“Thola Injabulo Ohambweni Lwakho lweVangeli,” iLiyahona, ngoJulayi 2025.
Umyalezo Wanyanga Zonke we iLiyahona ngoJulayi 2025
Thola Injabulo Ohambweni Lwakho lweVangeli
Umphumela wokugcina wokukhombisa uthando lwethu eNkosini ngokugcina imiyalelo Yayo yizibusiso eziletha injabulo kanye nentokozo.
Photograph of joyful Church members in Thailand (Isithombe samalungu eBandla ejabule eThailand) nguChristina Smith
Ngesikhathi ngisebenza njengomholi wemishini eJapan eminyakeni ethile edlule, ngahambela ingqungquthela yangempelasonto edolobheni elisemaphandleni kwelinye lamakhona akude emishini yethu. Umongameli wesifunda wayengihlelele ukuba ngiqhube ingxoxo nendoda eyayijoyine iBandla ngonyaka odlule futhi eyayifuna ukuthola imvume yokungena ethempelini. Wayenethemba lokuthi uzozitholela esakhe isipho sokwembathiswa phakathi noma ngasekupheleni konyaka owodwa ebhabhadisiwe.
Phakathi nengxoxo yethu, leli lungu elisha lachaza indlela elalibonga ngayo ngokujulile ngezibusiso eziningi elazithola ngonyaka kusukela ngesikhathi labhabhadiswa. Yayikujabulela ukuya enkonweni yesidlo masonto onke kanye neminye imihlangano. Yazibandakanya kakhulu emisebenzini yegatsha layo. Kumina, yayinesiqinisekiso sesivumelwano esivela ekuqondeni injongo yevangeli layo, okwase kuyingxenye ebalulekile yayo. Wayengumfundi kaKristu ophendukile owayethole ukuguquka okukhulu kwenhliziyo (bheka uMosiya 5:2).
Ingxoxo yethu eyayisele yalandela iphethini enika ithemba. Saxoxa ngezimiso kanye nezivumelwano ezazizoba yingxenye yalokho ayezokwenza ethempelini. Yawuphendula ngokuqiniseka umbuzo ngamunye ojwayelekile ohlobene nokuthola imvume yokungena ethempelini.
Ngemva kwengxoxo, ngikhumbula ngitshela umongameli wesifunda indlela engabonga ngayo ngokuhlangana nendoda evelele kangaka. Ngamtshela indlela engangihlabeke umxhwele ngayo ngokuthi abafundisi bevangeli kanye namalungu bathole, futhi bakhulisa ngokomoya, umuntu osezingeni elinjena futhi othembisayo.
Ngamangala lapho umongameli wesifunda engitshela ukuthi ngesikhathi lendoda iqala ukuthola izifundo kubefundisi bevangeli kanye nokuya esontweni esikhathini esingangonyaka ngaphambili, yayingenakhaya futhi isesimweni esinzima kakhulu—esicishe siphelelwe ithemba. Umongameli wesifunda wabe esechaza ukuthi ukufunda kwalo mfowethu ivangeli kanye nokuguquka kwakhe isikhathi esingangezinyanga kwaholela kanjani ekuguqukeni kwakhe okuyisimangaliso, okwambeka endleleni yokuzimela ngokomoya kanye nangokwesikhashana futhi kumnike umuzwa wenjongo kanye nenjabulo.
Ivangeli lamnika isithombe esicacile senhloso yempilo yakhe. Amaqiniso asobala nayigugu evangeli aletha izimpendulo emibuzweni ebalulekile yempilo yasemhlabeni, aqala ngolwazi lokuthi “uNkulunkulu unguBaba wethu oseZulwini, futhi singabantwana Bakhe. … UNkulunkulu uyasazi mathupha futhi uyasithanda. Eswini Lakhe, “uBaba oseZulwini … usiphe izipho eziningi neziqondiso ukuze asisize sibuyele ebukhoneni Bakhe.”
Lesi kwakuyisibusiso salendoda, esitholakala ngokulinganayo kubo bonke abantwana bakaNkulunkulu ngevangeli likaJesu Kristu.
Injongo yeMpilo
Ngoba uJesu Kristu wabuyisela ivangeli Lakhe ngoMprofethi uJoseph Smith, “sinokuqonda injongo yempilo, ukuthi singobani,” kwasho uMongameli M. Russell Ballard (1928–2023). Kubufakazi bakhe bokugcina eBandleni, uMongameli M. Russell Ballard, owayebekwe njengoMongameli oyiBambela womGwamanda wabaPhostoli abayiShumi naMbili ngalesoskhathi, wathi:
“Siyazi ukuthi uNkulunkulu ungubani; siyazi ukuthi ungubani uMsindisi ngoba sinoJoseph, owangena ehlathini lemithi esengumfana, efuna ukuthethelelwa izono zakhe …
“Ngiyamangala, futhi ngiqinisekile ukuthi iningi lenu nalo ngokunjalo, ngendlela esibusiswe ngayo ngokwazi esikwaziyo ngenjongo yethu empilweni, ukuthi kungani silapha, lokho okufanele ngabe siyazama ukukwenza futhi sikufeze empilweni yethu yansuku zonke.”
Kumalungu eBandla likaJesu Kristu labaNgcwele beziNsuku zokuGcina, lolo lwazi luhlanganisa nokuqonda “isu eliphelele” likaNkulunkulu lensindiso. Olwaziwa futhi ngokuthi “uhlelo olukhulu lwenjabulo,” “isu lokuhlengwa,” kanye “nesu lomusa” (u-Alima 42:8, 11, 15), “[li]susa imfihlakalo empilweni nokungaqiniseki ngekusasa lethu.” Okubalulekile kulelosu “imfundiso kaKristu,” ewumgogodla wenjongo yempilo.
Ngenxa yokuthi sinevangeli, siyazi ukuthi singabantwana bakaNkulunkulu, sithunyelwe emhlabeni ukuzovivinywa, siphuculwe, futhi silungiselelwe “ukukhululwa ngokuvuka kwabafileyo, ngokunqoba nangenkazimulo yeWundlu” (IMfundiso neziVumelwano 76:39). Siyayazi imiyalelo futhi siyalwa “ngokwanele ukuba [sazi] okuhle nokubi” (2 Nefi 2:5). Siyazi ukuthi sisemhlabeni ukuze sithande futhi sikhonze. Futhi siyazi ukuthi uMsindisi usibizile ukuthi sinqobe umhlaba futhi sisize abanye benze okufanayo (bheka NgokukaJohane 16:33; IMfundiso neziVumelwano 64:2) ekulungiseleleni Ukuza Kwakhe kwesiBili.
Ngesikhathi sigxile Kuye, lokho uJoseph Smith akubiza ngokuthi “umsindo wokuthokoza weVangeli leNkosi yethu uJesu Kristu” kuzosiqinisa ngezinsuku ezinzima futhi kulethe incazelo nenjongo empilweni yethu kanye nasezimpilweni zabanye.
Every Knee Shall Bow (Wonke Amadolo Ayoguqa), nguDan Wilson, mayingakopishwa
Ukulalela, Izibusiso, Injabulo
UNkulunkulu usinike ilungelo lokukhetha ukuze siphendule ngezinqumo zethu (bheka IMfundiso neZivumelwano 101:78; 2 Nefi 2:16). Njengengxenye “yokuphikisana ezintweni zonke” (2 Nefi 2:11), USathane uvumelekile ukuthi asilinge ngokuthi singalisebenzisi ngokulungile ilungelo lethu lokukhetha.
Kodwa iNkosi uJesu Kristu, “ngokwazi usizi oluzoza phezu kwabantu basemhlabeni” osukwini lwethu, yabiza uMprofethi uJoseph Smith, “ngakhuluma naye ngisezulwini, futhi ngamnika imiyalelo” (IMfundiso neziVumelwano 1:17). Leyo phethini iNkosi eyembula ngayo imiyalelo kanye nentando Yayo kubaprofethi Bayo iyaqhubeka osukwini lwethu noMongameli uRussell M. Nelson—futhi ngenxa yesizathu esifanayo. UNkulunkulu ufisa ukusiholela enjabulweni kulempilo kanye nasenkazimulweni esilestiyali yasezulwini empilweni elandelayo.
Ukulalela imiyalo kaNkulunkulu kufanele kusuke ekuzinikeleni kwethu Kuye nasothandweni esinalo Ngaye. INkosi uJesu Kristu ngokwayo yamemezela ukuthi ukuthanda uNkulunkulu “kuwumyalo wokuqala nomkhulu” (bheka NgokukaMathewu 22:37–38). Wanikeza ukuqonda okwengeziwe lapho ememezela, “Uma ningithanda, gcinani imiyalo yami” (NgokukaJohane 14:15).
Kunomvuzo wokuthanda iNkosi nokugcina imiyalo Yayo. Kulesikhathi Wachaza “umthetho, ongeke ususwe owamiswa ezulwini … , izibusiso zonke ezimiswe kuwo—
“Futhi uma sithola noma yisiphi isibusiso esivela kuNkulunkulu, siza ngokulandela loyo mthetho ohlelwe lapho leso sibusiso sibekwe khona” (IMf&V 130:20–21).
Ngakho ke umphumela wokugcina wokukhombisa uthando lwethu eNkosini ngokugcina imiyalelo Yayo yizibusiso eziletha injabulo kanye nentokozo.
Ukubheka impilo ngeso levangeli elibuyiselwe kanye nesambulo sesimanje kusinika ukucaca. Njengoba sinombono ocacile ngemvelaphi yethu yaphezulu nesiphetho sethu, siyazi ukuthi “zona kanye izinto eziyokwenza impilo [yethu] yasemhlabeni ibe ncono kakhulu yizona zinto ezifanayo ncamashi nezizokwenza impilo yethu kulo lonke iphakade ibengcono kakhulu!”
Isiphetho
Ngiphetha lapho engiqale khona, ngikhumbula engidlule kukho eminyakeni edlule nogcwele owayesanda kuphenduka eJapan. Ngokukhuthala kwakhe kanye nokukhuthala kwabefundisi bevangeli kanye namalungu, wathola ivangeli elibuyiselwe likaJesu Kristu. Ekutholeni ivangeli, wathola nenhloso yakhe, eyakhulisa umbono wakhe. Wathola nesu elikhulu lenjabulo. Ukulalela izivumelwano zevangeli zesu kwamlethela izibusiso kanye nenjabulo, kwamphakamisa ngokwenyama kanye nangokomoya.
Uhambo lwakhe oluholela kubulungu bakho eBandleni likaJesu Kristu lwamvumela ukuthi abe ngufakazi kaJesu Kristu. IGosa uPatrick Kearon woMgwamanda wabaPhostoli abayiShumi naMbili uchaze injabulo elandelayo:
“Ngenxa yesu lothando likaBaba wethu oseZulwini ngabantwana Bakhe ngamunye, nangenxa yempilo ehlengayo kanye nomsebenzi woMsindisi wethu, uJesu Kristu, singakwazi—futhi kufanele—sibe ngabantu abajabula kakhulu emhlabeni! Ngisho noma izivunguvungu zempilo ezweni elivame ukuba nezinkathazo zisihlasela, singakha umuzwa okhulayo wenjabulo nokuthula kwangaphakathi ngenxa yethemba lethu kuKristu kanye nokuqonda kwethu indawo yethu oswini elihle lwenjabulo.”
Nginikeza ukubonga kwami, kanye nobufakazi, ngevangeli elibuyiselwe likaJesu Kristu, kuhlanganisa nesu elikhulu lenjabulo elijule kakhulu kulo. Ngiyakumema ukuthi udle izithelo zevangeli futhi uzwe injabulo eyengeziwe kulempilo ohambweni lwakho oluya empilweni yaphakade.
© 2025 ngabakwa Intellectual Reserve, Inc. Wonke amalungelo agodliwe. Igaywe eMelika. Usuku okuvunywe ngalo ukuba lesi sifundo sishicilelwe ngesiNgisi: 6/19. Usuku okuvunywe ngalo ukuba lesi sifundo sihunyushwe: 6/19. Ukuhunyushwa kwe Monthly Liahona Message, Julayi 2025.. Zulu. 19601 783