Klemerang el kirel a Klengar Kid

Mla er a Elder Quentin L. Cook

Er a Chelechad er a Teruich me a Terung el Apostol

A oubeltikelreng el Chedam er a Babeluades a mla ocholt a klemrang el kired er chelii, chelechang, me a klukuk, luldimukl er a kmo kede mekera e nguu sel kot el ngarbab er a rokui el sengk.

Chelsel sel kekerei longeru el chellibel, el kosekodel a chelsel delmerab el stouang er a Newel K. Whitney er a beluu er a Kirkland, Ohio, er a January 22, 1833, e a re elders er a Ikelesia a mle kldibel lobengkel a Profet Joseph Smith. Chelsel Ongeteruich me a ongeru el buil er sel mlo merek el rak, e a Joseph a ngiluu chedaol ocholt el mlo uchul eng kildmeklii a blai er a omesuub el kirir a rodam el mo er a mision.

“Ak meskemiu a llach,” ng millekoi a Rubak, “el kmo ng kiriru el olisechakl er a ta me a tang a llach er a rengedek.

“Bol blak a rengmiu lolisechakl e a krasia er ngak a m obengkemiu, me ko mo mosisechakl a uldasou, suobel, me a osisechakl, me a llechul ebangkelio, er a rokui el tekoi el mirel a rengedel a Dios, el ngii a kiriu el mo medengei; …

“Me ko mo kldmokl er a rokui el tekoi sel kluut loldurokl er kemiu el mo er a ureor el bla kumekedong er kemiu el kirel, me a mision el bla kuderchemiu el mo er ngii” (Doctrine and Covenants 88:77–78, 80).

Tial “Omesuub er a Reprofet,” sei a mle ngklel, a milsterir a meang el chedaol teletael. Betok el mengeteklel a Ikelesia er a uchelel a mlosisechakl risei. Chelechal sils e a beluulechad a kmal ngodech el basio, eng di a osisechakl le dilu Rubak er sel taem a kmal dirk melemolem el uaisei. Kid, a dirrek, el kired losiik a llomes me a klemrang “er a ikel ngarngii er chelechang, me a ikel di mla ngarngii, me a ikel mo duubech er medad” (Doctrine and Covenants 93:24).

Sel Sked er a Klemerang

Tial taem el dekiei er ngii er chelechang, eng kmal betok a llomes el ngarngii. A ngaramong, e a lskeum eng soam el mo medengelii a kmo ngerang, eng kirem el mo er a laibreri e osiik. Chelchal sils ea internet me a dengua el dolab er a chimad a meskid a rael el mo er a betok el tekoi el debetik er a mereched el taem.

A Rubak a ungil a rengul sel dungil lousbech a klekedall el ngarngii el kired, eng di Ngii a mla meskid tiakid el tekoi: “Bol blak a rengum el mesuub e mkasisechakl a tekoi er a llomes, mosuub a kote lungil hong a tekoi er a llomes; e mosiik omesuub, mosuub lokiu a klaumerang” (Doctrine and Covenants 88:118). Ngii a mengelechel er kid el mo suubii a beluulechad el dengarngii (mesa Doctrine and Covenants 88:79; 93:53), eng di a sked er a klemrang, a kired lomes el bedul a Dios, el ngii a “medenge rokui el tekoi, le rokui el tekoi a ngar medal, … e ngii a ngarbab er a rokui el tekoi, … le rokui el tekoi a blebelel, e ngii a riruul” (Doctrine and Covenants 88:41).

A tara klemerang el Dios a mla meskid, el tara kot el klou a ultutelel er a klengar kid er a chutem a kmo Ngii a Demad er a Babeluades. Kid a sechal me a redil Ngelekel er a reng. Ngii a medengelkid e kmal betik a rengul er kid. Me kid el Ngelekel er a reng, a chedaol a blebeled. Sel bo dodengei e durrekodel aikal diak a ulebengelel klemerang a meskid a klechad er kid, dongeluolou el tekoi, me a moktek lulmekngeltengat e ulemekrael er kid er sel klengar kid ruchei er a chutem e melemolem el uaisei er chelechang el mo cherechar.

Kid a Ulebnegkel a Chedam er a Uchelel

Me sel dosiik a klemerang er tekoi “er sel di mla teletelel,” e kede metik aikakid el tekingel Osobel, Jesus Kristo: “Chelecha, eak mal subedemiu, ngak a ulebengkel a Chedam er a uchelel, e Kot el Ngelekel,” e “ kemiu me kom dirrek lulbengkel a Chedam er a uchelel” (Doctrine and Covenants 93:21, 23).

Uchei er a klengar kid er a chutem, e kede mla er sel klou el miting er a eanged el Chedam er a Babeluades a ulechotii a Uldesuel kirel a deureng. A Profet Joseph Smith a ulisechakl el kmo a moktek er a Dios er sel Uldesuel a meskid a “a techall el ngoriakl el uai ngii [e] … e mo suobel lobengkel.” A Urerel a “mo kutmeklii a diak luut el kodall me a diak a ulebengelel klengar er a chad” (Moses 1:39).

Kede mle ultuil er a mimokl lomelilt e millilt el mo oltirakl er a uldesuel a Chedam er a Babeluades. Kede ngeltengat el milchell er tiaikid el klengar, el dolelomel el mimokl melilt e subii a klengar er a chutem, e mesuub, e merael bedul a diak a ulebengelel klengar.

Chelsel tial klengar kid er a chutem, e kede mo chemau a ringel me a olibesongel. Eng di diak el belkul a kmo kede cheloit el di kid el tang el chemau aikal ringel. A Joseph Smith a ulisechakl el kmo a Chedam er a Babeluades, “el Kot el Ungil Loungalek er a beluulechad el rokir[,] a omes er a rokir el cherrengelel a telungalek loba ulekerreuil a ungil chedam.”

A Demad er a Babeluades, “el Chedam er a chubechub, e Dios er a rokui longelaod,” a mo omekngeltengat er kid, sobecheklid, e mengelaod er kid “er a rokui el ringel, me luchul e bo dongelim er tirkel ngar ringel, lokiu ongelaod el kid a ngmai er a Dios” (2 Korint 1:3–4). Sel klou a ultutelel telengtengil a Uldesuel, e a Chedam er a Babeluades a mla meskid a rael el sebeched el muut el mo er Ngii.

Sel Rael el Mo er a Demad

A klemerang “er a rokui el tekoi” (Jacob 4:13) a bleketakl: ng diak el sebeched el mo er sel ngii a ultekelled el ngelekel a Chedam er a Babeluades el di kid. A Jesus Kristo, el ngii a Kot el Ngelekel a Chedam er a reng, a tilbir el mo Osobeled.

A Jesus Kristo, el “Chimol Ngelekel a Chedam, el mui er a chubechub me a klemerang, el ngalek er a Reng er a klemerang, … a mlei er a beluulechad, e kiliei el teloi er kid” (Doctrine and Covenants 93:11). Ngii a mlei el me olecholt er a rael e kede metik er a deureng, el belkul a kmo, deureng er tial klengar me sel diak a ulebengelel klengar.

“Beltkil a rengul a Dios a uchul, e nguldureklii a di tal Ngelekel, me tirke el rokui el mo oumerang er ngii a diak bol riid, e bai mo nguu a diak a ulebengelel klengar.

“A Dios a dimlak el lodureklii a Ngelekel el mo melemall er a beluulechad; ng bai okiu Ngii e a beluulechad a mo suobel” (Johanes 3:16–17).

A klengar er a Osobel er a chutem a klou a ultutelel. Ngii “a dimlak el ngai el rokui el mo cherrungel er a uchelel, ng bai ngilai lokiu a krasia” (Doctrine and Covenants 93:12). Ngii a mlukeroul mol muut er a “cherrengelel a klebkellel a Chedam” me a “rokui el klisiich, er a eanged me a chutem, me a kelbkellel a Chedam a ulebengkel, le ngii el kiliei lobengkel” (Doctrine and Covenants 93:16–17). A Osobel a ulsisechakl:

“Ak meskemiu aikal tekoi me ko mo medengei el kmo ng mekera omngara omengull, e ngera ko mengull er ngii, me bol sebecheiu el mei er a Chedam lokiu a ngklek, me bom cherrungel el uai ngii.

“Le moltirakl a llechuk e ko mo ngmai a rokui, e bo klikiid lokiu ngak le ngak obengkel a Chedam; a leuaisei, e ak dmu er kemiu, ko mo nguu a krasia” (Doctrine and Covenants 93:19–20).

Ngara Sers er a Gethsemane me a kerus, ea Jesus Kristo a ngilai a kengtil a beluulechad e mlo chuarm er a klengiterreng me a “ringel me a ongarm me a ongetikaik er a bek el bedengel omeruul” (Alma 7:11). Tial “[Rirelii], … ngika el kot el ngarbab er a rokui, el mlo omritel er a ringel, me a rsechel a rirebet” (Doctrine and Covenants 19:18). Ng di tal Jesus Kristo me a Tngakireng er Ngii me a Okisel er a kodall a sebechel rael el mo er a diak a ulebengelel klengar.

Ngokiu a krasia me a tngakireng er a Osobel, e kede mukeroul er a rokui el tekoi el di merekmo bo decherrungel. Omko kede oltirakl okesiul Osobel e olngesenges a Llechul, e Ngii a mo omekrael er kid er a roled el muut el mo er a chetengakl el rengedel a Demad er a Babeluades.

Kristo el ngara rael el mo er a Jerusalem, mal er a Michael Coleman, diak molai a lecheklel

Ng Sebechem el Nguu a Sengk er Ngii?

A tara klemerang el kirel a “tekoi el mo duubech” (Jacob 4:13), e kede subii el kmo a bo doruul er sel diak a ulebengelel klengar a di mo ultuil er a omelilt er kid loltirakl er a Jesus Kristo e ngmai a sengk el Ngii oldars el kired. A chedaol llechukl olisechakl kmo kede mo ngara “deureng el kirel aikel [kid] a blak a rengud el mo ngmai.” Ng di mekngit a rengud, le rebebil a diak “el blak a rengrir losiik er sel ngii a sebechir el mo nguu” (Doctrine and Covenants 88:32).

A mision president er ngak, el Elder Marion D. Hanks (1921–2011), el milesiou el General Authority Seventy, a ulisechakl er a remisionari er ngii el kmo sel dolengit er sel ngii a blak a rengud el mo nguu el tekoi a ngii a rael el kid a tirterii a chedaol omerolled. “Ngera klungiolel a chad alsekum a sengk a mo er ngii e ngii a diak el nguu?” Sel dengai a sengk er a Osobel lokiu a blakelreng er kid losiik e oltirakl er Ngii, e kede mo ngara deureng el kirel a diak a ulebengelel klengar lokiu e “okiu ngii eng meskid [tiaikid] el sengk” (Doctrine and Covenants 88:33). Tiaikid el sengk el denguu “a kot el ngarbab er a rokui el sengk er a Dios” (Doctrine and Covenants 14:7).

A Dios a Demad er a Babeluades. Ngii a medengelkid e betik a rengul er kid. Me sel dobult el mo er Ngii sel dosiik er a klemrang, eng sebeched lurrekodel er a llomes, ngmai a llomes, a nguu a klemerang, e soad a klikiid, e urrekodel er a llomes el ngar Ngii el mei (mesa Doctrine and Covenants 88:40). E sola melemolem er a klengar kid el mol muut “er sel sils el [kid] a mo medengei el uaia Dios, e mo uai ngii” (Doctrine and Covenants 88:49).

Tia kmal mo chetengakl e klebokel sils.

© 2025 lokiu Intellectual Reserve, Inc.Urrekodel a rokui el klisiich. Milluches er a USA. Kengei er a English: 6/19. Kengei er a Oidel: 6/19. Oidel a Monthly Liahona Message, August 2025. Palauan. 19613 881