Ti Kinapudno Maipapan iti Biagtayo

Ti Panagsapsapultayo iti Kinapudno

Iti daytoy a panawen a pagbibiagantayo, ad-adu a pannakaammo ti magun-odantayon ngem idi. Iti napalabas, no kayatyo a maammuan ti maysa a banag, masapul a mapankayo iti library ket kitaenyo daytoy. Ita, ti Internet ken dagiti maig-iggaman a device ket mangipaay iti pannakagun-od iti dandani awan patinggana nga impormasion a mabalin a dagus a masarakantayo.

Maragsakan ti Apo no nainsiriban nga usarentayo dagiti resources a sidadaan a magun-odtayo, ngem impaayna daytoy nga awan patinggana a balakad: “Agsukisokkayo a sireregta ken isuroyo iti tunggal maysa kadagiti nainsiriban a balikas; wen, sukisokenyo dagiti kasayaatan a libro ti nainsiriban a balikas; agadalkayo, uray pay ti panagadal ken kasta met ti pammati” (Doktrina ken Katulagan 88:118). Paregtaennatayo a mangammo maipapan iti lubong iti aglawlawtayo (kitaen iti Doktrina ken Katulagan 88:79; 93:53), ngem iti panagbiroktayo iti kinapudno, masapul a kumitatayo iti Dios, a “matukodna amin a banag, ket adda kenkuana ti amin a banag, … ket isu ti kangatuan iti amin a banag, … ken iti amin a banag, ken babaen iti amin a banag” (Doktrina ken Katulagan 88:41).

Maibilang kadagiti kinapudno nga inted ti Dios kadatayo, ti maysa kadagiti kangrunaan a pundasion para iti biagtayo ditoy daga ket Isu ti Nailangitan nga Amatayo. Datayo dagiti espiritu nga annakna a lallaki ken babbai. Naan-anay nga am-ammo ken ay-ayatennatayo. Ket kas dagiti espiritu nga annakna, addaantayo iti nadiosan a nakaparsuaan ken pagtungpalan. Ti pannakaawat ken panangawat kadagitoy nga agnanayon a kinapudno ti mangted kadatayo iti pakabigbigan, pateg, ken panggep a nangbendision ken nangiturong kadatayo iti biagtayo sakbay ti kaaddatayo ditoy daga ken agtultuloyto a mangiturong kadatayo ita ken iti agnanayon.

Kaduatayo ti Ama idi Punganay

Bayat ti panangsapsapultayo iti kinapudno dagiti banag “kas iti kasasaadda ita,” matakuatantayo dagitoy a balikas manipud iti Mangisalakantayo, ni Jesucristo: “Ket ita, pudno kunak kadakayo, addaak idi iti punganay iti Amak, ken siak ti Inauna,” ken “kaduayo met idi punganay ti Ama” (Doktrina ken Katulagan 93:21, 23).

Sakbay ti panagbiagtayo ditoy daga, timmabunotayo iti maysa a konseho idiay langit a nangidatagan ti Nailangitan nga Amatayo ti naindaklan a planona iti ragsak. Insuro ni Propeta Joseph Smith a ti motibasion ti Dios para iti planona ket ikkannatayo iti “pribilehio a dumur-as a kas kenkuana [ken] … maitan-ok a kas kenkuana.” Aramid ken gloriana ti “mangipatungpal iti saan nga ipapatay ken agnanayon a biag ti tao” (Moises 1:39).

Inusartayo ti kinawayatayo nga agpili ket pinilitayo a suroten ti plano ti Nailangitan nga Amatayo. Nabendisionantayo a mayanak iti daytoy a biag, a pangituloyantayo a maaddaan iti kinawaya nga agpili ken makapadas iti mortalidad, makapagsursuro, ken makapagdur-as nga agturong iti agnanayon a biag.

Bayat ti mortal a panagdaliasattayo, mapasarantayo dagiti karit ken pannakapaay. Ngem saantayo a masapul a sanguen nga agmaymaysa laeng dagiti pakarigatan iti biag. Insuro ni Joseph Smith a ti Nailangitan nga Ama, “ti Naindaklan a Nagannak ti uniberso[,] kitkitaenna ti intero a pamilia ti tao nga addaan iti naamaan a panangaywan ken panangipateg.”

Ti Nailangitan nga Amatayo, “ti manangngaasi nga Ama, ken ti Dios a pagtaudan ti amin a pakagin-awaantayo,” ket bendisionannatayo, itag-aynatayo, ken liwliwaennatayo “iti amin a sagsagabaentayo, tapno maliwliwatayo dagiti addaan iti aniaman a pakarikutan babaen iti gin-awa met laeng nga inawattayo iti Dios” (2 Taga Corinto 1:3–4). Kas napateg a paset ti planona, impaay ti Nailangitan nga Amatayo ti dalan tapno agsublitayo Kenkuana.

Ti Dalan nga Agturong iti Amatayo

Nalawag ti kinapudno “kadagiti bambanag a kas iti kasasaadda” (Jacob 4:13): saantayo a maragpat ti naan-anay a potensialtayo kas annak ti Nailangitan nga Amatayo no agmaymaysatayo laeng. Ni Jesucristo, ti Inauna nga anak ti Ama iti espiritu, ket nakitulag nga agbalin a Mangisalakan ken Mannubbottayo.

Ni Jesucristo, “ti Bugbugtong ti Ama, napno iti parabur ken kinapudno, nga isu ti Espiritu ti kinapudno, … nga immay ken nagnaed iti lasag, ken nakipagtaeng kadatayo” (Doktrina ken Katulagan 93:11). Immay tapno ipakitana kadatayo ti dalan nga agturong iti kinaragsak, kaipapanan, ken rag-o iti daytoy a biag ken iti agnanayon.

“Gapu iti kasta unay a panagayat ti Dios iti lubong, intedna ti Bugbugtong nga Anakna tapno ti siasinoman a mamati kenkuana saan a matay no di ket agbiag nga agnanayon.

“Ta saan nga imbaon ti Dios ti Anakna ditoy lubong tapno ukomenna ti lubong, no di ket tapno isalakanna.” (Juan 3:16–17).

Napateg ti naindagaan a kapadasan ti Mangisalakan. Ket “dina inawat ti pakabuklan iti unana, ngem immawat iti ad-adu pay a parabur” (Doktrina ken Katulagan 93:12). Dimmakkel agingga nga “inawatna ti pakabuklan ti gloria ti Ama” ken “ti amin a bileg, iti man langit ken iti daga, ken ti gloria ti Ama adda kenkuana, ta agnaed kenkuana” (Doktrina ken Katulagan 93:16–17). Ti Mangisalakan insurona:

“Itedko kadakayo dagitoy a pagsasao tapno maawatan ken maammuanyo no kasano ti agdaydayaw, ken ammoyo no ania ti pagdaydayawanyo, tapno makaumaykayo iti Ama babaen ti naganko, ken maawatyo ti pakabuklanna iti naituding a panawen.

“Ta no tungpalenyo dagiti bilinko maawatyonto ti pakabuklanna, ket maitan-okkayo kaniak a kas kaniak iti Ama; ngarud, ibagak kadakayo, umawatkayonto iti ad-adu pay a parabur” (Doktrina ken Katulagan 93:19–20).

Iti Minuyongan ti Getsemani ken iti krus, inawat ni Jesucristo iti Bagina dagiti basol ti lubong ket nagsagaba iti amin a ladingit ken “saem ken rigat ken amin a kita ti sulisog” (Alma 7:11). Daytoy ti “nangipaay [Kenkuana], … a kaindaklan ti amin, nga aggarigenggen gapu iti saem, ken agdara iti tunggal teterreman” (Doktrina ken Katulagan 19:18). Babaen laeng ken ni Jesucristo ken ti Pannubbot ken Panagungarna a posible ti pannakaisalakan ken pannakaitan-ok.

Babaen ti parabur ken pangsubbot a sakripisio ti Mangisalakan, mabalin a dumur-astayo agingga nga umawattayo iti pakabuklan ket iti maysa nga aldaw makapagbalintayo a naan-anay. No surotentayo ti pagwadan ti Mangisalakan ken tungpalentayo dagiti bilinna, idauluannatayo ken iturongnatayo iti dalantayo nga agsubli iti nadayag nga imatang ti Amatayo idiay Langit.

Ni Cristo iti Dalan nga agturong iti Jerusalem, ni Michael Coleman, saan a mabalin a makopia

Awatenyonto Kadi Ti Sagutna?

Maibilang kadagiti kinapudno “dagiti banag a pudno a pagbalinandanto” (Jacob 4:13), masursurotayo a ti padastayo iti kinaagnanayon ket maikeddengto babaen ti panangpilitayo a mangsurot ken ni Jesucristo ken mangawat kadagiti sagut nga ipaayna. Isuro dagiti nasantuan a kasuratan nga “agragsak[tayo] iti dayta kayat[tayo] nga awaten.” Nakalkaldaang, ta addanto dagiti saan a “mayat nga agragsak iti dayta awatenda koma” (Doktrina ken Katulagan 88:32).

Ti mission president-ko, ni Elder Marion D. Hanks (1921-2011), a nagserbi a kas maysa a General Authority Seventy, insurona kadagiti misionariona a ti panagdawat iti kayattayo nga awaten ken tagiragsaken ket maysa a wagas a mabalintayo a mangkedngan no sadino ti ayantayo iti naespirituan a panagdaliasattayo. “Ta ania koma ti magunggona ti tao no maikkan iti sagut, ngem saanna nga awaten ti sagut?” Bayat ti panangawattayo kadagiti sagut ti Mangisalakan babaen ti napasnek a panagsapsapul ken panangsurottayo Kenkuana, agrag-otayo iti namnama ti agnanayon a biag ken “iti nangted kenkuana iti [dayta a] sagut” (Doktrina ken Katulagan 88:33). Daytoy a sagut a naited iti kasta unay a panagayat ket “ti kapatgan iti amin a sagut ti Dios” (Doktrina ken Katulagan 14:7).

Ti Dios ti Nailangitan nga Amatayo. Am-ammo ken ay-ayatennatayo. Bayat ti yaasidegtayo Kenkuana iti panagsapsapultayo iti kinapudno, mabalintayo ti agsadag iti kinasaririt, umawat iti sirib, umarakup iti kinapudno, mangipateg iti saguday, ken agsadag iti lawag nga aggapu Kenkuana (kitaen iti Doktrina ken Katulagan 88:40). Kalpasanna agtultuloytayo iti unos a panagbiagtayo agingga iti “aldaw inton matukod[tayo] ti Dios, gapu ta isu ti nangbiag kada[tayo]” (Doktrina ken Katulagan 88:49).

Dayta ti agbalinto a nadayag ken naragsak unay nga aldaw.