Wɔdze Asɔfodzi Tumdzi na TumEhyira

Jesus Christ nye Asɔr no ne tsir. Asɔr no nye edwindadze a Ɔabɔ dze bɛyɛ nyimpa no ɔpon edwuma tsitsir wɔ asɛmpa odzi ewiei mberano yi mu tse dɛ mberano a Ɔtsenaa asaase no do. Ɔnam Asɔr no do no:

• Obotum abɔ N’asɛmpa dawur wɔ wiadze nyina.

• Obotum ama enuma na ahyɛmudzi nkaa ahorow nyina—mpo ahyɛmu anamɔnkwan dze kɔ Ne celestial ahenman mu.

• Obotum akã ebusua ebusua abɔ mu ma mbersantsen.

• Obotum dze nkwagye akyɛdze horow no ama, mpo hɔn a woeewu a woennya bi.

• Obotum aboa Nyankopɔn ne mba wɔ hɔn honandua mu ehiadze wɔ mber yi mu.

Asɔr no hia Nyankopɔn ne daa daa akwankyerɛ, tumdzi, na tum dze ahyɛ botae etsitsir yinom mã, na ɔayɛ ahoboa ama Agyenkwa no ne mbae. Asɔr no nye “nokwar na tseasefo asɔr” no (Nkyerɛkyerɛ na Ahyɛmudzi 1:30) osiandɛ Christ dze tum a ofi N’asɔfodzi mu, “Asɔfodzi Krɔnkrɔn no, ɔwɔ Nyankopɔn ne Ba ne Nhyehyɛɛ do” (Nkyerɛkyerɛ na Ahyɛmudzi 107:3) no dzi baano.

Nkyɛ asɔfodzi krɔnkrɔn yi nnyi hɔ a, Asɔr no bɛyɛ tse dɛ honandua mu kuw biara, a ɔreyɛ papa wɔ wiadze no mu mbom onnyi tum biara a ɔdze bɛhyɛ botae tsitsir dɛ ɔdze besiesie Nyankopɔn ne mbabanyin na mbabaa ama onnyiewiei nkwa ne dɛw wɔ N’enyim no mã. Yɛdze dɛm asɔfodzi yi, na nsaafee a ɔma asɔfodzi dwuma no kwankyerɛ no, tumdzi na nhyehyɛɛ wɔ Asɔr no mu.

Asɔr no mu no, asɔfodzi tumdzi nyinara no wɔdze dzi dwuma wɔ hɔn a wokitsa asɔfodzi nsaafee no hɔn kwankyerɛ ase.

“Asɔrmba mbanyin a wɔfata dua asɔfodzi a wɔdze ma na asɔfohyɛ kɔ asɔfodzi dzibew do dze gye asɔfodzi tumdzi. Asɔrmba nyina botum dze tumdzi a wɔdze ahyɛ hɔn nsa edzi dwuma ber a woeyi hɔn esi hɔ anaa wɔafrɛ hɔn dɛ wɔmboa nyɛ Nyankopɔn N’edwuma.”

Ɔnam asɔfodzi nsaafee do no, Ewuradze N’ehiadze horow bedzi nyim. Obiara nnkotum awɔw ankorankor gyinabew bi do a ɔnye Ne kwankyerɛ nnsaa do. Obiara nnkotum edzi nyim wɔ asɔfoɔtorsom mu, rohwehwɛ ankorankor apɛdze na ankorankor akadofo.

Asɔfodzi dzi dwuma tsitsir so wɔ Asɔrmba efiefi mu. President Dallin H. Oaks, Ɔpamfo a Odzi Kan wɔ President a Odzi Kan na n’Apamfo mu kyerɛkyerɛ no dɛ “asɔfodzi tumdzi no wobotum dze edzi dwuma nko wɔ onyia okitsa asɔfodzi nsaafee ma dɛm dwumadzi no kwankyerɛ ase no yɛ fapem nhyehyɛɛ wɔ Asɔr no mu, mbom onndzi dwuma wɔ ebusua mu.” Egyanom hwɛ na wɔdze asɔfodzi no dzi dwuma wɔ hɔn ebusua mu—rotu fo, reyɛ ebusua ehyiadzi horow, rema ebusuafo anaa binom asɔfodzi anaa ayarsa nhyira, na dza ɔkeka ho—a ɔnndze kwankyerɛ anaa tumdzi a ofi nyia okitsa asɔfodzi nsaafee.

“Nkyerɛkyerɛ kor yi ara dzi dwuma ber a egya no nnyi fie na enã no nye ebusua no baanodzinyi no. Ɔhwɛ ne fie no do na ɔyɛ edwindze dze asɔfodzi tumdzi na nhyira dua n’endowment na nsɔwano mu dze ba n’ebusua mu.”

Asɔfodzi: Tum a wɔdze Hyira

Sɛ itwa no tsia a, asɔfodzi tumdzi na tum a Jesus Christ dze saan ananmu bae no botae nye dɛ obehyira. Ɔboa Asɔrmba ma wɔdze Nyankopɔn no tum dzi dwuma som na wohyira binom wɔ asɔr no mu, wɔ fie, na wɔ wiadze nyina mu. Asɔrmba ka Agyenkwa no ho ma ɔyɛ Ne nkwagye na nkwagye ntowdo edwuma, ber a wɔdze sunsum mu akyɛdze na tum a ɔbor hɔn dze do boa ma Nyankopɔn n’ahenman nyin hyɛ asaase no do mã (hwɛ Nkyerɛkyerɛ na Ahyɛmudzi 65:2, 5–6).

Ewuradze akyerɛkyerɛ mu dɛ “na asɔfodzi a ɔkrɔn yi na wɔdze dzi asɛmpa no ho dwuma na wɔdze kura ahenman n’esumasɛm saafee no, dza ɔyɛ Nyankopɔn no ho nyimdzee saafee no.

“Dɛm ntsi, wɔ ayɛdze yi mu na nyamesu mu tum no da edzi.

“Na sɛ wokwetsir dɛm ayɛdze nye asɔfodzi tumdzi yi a, nyamesu mu tum rennda edzi mma adasa wɔ honam mu” (Nkyerɛkyerɛ na Ahyɛmudzi 84:19–21).

Ayɛdze horow, ampaara, yɛ asɔfodzi guado-ndzeyɛe anaa sacrament horow a yedua do nye Nyankopɔn yɛ ahyɛmudzi horow, a enuma dzi kan na ahyɛmudzi horow a wɔgye no Ewuradze ne fie toa do. Yerisie dɛm ahyɛmudzi horow yinom mu na yɛsesa fi “honam” mu mbanyin na mbaa bɛyɛ ahotseweefo (hwɛ Mosiah 3:19) ɔnam Christ no werdam adom do na yedzi bem na hɛn ho san wɔ Nyankopɔn enyim (hwɛ Nkyerɛkyerɛ na Ahyɛmudzi 20:29–31; 3 Nephi 27:16–20).

Ɔserɛkã a ofi “Jesus Christ N’Asɛmpa no ne Mãhyɛ ne Nsananan mu no: Mfe Ahaebien Afrenhyia Dawurbɔ ma Wiadze,’’ a President a Odzi Kan na n’Apamfo na Asomafo Abaguafo Duebien no kaa no tsia ara yie:

“Yɛbɔ no dawur dɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no, a wɔkyekyeer no Ebɔbira 6, 1830, nye Christ N’Ahyɛmu Fofor Asɔr no a wɔdze asan anamu aba no. Asɔr no tsim no kotowdo-bo tsitsir, Jesus Christ N’emudzi abraba do, na No Werdambɔ a ɔmmbɔadze da na No Wusoɛr ampaara no do. Jesus Christ asan afrɛ Asomafo bio na Ɔama hɔn asɔfodzi tumdzi. Ɔto nsa frɛ hɛn nyina dɛ yɛmbra Ne nkyɛn na N’Asɔr mu, mbɛgye Sunsum Krɔnkrɔn no, nkwagye ayɛdze horow, na yenya daapem enyigye.”