“Tau Koob Hmoov Los ntawm lub Pov Thawj Hwj Txoj Cai thiab lub Hwj Chim,” Liyahaunas, Cuaj Hlis Ntuj 2025.
Zaj Lus hauv Liyahaunas Txhua Hli, Cuaj Hlis Ntuj 2025
Tau Koob Hmoov Los ntawm lub Pov Thawj Hwj Txoj Cai thiab lub Hwj Chim
Lub Koom Txoos cov mej zeej siv Vajtswv lub hwj chim kom pab thiab foom koob hmoov rau lwm tus hauv lub Koom Txoos, hauv tsev, thiab nyob thoob plaws lub ntiaj teb.
Peb ua tim khawv rau lub ntiaj teb hais tias Vajtswv lub pov thawj hwj dawb huv yeej tseem ceeb rau kev ua Nws txoj hauj lwm cawm tib neeg dim thiab muab lawv tsa nto, Nws muab lub pov thawj hwj txum tim rov qab los rau lub hom phiaj no, thiab lub pov thawj hwj yog muab los ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.
Vim Li Cas Yuav Tsum Muaj lub Pov Thawj Hwj Txoj Cai thiab lub Hwj Chim
Yexus Khetos yog tus thawj coj ntawm lub Koom Txoos no. Lub Koom Txoos yog qhov uas Nws tau tsim kom ua Nws txoj hauj lwm txhiv tib neeg dim nyob hauv lub caij nyoog qhia txoj moo zoo zaum kawg ib yam li lub caij nyoog tso txoj cai thaum Nws nyob hauv lub ntiaj teb. Dhau los ntawm lub Koom Txoos:
-
Nws tshaj tawm txog Nws txoj moo zoo thoob plaws lub ntiaj teb.
-
Nws muab neeg ua kev cai raus dej thiab muab tej kev khi lus ntxiv rau lawv—ib txoj kev khi lus mus rau Nws lub nceeg vaj xilethi-aus.
-
Nws ua rau tej tsev neeg koom ua ke mus ib txhis li.
-
Nws muab lub txiaj ntsim kev cawm seej rau lawv, tsis hais cov uas tau tuag ua ntej lawv tau koob hmoov.
-
Nws txhawb pab Vajtswv cov me nyuam niaj hnub nim no kom muab tej yam uas lawv sab cev nqaij daim tawv xav tau.
Xwv kom ua raws li tej lub hom phiaj tseem ceeb no, thiab npaj rau tus Cawm Seej txoj kev rov qab los, lub Koom Txoos yeej xav tau Vajtswv txoj kev coj, txoj cai, thiab lub hwj chim. Lub Koom Txoos no yog “tib lub koom txoos uas tseeb thiab muaj sia zees” (Lus Qhuab Qhia thiab Kev Khi Lus 1:30) vim tus Khetos yog tus coj thiab muab Nws lub hwj chim dhau los ntawm Nws lub pov thawj hwj, “lub Pov Thawj Hwj Dawb Huv, raws li tus Txheej Txheem ntawm Vajtswv Leej Tub” (Lus Qhuab Qhia thiab Kev Khi Lus 107:3).
Yog tsis muaj lub pov thawj hwj dawb huv no, lub Koom Txoos no yog ib lub koom haum raws li neeg ntiaj teb ua xwb, uas ua zoo hauv lub ntiaj teb tiam sis tsis muaj hwj chim npaj Vajtswv cov tub thiab cov ntxhais txais tau kev xyiv fab ntawm txoj sia nyob mus ib txhis nyob ntawm Nws lub xub ntiag. Vim muaj lub pov thawj hwj no, thiab cov yawm sij coj txoj hauj lwm ntawm lub pov thawj hwj no, ces muaj txoj cai thiab ib tug txheej txheem hauv lub Koom Txoos no.
“Nyob hauv lub Koom Txoos, cov uas tuav lub pov thawj hwj cov yawm sij coj kev siv tag nrho lub pov thawj hwj txoj cai.
“Cov txiv neej tsim nyog uas yog lub Koom Txoos cov mej zeej txais tau txoj cai pov thawj hwj thaum muab lawv tsa rau lub pov thawj hwj thiab tsa rau tej luag hauj lwm ntawm lub pov thawj hwj. Txhua tus mej zeej hauv lub Koom Txoos siv txoj cai uas tau muab rau lawv thaum tsa lawv los sis txib lawv pab ua Vajtswv tej hauj lwm.”
Dhau los ntawm cov yawm sij pov thawj hwj, yeej yuav ua raws li tus Tswv tej lub hom phiaj. Tsis muaj leej twg uas yuav txhawb nqa lawv tus kheej tej lub hom phiaj uas tsis yog raws li tus Tswv txoj kev coj. Tsis muaj leej twg uas yuav muaj cuab kav txhawb nqa tej tswv yim xib hwb cuav thiab nrhiav kev kom txhawb nqa nws tus kheej.
Lub pov thawj hwj kuj yog ib yam tseem ceeb hauv lub Koom Txoos cov mej zeej lub tsev. Thawj Tswj Hwm Dallin H. Oaks, tus Pab Cuam thib Ib hauv Thawj Pawg Thawj Tswj Hwm, qhia tias, “Lub ntsiab cai uas qhia tias yus siv tau txoj cai pov thawj hwj raws li tus uas tuav cov yawm sij ua tej hauj lwm ntawd coj xwb yeej yog ib qho tseem ceeb nyob hauv lub Koom Txoos tiam sis tsis yog li ntawd thaum hais txog yus tsev neeg.” Ib tug txiv tsev tswj hwm thiab siv lub pov thawj hwj pab nws tsev neeg—ntuas nws tsev neeg, muaj tsev neeg kev sib ntsib, siv lub pov thawj hwj foom koob hmoov rau cov neeg hauv nws tsev neeg los sis rau lwm tus, thiab li ntawd—tsis tas muaj ib tug uas tuav cov yawm sij pov thawj hwj coj kev los tsis tso cai rau nws.
“Muaj raws li lub ntsiab cai no thaum ib tug txiv tsev tsis nyob thiab tus niam tsev yog ib tsev neeg tus thawj coj. Nws tswj hwm hauv nws lub tsev thiab yog tus uas ua rau nws tsev neeg tau lub hwj chim thiab cov koob hmoov ntawm lub pov thawj hwj vim nws tau txais vaj txiaj ntsim thiab ua kev cai khi hauv lub tuam tsev.”
Kev Muab lub Pov Thawj Hwj Txum Tim Rov Qab Los hauv Peb Hnub Nyoog
Tsib Hlis Ntuj 15, 1829
Qhov uas tau muab txoj cai pov thawj hwj hauv lub caij nyoog tso cai kawg no txum tim rov qab los twb muaj ib tug txheej txheem vam meej. Thaum tseem muab cov vaj lug kub rau peb lub caij nyoog tso cai no txhais lus nyob rau xyoo 1829, tus Tswv pib txhim tsa Nws txoj kev tsa neeg rau Nws lub pov thawj hwj. Yauhas tus uas Muab Neeg Ua Kev Cai Raus Dej uas tau sawv rov los tau teb Joseph Smith thiab Oliver Cowdery txoj kev thov Vajtswv txog txoj kev cai raus dej, thaum nws tshwm sim thiab muab lub Pov Thawj Hwj Aloos rau nkawd, lub pov thawj hwj ntawd “tuav cov yawm sij ntawm cov tim tswv tej kev los txhawb pab, thiab ntawm txoj moo zoo ntawm kev hloov siab lees txim, thiab ntawm kev cai raus dej uas ua rau neeg txais kev zam txim rau tej kev txhaum” (Lus Qhuab Qhia thiab Kev Khi Lus 13:1). Nrog txoj cai ntawd, Joseph thiab Oliver nyias muab nyias ua kev cai raus dej thiab muab lwm tus ua kev cai raus dej thaum txhim tsa lub Koom Txoos lawm.
Tsis ntev tom qab lub Tsib Hlis Ntuj 15, 1829
Tsis ntev tom qab Yauhas tus uas Muab Neeg Ua Kev Cai Raus Dej tau tshwm sim, cov Thwj Tim puag thaum ub, Petus, Yakaunpaus, thiab Yauhas tau tshwm sim thiab muab lub pov thawj hwj siab dua, los sis lub Pov Thawj Hwj Mekhixedes, tsis hais “cov yawm sij ntawm kuv lub nceeg vaj rau, thiab ib lub caij nyoog tso txoj cai rau txoj moo zoo rau … lub caij nyoog uas muaj txhij txhua, ” (Lus Qhuab Qhia thiab Kev Khi Lus 27:13; kuj saib 128:20).
Plaub Hlis Ntuj 3, 1836
Twb muab txoj cai pov thawj hwj ntxiv tom qab ntawd, thaum nyob hauv lub Tuam Tsev Kirtland, peb tug yaj saub puag thaum ub, Mauxes, Eli-as, thiab Eliyas, tau tshwm sim rau Joseph thiab Oliver thiab muab cov yawm sij muab Ixayees sau los ua ke thiab txoj hauj lwm ntawm kev ua hauj lwm hauv tus Tswv tej lub tuam tsev (saib Lus Qhuab Qhia thiab Kev Khi Lus 110:11–16).
Lub Caij Ntuj Sov 1829–Plaub Hlis Ntuj 1835
Tej kev tshwm sim hauv phau Lus Qhuab Qhia thiab Kev Khi Lus tau qhia tus Yaj Saub Joseph Smith txog kev tsa txiv neeg rau tej lub luag hauj lwm ntawm lub pov thawj hwj siab dua (Mekhixedes) thiab lub pov thawj hwj npaj (Aloos); kev tsa cov thawj coj pov thawj hwj, xws li cov npisov; thiab kev tsa tej pawg thiab pawg sab laj pov thawj hwj.
1835–1973
Cov yaj saub tseem coj tej lub koom haum pov thawj hwj thiab txoj kev siv lub pov thawj hwj hauv lub Koom Txoos. Piv txwv hais tias, twb tsa tej pawg Xya Caum hauv Kirtland kom pab Pawg Kaum Ob tug Thwj Tim. Tom qab cov mej zeej mus rau Sab Hnub Poob ces tom qab ntawd lawv mus rau ub rau no, twb txib tej pawg no mus pab tej ceg txheem ntseeg ntawm lub Koom Txoos.
1973–Tam Sim No
Thaum Thawj Tswj Hwm Spencer W. Kimball (1895–1985), Ezra Taft Benson (1899–1994), thiab Gordon B. Hinckley (1910–2008) coj lub Koom Txoos, cov Xya Caum thiab lawv tej pawg pib ua hauj lwm raws li Pawg Kaum Ob tug Thwj Tim qhia hauv lub hauv paus ntawm lub Koom Txoos thiab tej cheeb tsam ntawm lub Koom Txoos. Twb muab tej pawg hauv tej ceg txheem ntseeg tag lawm. Hnub no, muaj kaum ob pawg ntawm cov Tuam Thawj Coj thiab cov Xya Caum Coj Cheeb Tsam pab cov Thwj Tim “rau txoj kev txhim tsa lub Koom Txoos thiab tswj tag nrho tej xwm hauv lub koom txoos nyob hauv txhua lub teb chaws” (Lus Qhuab Qhia thiab Kev Khi Lus 107:34). Peb tsim tau tej pawg Xya Caum ntxiv thaum lub Koom Txoos loj tuaj.
Txwj Laug Christofferson ntsib tij laug Sampson thiab Daniel Amako nyob hauv Gambia, West Africa, thaum lub Ob Hlis Ntuj 2022.
Lub Pov Thawj Hwj: Lub Hwj Chim Foom Koob Hmoov rau Lwm Tus
Hais lub ntsiab lus, Yexus Khetos twb tau muab txoj cai thiab lub hwj chim pov thawj hwj txum tim rov qab los kom foom koob hmoov rau tib neeg. Ua rau lub Koom Txoos cov mej zeej siv Vajtswv lub hwj chim kom pab thiab foom koob hmoov rau lwm tus hauv lub Koom Txoos, hauv tsev, thiab nyob thoob plaws lub ntiaj teb. Cov mej zeej koom nrog tus Cawm Seej ua Nws txoj hauj lwm cawm seej thiab kev tsa nto, siv tej txiaj ntsim thiab lub hwj chim uas los saum ntuj los kom pab Vajtswv lub nceeg vaj loj tuaj hauv lub ntiaj teb (saib Lus Qhuab Qhia thiab Kev Khi Lus 65:2, 5–6).
Tus Tswv tau piav hais tias “lub pov thawj hwj [Mekhixedes uas] loj zog no tswj hwm txoj moo zoo thiab tuav tus yawm sij ntawm tej txuj ci uas neeg tsis paub txog lub nceeg vaj, uas twb yog tus yawm sij ntawm txoj kev paub txog Vajtswv.
“Yog li ntawd, dhau los ntawm tej kab ke ntawd, thiaj pom lub hwj chim ntawm Vajtswv tshwm sim.
“Thiab yog hais tias tsis muaj tej kab ke ntawd, thiab txoj cai ntawm lub pov thawj hwj, ces twb tsis pom lub hwj chim ua li Vajtswv tshwm sim los rau neeg uas muaj cev nqaij daim tawv” (Lus Qhuab Qhia thiab Kev Khi Lus 84:19–21).
Cov kab ke yeej yog cov kab lig kev cai uas cov neeg siv lub pov thawj hwj coj kev kom peb khi lus nrog Vajtswv, pib thaum ua kev cai raus dej thiab mus txog thaum peb khi lus hauv tus Tswv lub tsev. Thaum peb ua raws li tej kev khi lus no peb hloov los ntawm peb txoj kev ua txiv neej thiab poj niam “ntawm sab cev nqaij daim tawv” mus txog thaum peb yog cov neeg dawb huv (saib Mauxiyas 3:19) dhau los ntawm Khetos txoj kev theej txhoj thiab peb hloov los ua neeg ncaj thiab dawb huv—tsis muaj txim thiab tsis muaj qhov ceb—rau ntawm Vajtswv xub ntiag (saib Lus Qhuab Qhia thiab Kev Khi Lus 20:29–31; 3 Nifais 27:16–20).
Cov lus los ntawm “Kev Muab Yexus Khetos Txoj Moo Zoo uas Muaj Txhij Txhua Txum Tim Rov Qab Los: Ib zaj Lus Tshaj Tawm rau lub Ntiaj Teb Thaum Nco txog Ob Puas Xyoo Tas Los,” los ntawm Thawj Pawg Thawj Tswj Hwm thiab Pawg Kaum Ob tug Thwj Tim, yeej hais lub ntsiab txog qhov no:
“Peb tshaj tawm hais tias Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, uas tau txhim tsa thaum lub Plaub Hlis Ntuj hnub tim 6, xyoo 1830, yog Khetos lub Koom Txoos hauv Phau Tshiab uas Nws tau muab txum tim rov qab los. Lub Koom Txoos yeej txheem rau Yexus Khetos lub neej zoo tag nrho, uas yog lub Koom Txoos tus ncej zeb tag, thiab txheem rau Nws txoj Kev Theej Txhoj uas kav ib txhis thiab Nws txoj Kev Sawv Rov Los. Yexus Khetos twb tau rov qab hu cov Thwj Tim thiab tau muab txoj cai pov thawj hwj rau lawv. Nws caw peb txhua tus los cuag Nws thiab Nws lub Koom Txoos, txais tus Vaj Ntsuj Plig Dawb Huv, cov kab ke cawm seej, thiab muaj kev xyiv fab uas kav ib txhis.”
© 2025 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, September 2025. Hmong. 19604 295