యాజకత్వపు అధికారం మరియు శక్తి ద్వారా ఆశీర్వదించబడ్డారు

యేసు క్రీస్తు సంఘమునకు శిరస్సై యున్నారు. ఆయన భూమిపై జీవించిన యుగములో వలె, ఈ చివరి సువార్త యుగములో మానవాళిని విమోచించే ముఖ్యమైన పనిని నెరవేర్చడానికి ఆయన సృష్టించిన సాధనమే సంఘం. సంఘము ద్వారా:

• ఆయన తన సువార్తను ప్రపంచవ్యాప్తంగా ప్రకటించగలరు.

• ఆయన బాప్తిస్మమును మరియు అన్ని ఇతర నిబంధనలను అందించగలరు—ఆయన సిలెస్టియల్ రాజ్యమునకు ఒక నిబంధన మార్గాన్ని కూడా అందించగలరు.

• ఆయన కుటుంబాలను నిత్యత్వము వరకు ఏకం చేయగలరు.

• ఆయన రక్షణ వరాలను అందించగలరు, అవి లేకుండా మరణించిన వారికి కూడా.

• ఆయన వర్తమానంలో దేవుని పిల్లల శారీరక అవసరాలకు పరిచర్య చేయుగలరు.

ఈ గొప్ప ఉద్దేశాలను నెరవేర్చడానికి మరియు రక్షకుని రాక కోసం సిద్ధ పడడానికి, సంఘానికి దేవుని యొక్క నిరంతర దిశానిర్దేశం, అధికారం మరియు శక్తి అవసరం. సంఘము “జీవము గల సత్య సంఘము” (సిద్ధాంతము మరియు నిబంధనలు 1:30) ఎందుకంటే, క్రీస్తు తన యాజకత్వం ద్వారా, అంటే, “దేవుని కుమారుని క్రమముననుసరించిన పరిశుద్ధ యాజకత్వము” (సిద్ధాంతము మరియు నిబంధనలు 107:3) ద్వారా, తన నాయకత్వాన్ని మరియు శక్తిని సంఘానికి ప్రసాదిస్తారు.

కానీ ఈ పవిత్ర యాజకత్వం లేకపోతే, సంఘం వాస్తవంగా ఒక లౌకిక సంస్థగా ఉండేది, ప్రపంచంలో మంచి పనులు చేస్తుంది కానీ, దేవుని కుమారులు మరియు కుమార్తెలను ఆయన సన్నిధిలో నిత్యజీవ ఆనందం కోసం సిద్ధం చేసే అంతిమ ప్రయోజనాన్ని సాధించడానికి శక్తి లేకుండా ఉండేది. ఈ యాజకత్వంతో, మరియు ఈ యాజకత్వ పనిని నిర్దేశించే తాళపుచెవులతో, సంఘములో అధికారం మరియు క్రమం రెండూ ఉన్నాయి.

“సంఘములో, యాజకత్వ అధికారము మొత్తము యాజకత్వ తాళపుచెవులను కలిగియున్న వారి మార్గదర్శకత్వం క్రింద వినియోగించబడుతుంది.

“యాజకత్వం అనుగ్రహించబడుట మరియు యాజకత్వ స్థానాలకు నియమించబడుట ద్వారా సంఘము యొక్క యోగ్యులైన పురుష సభ్యులు యాజకత్వ అధికారాన్ని పొందుతారు. దేవుని యోక్క పనిని నెరవేర్చడంలో సహాయపడటానికి ప్రత్యేక పరచబడినందున లేదా నియమించబడినందున, సంఘ సభ్యులందరూ అప్పగించబడిన అధికారాన్ని ఉపయోగించగలరు.”

యాజకత్వ తాళపుచెవుల ద్వారా, ప్రభువు యొక్క ప్రాధాన్యతలు ఎల్లప్పుడూ ప్రబలంగా ఉంటాయి. ఆయన నిర్దేశానికి అనుగుణంగా లేని వ్యక్తిగత ఉద్దేశ్యాలను ఎవరూ ఆమోదించలేరు. వ్యక్తిగత లాభం మరియు వ్యక్తిగత అనుచరులను కోరుతూ, యాజకవంచనలో ఎవరూ విజయం సాధించలేరు.

సంఘ సభ్యుల గృహాలలో కూడా యాజకత్వము కీలక పాత్ర పోషిస్తుంది. “ఆ పనికి యాజకత్వపు తాళపుచేతులు కలిగియున్న వ్యక్తి ఆదేశాల మేరకు మాత్రమే యాజకత్వ అధికారాన్ని ఉపయోగించవచ్చనే సూత్రం సంఘములో ప్రాథమికమైనది, అయితే ఇది కుటుంబంలో వర్తించదు.” అని అధ్యక్షులు డాల్లిన్ హెచ్. ఓక్స్, ప్రథమ అధ్యక్షత్వములో మొదటి సలహాదారులు, బోధించారు. తండ్రులు ప్రేమ మరియు నీతితో వారి కుటుంబములపై అధ్యక్షత్వం వహించాలి—సలహా ఇవ్వడం, కుటుంబ సమావేశాలు నిర్వహించడం, కుటుంబ సభ్యులకు లేదా ఇతరులకు యాజకత్వం లేదా స్వస్థపరిచే ఆశీర్వాదాలు ఇవ్వడం మొదలైనవి—యాజకత్వ తాళపుచెవులు కలిగి ఉన్నవారి దిశానిర్దేశం లేదా అధికారిక అనుమతి లేకుండానే.

“తండ్రి లేనప్పుడు మరియు తల్లి కుటుంబ నాయకురాలిగా ఉన్నప్పుడు అదే సూత్రం వర్తిస్తుంది. ఆమె తన ఇంటిలో అధ్యక్షత వహిస్తుంది మరియు దేవాలయంలో తన వరము మరియు ముద్రణ ద్వారా యాజకత్వం యొక్క శక్తి మరియు ఆశీర్వాదాలను తన కుటుంబంలోకి తీసుకురావడంలో కీలకపాత్ర పోషిస్తుంది.”

యాజకత్వం: దీవించే శక్తి

ఒక్క మాటలో చెప్పాలంటే, యేసు క్రీస్తు పునఃస్థాపించిన యాజకత్వ అధికారం మరియు శక్తి యొక్క ఉద్దేశ్యం దీవించడం. సంఘ సభ్యులు సంఘములో, గృహములో మరియు ప్రపంచవ్యాప్తంగా ఇతరులకు సేవ చేయడానికి మరియు ఆశీర్వదించడానికి దేవుని శక్తిని ఉపయోగించడానికి ఇది వీలు కల్పిస్తుంది. దేవుని రాజ్యం పెరిగి భూమిని నింపుటకు సహాయపడటానికి వారి స్వంతదానికంటే చాలా ఎక్కువైన దైవిక బహుమతులు మరియు శక్తిని ఉపయోగించి, సభ్యులు రక్షకుని యొక్క రక్షణ మరియు ఉన్నతస్థితి కార్యమును సాధించడంలో చేరుతారు.(సిద్ధాంతం మరియు నిబంధనలు 65:2, 5–6 చూడండి).

ప్రభువు ఇలా వివరించారు, “ఈ ఉన్నత యాజకత్వము[మెల్కీసెదెకు] సువార్తను నిర్వహించి, పరలోకరాజ్య మర్మముల తాళపుచెవులను అనగా దేవుని జ్ఞానము యొక్క తాళపుచెవిని కలిగియుండును.

“ఆ విధులలో, దైవత్వము యొక్క శక్తి ప్రత్యక్షపరచబడుతుంది.

దాని విధులు, యాజకత్వపు అధికారము లేకుండా శరీరమందు మనుష్యునికి దైవత్వపు శక్తి ప్రత్యక్షపరచబడదు” (సిద్ధాంతం మరియు నిబంధనలు 84:19–21).

నిస్సందేహంగా, విధులు అనేవి యాజకత్వం ద్వారా నిర్వహించబడే వేడుకలు లేదా సంస్కారాలు, వీటి ద్వారా మనం దేవునితో నిబంధనలు చేస్తాము, బాప్తిస్మము నుండి ప్రారంభమై ప్రభువు మందిరములో స్వీకరించే నిబంధనల వరకు కొనసాగుతుంది. ఈ నిబంధనలను పాటించడం ద్వారానే మనం క్రీస్తు ప్రాయశ్చిత్త కృప ద్వారా “ప్రకృతి సంబంధియైన” పురుషులు మరియు స్త్రీల నుండి పరిశుద్ధులుగా (మోషైయ 3:19 చూడండి) మార్చబడతాము మరియు దేవుని ముందు నీతిమంతులుగా మరియు శుద్ధిచేయబడువారుగా—నిర్దోషులుగా మరియు నిష్కళంకులుగా—మారతాము (సిద్ధాంతము మరియు నిబంధనలు 20:29–31; 3 నీఫై 27:16–20 చూడండి).

ప్రథమ అధ్యక్షత్వము మరియు పన్నెండుమంది అపొస్తలుల సలహాసభ ద్వారా రాయబడిన “యేసు క్రీస్తు సువార్త సంపూర్ణత యొక్క పునఃస్థాపన: ప్రపంచానికి ద్విశతాబ్ది ప్రకటన” నుండి ఈ ఉల్లేఖనం తగిన సారాంశాన్ని వ్యక్తపరుస్తుంది:

“1830 ఏప్రిల్ 6న ఏర్పాటు చేయబడిన యేసు క్రీస్తు యొక్క కడవరి-దిన పరిశుద్ధుల సంఘము, క్రీస్తు యొక్క పునఃస్థాపించబడిన క్రొత్త నిబంధన సంఘమని మేము ప్రకటిస్తున్నాము. ఈ సంఘము దాని ప్రధాన మూలరాయియైన యేసు క్రీస్తు యొక్క పరిపూర్ణ జీవితముతో, ఆయన అనంతమైన ప్రాయశ్చిత్తము మరియు యధార్థమైన పునరుత్థానముతో అనుసంధానించబడినది. యేసు క్రీస్తు మరొకసారి అపొస్తలులను పిలిచి, వారికి యాజకత్వ అధికారమును అనుగ్రహించెను. ఆయన మనందరినీ తన యొద్దకు, ఆయన సంఘము యొద్దకు రమ్మని, పరిశుద్ధాత్మను, రక్షణ విధులను, శాశ్వతమైన ఆనందమును పొందమని ఆహ్వానించుచున్నారు.