Efeioch seni Manamanen me Mumutan Pristut

Jises Kraist me ewe mokuren ewe Mwichefen. Ewe Mwichefen mi ewe pisek I a fen forata an epwe ounusochuono ewe ouchean angangen amanaua aramas non ei omuchunon fansoun kapas allim ussun chok non ewe fansoun nupwen I a nom won ei fonufan. Seni ewe Mwichefen:

• I a tongeni aporousa An Kapas Allim non unusen fonufan.

• I a tongeni awora papatais me meinisin ekkoch pwon mi pin—pwan mo ew anen pwon ngeni An muun selestial

• I a tongeni ochufengeni famini fochofoch.

• I a tongeni awora niffangen amanaua, pwan mo ngeni ekkana ra mano nge ese wor rer.

• I a tongeni iamwiri ekkewe mi osupwang non pekin inis ren noun Kot kewe semirit non ei fansoun.

Ne awesano ekkei watten popun, me ne amonata ren An ewe Chon Amanau niwinsefan, ewe Mwichefen a mochen An Kot soposoponon emwen, mumuta, me manaman. Ewe Mwichefen mi ewe “ennetin mwichefen mi chok soposopono” (Doctrine and Covenants 1:30) pokiten Kraist pusin a awora tufichin fiti An emwen me manaman seni An pristut,”ewe Pristut mi Pin, mwirin ewe Eteten an ewe Noun Kot” (Doctrine and Covenants 107:3).

Nge ren ei pristut mi pin, ewe Mwichefen epwe wesewesen ew mwicheich ese anongonong won mettochun namanam, fori mi murinno non ewe fonufan nge ese wor an pochokun ne tikeri ewe omuchunon popun amonata kewe at me nengin noun Kot ren ewe pwapwan manau ese much mi nom ren I. Fiti ei pristut, me ekkewe ki an epwe emweni ewe angangen ei pristut, mei wor ir me ruu mumuta me tetenin non ewe Mwichefen.

“Non ewe Mwichefen, meinisin mumutan pristut a fis angangan fan ewe emwen an ekkana ra omochu ekkewe kien pristut.

“Ekkewe mwan chon ei Mwichefen mi nimenimoch ra angei mumutan ewe pristut ren ar ra ewis ngenir wiser me seikita ngeni kewe wis non ewe pristut. Meinisin chon Mwichefen ra tongeni omokutu ewe mumuta ika wis Kot a ngenir nupwen ra ewisa ngenir wiser ar repwe aninis ne awesano An Kot angang.”

Seni kewe kien pristut, an ewe Samon kewe tetenin auchean mettoch repwe okufu chon u ngeni fansoun meinisin. Ese wor emon epwe apochokuna ika anisi an emon kokot ika popun minne ese fiti tipeewin An emwen. Ese wor emon epwe tongeni fetanoch non mokutukutun prist, kutta tufichir won pusin winikaper, me pusin porousen emon won winikapan.

Pristut a pwan omokutu ew wis non ekkewe imwen chon ewe Mwichefen. Preseten Dallin H. Oaks, Aemonun Chon Aninis non ewe Aewin Presetensi, a aitikich,“Ewe nongonong minne mwumwutan pristut a tongeni angang chok fan emwenien ewe emon a kamoch ekkewe kiien ena angang mi namwot non ewe Mwichefen, nge ei nongonong ese pwan kuu non ewe famini.” Semenap ra nemeni me anganga ewe pristut non ar famini—kapasen ourour, fori mwichen famini, awora pristut ika efeiochun echikara ngeni chochon we famini ika ekkoch, me pwan ekkoch—nge ese wor ewe emwen ika mumuta an emon a omochu kewe kien pristut.

“Pwan ewe chon nongonong a pwan fis nupwen emon sam ese nom me emon iin a wisen emweni ewe famini. Neminewe a wisen nemeni an famini non imwan me a auchea pwe epwe awora ewe manaman me feiochun ewe pristut ngeni an famini me ren ewe endowment me riri fengen non ewe tempel.”

Pristut: Ewe Manaman ngeni Efeioch

Non ew kapas, ewe popun ewe mumutan pristut me manaman minne Jises Kraist a eniwinsefanieto an epwe efeioch. A otufichi chon Mwichefen ar repwe aea ewe manamanen Kot non anisi me efeiochu ekkoch non ewe Mwichefen, non imw, me unusen ewe fonufan. Memper ra fiti ewe Chon Amanau non kawesinon An angangen amanaua me manau mi tekia, anganga kewe niffang seni nang me manaman towaw seni pekinon ar pusin anisi ewe muun Kot marino ar repwe amasowa ewe fonufan (nengeni Doctrine and Covenants 65:2, 5–6).

Ewe Samon a fen awewei pwe “ei wachemuken [Melkisetek] a tumunu mokuto monomon non ewe muu, pwan ewe kien ewe miritin Kot.

“Ina minne, non ekkewe angangepin, ewe manamanen Kot a pwano.

“Iwe ika ese wor ekkewe angangepin, me ewe mumutan ewe pristut, ewe manamanen Kot esap pwano ngeni aramas non pekin inis” (Doctrine and Covenants 84:19–21).

Ekkewe angangepin, ewer, ir ekkewe angang mi pin ika sakrament ren minne sia fori kewe pwon mi pin ngeni Kot, poputa ren papatais me sopweno meren kewe pwon mi pin sia angei me non ewe imwen ewe Samon. Iei non aponuetan ekkei annuk mi pin pwe sia siwinino seni “ewe chon koum ngeni Kot,“ mwan me fefin ra winiti souneng (nengeni Mosiah 3:19) seni ewe umoumochun achasefan an Kraist me winiti ir me ruu pungoch me epinipinino—ese wor tipis me nimenimoch mwen mesen Kot (nengeni Doctrine and Covenants 20:29–31; 3 Nephi 27:16–20).

Ei porous sia pin rong seni “Ewe Niwinsefaniton ewe Unusen ewe Kapas Allimen Jises Kraist: Ew Minefon Esinesin ngeni ewe Fonufan,” seni ewe Aewin Presetensi me Mwichen Soupungun ekkewe Engon me Ruemon Aposel, a pwarano ew menapen porousen met emon e apasa ika fori.

“Aua pwarata pwe Ewe Mwichefenin Jises Kraist ren Aramas mi Pin non Fansoun Soponon, minne a fisita non April 6, 1830, iwe a An Kraist we Mwichefen non ewe Testamen Sofo mi niwinsefan. Ei Mwichefen mi nukuchar non unusochun manauen foun nongonongun we, Jises Kraist, me non An Achasefan esemuch me wesewesen Manausefan. Jises Kraist a pwan kori sefani Aposel me ngenir mumutan pristut. A korato kich meinisin pwe sipwe feito Ren me An Mwichefen, ach sipwe angei ewe Ngun mi Fel, ekkewe angangepin ren amanaua, me angei pwapwa esemuch.