Ginbugayan sang Awtoridad kag Gahum sang Priesthood

Si Jesucristo amo ang pangulo sang Simbahan. Ang Simbahan amo ang instrumento nga Iya ginhimo para tumanon ang kinahanglanon nga buluhaton sang pagtubos sang katawhan sa sining katapusan nga dispensasyon sang ebanghelyo pareho sa dispensasyon sang nagapuyo pa Sia sa duta. Paagi sa Simbahan:

• Maproklamar Niya ang Iya ebanghelyo sa bilog nga kalibutan.

• Matanyag Niya ang bunyag kag ang tanan nga iban nga kasugtanan—bisan ang dalan sang kasugtanan pakadto sa selestiyal Niya nga ginharian.

• Mahiusa Niya ang mga pamilya sa wala katapusan.

• Matanyag Niya ang mga dulot sang kaluwasan, bisan sa mga naglakamatay nga wala makabaton sini.

• Maatipan Niya ang pisikal nga panginahanglan sang mga anak sang Dios sa karon.

Para malab-ot ining dako nga mga tuyo, kag para maghanda para sa pagbalik sang Manluluwas, kinahanglan sang Simbahan ang padayon nga giya, awtoridad, kag gahum sang Dios. Ang Simbahan amo ang “matuod kag buhi nga simbahan” (Doktrina kag mga Kasugtanan 1:30) tungod ginhatagan ini ni Cristo sang Iya liderato kag gahum paagi sa Iya priesthood, “ang Balaan nga Pagkapari suno sa Paagi sang Anak sang Dios” (Doktrina kag mga Kasugtanan 107:3).

Kon wala ining balaan nga priesthood, ang Simbahan mangin sekular lamang nga organisasyon, nga nagahimo sang kaayuhan sa kalibutan pero wala sang gahum para malab-ot ang pinakamataas nga tuyo sang paghanda sang mga anak sang Dios para sa kalipay sang kabuhi nga wala katapusan sa Iya presensya. Upod ining priesthood, kag ang mga yabi sa paghatag direksyon sa buluhaton sining priesthood, may awtoridad na kag kahusayan sa Simbahan.

“Sa Simbahan, ang tanan nga awtoridad sang priesthood ginagamit sa idalom sang direksyon sang mga nagakapot sang mga yabi sang priesthood.

“Ang kaangay-angay nga mga lalaki nga miyembro sang Simbahan nagabaton sang awtoridad sang priesthood paagi sa paghatag sang priesthood kag ordinasyon sa mga palangakuan sang priesthood. Ang tanan nga miyembro sang Simbahan pwede maggamit sang gindelegar nga awtoridad kon sila gin-set apart ukon gin-asayn para magbulig sa pagtuman sang buluhaton sang Dios.”

Paagi sa mga yabi sang priesthood, magapangibabaw pirme ang mga prayoridad sang Ginuo. Wala sang makasakdag sang personal nga interes nga wala nagaugyon sa Iya direksyon. Wala sang magmadinalag-on sa butig nga pagkapari, nga nagahandum sang personal nga ganar kag personal nga mga sumulunod.

Ang priesthood may kritikal man nga papel sa mga panimalay sang mga miyembro sang Simbahan. Gintudlo ni Pangulong Dallin H. Oaks, Unang Manuglaygay sa Unang Pangulohan, “Ang prinsipyo nga ang awtoridad sang priesthood magamit lamang sa idalom sang direksyon sang nagakapot sang mga yabi para sa sinang buluhaton tig-una sa Simbahan, pero indi sini sakop ang pamilya.” Ang mga amay nagapamuno kag nagagamit sang priesthood sa ila pamilya—paglaygay, paghiwat sang mga miting sang pamilya, paghatag sang mga bendisyon sang priesthood ukon pag-ayo sa mga miyembro sang pamilya ukon sa iban, kag madamo pa—nga wala sang giya ukon pahanugot sang tawo nga nagakapot sang mga yabi sang priesthood.

“Amo man nga prinsipyo ang ginasunod kon wala ang amay kag ang iloy amo ang lider sang pamilya. Nagapamuno sia sa iya puluy-an kag nagapatigayon sa pagdala sang gahum kag mga bugay sang priesthood sa iya pamilya paagi sa iya endowment kag pagselyo sa templo.”

Priesthood: Ang Gahum sa Pagbugay

Sa isa ka tinaga, ang tuyo sang awtoridad kag gahum sang priesthood nga ginpanumbalik ni Jesucristo amo ang magbugay. Ginatugot sini nga magamit sang mga miyembro sang Simbahan ang gahum sang Dios sa pagserbisyo kag pagbugay sang iban sa Simbahan, sa balay, kag sa bilog nga kalibutan. Nagaupod ang mga miyembro sa Manluluwas sa pagtuman sang buluhaton sang pagluwas kag pagpahitaas, nga ginagamit ang diosnon nga mga dulot kag gahum nga labaw pa sa ila kaugalingon nga ikasarang para buligan ang ginharian sang Dios nga magdako para mapuno ang kalibutan (tan-awa sa Doktrina kag mga Kasugtanan 65:2, 5–6).

Ginpaathag sang Ginuo nga “ining mas mataas [Melquisedec] nga pagkapari ang nagadumala sang ebanghelyo kag nagakapot sang yabi sang mga misteryo sang ginharian nga amo ang yabi sang ihibalo parte sa Dios.

“Gani, sa mga ordinansa sini, ang gahum sang pagkadiosnon ginapakita.

“Kag kon wala ang mga ordinansa sini, kag ang awtoridad sang pagkapari, ang gahum sang pagkadiosnon indi mapakita sa mga tawo sa unod” (Doktrina kag mga Kasugtanan 84:19–21).

Ang mga ordinansa, siyempre, amo ining mga seremonya nga ginahikot paagi sa priesthood ukon mga sakramento kon diin nagahimo kita sang mga kasugtanan sa Dios, sugod sa bunyag kag nagapadayon sa mga kasugtanan nga ginabaton sa balay sang Ginuo. Ara sa pagtuman sining mga kasugtanan nga nagaliwat kita halin sa “kinaandan” nga mga lalaki kag babayi kag mangin mga santos (tan-awa sa Mosias 3:19) paagi sa nagabayad-sala nga grasya ni Cristo kag pareho nga mapakatarong kag matinloan—nga wala sala kag mantsa—sa atubang sang Dios (tan-awa sa Doktrina kag mga Kasugtanan 20:29–31; 3 Nefi 27:16–20).

Ining sinambit halin sa “Ang Pagpanumbalik sang Kabug-osan sang Ebanghelyo ni Jesucristo: Ika-duha ka Gatos ka Tuig nga Anibersaryo nga Proklamasyon sa Kalibutan,” sang Unang Pangulohan kag Konseho sang Dose ka Apostoles, nagapahayag sang hustohan gid nga deskripsyon:

“Amon ginapahayag nga Ang Simbahan ni Jesucristo sang mga Santos sa Ulihing mga Adlaw, nga gin-organisar sang Abril 6, 1830, amo ang Bag-ong Katipan nga Simbahan ni Cristo nga ginpanumbalik. Ang ining Simbahan napasad sa perpekto nga kabuhi sang iya pangulong pundasyon nga bato, nga si Jesucristo, kag sa Iya wala dulunan nga Pagbayad-Sala kag literal nga Pagkabanhaw. Si Jesucristo sa liwat nagtawag sang mga Apostoles kag ginhatagan sila sang awtoridad sang pagkapari. Ginaagda Niya kita tanan nga magkari sa Iya kag sa Iya Simbahan, sa pagbaton sang Balaan nga Espiritu, sang mga ordinansa sang kaluwasan, kag sa pag-angkon sang nagadugay nga kalipay.”