Bato bapambolami na Likoki mpe Nguya ya Bonganganzambe

Yesu Klisto azali moto ya Eklezia Eklezia ezali esaleli oyo Ye moko akeli mpo na kokokisa mosala ya ntina ya kobikisa bato na eleko oyo ya nsuka ya nsango malamu kaka lokola na eleko oyo ntango Ye azalaki na mabele. Na nzela ya Eklezia:

• Ye akoki kosakola nsango malamu na ye na mokili mobimba.

• Akoki kopesa libatisi mpe mayokani nyonso mosusu—kutu nzela ya boyokani oyo ememaka na bokonzi ya selesitiale na Ye.

• Akoki kosangisa mabota mpo na seko.

• Akoki kopesa makabo ya lobiko, ata na baoyo bakufaki na yango te.

• Akoki kosalisa na bamposa ya nzoto ya bana ya Nzambe na ntango ya sikawa.

Mpo na kokokisa mikano minene oyo, mpe mpo na kolengela bozongi ya Mobikisi, Eklezia ezali na mposa ya bokambi ya ntango nyonso, likoki, mpe nguya ya Nzambe. Eklezia ezali “eklezia ya solo mpe ya bomoi” (Malongi mpe Mayokani 1:30) mpo ete Klisto azali kofula yango na bokambi mpe nguya na Ye na nzela ya bonganganzambe na Ye, “Bonganganzambe Bosantu, na Molongo ya Mwana ya Nzambe” (Malongi mpe Mayokani 107:3).

Kasi mpo na bonganganzambe bosantu oyo, Eklezia ekozala mpenza ebongiseli moko ya kala, oyo ezali kosala malamu na mokili kasi na nguya te mpo na kokokisa ntina ya libosoliboso ya kolengela bana mibali mpe bana basi ya Nzambe mpo na esengo ya bomoi ya seko na miso na Ye. Na bonganganzambe oyo, mpe bafungola ya kotambwisa mosala ya bonganganzambe oyo, ezali na likoki mpe na molongo kati na Eklezia.

“Na Eklezia, likoki nyonso ya bonganganzambe esalelami na nse ya bokambi ya baye bazali na bafungola ya bonganganzambe.

“Bandimi ya Eklezia ya mibali oyo balongobani bazwaka likoki ya bonganganzambe na nzela ya bopesi mpe bokulisi na bonganganzambe na masanga ya bonganganzambe. Bandimi nyonso ya Eklezia bakoki kosalela likoki oyo epesameli bango ntango batiami pembeni to bapesami mokumba ya kosunga na kokokisa mosala ya Nzambe.”

Na nzela ya bafungola ya bonganganzambe, makambo ya motuya ya Nkolo ekolonga ntango nyonso. Moto moko te akoki kosunga libongisi na ye moko oyo ezali na boyokani te na bokambi na Ye. Moto moko te akoki kolonga na mosala ya bonganganzambe, kolukaka litomba na ye moko mpe bolandi ya ye moko.

Bonganganzambe ezali lisusu na mokumba monene na bandako ya bandimi ya Eklezia. Mokambi Dallin H. Oaks, Mopesi toli ya Yambo na Bokambi ya Yambo, ateyaki, “Libongi oyo ete likoki ya bonganganzambe ekoki kosalelama kaka na nse ya bokambi ya moto oyo asimbi bafungola mpo na mosala wana ezali ya ntina koleka na kati ya Eklezia, kasi yango ezali kosalama na kati ya libota te.” Batata bazali kokamba mpe kosalela bonganganzambe na libota na bango—kopesa toli, kosala makita ya libota, kopesa mapamboli ya bonganganzambe to ya libiki na bato ya libota to basusu, mpe bongo na bongo—kozanga bokambi to ndingisa ya moto oyo asimbi bafungola ya bonganganzambe.

“Libongi se moko oyo eselamaka ntango tata azali te mpe mama azali mokambi ya libota. Akokamba na kati ya libota na ye mpe azali esaleli na komemaka nguya mpe mapamboli ya bonganganzambe na kati ya ndako na ye na nzela ya dotasio mpe bokangisi na ye na kati ya tempelo.”

Bonganganzambe: Nguya ya Kopambola

Na liloba moko, ntina ya likoki mpe nguya ya bonganganzambe oyo Yesu Klisto azongisaki ezali mpo na kopambola. Ezali kopesa nzela na bandimi ya Eklezia ya kosalela nguya ya Nzambe na kosalela mpe kopambola basusu kati na Eklezia, na ndako, mpe na mokili mobimba. Bandimi bazali kosangana na Mobikisi na kokokisaka mosala na Ye ya lobiko mpe ya bonetoli, kosalelaka makabo ya bonzambe mpe nguya mosika koleka oyo ya bango moko mpo na kosalisa bokonzi ya Nzambe ekola mpo na kotondisa mabele (tala Malongi mpe Mayokani 65:2, 5–6).

Nkolo alimboli ete “bonganganzambe ya likolo [Melekisedeke] oyo eyangelaka nsango malamu mpe ezali na fungola ya misala ya bokonzi, kutu fungola ya boyebi ya Nzambe.

“Na yango, na makuli na yango, nguya ya bonzambe ezali komonana.

“Mpe kozanga makuli na yango, mpe likoki ya bonganganzambe, nguya ya bonzambe ezali komonana te epayi ya bato na mosuni” (Malongi mpe Mayokani 84:19–21).

Makuli, ya solo, ezali milulu esalami na nzela ya bonganganzambe to elambo oyo na nzela na yango nde tosalaka mayoki elongo na Nzambe, kobandaka na libatisi mpe kokobaka na nzela ya mayokani oyo ezwami kati na ndako ya Nkolo. Ezali na kobatelaka mayokani oyo nde tobongwani uta na bato ya “bomoto” na basantu (tala Mosiya 3:19) na ngolu ya bomikabi ya Klisto mpe kokoma bato ya sembo mpe bule—kozanga mbeba mpe litono—liboso ya Nzambe (tala Malongi mpe Mayokani 20:29–31; 3 Nefi 27:16–20).

Liloba oyo uta “Bozongisi ya Litondi ya Nsango Malamu ya Yesu Klisto:Esakola ya Mibu Nkama Mibale na Mokili,” na Bokambi ya Yambo mpe Lisanga ya Bapostolo Zomi na mibale, ezali kolakisa maloba ya mokuse oyo ebongi mpenza:

“Tosakoli ete Eklezia ya Yesu Klisto ya Basantu ya Mikolo ya Nsuka, ebongisamaki na mokolo ya 6, Sanza ya minei 1830, ezali Eklezia ya Klisto ezongisami ya Boyokani ya Sika. Eklezia oyo ekangami makasi kati na bomoi ebonga nie ya kokonzi na yango oyo azali libanga esimbi ndako, Yesu Klisto, mpe kati na Bomikabi na Ye ezanga nsuka mpe Bosekwi na Ye na nzoto. Yesu abiangi mbala moko lisusu Bapostolo mpe apesi bango likoki ya bonganganzambe. Abengisaka biso banso toya epai na Ye mpe na Eklezia na Ye, tozwa Molimo Mosantu, makuli ya lobiko, mpe tozwa esengo oyo ewumelaka.”