Mabendisionan babaen iti Turay ken Bileg ti Priesthood

Ni Jesucristo ti ulo ti Simbaan. Ti Simbaan ti ramit a pinarnuayna a mangipatungpal iti napateg nga aramid a panangsubbot iti sangkataw-an iti daytoy maudi a dispensasion ti ebanghelio a kas met laeng iti dispensasion idi nagnaed Isuna ditoy daga. Babaen iti Simbaan:

• Mabalinna nga iwaragawag ti Ebangheliona iti intero a lubong.

• Mabalinna nga idaton ti buniag ken amin a dadduma pay a katulagan—uray ti dana ti katulagan nga agturong iti celestial a pagarianna.

• Mabalinna a pagkaykaysaen dagiti pamilia iti kinaagnanayon.

• Mabalinna nga idaton dagiti sagut ti pannakaisalakan, uray kadagiti natay nga awan dagitoy.

• Mabalinna ti agserbi kadagiti pisikal a kasapulan dagiti annak ti Dios iti agdama.

Tapno maipatungpal dagitoy a naindaklan a panggep, ken tapno agsagana para iti panagsubli ti Mangisalakan, kasapulan ti Simbaan ti agtultuloy a panangiturong, turay, ken bileg ti Dios. Ti Simbaan ti “pudno ken sibibiag a simbaan” (Doktrina ken Katulagan1:30) gapu ta ipuonan ni Cristo daytoy iti panangidaulo ken pannakabalinna babaen ti Priesthood-na, “ti Nasantuan a Kinasaserdote, kalpasan ti Urnos ti Anak ti Dios” (Doktrina ken Katulagan 107:3).

Ngem para iti daytoy nasantuan a kinasaserdote, agbalin ti Simbaan kangrunaanna a maysa a sekular nga organisasion, nga agar-aramid iti naimbag iti lubong ngem awan ti pannakabalinna a mangragpat iti ultimo a panggep a mangisagana kadagiti annak a lallaki ken babbai ti Dios para iti rag-o ti biag nga agnanayon iti Imatangna. Babaen daytoy a priesthood, ken dagiti tulbek a mangiturong iti trabaho daytoy a priesthood, agpada nga adda turay ken urnos iti Simbaan.

“Iti Simbaan, maaramat ti amin a turay ti priesthood babaen ti panangiturong dagiti agiggem kadagiti tulbek ti priesthood.

“Umawat dagiti maikari a lallaki a miembro ti Simbaan iti turay ti priesthood babaen ti panangi-confer iti priesthood ken pannakaordenda kadagiti pagakeman [offices] ti priesthood. Maaramat ti amin a miembro ti Simbaan ti naipakumit a turay no ma-set apart wenno madutokanda a tumulong iti panangipatungpal iti aramid ti Dios.”

Babaen kadagiti tulbek ti priesthood, kanayon nga agballigi dagiti ipangpangruna ti Apo. Awan ti asino man a makatulong iti personal nga adyenda a saan a maitunos iti panangiturongna. Awan ti asino man nga agballigi iti sinsinan a kinasaserdote, nga agsapsapul iti bukod a gunggona ken bukod a pannakapasurot.

Napateg pay ti akem ti priesthood kadagiti pagtaengan dagiti miembro ti Simbaan. Insuro ni Presidente Dallin H. Oaks, Umuna a Mamagbaga iti Umuna a Panguluen, “Ti prinsipio a maaramat laeng iti turay ti priesthood babaen ti panangiturong ti maysa nga agig-iggem kadagiti tulbek para iti dayta a pagrebbengan ket napateg iti Simbaan, ngem saan a mayaplikar daytoy iti pamilia.” Dagiti amma ti mangidaulo ken mangaramat iti priesthood iti pamiliada—panagbalakad, panangangay kadagiti miting ti pamilia, panangted kadagiti bendision ti priesthood wenno panangagas kadagiti miembro ti pamilia wenno dadduma pay, ken dadduma pay—nga awan ti panangiturong wenno pammalubos ti maysa a tao nga agig-iggem kadagiti tulbek ti priesthood.

“Mausar ti isu met la a prinsipio no awan ti ama ket ti ina ti lider ti pamilia. Isu ti mangidaulo iti pagtaenganna ken isu ti ramit iti panangyeg iti bileg ken bendision ti priesthood iti pamiliana babaen ti endowment ken panangilantip iti templo.”

Priesthood: Ti Bileg a Mangbendision

Iti maysa a balikas, ti panggep ti turay ken bileg ti priesthood nga insubli ni Jesucristo ket mangbendision. Mangpabael kadagiti miembro ti Simbaan a mangusar iti bileg ti Dios nga agserbi ken mangbendision kadagiti dadduma iti Simbaan, iti pagtaengan, ken iti intero a lubong. Makikadua dagiti miembro iti Mangisalakan iti panangitungpalda iti aramidna iti pannakaisalakan ken pannakaitan-ok, panangusar kadagiti nadiosan a sagut ken bileg a nalablabes nga amang ngem iti bukodda tapno matulongan ti pagarian ti Dios a dumakkel a mangpunno iti daga (kitaen iti Doktrina ken Katulagan 65:2, 5–6).

Inlawlawag ti Apo nga “annongen daytoy nabilbileg a kinasaserdote a [Melchizedek] ti ebanghelio ken iggemna ti tulbek dagiti kinadatdatlag ti pagarian, nga isu ti tulbek ti pannakaammo ti Dios.

“Ngarud, kadagiti ordinansa iti daytoy, naipakita ti bileg ti kinadios.

“Ket no awan dagiti ordinansa iti daytoy, ken ti panangituray ti kinasaserdote, saan a maipakita ti bileg ti kinadios kadagiti tao iti lasag.” (Doktrina ken Katulagan 84:19–21).

Dagiti ordinansa, siempre, ket dagiti seremonia wenno sakramento nga annongen ti priesthood a babaen iti dayta agaramidtayo kadagiti katulagan iti Dios, mangrugi iti panagbuniag ken agtultuloy babaen kadagiti katulagan a naawat iti balay ti Apo. Iti panangtungpal kadagitoy a katulagan a mabalbaliwantayo manipud iti “nailubongan” a lallaki ken babbai nga agbalin a santo (kitaen iti Mosiah 3:19) babaen ti mangsubbot a parabur ni Cristo ken agbalin nga agpada a napalinteg ken napasanto—awan basol ken awan mulitna—iti sanguanan ti Dios (kitaen iti Doktrina ken Katulagan 20:29–31; 3 Nephi 27:16–20).

Daytoy nga adaw manipud iti “The Restoration of the Fulness of the Gospel of Jesus Christ: A Bicentennial Proclamation to the World,” ti Umuna a Panguluen ken Konseho dagiti Sangapulo-ket-dua nga Apostol, ti mangipeksa iti maitutop a pakagupgopan:

“Ipakdaarmi a ti Ti Simbaan ni Jesucristo dagiti Santo iti Ud-udina nga Aldaw, a nabuangay idi Abril 6, 1830, ti naisubli a Simbaan ni Cristo iti Baro a Tulag. Sititibker a nakabatay daytoy a Simbaan iti naan-anay a biag ti kangrunaan a panulina a bato, a ni Jesucristo, ken iti awan patinggana a Pannubbot ken literal a Panagungarna. Nangawag manen ni Jesucristo kadagiti Apostol ken nangted kadakuada iti turay ti priesthood. Awisennatayo ti amin nga umasideg Kenkuana ken iti Simbaanna, tapno umawat iti Espiritu Santo, dagiti ordinansa ti pannakaisalakan, ken tapno manggun-od iti napaut a rag-o.”