Pwacyeiyacn Moul Lasr uh

Suk lasr ke ma Pwacye

Ke fihl se kuht oasr kac ingena inge,puhkantweni mwe etwacack ma oasr liki na met ah. Ke pacl met ah, fin kom ke etuh ma se, kom enenuh in som nuhke library ah ac suk. Misenge intuhrnet ac devices inge use nuhsesr mwe etwacack puhs ac kuht kuh in konwacack ke pacl na sa.

Leum el insewowo ke kuht orekmakihn wo ma utuhkuh nuhn sesr uh, tuhsruhk El tuh use kahs in kolyuhk: “Sikalweni in suk ac luti sie sin sie kahs in lahlmwetmwet; aok, riti ke puk kahs in lahlmwetmwet uh; suk etwacack, finne ke lutlut ac ke luhlahlfongi” (Doctrine and Covenants 88:118). El pahtok kuht in luti ke ma nuhkwewa ma raunikuhtlac (liye Doctrine and Covenants 88:79; 93:53), tuhsruhk ke pacl se kuht suk ma inge uh, kuht enenuh in ngwet nuhsin God, suc “etuh ma nuhkwewa, ac ma nuhkwewa el liye, … ac el luhng liki ma nuhkwewa, … ac ma nuhkwewa ma sel, ac ma kacl” (Doctrine and Covenants 88:41).

Ke ma pwacye suc ma God el use nuhsesr tari, sie sin ma yohk emet ke moul lasr fin facluh se inge pa El pa Pahpah Tuhmasr Inkosrao. Kuht wen sacohk ac acn sacohk Nahtuhl. God El etwekuht ac luhngse kuht na pwacye. Ac ke kuh ekihn tuhlihk nguhn nahtuhl uh, oasr sripac yohk lasr fin facl se inge. Ke kuht e kahlwem ke ma pwacye inge e use nuhsesr kuht in etuh lah suc kuht uh, yohksripaciyacsr, ac sripac se ma ahkinsewowoye kuht ac kol kuht ke moul lasr met liki facluh ac tuhfah tahfwelah na in oruh oacna ke moul se lasr ingenalac ac nuh tok ma pahtpaht.

Kuht weluhl Pahpah muhta ke Muhtwacwacikyac ah

Ke kuht suk ke pwacyeiyacn ma uh kuht konwacack ke kahs luhn mwet Lahngo lasr: “Ac inge, pwacyena nga fahk nuhsum, nga tuh wi Pahpah ke muhtwacwacackiyac ah, ac nga pa Wen se Emet,” ac “kom oacyapac oasr ke muhtwacwacackiyac ah weluhl Pahpah” (Doctrine and Covenants 93:21, 23).

Met liki moul lasr fin facluh se inge, kuht tuh wi sie toeni inkuhsrao suc Pahpah Inuhsrao el tuh ahkkahlwemye ke plwacn wolacna lal ke engan. Mwet Pahluh Joseph Smith el tuh luti lah sripac lal God nuhke plwacn se inge pa in use nuhsesr “pacl wowo lasr in eklac oacna el [ac] … in moul ma pahtpaht yohrohl.” Orekma lal uh pa “in sang moul kawihl ac moul ma pahtpaht nuh sin mwet“ (Moses 1:39).

Kuht orekmakihn sukohsohk in sulaclah lasr ac sulaclah in uke plwacn luhn Pahpah Lucng. Kuht ahkinsewowoiyuhk in isuslac nuhke moul se inge, ke kuht tahfwelah in eis sukohsohk in sulaclah lasr ac kuh in puhlakihn moul suhkawihl, etwacack, ac kapwack nuhke moul ma pahtpaht.

Ke moul in mahno lasr, kuht e puhlakihn ma upac ac elyah ma e ahksuhmuhiye kapkapwack lasr. Tuhsruhk kuht tiacna enenuh in muhkwena fahsr ke inek soko inge. Joseph Smith el luti lah Pahpah Tuhmasr Inkuhsrao, “Pahpah Wolacna kac facluh nohfohn[,] liye mwet nuhkwewa ac elyah kacsr nohfohn oacna sie pahpah nuhsin tuhlihk nahtuhl.”

Pahpah Tuhmasr Inkuhsrao, “Pahpah suc arulacna pahkotwen, ac God suc kahsrwekuht ac ahkwoye kuht,” fah ahkinsewowoye kuht, wi kuht, ac ahkkweye kuht, “in mwe lokoalok nuhkwewa lasr, tuh kuht in kuh in kahsruh mwet ngiah ke kuhtwena mwe lokoalok lalos, ke ohiyacn kahsruh sepacna ma God el kahsrwe kuht kac” (2 Corinthians 1:3–4). Oacna ke ma se ma yohk sripac emet ke placn Lal uh, Pahpah Inkuhsrao el use inkacnek nuhsesr in sifilpac fohlohk nuh yohrohl.

Inkacnek nuh yurin Pahpah

Pwacyeiyacn “ma uh ke luhmah lalos na pwacye” (Jacob 4:13) kahlwem: kuht tiacna kuh in sun kuhiyacsr nohfohn in ekihn tuhlihk nahtuhl Pahpah kuht fin sifacna. Jisus Kraist, Wen se Emet nuhtin Pahpah ke nguhn, olwelah in pa Mwet Lahngo ac Mwet in Molwelah lasr.

Jisus Kraist, “Wen Kuloh Sefanna nuhtin Pahpah, sesseslah ke luhng kuhlwacng pwacye, finne Nguhn luhn pwacye, … tuhkuh ac eis mahno se, ac moul yohrohsr” (Doctrine and Covenants 93:11). El tuhkuh in ahkkahlwemye nuhsesr inkacnek nuhke engan, sripac, ke moul se inge ac ke moul ma pahtpaht.

“Tuh God El luhngse facluh ohinge; El acse Wen sefanna Nahtuhl, tuh elos nuh kwewa suc luhlahlfongi ke El fah tiac misac tuh elos fah eis moul ma pahtpaht.”

“Tuh God el tiac suhpwacma Wen nahtuhl in tuh nununku faclu, tuh faclu in eis moul kacl” (John 3:16–17).

Ohiyac luhn Mwet Lahgo lasr fin facluh yohk sripac. El “muhtwacwacackiyac ah El tiac eis fohnlah kac, tuhsruhk tahfwelah na ke luhngse nuhke luhngse” (Doctrine and Covenants 93:12). Ma suhmuhslah uh luti kuht lah Jisus Kraist El eis kuh nuh kwewa, kwewa na kuhsrao ac fin facluh, ac wolacna luhn Pahpah oan yohrohl (liye Doctrine and Covenants 93: 16– 17). Mwet Lahngo El luti:

“Nga usot nuhsum ma inge tuh kom in kuh in kahlwem kac ac etuh in alu fuhkah, ac etuh lah mac kom alu nuh se, tuh kom in kuh in tuhkuh nuh yurin Pahpah ke inek, ac ke pacl fal eis nohfohn wolacnaiyac.

“Tuh inge kom fin liyacacng masap luhk kom fah eis wolacna lal, ac fah kaksakihnyuhk keik oacna ke nga pa Pahpah; ohinge, nga fahk nuhsum, kom fah eis luhngse nuhke luhngse” (Doctrine and Covenants 93:19–20).

Ke Imac Gethsemane ac fin sahkseng soko, Jisus Kraist El eis nuh Facl ma koluk luhn facluh ac kweok ke ahsor ac “ngal ac kweok ac kain in mwe sruhf nuhkwewa” (Alma 7:11). Ma inge oruh tuh kweok lal Jisus arulacna yohk pwacnwacng El rarrar ke srihpen waek, ac srah kahklac liki Mahnol (liye Doctrine and Covenants 19:18 Nuh ke Iwaclah ac Auliyak, Jisus Kraist El oraclah tuh molwelah ac moul ma pahtpaht kuh in sikyak nuh sin mwet nuhkwewa.

Ke luhngse luhn Mwet Lahngo lasr ac ke kihsackuhnlah lal, kuht kuh in kapkapwack neke na kuht eis fohnlah ac kuh in sie lwen eklac suwohswohs. Kuht fin fahsr tukun srihkasrak luhn Mwet Lahngo lasr ac ahkos masap Lal, El fah pwen kuht ac kol kuht in fohlohklac nuh yurin Pahpah Tuhmasr Inkuhsrao.

Kraist ke Innek nuh Jerusalem, sel Michael Coleman, tiac kuh in kapiyuhk

Yac kom e eis Mwe Sang Lal?

Ke ma pwacye ma kuht riti kac (Jacob 4:13), kuht lotwelah lah ma kuht e puhlakihn ke moul ma pahtpaht lasr ma tuhkuh ke sulaclah lasr in ukwacl Jisus Kraist ac eis mwe sang me el use nuhsesr uh. Ma suhmuhslah uh luti lah kuht fah “puhlakihn woiyacn ma kuht luhngse eis uh.” Tuhsruhktuh, oasr kuhtuh ma e tiacna “luhngse in eis ac puhlakihn ma elos kuh in eis uh” (Doctrine and Covenants 88:32).

Misrin prestuhn luhk, Elder Marion D. Hanks (1921–2011), suc tuh kuhlwacnsap ke Sacfacnti ah, tuh luti misrinacris lah siyuhk ke ma kuht luhngse in eis ac puhlakihn el inkacnek se kuht kuht in nuhnuhnkuh lah kuht piyac ke fuhfahsryuhsr nuhke moul in nguhn lasr. “Meac kapwack luhn sie mwet fin mwe sang se ituckyang nuh sel, ac el tiacna eis mwe sang sac? Ke kuht eis mwe sang luhn Mwet Lahngo ke kuht sokuhl ac fahsr tohkohl uh, kuh fah enganwack ke finsrak nuhke moul ma pahtpaht ac “in el suc pa use mwe sang se inge” (Doctrine and Covenants 88:33). Mwe sang se inge “pa mwe sang yohk se emet ke mwe sang nuhkwewa luhn God uh” (Doctrine and Covenants 14:7).

God el Pahpah tuhmwacsr Inkuhsrao. El etwekuht ac luhngse kuht. Ke kuht ngwet nuhsel ke lutlut lasr in etuh ma pwacye uh, kuht kuh in fungyang nuhke lahlmwetmwet, eis etwacack, sruokyac ma pwacye, luhngse ma wo, ac fungyang nuhke kahlwem se ma tuhkuh sel me (liye Doctrine and Covenants 88:40). Ohinge kuht tahfwelah na ke moul lasr neke “lwen sac ma e tuhkuh suc kuht fah kahlwem oacna God, eklac in el ac sel” (Doctrine and Covenants 88:49).

Lwen se ingacn ac sie lwen na wolacna ac engan se.