Nhyira a ɛfiri Asɔfodie Tumidie ne Tumi mu

Yesu Kristo ne Asɔre no ti. Asɔre no yɛ adwinnadeɛ a Wayɛ sɛ Ɔde bɛwie adasamma gyeɛ adwuma a ɛho hia wɔ asɛmpa berɛ a ɛtwa toɔ yi mu sɛdeɛ na ɛteɛ wɔ berɛ a ɔtenaa asase so no. Ɛnam Asɔre no so:

• Ɔbɛtumi aka N’asɛmpa no wɔ wiase nyinaa.

• Ɔbɛtumi de asubɔ ne apam afoforɔ nyinaa ama—mpo apam kwan a ɛkɔ Ne sɛlɛtia ahemman mu.

• Ɔbɛtumi aka mmusua abom afebɔɔ.

• Ɔbɛtumi de nkwagyeɛ akyɛdeɛ ama, mpo wɔn a wɔawuwuo a wɔannya.

• Ɔbɛtumi ama Onyankopɔn mma honam fam ahiadeɛ seesei ara.

Sɛdeɛ saa atirimpɔ akɛseɛ yi bɛba mu no, na yɛasiesie yɛn ho ama Agyenkwa no mmaeɛ bio, Asɔre no hia Onyankopɔn akwankyerɛ, tumidie, ne tumi a ɛkɔ so. Asɔre no yɛ “nokorɛ asɔre a ɛte ase” (Nkyerɛkyerɛ ne Apam 1:30) ɛfiri sɛ Kristo nam N’akwankyerɛ ne tumi a ɛwɔ N’asɔfodie mu, “Asɔfodie Kronkron, wɔ Onyankopɔn Ba no Kwan so” de si hɔ (Nkyerɛkyerɛ ne Apam 107:3).

Sɛ nyɛ asɔfodie kronkron yi a, anka Asɔre no bɛyɛ wiase kuo bi, a ɛreyɛ papa wɔ wiase nanso ɛnni tumi biara sɛ ɛbɛnya atirimpɔ titire a ɛne sɛ ɛbɛsiesie Onyankopɔn mma mmarima ne mma mmaa ama daa nkwa anigyeɛ wɔ N’anim. Saa asɔfodie yi, ne nsafoa a wɔde bɛkyerɛ asɔfodie yi adwuma kwan no nti, tumidie ne nhyehyɛeɛ wɔ Asɔre no mu.

“Wɔ Asɔre no mu no, wɔde asɔfodie tumi nyinaa di dwuma wɔ wɔn a wɔkura asɔfodie nsafoa no akwankyerɛ ase.

“Asɔremma mmarima a wɔfata gye asɔfodie tumidie no berɛ a wɔde nsa gu wɔn so na wɔhyɛ wɔn asɔfoɔ kɔ asɔfodie diberɛ ahodoɔ mu. Asɔremma nyinaa bɛtumi de tumidie a wɔde ama adi dwuma berɛ a wɔyi wɔn si hɔ anaa wɔka sɛ wɔmmoa ma wɔnyɛ Onyankopɔn adwuma.”

Ɛnam asɔfodie nsafoa so, nneɛma a ɛhia Awurade bɛdi nkonim berɛ biara. Obiara ntumi nkura ankoroankoro nhyehyɛeɛ a ɛne N’akwankyerɛ nhyia mu. Obiara ntumi nni nkonim wɔ asɔfotorosɛm mu, a ɔrehwehwɛ n’ankasa mfasoɔ ne n’ankasa akyidifoɔ.

Asɔfodie di dwuma titire nso wɔ asɔremma afie mu. Titenani Dallin H. Oaks, Fotufoɔ a ɔdi Kan wɔ Titenafoɔ a wɔdi Kan no mu, kyerɛkyerɛɛ sɛ, “Nnyinasosɛm a ɛne sɛ wɔbɛtumi de asɔfodie tumi adi dwuma wɔ deɛ ɔkura saa dwumadie no nsafoa no akwankyerɛ ase nko ara no yɛ ade titire wɔ Asɔre no mu, nanso yei nyɛ adwuma wɔ abusua mu.” Agyanom di anim na wɔde asɔfodie di dwuma wɔ wɔn abusua mu—tu fo, yɛ abusua nhyiamu ahodoɔ, de asɔfodie anaa ayaresa nhyira ma abusuafoɔ anaa afoforɔ, ne deɛ ɛkeka ho—a obi a ɔkura asɔfodie nsafoa akwankyerɛ anaa tumidie nka ho.

“Nkyerɛkyerɛ korɔ no ara di dwuma berɛ a agya nni hɔ na ɛna no yɛ abusua kannifoɔ. Ɔhwɛ ne fie so, na ɔdi akotene wɔ asɔfodie tumi ne nhyira a ɔnam n’akyɛdeɛ kronkron ne nsɔano wɔ tɛmpol mu so de bɛba n’abusua mu.”

Asɔfodie: Tumi a Wɔde Hyira

Wɔ asɛmfua mu no, asɔfodie tumidie ne tumi a Yesu Kristo de baa bio no botaeɛ ne sɛ ɛbɛhyira. Ɛma Asɔremma de Onyankopɔn tumi som na wɔhyira afoforɔ wɔ Asɔre no mu, wɔ fie, ne wiase nyinaa. Asɔremma ka Agyenkwa no ho yɛ N’adwuma a ɛyɛ nkwagyeɛ ne mpagya, de ɔsoro akyɛdeɛ ne tumi a ɛboro wɔn ankasa deɛ so koraa boa ma Onyankopɔn ahemman nyini na ɛhyɛ asase so ma (hwɛ Nkyerɛkyerɛ ne Apam 65:2, 5–6).

Awurade akyerɛkyerɛ mu sɛ “saa [Melchizedek] asɔfodie kɛseɛ yi di asɛmpa no ho dwuma na ɛkura ahemman no ahintasɛm safoa, mpo Onyankopɔn ho nimdeɛ safoa.

“Enti, wɔ ayɛyɛdeɛ ahodoɔ mu no, Onyankopɔn tumi da adi.

“Na sɛ ayɛyɛdeɛ ahodoɔ no, ne asɔfodie tumidie no nni hɔ a, Onyankopɔn tumi no nna adi mma nnipa wɔ honam mu .” (Nkyerɛkyerɛ ne Apam 84:19–21).

Nokorɛ mu no, ayɛyɛdeɛ yɛ asɔfoɔdie dwumadie anaa amanneɛ a yɛnam so ne Onyankopɔn yɛ apam, a ɛhyɛ aseɛ firi asubɔ so na ɛtoa so wɔ apam a yɛnya wɔ Awurade fie no mu. Ɛyɛ apam ahodoɔ yi a yɛbɛkora no mu na wɔsakyera yɛn firi “honam mu” mmarima ne mmaa ho yɛ yɛn ahotefoɔ (hwɛ Mosiah 3:19) ɛnam Kristo mpata adom so na yɛbɛfata na yɛn ho ate—a yɛnni fɔdie ne nkekaeɛ biara—wɔ Onyankopɔn anim (hwɛ Nkyerɛkyerɛ ne Apam 20:29–31; 3 Nephi 27:16–20).

Srɛka yei a ɛfiri “Yesu Kristo Asɛmpa no Mahyɛ Mmaeɛ bio: Mfeɛ Ahaanu Paemuka ma Wiase,” a ɛfiri Titenafoɔ a wɔdi Kan ne Asomafo Dummienu Agyinatukuo no hɔ no da muabɔ a ɛfata adi:

“Yɛpaemu ka sɛ Yesu Kristo Asɔre A ƐwɔHɔ Ma Nna A Ɛdi Akyire Mu Ahoteefoɔ No, a wɔkyekyeree no wɔ Oforisuo 6, 1830, mu no yɛ Kristo Apam Foforɔ Asɔre no a san aba bio no. Asɔre yi gyina n’abrabɔ pɛyɛ ne tweaseboɔ hene, Yesu Kristo, ne Ne Mpata a enniawieɛ ne Ne Owusɔreɛ no so. Yesu Kristo asan afrɛ Asomafoɔ bio a wama wɔn asɔfodie tumi. Ɔto nsa frɛ yɛn nyinaa sɛ yɛmmra Ɔne N’asɔre nkyɛn na yɛmmɛ gye Honhom Kronkron no, nkwagyeɛ ayɛyɛdeɛ no, na yɛadi dɛ a ɛnsa da.”