Te parau mau o tō tātou orara’a

Tā tātou mā’imira’a i te parau mau

I teie tau tā tātou e ora nei, e noa’a ia tātou te rāve’a ’ia ’ite rahi atu ā i nā mua a’e nei. I te tau i mā’iri, mai te peu e hina’aro ’oe e ’ite i te hō’ē ’ohipa, e ti’a ia ’oe e haere i te fare vaira’a buka ’e e rave i te mau mā’imira’a. I teie mahana, tē hōro’a mai nei te natirara ’e te mau rāve’a ’āfa’ifa’i ia tātou i te rahira’a fātata i te hopera’a o te mau ha’amāramaramara’a, e roa’a fātata i te reira iho taime.

Tē ’oa’oa nei te Fatu ’ia fa’a’ohipa ana’e tātou ma te pa’ari i te mau rāve’a e vai ra ia tātou, ’ua hōro’a mai rā ’oia i teie parau a’o fāito ’ore : « ’A ha’api’i atu te tahi i te tahi i te mau parau nō te pa’ari ; ’oia ïa, ’a ’imi na ’outou i roto i te mau buka maita’i roa a’e i te mau parau nō te pa’ari ; ’a ’imi ho’i i te ’ite, ’oia ïa nā roto i te ha’api’i ’e nā roto ato’a i te fa’aro’o » (Te Ha’api’ira’a Tumu ’e te mau Fafaura’a 88:118). Tē fa’aitoito nei ’oia ia tātou ’ia ha’api’i mai nō ni’a i te ao ’ati a’e ia tātou (hi’o Te Ha’api’ira’a Tumu ’e te mau Fafaura’a 88:79 ; 93:53), i roto rā i tā tātou ’imira’a i te parau mau, e ti’a ia tātou ’ia hi’o i te Atua, ’o tei « māramarama i te mau mea ato’a, ’e tei mua iāna te mau mea ato’a, …’e tei ni’a a’e ’oia i te mau mea ato’a, … ’e nāna te mau mea ato’a, ’e nōna ho’i » (Te Ha’api’ira’a Tumu ’e te mau Fafaura’a 88:41).

I roto i te mau parau mau tā te Atua i hōro’a mai ia tātou, hō’ē o te mea tītau-rahi-roa-hia nō tō tātou orara’a i te fenua nei, ’oia ho’i ’o ’oia tō tātou Metua i te ao ra. E mau tamāroa ’e e mau tamāhine vārua tātou nāna. ’Ua ’ite ’e ’ua here maita’i roa ’oia ia tātou. ’E ’ei mau tamari’i vārua nāna, e nātura ’e e hope’ara’a hanahana tō tātou. Te hāro’aro’ara’a ’e te tauahira’a i teie mau parau mau mure ’ore e hōro’a mai ia tātou i te hīro’a, te faufa’a ’e te ’ōpuara’a ’o te ha’amaita’i ’e ’o te arata’i ia tātou i roto i tō tātou orara’a hou teie orara’a, ’e ’o te tāmau noa i te nā reira i teienei ’e a muri atu.

Tei pīha’i iho tātou i te Metua i te ha’amatara’a

’A ’imi ai tātou i te parau mau o te mau mea « mai tō rātou vaira’a », e ’ite mai tātou i teie mau parau nā roto mai i tō tātou Fa’aora, ’o Iesu Mesia : « ’E i teienei, ’oia mau tē parau atu nei au ia ’outou na, i te Metua ra vau i te mātāmua, ’e ’o vau te Matahiapo », ’e « tei te Metua ato’a ra ho’i ’outou i te ha’amatara’a » (Te Ha’api’ira’a Tumu ’e te mau Fafaura’a 93:21, 23).

Hou tō tātou orara’a i ni’a i te fenua nei, ’ua ’āmui atu tātou i te hō’ē ’āpo’ora’a i te ra’i ra, i reira tō tātou Metua i te ao i te vauvaura’a mai ia tātou i tāna fa’anahora’a rahi o te ’oa’oa. ’Ua ha’api’i te peropheta Iosepha Semita ē, te fa’aitoitora’a a te Atua nō tāna fa’anahora’a ’o te hōro’ara’a mai ia tātou « te ha’amaita’ira’a ’ia haere i mua mai iāna [’e] ’ia fa’ateiteihia iāna iho ». Tāna ’ohipa ’e tōna hanahana ’o « te fa’atupura’a i te tāhuti ’ore ’e te ora mure ’ore o te ta’ata nei » (Mose 1:39).

’Ua fa’a’ohipa tātou i tō tātou ti’amāra’a ’e ’ua mā’iti ’ia pe’e i te fa’anahora’a a te Metua i te ao ra. ’Ua ha’amaita’ihia tātou ’ia fānauhia i roto i teie orara’a, i reira tātou e tāmau noa ai i te fa’ari’i i te ti’amāra’a ’e ’ia nehenehe tātou e ora i te mau ’ohipa o te tāhuti nei, ’ia ha’api’i mai ’e ’ia haere i mua i te ora mure ’ore.

I te roara’a o tō tātou tere i te tāhuti nei, e ora tātou i te mau tāmatara’a ’e te mau fifi. ’Aita rā tātou e tītauhia ’ia fa’aruru tātou ana’e i te ’ati o te orara’a. ’Ua ha’api’i Iosepha Semita ē, te Metua i te ao ra « te Metua rahi nō te ao nui [,] e hi’o ra i te tā’āto’ara’a o te ’utuāfare ta’ata nei, ma te poihere ’e te fa’atura o te metua tāne ».

Tō tātou Metua i te ao ra, « te Metua o te aroha, ’e te Atua nōna ana’e te tāmāhanahana » e ha’amaita’i ia tātou, e fa’ateitei ia tātou ’e e tāmāhanahana ia tātou « i tō [tātou] mau pohe ato’a nei, ’ia ti’a ia [tātou] ’ia ha’amahanahana i te feiā i ro’ohia i te pohe ra, i te mahanahana a te Atua i mahanahana ai [tātou] » (2 Korinetia 1:3–4). ’Ei tuha’a faufa’a rahi nō tāna fa’anahora’a, ’ua hōro’a mai te Metua i te ao ra ia tātou i te rāve’a nō te ho’i iāna ra.

Te ’ē’a i tō tātou Metua

Te parau mau « o te mau mea e vai nei » (Iakoba 4:13) e mea māramarama ïa : e’ita tātou e tāpae i tō tātou fāito pūai hope ’ei mau tamari’i nā tō tātou Metua i te ao ra, ’o tātou ana’e. ’Ua fafau Iesu Mesia, te Tamaiti Fānau Tahi a te Metua i roto i te vārua, ’ia riro ’ei Fa’aora ’e ’ei Tāra’ehara nō tātou.

Iesu Mesia, « te Fānau tahi a te Metua, tei ’ī i te aroha ’e te parau mau, ’oia i te Vārua o te parau mau, … tei haere mai ’e ’o tei pārahi ho’i i roto i te tino nei, ’e ’o tei fa’aea i rotopū ia tātou » (Te Ha’api’ira’a Tumu ’e te mau Fafaura’a 93:11). ’Ua haere mai ’oia nō te fa’a’ite ia tātou i te ’ē’a nō te ’ite mai i te poupou, te aura’a ’e te ’oa’oa i roto i teie orara’a ’e i roto i te tau mure ’ore.

« I aroha mai te Atua i tō te ao, ’e ’ua tae roa i te hōro’a mai i tāna Tamaiti fānau tahi, ’ia ’ore ’ia pohe te fa’aro’o iāna ra, ’ia roa’a rā te ora mure ’ore.

« ’Aore ho’i te Atua i tono mai i tāna Tamaiti i te ao nei e fa’ahapa mai i tō te ao, ’ia ora rā tō te ao iāna » (Ioane 3:16–17).

E mea faufa’a roa te ’ohipa i tupu nō te Fa’aora i te fenua nei. ’Aita ’oia « i fāri’i i te īra’a i te mātāmua, ’ua fāri’i rā i te maita’i i muri a’e i te maita’i » (Te Ha’api’ira’a Tumu ’e te mau Fafaura’a 93:12). ’Ua tupu rahi ’oia e tae roa « ’ua fāri’i ’oia i te ’īra’a o te hanahana o te Metua » ’e « te tā’āto’ara’a o te mana, i tō te ao ra ’e i tō ni’a i te fenua nei, ’e tei iāna te hanahana o te Metua, nō te mea i pārahi na ’oia iāna » (Te Ha’api’ira’a Tumu ’e te mau Fafaura’a 93:16–17). ʼUa haʼapiʼi te Faʼaora :

« Tē hōro’a atu nei au i teie mau parau ia ’outou ’ia māramarama ’outou ’e ’ia ’ite ho’i nāhea ’ia ha’amori, ’e ’ia ’ite e aha tā ’outou e ha’amori, ’ia ti’a ia ’outou ’ia haere mai i te Metua i roto i tō’u nei i’oa, ’e ’ia fāri’i i tōna ’īra’a i te tau i ha’apa’ohia.

« Nō te mea ’ia ha’apa’o ’outou i tā’u mau fa’auera’a e fāri’i ïa ’outou i tōna ra ’īra’a, ’e e fa’ahanahanahia ho’i i roto iā’u mai iā’u nei ho’i i roto i te Metua ; nō reira, tē parau atu nei au ia ’outou, e fāri’i ’outou i te maita’i i muri a’e i te maita’i » (Te Ha’api’ira’a Tumu ’e te mau Fafaura’a 93:19–20).

I roto i te ’ō nō Getesemane ’e i ni’a i te sātauro, ’ua rave Iesu Mesia i ni’a iho iāna i te mau hara o te ao nei ’e ’ua mamae i te mau ’oto ato’a ’e « te mau māuiui ’e te mau ’ati, ’e te mau huru fa’ahemara’a ato’a » (Alama 7:11). Nā te reira « i fa’atupu i roto [iāna]… ’o tei hau a’e i te mau mea ato’a ra, i te rurutaina nō te māuiui, ’e ’ua tahe mai ra te toto nā te mau poa ato’a » (Te Ha’api’ira’a Tumu ’e te mau Fafaura’a 19:18). Mea nā roto ana’e ia Iesu Mesia, tāna tāra’ehara ’e tōna ti’afa’ahoura’a e noa’a ai te fa’aorara’a ’e te fa’ateiteira’a.

Nā roto i te maita’i rahi ’e te tusia tāra’ehara a te Fa’aora, tātou e nehenehe ai e tupu rahi ē tae roa e fa’ari’i tātou i te ’īra’a ’e ’ia tae i te hō’ē mahana i te maita’i-roa-ra’a. Mai te mea e pe’e tātou i te hi’ora’a o te Fa’aora ’e e ha’apa’o i tāna mau fa’auera’a, e ’āfa’i ’e e arata’i ’oia ia tātou i ni’a i te ’ē’a ho’ira’a i mua i te aro hanahana o tō tātou Metua i te ao ra.

Te Mesia i ni’a i te purūmu o Ierusalema, nā Michael Coleman, ’eiaha e tāhōho’a

E fa’ari’i ānei ’outou i tāna hōro’a ?

I roto i te mau parau mau « o te mau mea e vai nei » (Iakoba 4:13), tē ha’api’i mai nei tātou ē, tō tātou ’itera’a i roto i te tau mure ’ore e fa’ata’ahia e tā tātou mā’itira’a ’ia pe’e ia Iesu Mesia ’e ’ia fa’ari’i i te mau hōro’a tāna e pūpū mai. Tē ha’api’i nei te mau pāpa’ira’a mo’a ē, e « ’oa’oa [tātou] i te au ia [tātou] ’ia fāri’i ». Te mea ’oto rā, e’ita vetahi e « ’oa’oa i te mea tā rātou i ti’a ia rātou ’ia fāri’i » (Te Ha’api’ira’a Tumu ’e te mau Fafaura’a 88:32).

’Ua ha’api’i tō’u peresideni misiōni, ’o Elder Marion D. Hanks (1921–2011), ’o tei tāvini ’ei Hitu ’Ahuru huimana fa’atere rahi i tāna mau misiōnare ē, te anira’a i te mea tā tātou e au ’ia fa’ari’i ’e e ’oa’oa ’o te hō’ē ïa rāve’a e nehenehe ai tātou e ha’avā, tei hea ra tātou i roto i tō tātou haere’a pae vārua. « Nō te mea e aha ihora ïa te ta’ata e faufa’ahia ai mai te mea e tu’uhia mai te tao’a hōro’a iāna, ’e ’aita ’oia e fāri’i mai i te reira ? ’A fa’ari’i ai tātou i te mau hōro’a a te Fa’aora ma te ’imi-pāpū-ra’a ’e te pe’era’a iāna, e ’oa’oa tātou i te tīa’ira’a i te ora mure ’ore ’e « iāna ’o tei tu’u mai i te tao’a hōro’a » (Te Ha’api’ira’a Tumu ’e te mau Fafaura’a 88:33). Teie hōro’a ’o tei hōro’ahia mai ma te here « ’o te hōro’a hau a’e ïa i te mau hōro’a ato’a a te Atua » (Te Ha’api’ira’a Tumu ’e te mau Fafaura’a 14:7).

Te Atua ’o tō tātou ïa Metua i te ao ra. ’Ua ’ite ’e ’ua here ’oia ia tātou. ’A fāriu ai tātou i ni’a iāna i roto i tā tātou ’imira’a i te parau mau, e nehenehe tātou e ruru’u atu i te ’ite, ’ia fa’ari’i te pa’ari, ’ia tauahi te parau mau, ’ia here i te vi’ivi’i ’ore, ’e ’ia ruru’u atu i te māramarama nō ’ō mai iāna ra (hi’o Te Ha’api’ira’a Tumu ’e te mau Fafaura’a 88:40). I muri iho e tāmau noa tātou i te ora i tō tātou orara’a ē tae roa i « te mahana e ’ite ai [tātou] i te Atua mau, nō te mea e fa’aorahia [tātou] e ana, ’e nā roto ho’i iāna » (Te Ha’api’ira’a Tumu ’e te mau Fafaura’a 88:49).

’O te mahana hanahana roa a’e ’e te ’oa’oa te reira.