Ol Kavenan, Paoa, mo ol Promes

I Kam long Elda Ronald A. Rasband

Blong Kworom blong Olgeta Twelef Aposol

Tempol i stamba samting long paoa mo proteksen we oli promesem long olgeta we oli fetful bifo Seken Kaming blong Lod Jisas Kraes.

Pikja blong Joseph Smith we i stanap long fored blong Ketlan Tempol

Long Mei 1833, nambafo apu man blong mi, Asahel Perry wetem sam fren oli travel long not blong Niu Yok i go long Ohaeo. Oli no bin ol memba blong niufala Jos ia we i kambak, be oli wantem blong mitim profet Joseph Smith. Oli kam stret long taem blong atendem fas kaonsel we i blong toktok raon long saed blong bildim Ketlan Tempol.

Afta we kaonsel i stat, profet i presentem bisnis ia blong bildim tempol. Mo afta hem i askem olgeta we i stap blong talem tingting blong olgeta long bigfala projek ia. Plante oli ansa se Jos i pua tumas blong mekem wan bigfala projek olsem. Oli askem blong mekem wan bilding we i moa smol mo i no nidim tumas mane.

Long taem blong miting ia, Apu Perry wetem ol fren blong hem oli hip tugeta, karemaot ol mane blong olgeta mo putum i go tugeta. ?Oli gat inaf mane blong pem rod blong olgeta i gobak mo mekem kontribusen blong bildimap tempol? Sam minit afta, apu man blong mi i go luk Josef Smith, i tekemaot wan faef dola gol koen, mo i givim long profet. (!Tedei wan kaen koen olsem i gat bigfala valiu blong plante handred dola!)

Joseph i stanap long fored blong Kaonsel mo i holem koen ia i go antap. Afta, wetem plante eneji, hem i talem se “wok i stat mo bae oli bildimap Haos [blong Lod] folem wei we i” kam long Lod Jisas Kraes.

Sam taem afta, famli Perry i joenem Jos long Ketlan, oli kasem ol tempol blesing blong olgeta sam yia afta, long Nauvu Tempol, mo afta oli travel i go long Yuta.

Taem oli dediketem Ketlan Tempol long 1836, ples i smol tumas blong holemtaet evri Lata-dei Sent we oli wantem atendem dedikesen blong tempol. Taem Jos i stap kam antap, namba blong ol Sent we oli atendem ol miting aotsaed tu i kam antap. Presiden James E. Faust (1920–2007), we i bin stap olsem stek presiden blong mi taem mi wan yang man mo i bin stap olsem wan tija taem oli singaotem mi blong kam wan Jeneral Atoriti long 2007, hem i talem hemia abaot seken tempol blong Jos:

“Bifo oli flatem Nauvu Tempol long 1846, ol Sent oli stap mit aotsaed, plante taem kolosap long tempol, blong harem Joseph mo ol nara Jos lida oli toktok. Samtaem taosen pipol oli atendem ol miting ia”—samtaem iven long ol rabis weta.

“Olsem [Elda] George A. Smith i talem long fani wei blong hem, ‘Long taem blong Profet Joseph … [Jos] i kam gud antap aotsaed long doa.’”

Yumi glad se long dei blong yumi, Jos Ia blong Jisas Kraes blong Ol Lata-dei Sent i kam gud antap aotsaed long doa, insaed mo raon long wol. Jos i kam gud antap i minim tu se oli bildim ol tempol hariap moa “folem wei blong Lod”—wan wei we i tekem tu ol blesing, konsekresen, fet mo sakrifaes.

Wan Laet blong Glori—Ketlan Tempol, i kam long Glen S. Hopkinson, maet bae oli no save kopi

?From Wanem i Gat Tumas Tempol?

“Olgeta we oli bin wok bifo oli bin profesae se ol tempol bae oli fulumap graon blong Not mo Saot Amerika, ol aelan blong Pasifik, Yurop mo sam moa ples,” Presiden Eza Taft Benson (1899–1994) i talem plante yia i pas. Sapos wok ia blong pemaot man, oli mas skelem, bae i nidim plante handred tempol”.

Presiden Russell M. Nelson i talem se yumi stap bildim ol tempol hariap moa tedei “from Lod i askem yumi blong mekem olsem. Ol blesing blong tempol i help blong karem Isrel i kam wanples long tugeta saed blong vel. Ol blesing ia i help tu blong rere wan pipol we bae i help blong mekem wol ia i rere from Seken Kaming blong Lod!”

Long dedikesen prea blong hem long Ketlan Tempol, Joseph Smith i prea “se evri pipol we oli kam insaed long ol doa blong haos blong Lod bae oli filim paoa blong yu. …

Mo mifala i askem yu, Tabu Papa, blong ol wokman blong yu oli save aot long haos ia we oli fulap wetem paoa blong yu, mo blong nem blong yu i stap long olgeta, mo glori blong yu i stap raonem gud olgeta, mo blong ol enjel blong yu oli lukaotem gud olgeta” (Doktrin mo Kavenan 109:13, 22; oli ademap long italik; luk tu long ves 23).

Taem mi ridim ol ves ia, mi tingbaot drim blong Nifae abaot ol lata dei. Notem daon ol semmak toktok: “Mo i bin hapen se mi, Nifae, mi bin luk paoa blong Smol Sipsip blong God, we i bin kamdaon long ol sent blong Jos blong Smol Sipsip, mo long ol kavenan pipol blong Lod, we i bin seraot olbaot long ful fes blong wol; mo oli blokem olgeta wetem stret fasin mo paoa blong God long bigfala glori” (1 Nifae 14:14; oli ademap long italik)

Mi biliv se ol lata-dei tempol oli mekem wan impoten wok blong mekem profesi blong Nifae i kam tru mo oli ol stamba samting long proteksen mo paoa we oli promesem long olgeta we oli fetful bifo Seken Kaming.

Sam yia i pas, taem mi stap givim seves olsem bisop blong wan yunivesiti wod, mi hapi from wan yang woman long wod blong mi. Tedei mi gohed blong stap hapi from hem. Yufala i save hem olsem Presiden Emily Belle Freeman, Yang Woman Jeneral Presiden. Long toktok blong wan jeneral konfrens we i jes pas, hem i tijim se tru long tempol, Jisas Kraes i leftemap yumi i go long wan ples we i moa hae long saed blong spirit.

“Evri taem mi go long haos blong Hem, mi eksperiensem wan kavenan rilesensip wetem Hem we i moa dip,” Presiden Freeman i talem. “Mi kam klin wetem Spirit blong Hem, mi endao wetem paoa blong Hem, mo set apat blong bildim kingdom blong Hem.”

Paoa we Oli Promesem

Presiden Nelson i stap toktok plante taem abaot paoa ia blong Jisas Kraes we yumi save kasem tru long ol tempol kavenan. “Blong putum yok blong yu long Sevya i minim se yu gat raet long paoa blong Hem mo paoa we i pem praes,” hem i talem. Presiden Nelson i bin tijim tu se:

“Taem yumi kipim ol tempol kavenan blong yumi, yumi kasem moa paoa ia blong Lod blong mekem yumi kam strong moa. Insaed long tempol, yumi kasem proteksen aot long ol harem nogud blong wol.”

Ol impoten odinens blong [Sevya] oli fasem yumi wetem Hem tru long ol tabu prishud kavenan. Afta, taem yumi kipim ol kavenan blong yumi, Hem i kavremap yumi wetem paoa blong Hem we i save hilim mo givim moa strong paoa long yumi. Mo, o yes, bae yumi nidim paoa blong Hem long ol dei we oli stap kam.”

“Standet mo paoa long saed blong spirit we ol pipol blong yumi i nidim naoia mo blong ol dei we i stap kam hem i paoa blong God Papa mo Pikinini blong Hem, Jisas Kraes. Yumi kasem paoa blong Tufala taem yumi mekem mo kipim ol kavenan wetem Tufala.”

Paoa blong Heven i impoten, ol brata mo sista, from se yumi laef long wan wol we i nogud tumas. Sapos i no gat paoa ia, bae yumi no “naf blong stanap long dei ia” o “stanap long fes blong hem” (Malakae 3:2). Yumi no save se dei ia bae i kam wetaem, be mesenja blong Hem i bin kam finis blong “mekem rere rod” from kaming blong Hem (Malakae 3:1). Be wol i stap wet long dei ia long wan fasin we i no stret.

Yumi nidim paoa ia we oli promesem long olgeta we oli fetful blong i helpem yumi:

Letem God i win long laef blong yumi.
Sakem sin mo kam kolosap long Lod.
Blesem, kamfotem, lidim, mo givhan.
“Winim gud ol hadtaem, temtesen mo ol harem nogud” (luk long Mosaea 3:19).
Faenem pis mo glad long Kraes taem yumi wokbaot long kavenan rod ia.
Stap rere from “dei ia blong faea” mo “ol bigfala trabol blong ol man nogud” (Doktrin mo Kavenan 109:46).
Flatem wok blong Lod bifo Seken kaming blong Hem.

Foto blong Tuson Arisona Tempol i kam long James Whitney Young

Ol Wajman blong Fasin blong Sevem Man

Wok mo glori blong Papa long Heven i blong “mekem man i nomo save ded mo i kasem laef we i no save finis” (Moses 1:39 Wanwan tempol i olsem wan wajman blong plan blong God blong sevem man long wol ia, mo i lidim yumi i go long stamba rol blong Sevya long wok mo glori ia.

Wetem paoa blong Hem, evri man mo woman we i kipim ol kavenan—i mared o i no mared—mo i fetful blong kipim ol tempol kavenan, bae oli kasem blesing long laef ia mo long laef afta long wol ia.

Presiden Nelson i promesem “En ia, we wanwan long yumi i stap traehad from, i blong oli kavremap yumi wetem paoa insaed long wan haos blong Lod, blong yumi sil olsem ol famli, blong yumi stap fetful long ol kavenan we yumi mekem insaed long tempol; ol kavenan ia oli mekem yumi kwalifae from presen ia we i moa bigwan we i kam long God—we i laef we i no save finis. Ol odinens blong tempol mo ol kavenan we yufala i mekem insaed ia, oli ki blong mekem laef, mared, mo famli i gat moa paoa, mo oli ki blong mekem se yu gat paoa blong stanap fesem mo no foldaon long ol agens blong enemi. Wosip blong yufala insaed long tempol mo seves blong yufala long ples ia blong ol bubu blong yufala, bambae oli blesem yufala long wei ia we bae yufala i kasem moa revelesen blong yufalawan, bae yufala i kasem moa pis, mo bae i mekem yufala i moa strong blong wok blong stap long rod ia blong kavenan.”

Olsem wan Aposol blong Lod Jisas Kraes, mi testifae se ol samting ia i tru.

© 2025 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem long translesen: 6/19. Translesen blong Liahona Mesej blong Evri Manis, Oktoba 2025. Bislama. 19611 852