen churi ewe Soufos Joseph Smith. Ra keran chok wareto ar repwe fiti nepoputan ewe aewin mwichen apungupung ar repwe aporousa forutan ewe Kirtland Tempel.
Mwirin an poputani ewe mwichen apungupung, ewe Soufos a kapas usun ewe angangen forata ewe tempel. Mwirin a tingorei ekkewe ir mi nom ar repwe atou mefier usun ena watten kokkot. Napengenir ra ponuweni pwe we Mwichefen a kon woungaw an epwe awesi ena sokkun angang. Ra apasa eu kokkot ar repwe forata eu tempel epwe kukkun me esap kon watte niwinin.
Fansoun mwirinon ewe aporous, Grandpa Perry me chienan kewe ra achufengen, wau nour kewe moni, me anneafengenir. Mi naf ngenir ar repwe moni niwinin ar repwe niwin me aninis ngeni forutan ewe tempel? Fitu minich mwirin, semei chinnap a feinno ren Joseph Smith, wau efou gold nimu-chana, me ngeni ewe Soufos. (Ena sokkun foun moni ikenai ina epwe ukukun fite puku chana!)
Joseph a uta me mwen ewe mwichen apungupung me amwochata ewe foun moni. Mwirin, a kapas non pochokun, a apasa pwe “ewe angang a poputa me ewe Imwen [ewe Samon] epwe kauta anongonong won ewe kokkot a kawor” me ren ewe Samon Jises Kraist.
Mwitir chok we faminien Perry a choni ewe Mwichefen non Kirtland, ra angei ar efeiochun tempel ekkoch ier mwirin me non ewe Nauvoo Tempel, me mwirin ra feinno non ekkewe masies ngeni Utah.
Non ewe fansoun ewe Kirtland Tempel a epinipinino non 1836, a kon kukkun an epwe anonnomu meinisin ekkewe Aramas mi pin non Fansoun soponon ekkewe ra mochen fiti epinipinion we. Nupwen ewe Mwichefen a marino, a pwan chommongono chochon Souneng kewe mi fiti mwich nukun. Preseten James E. Faust (1920–2007), ewe a angang usun nei presetenin steik ne anuonui me emon chon ourour nupwen ua kokko ngeni ai upwe emon Meinap Unus non 2007, a affata met mi esinna usun an ewe Mwichefen we oruwen tempel:
“Me mwen ewe Nauvoo Tempel a wesino non 1846 ekkewe Souneng ra kan mwich nukun, fan chommong unukun ewe tempel, ar repwe ausening ngeni Joseph me ekkewe ekkoch nouwisen Mwichefen ra kapas. Fan ekkoch fite ngerou ra fiti ekkena mwich”—fan ekkoch pwan mwo non raningaw.
“Usun [Elter] George A. Smith a kuna non an napanapen atakirikir, ‘Non ekkewe ranin ewe Soufos Joseph… [ewe Mwichefen] a watteno me nukun.’”
Sia kinisoun non ach fansoun, Ewe Mwichefenin Jises Kraist ren Aramas mi Pin non Fansoun Soponon mi watteno me nukun, me non, me non unusen ewe fonufan. Ena watteno mi pachenong ewe forutan tempel mi mwitir seni seni akkom “anongonong ngeni ewe kokkot mi kawor”—eu kokkot mi chok soun pachenong efeioch, epinipin, nuku, me fangeno.
A Glorious Light—Kirtland Temple, seni Glen S. Hopkinson, ese tongeni epwe kapitiw
Pwata Chommong Tempel?
“Nouch souemwen akkom ra pwarata pwe epwe unusono tempel non fonufan seni North me South America, ekkewe fonuen neset non Pacific, Europe, me ekis meinisin,” Preseten Ezra Taft Benson (1899–1994) a apasa chommong ier a no. “Ika pwe ei angangen angasano epwe fis non ei napanap, mi namot epwe wor fite puku tempel.”
Preseten Russell M. Nelson a apasa pwe sia aueta tempel mi mwitir seni akkom ikenai “pokiten ewe Samon a ouroura kich pwe sipwe fori.” Ekkewe feiechun kewe tempel ra anisi kochufengenin Israel won ewe veil me ruepek. Ekkei feioch ra pwan anisi me amonata ew mwichen aramas ewe epwe anisi ne amonata ewe fonufan ngeni ewe Oruwen Wareto an ewe Samon!”
Non an iotekin epinipinin ewe Kirtland Tempel, Joseph Smith a iotek “pwe meinisin aramas repwe tonong non asamen imwen ewe Samon repwe mefi om manaman. …
Me aua tingoreok, Semem mi Pin, pwe noum chon angang repwe feinno seni ei imw repwe pochokununo ren om manaman, me itom epwe nom wor, me om ning epwe rokopwanireno, me noum chon nang repwe tumunur (Doctrine and Covenants 109:13, 22; auchean mi kapacheta ; nengeni pwan uwokisin 23).
Nupwen uwa annean i ekkena uwokisin, Ua ekieki usun an Nifai we nemasepwi usun ekkewe fansoun soponon. Ottona ekkewe kapas mi nonnofengen: “Iwe non ewe fansoun ngang, Nifai, ua kuna ewe manamanen ewe Namen Kot, pwe a feitiw won ekkewe sounengin ewe mwichefenin ewe Nam, me won ekkewe aramas pwon noun ewe Samon, ekkewe ra toropas fetan won ewe unusen ewe fonufan; iwe ra fotata wenechar me ren ewe manamanen Kot non ning mi napanap” (1 Nifai 14:14; auchean mi kapacheta).
Ngang mi nuku pwe tempel non fansoun soponon a wor auchear non apwonuetan an Nifai we osini mi ir ionapen ewe pwonen tumun me manaman ngeni ekkewe mi tupwon me mwen ewe Oruwan Wareto.
Ekkoch ier a no, nupwen ngang emon pisopun eu wart non college, ua fokkun ingeno ren emon fopun non ai we wart. Ngang mi chok ingeno iren iei. Ami mi sisinei i usun Preseten Emily Belle Freeman, Presetenin Ekkewe Fopun Unus. Non eu mwichenap mi chok arapeto, a aiti kich pwe seni ewe tempel, Jises Kraist a chunakicheta ngeni eu kinikinin pekin ngun mi tekia.
“Iteiten fansoun ua tonong non asamen Imwan we, ua mefi eu anonnonen pwonen nefin ngeni I,” Preseten Freeman a apasa. “Ngang ua nimenimochuno ren Ngunun, feiochuno ren An manaman, me efeioch ngeni wis ai upwe aueta Muun we.”
Manaman mi Pwon
Preseten Nelson a kapas fan chommong usun ewe manamanen Jises Kraist mi kawor seni pwon mi pin non tempel. “Ami angang fengen me ewe Chon Amanau wewen oupwe mecheres ngeni An pochokun me manamanen ngaseno,” a apasa. Preseten Nelson a pwan aiti kich:
“Ach sia apwonueta ach kewe pwon mi pin non tempel, sia aochueno ach tour ngeni an ewe Samon pochokun. Non ewe tempel, sia angei eppetich seni ekkewe osukosuken fonufan.”
“[An ewe Chon Amanau] kewe auchean angangepin ra ri fengeni kich ngeni I me ren pwonen pristut mi pin. Mwirin, nupwen sia aponueta ach kewe pwon mi pin, I a efeiochu kich ren An echikar, apochokunen manaman. Me ifa, me ifan namoten ngeni kich An manaman non kewe ran mwach.”
“Ewe echipwer me manamanen pekin ngun minne mi namot ngeni nouch aramas iei me ekkewe fansoun mwach ina ewe manamanen Kot ewe Sam me Noun we, Jises Kraist. Sia angei mumuta ngeni An manaman ren ach fori me apwonueta pwon mi pin ngeni Ir.”
Manamanen nang mi namot, pwi me fefinei, pokiten sia nom non eu fonufan mi fokkun ngaw. Me nukun ena manaman, sisap tufichin “engino ngeni ena ranin an wareto; ika “uta nupwen a pwato” (Malachi 3:2). Sise sinei inet ena ran, nge Noun chon kuno a fen titito an epwe “amonnata ewe aan” ngeni An wareto (Malachi 3:1). Ren iei, ewe fonufan ese fetanoch ngeni ena ran.
Mi namot ngeni kich ewe manaman mi pwon ngeni ekkewe mi tupwon an epwe anisi kich:
-
Mut ngeni Kot epwe nemenem non manauach.
-
Aier me arap ngeni ewe Samon.
-
Efeioch, ourur, emwen, me iawmir.
-
“Ungeni ochu ach weires, sossot, me metekin netip” (nengeni Mosaia 3:19).
-
Kutta kinamwe me pwapwa non Kraist nupwen sia fetan won ewe aanen pwon mi pin.
-
Monneta ngeni ewe ranin kareno me ewe osukosuken ekkewe mi ngaw(Doctrine and Covenants 109:46).
-
Awesi an ewe Samon angang me mwen An Oruwen Wareto.
Sasingin asechikin ewe Tucson Arizona Tempel seni James Whitney Young
Sentinels of Salvation
An Samach won Nang angang me ning an “epwe wato manau me manau ese much ngeni aramas” (Moses 1:39). Eu me eu tempel a fis pwe eu eppetin an Kot kokkoten manau ese much, a wenengeni wisen ewe Chon Amanau non ena angang mi ning.
Foutuno ren An manaman, emon me emon mwan me fefin mi apwonueta pwon mi pin—mi pupunu ika ese pupunu—ewe mi tupwon ne apwonueta pwon mi pin non tempel epwe feioch non ei manau me non ewe manau mwirin.
Preseten Nelson a pwonei: “Ewe nesopun ren minne emon me emon kich sia achocho ngeni ina ach sipwe feioch ren manaman non ew imwen ewe Samon, riri fengen ren famini, nukuchar ngeni pwon mi pin a for non ew tempel minne a atufichi kich ngeni ewe niffang mi nap an Kot—ewe niffangen manau esemuch. Ekkewe angangepinin ewe tempel me ekkewe pwon mi pin oua fori ikewe ir ekkewe kii ne apochokuna manauemi, ami pupunu me famini, me ami tufichin ungeni ekkewe feiengawen ewe chon ungenikich. Ami fen me non ewe tempel me ami angang ikewe fan iten ami kewe neuo epwe efeiochu kemi ren napenon ami pwisin pwarata me kinamwe me epwe apochokuna ami nikitu ne nom won ewe aanen pwon.”
Usun emon Aposel noun ewe Samon Jises Kraist, uwa pwarata pwe ekkei mettoch ir mi ennet.
© 2025 seni Intellectual Reserve, Inc. Meinisin pung mi kawor. Mi katou non USA. Kapunguno non fosun Merika: 6/19. Kapungunon chiakun: 6/19. Chiakun Porous ren Liaona Iteiten Maram, October, 2025. Chuukese. 19611 901