Imibɔ-eridiɔŋ oto Unen ye Odudu Itie-oku

Etop otode Elder D. Todd Christofferson

Eke Eboho mme Apostle Duopeba

Elder Christofferson ekpep ke edɔhɔ mbon Ufɔk Abasi ete eda odudu Abasi enam-ŋkpɔ enyuŋ ediɔŋ mbon efen ke Ufɔk Abasi, ke ufɔkiduŋ, ye ke ofuri ererimbot.

Ntiense emi nnyin inɔde ererimbot edi ke edisana itie-oku eke Abasi edi akpan-ŋkpɔ ke ndinam utom erinyaŋa-ukpɔŋ ye edimenede ŋkure, ke Enye ama-afiak ayak itie-oku ɔnɔ edi ke isɔŋ ke ntak-ufɔn oro, ndien ke Ufɔk Abasi Jesus Christ Mme Ndisana Owo ke Ukperedem Usen eda oro enam utom.

Ufɔn-edinyene Unen ye Odudu Itie-oku

Jesus Christ edi andida-ibuot ke Ufɔk Abasi. Ufɔk Abasi edi ŋkɔ-utom emi Enye okobotde ndinam akpan utom erifak ubonowo ke akpatre emana ikɔ-Abasi emi ŋkure ukem nte ekedide ke emana eke ini emi Enye okodude ke isɔŋ. Otode ke Ufɔk Abasi:

Enye ekeme edikwɔrɔ ikɔ-Abasi Esie ke ofuri ererimbot.
Enye ekeme edinɔ uduɔk-mmɔŋ ye kpukpru ediomi eken—kpa ediomi eke usuŋ emi akade obio-ubɔŋ celestial Esie.
Enye ekeme ndidian mme ufɔkemana ke nsinsi.
Enye ekeme edinɔ mme enɔ erinyaŋa, kpa edinɔ esɔk mbon emi ema ekekpaŋa emi mikibɔhɔ enɔ oro.
Enye ekeme ediŋwam ke mme unana ikpɔkidem eke nditɔ Abasi emi edude idahaemi.

Man inam ikpɔ utom emi ikure, inyuŋ ibeŋe-idem inɔ erifiak-ndi eke Andinyaŋa, Ufɔk Abasi eyom ŋka-iso ndausuŋ, unen, ye odudu. Ufɔk Abasi emi edi “akpanikɔ ye odu-uwem ufɔk Abasi” (Doctrine ye Covenants 1:30) koro Christ owuk enye ke ndausuŋ ye odudu Esie oto ke itie-oku Esie, “Edisana Itie-oku, etienede Ubono-ŋkpɔ Eyen Abasi” (Doctrine ye Covenants 107:3).

Mikpidighe edisana itie-oku emi, Ufɔk Abasi okponyuŋ edi nte ŋka kiet, emi enamde eti-ŋkpɔ ke ererimbot edi anana-odudu ndinam ata ufɔn eke edibeŋe nditɔ irenowoye iban eke Abasi nnɔ edinyene idara eke nsinsi uwem ke iso Esie. Ye itie-oku emi, ye mme ukpɔhɔde man enam utom itie-oku emi, odu unen ye ubono-ŋkpɔ mbiba ke Ufɔk Abasi.

“Ke Ufɔk Abasi, kpukpru unen itie-oku emi edade enam ŋkpɔ edi ke idak ndausuŋ eke mbon emi ekamade mme ukpɔhɔde itie-oku.

“Irenowo Ufɔk Abasi emi edotde ebɔ unen itie-oku eto ke edinɔ itie-oku ye dimek nsin ke mme itie-utom eke itie-oku. Ofuri mbon Ufɔk Abasi ekeme edikama unen emi ekenɔde ke nte esiode mmɔ enim mme edɔŋde mmɔ ete eŋwam man enam utom Abasi ekure.”

Otode ke ukpɔhɔde itie-oku, kpukpru ini eyekan enam se Jehovah akaduakde. Iduhe owo ndomokiet emi ekemede ndinam ekikere idemesie emi misaŋake ye ndausuŋ Esie. Iduhe owo ndomokiet emi edidade ŋkari-ifɔt ikut-unen, ke oyomde udori idemesie ye nditiene usuŋ idemesie.

Itie-oku ŋko enyene akpan utom ndinam ke ufɔkiduŋ eke mbon Ufɔk Abasi. President Dallin H. Oaks, Akpa Ͻnɔitem ke Akpa Presidency, ekekpep ke, Ukpepŋkpɔ ete ke unen itie-oku ke ekeme ndida nam-ŋkpɔ kpɔt ke idak ndausuŋ eke enye emi akamade mme ukpɔhɔde koro utom oro edi akpan-ŋkpɔ ke Ufɔk Abasi, edi emi itibeke ke ufɔkemana.” Mme ete etie-ibuot enyuŋ enam-utom itie-oku ke ufɔkiduŋ mmɔ—edinɔ-item, edinim mme esop ke ufɔkemana, edinɔ mme eridiɔŋ itie-oku mme eke erikɔk-udɔŋɔ nnɔ mbon ufɔkemana mme mbon efen, ndien eka-iso—ke mibɔhɔ ndausuŋ mme edibɔ-unen nto owo andikama mme ukpɔhɔde itie-oku.

“Ukem ubono-ŋkpɔ emi odu kini ete miduhe ndien eka edi ada-ibuot ke ufɔkemana. Enye ada-ibuot ke ufɔk esie onyuŋ edi ŋkpɔ-utom ke ndida odudu ye eridiɔŋ eke itie-oku nsin ke ufɔkemana esie otode endowment ye edidian-kiet esie ke temple.”

Edifiak-mmen Itie-oku ndi ke Eyo Nnyin emi

May 15, 1829

Edifiak-mmen unen itie-oku ndi ke akpatre emana emi ɔkɔtɔŋɔ ke nnen-nnen, nde-ke-nde ŋka-iso kiet. Nte eritɔŋɔ ŋwed Abasi kiet ke emana nnyin emi, Ŋwed Mormon, emi ekebarede ke 1829, Jehovah ama ɔtɔŋɔ ndinim ubono-ŋkpɔ eke itie-oku Esie ke itie. Ke edibɔrɔ akam ebeŋe eke Joseph Smith ye Oliver Cowdery kabaŋa uduɔk-mmɔŋ, John the Baptist emi ekesetde ama ɔbiɔŋɔre onyuŋ ayak Itie-oku Aaron ɔnɔ mmɔ, itie-oku emi “akamade mme ukpɔhɔde ukwɔrɔ ikɔ eke mme angel, ye eke ikɔ-Abasi ŋkabare esit, ye eke uduɔkmmɔŋ ke edinyeyin kabaŋa erifen ke idiɔkŋkpɔ” (Doctrine ye Covenants 13:1). Ye unen oro, Joseph ye Oliver ema enim kiet eken baptism ndien edikem enam enɔ mbon efen ke nte enehede esiak Ufɔk Abasi.

Ibighike ke ebede May 15, 1829

Ikibighike ke edibiɔŋɔre eke John the Baptist ebede, mme Apostle Peter, James, ye John eke eyo-eset edibiɔŋɔre enyuŋ eyak mkpon-nkan odudu, mme Melchizedek enɔ, itie-oku, esinede mme ukpɔhɔde obio-ubɔŋ mi, ye emana ikɔ-Abasi enɔde … ke uyɔhɔ ini” (Doctrine and Covenants 27:13; se ŋko 128:20).

April 3, 1836

Mme ndadiana unen itie-oku efen ama etiene edi kini, edude ke Kirtland Temple, mme prophet eyo-eset ita, Moses, Elias, ye Elijah, edibiɔŋɔre enɔ Joseph ye Oliver enyuŋ eyak mme ukpɔhɔde editaŋ Israel mbok ye utom emi abaŋade mme temple Jehovah enɔ. (se Doctrine ye Covenants 110:11–16).

Ini-ndaeyo eke 1829–April 1835

Mme eriyarare emi idahaemi esɔŋɔde esin ke Doctrine ye Covenants ama eteme Prophet Joseph Smith kabaŋa ndimek irenowo nsin ke mme itie-utom eke mme akamba (Melchizedek) ye edibeŋe (Aaron) itie-oku; edimek mme anam-utom itie-oku, utɔ nte mme bishop; ye edibono mme eboho itie-oku ye mme esop-mbono.

1835–1973

Ndausuŋ eke prophet akaka-iso ndikpeme editum itie-oku ye utom ke Ufɔk Abasi Nte uwutŋkpɔ, ema ebono mme eboho eke mme Seventy ke eyo Kirtland ndiŋwam mbon Eboho Duopeba. Ke akwa ediwɔrɔ nka Usoputin ye edisuan mbon Ufɔk Abasi ŋkanare akpakip ebiet, ekenɔ mme eboho emi ubiɔŋutom ndinam ke mme stake eke Ufɔk Abasi.

1973–Idahaemi

Ke idak ukara eke mme President Spencer W. Kimball (1895–1985), Ezra Taft Benson (1899–1994), ye Gordon B. Hinckley (1910–2008), mbon Seventy ye mme eboho mmɔ ema etɔŋɔ ndinam utom ke idak mbon Eboho Duopeba ke ofuri ndaha ke Ufɔk Abasi ye ke mme ebiet Ufɔk Abasi. Edikem ema etre mme Eboho edidu ke ndaha eke stake. Mfin emi, mme eboho duopeba eke General Authority ye mme Area Seventy eŋwam mme Apostle “ke edida-usuŋ ke ufɔk Abasi nyuŋ nnam kpukpru mbubehe ke ukem usuŋ ke ofuri idut” (Doctrine ye Covenants 107:34). Ekeme edinim mme ndadiana eboho mme Seventy efen ke nte Ufɔk Abasi atarade.

Elder Christofferson ɔkɔmde mme brother Sampson ye Daniel Amako ke Gambia, West Africa, ke February 2022.

Itie-oku: Odudu ndinɔ Eridiɔŋ

Ke ikɔ kiet, ufɔn unen ye odudu itie-oku emi Jesus Christ akafiakde-ɔnɔ-edi edi ndinɔ eridiɔŋ. Itie-oku oro ɔnɔ mbon Ufɔk Abasi ukeme ndida odudu Abasi nnam-ŋkpɔ nyuŋ ndiɔŋ mbon efen ke Ufɔk Abasi, ke ufɔkiduŋ, ye ke ofuri ererimbot. Mbon ufɔk Abasi ediana ye Andinyaŋa ke ndinam utom erinyaŋa ye edimenede Esie ŋkure, ke edade ndisana enɔ ye odudu emi akande eke mmɔ ndiŋwam man obio-ubɔŋ Abasi ɔkɔri ɔyɔhɔ isɔŋ (se Doctrine ye Covenants 65:2, 5–6).

Jehovah akanam aŋwaŋa ke “akamba itie-oku [Melchizedek] anam-utom ikɔ-Abasi onyuŋ akama mme ukpɔhɔde eke mme ndedibe-ŋkpɔ eke obio-ubɔŋ, kpa ukpɔhɔde eke mbufiɔk Abasi.

“Mmɔdo, otode ke mme edinam emi, ke eyarare odudu nditie nte Abasi.

“Ndien ke mme edinam emi, ye unen itie-oku miduhe, odudu Abasi idiyarakede idemesie inɔ nditɔ-owo ke ikpɔkidem” (Doctrine ye Covenants 84:19–21).

Mme-edinam ke akpanikɔ, edi mme edinam mme udia-ɔbɔŋ emi edade itie-oku enam emi nnyin inamde ediomi ye Abasi, ɔtɔŋɔde ke uduɔk-mmɔŋ onyuŋ akaka-iso ebe ekesim ediomi edibɔde ke ufɔk Jehovah. Edi ke ndinim mme ediomi emi ke edikpuhɔ nnyin isio ke “owo nte obot” irenowo ye iban esin ke ndisana owo (se Mosiah 3:19) oto ke mfɔn nwaidem Christ ndikabare nnyene-unen ye edinam-asana—inanade-ndudue ye ndo—ke iso Abasi (se Doctrine ye Covenants 20:29–31; 3 Nephi 27:16–20).

Ikɔ-ibuot emi otode “Edifiak-mmen Uyɔhɔ Ikɔ-Abasi Jesus Christ ndi: Etop ɔyɔhɔ Isua Ikie-Iba emi enɔde Ererimbot,” otode Akpa Presidency ye Esop eke Apostle Duopeba, ediwut ke ibio-ibio ikɔ emi ekemde ete:

“Nnyin itiŋ ke Ufɔk Abasi Jesus Christ Mme Ndisana Owo ke Ukperedem Usent, emi eketɔŋɔde ke April 6, 1830, edi Ufɔk Abasi Christ eke Obufa Testament emi ekefiakde-emen-edi. Ufɔk Abasi emi ɔkɔŋɔ ke nsana-mma uwem akan itiat-inuk esie, Jesus Christ, ye ke anana-adaŋa Erisio-isop ye ata Eriset Esie. Inikiet efen Jesus Christ ama afiak okot mme Apostle onyuŋ ɔnɔ mmɔ unen itie-oku. Enye okot kpukpru nnyin ete edi itiene Enye ye Ufɔk Abasi Esie, man ibɔ Edisana Spirit, edinam erinyaŋa, man inyene nsinsi idara.”

© 2025 eketode Intellectual Reserve, Inc. Ekpan kpukpru unen ndimiŋ ŋwed emi. Ekemiŋ ke USA. Enyime ndikabare ke Ikɔ Mbakara: 6/19. Enyime ndikabare: 6/19. Edikabare Ɔfiɔŋ-ke-ɔfiɔŋ Etop Liahona, Ɔyɔhɔ Ɔfiɔŋ Usukkiet 2025. Efik. 19604 553