Metik er a Deurreng er a Omerolem er a Ebangkelio

Mla er a Elder Gary E. Stevenson

Er a Chelechad er a Teruich me a terung el Apostol

A redechel olechotel a beltkil a rengud el mora Rubak a sel doltirakl a Llechul a klengeltengat el ngii a meskid a deurreng.

klikmechur el chedal a Ikelesia el ngara Thailand

A tara taem er a kusiou loungerachel er a remisionari el ngara Siabal sesel rak er a mla memong, e ak mlora ongdibel er a beluu el ngara cheroid er a kim ngarngii. A district president a mle kudmeklii a taem el bo kungedecheduch er a chad el ngii a mlo chedal a Ikelesia el mla mo tal rak e soal mo melai er a kengei el mora templo. Ng mle soal mo melai er a chedaol klisiich er sel temel er le metecholb malechub eng sils el kmeed er ngii.

Sera kim kadecheduch, ngkal beches el chedal a ikelesia eng milsaod er a dmolech el omereng el saul er a betok el klengeltengat el bla lengai er a chelsel sel tal rak er a le metecholb. Ng mle soal ngara ongdibel er a chedaol belsoil me a ikel bebil er a miting. Ng mle blak a rengul teloi er a tekoi er a omilil/omeruul er a ikelesia. Sel denguu er ngak, eng ochotii a kllouel reng er a telbiil el ngii a rdechel a klemedengei er ngii er a ebangkelio me a moktek er ngii, el ngii er chelechang a mla mo tebedechel a klengar er ngii. Ngii a ulebult e oltirakl er a Kristo el mla nguu a klou el ngedechel a chelsel a rengul (mesa Mosiah 5:2).

A ikel bebil er a ki blem chadecheduch a ultirakl er a osisiu el ungil teletael. A ki milsaod a chedaol ruoll me a telbiil el ngii a mo tebedechel a bo loruul er a templo. Ngii a ulenger el moungil aikel ker el lobengkel a ngeiul a kengei el mora templo.

A iriul er a kimkadecheduch, e ak dobedebekak el millekoi er a district president el kmal me ungil a renguk el mesa chouai ngika el kmal blak a rengul el chad. Ak dilu er ngii el kmo ak smiich a renguk el remisionari me a rechedad a miltik, e ulsisechakl er ngii er a chedaol tekoi, ngika lungil a blekerdelel me a ngarmedad er ngii.

Ak mlo mechas a renguk er a district president er a louchisang el ngkal chad er a lekot el mesuub lobengterir a re misionari e lebera ikelesia er a betok er rak ruchei, eng dimlak a blil e meral imis el chetituokel—ua lak el sebechel mesemechokl—el blekeradel. A district president a mlo mesaod er a omesubel ngikal odam er a ebangkelio me a beltel er a chelsel a sesel buil el mlouchul tial mengasireng el beltel, el ngiluu el mora rael er a dingii lungil a ulekereuil er a chedaol tekoi me a klechad el milsang a ual moktek er ngii me a deurreng.

A ebangkelio a milsang a bleketakl el siasing er a moktek er a klengar er ngii. Beot e mekreos el klemerang er a ebangkelio e mileskid a nger el mora meklou a belkul ker er a klengar, lomuchel er a klemedengei el kmo “A Dios a Demad er a Babeluades, e kid a Rengelekel. … A Dios a ungil medengelkid e betik a rengul er kid.” Ngar sel Uldesuel, “A Chedam er a Babeluades a mla … meskid a betok el sengk me a ulekrael lolengeseu er kid mede luut el mo er a Rengedel.”

Uaitiang a mle klengeltengat el mo er ngika el chad, el tia dirrek el ngarngii el mora rokui el ngelekel a Dios lokiu a ebangkelio er a Jesus Kristo.

Moktek er a Klengar

E le a uchul a Jesus Kristo a mle olutii a ebangkelio er Ngii lokiu a Profet Joseph Smith,“ e kid a medengelii a moktek er a klengar, me kid kede techang,” millekoi a President M. Russell Ballard (1928–2023). Ngar sel ulebongel el olechotel a klaumerang er ngii el mora Ikelesia, a President Ballard, el mle-Acting President er a Chelechad er a re Teruich el Apostol, a dilung:

“Kede medengei el kmo ng techa Dios; kede medengelii a Osobel, e le Joseph, el mlora delul a kerrekar sera le ngeasek el sechal, losiik a klausubes er a kngtil. …

“Ng mechas a renguk, e medengei el locha kemiu el dirrek, el kmo kede ngeltengat el medengei a dodengei el kirel a moktek er kid er tial klengar, ngera uchul mekede ngar tiang, ngera kired el meruul me a kired el oureor el kirel er a bek el sils.”

Mora rechedal a Ikelesia er a Jesus Kristo er a Uriul-klebesei el Santo, a ikal dodengei a uldimukl er a ungil medengelii sel “cherrungel uldesuel” a Dios er a mo suobel. El dodengelii el dirrek el “ngarbab el uldasu el kirel a deurreng,” “uldasu er a mo mekikiid,” me a “uldasu er a klechubechub” (Alma 42:8, 11, 15), tia “ngubetii sel diak dodengelii er a klengar me a diak dodengelii er a ngarmedad.” Sel klou a ultutelel el mo er tial uldasu a “sel osisecheklel a Kristo,” el ngii a chedul a moktek er a klengar.

E le uchul kid loba ebangkelio, e kid a medengei el kmo kede ngelekel a Dios, el mlodurokl el mera beluulechad el bo lolasem er kid, omtanget, e mengedmokle er kid el mekiis sel borngii a oskiis er a kodall, lokiu a klisiich me a klebkellel a ngelekel a Sib (mesaDoctrine and Covenants 76:39). Kede medengei a llach e mla mosisechakl “lungil me [ke] de medengei a ungil er a mekngitl” (2 Nephi 2:5). Kede medengei el kmo kid a ngartial beluulechad el moubeltikelreng e mesiou. E medengei el kmo a Osobel a mla mekedongid el mo mesisiich er a beluulechad e molngeseu er a rebebil el meruul uaisei (mesa Johanes 16:33; Doctrine and Covenants 64:2) el mengedmokl el kirel sel Ongeru Lemei er Ngii.

Mesel domes el bedul Ngii, e a Joseph Smith omekedong el “sel ngerel oyeng er a Ebangkelio er a Rubak el Jesus Kristo” a mo smisichid er a ikel chetituokel klebesei e meskid a belkul me a moktek er a klengar er kid me a klengar er a rebebil.

A rokui el Bkul Chochid a mo Outubaruach, mlara Dan Wilson, diak molai a llecheklel

Omengull, Klengeltengat, me a Deurreng

A Dios a meskid a llemelted el melilt me bol sebeched el nguu a ngerachel er ikel dolilt (mesa Doctrine and Covenants 101:78; 2 Nephi 2:16). El tebedechel “a cherbitang er a rokui el tekoi” (2 Nephi 2:11), a Diablong a lebecherei meng sebechel mengesuseu er kid el mo mekngit lousbech er tial llemelted el melilt.

Engdi a Rubak el Jesus Kristo “medengei a tellemal el mereal mei er a rechad er a beluulechad” er a sils er kid, a mekedongii a Prophet Joseph Smith, “e mengedecheduch er ngii el ngara babeluades, e msang a llach” (Doctrine and Covenants 1:17). Tial teletael el Rubak olecholt a Llechul me a soal el mora re profet er Ngii a melemolem er chelecha el sils lobengkel a President Russell M. Nelson—el disisiu el moktek. A Dios a soal lomekrael er kid el mora deurreng er tial klengar me a mora kot el ngarbab el klebkall er sei el mei el klengar.

Omengull er a llechul a Dios a kirel mocholt er a rengud el meral soad Ngii e oubeltikelreng el mo er Ngii. Ngii el Rubak el Jesus Kristo a ulechais er tial beltikelreng el mora Dios “el ngii a kot e ngarbab el llach” (mesa Mateus 22:37–38). Ngii a liluut el meskid a uldasu sera Ledu el kmo, “A lsekum eng betik a rengum er ngak a moltirakl a llechuk” (Johanes 14:15).

Ngarngii a sengk er a oubeltik el reng el mora Rubak e oltirakl a Llechul. Chelechal taem e Ngii a silodii “llach el , el diak el mengubet el tilobed er a babeluades … , el rokui el klengeltengat a mengai er ngii—

“Mesel dengai aikal klengeltengat er a Dios, eng otirekled el mo er sel llach el ngii a kirel” (Doctrine and Covenants 130:20–21).

Me sel, tuobed er tial olecholt a beltkil a rengud el mora Rubak me kede oltirakl a Llechul a klengeltengat el meskid a deurreng.

Omes er a klengar lokiu a osengel a olutel a ebangkelio me a chocholt er chelechal taem a meskid a belekekatl el ues. Meng bleketakl osenged er a chedaol ucheled me a osioled, e kid a medengei el kmo a ikel tekoi el mo kutmeklau er chelechalklengar el kot lungile ngiia sebechel eldi uai ngii losisiuel tekoi el kutmeklii a klengar er [kid] el mora diak a ulebengelel el kot el ungil klengar!”

Ulebongel

Ak mo mengesimer er a kulemuchel er ngii, el lemuut el melekoi er a kblar ngii el tekoi er a bebil rak ra mla memong lobengkel a dirk ulebult el ngara Siabal. Ngulekiu a blakerreng er ngii me a blakerreng er a re misionari me a rechedal a ikelesia, eng miltik er a mla moluult el ebangkelio er a Jesus Kristo. Sera lebetik er a ebangkelio, eng direk el miltik er a moktek er ngii, el ngii a killungii osengel. Ngii a dirrek el miltik er a ngarbab el uldasu er a deurreng. Omengull el mora uldasu er a ebangkelio er a telbiil a milsang a klengeltengat er a deurreng, el kilderii a klechad me chedaol klengar er ngii.

A omerolel el ngoikii el mo chedal a Ikelesia er a Jesus Kristo a msa techall el mo sioning er a Jesus Kristo. Elder Patrick Kearon er a Chelechad er a re Teruich me a teru el Apostol a mla smodii a deurreng lokiuellel:

“E le uchul sel ungil uldesuel a Demad er a Babeluades el kirel a derta er a Rengelekel, me sel olsobel a klengar el urerel a Osobeled, el Jesus Kristo, eng sebeched—e kired—el kot el ngara deurreng el chad er tial beluulechad! Ngii ma sesengel a eolt er a klengar er a chetituokel el beluulechad el melekou er kid, eng sebeched el dolmii a merael el me klou el ngarkid el reng er a deurreng me a budech er a chelsed e leng sel deurreng el ngara Kristo me kid el medengei a ileakl el basio er kid er sel klebokel uldasu er a deurreng.

A kudersii a omereng el saul el kirel, me a klaumerang er ngak er ngii, el mla moluut el ebangkelio er a Jesus Kristo, uldimukl er sel ngarbab el uldasu er a deurreng el delalem er sel kmal chelsel. Ak kulengit er kemiu el mo nguu sel rodech er a ebangkelio e mo melchesiu er a lmuut el deurreng er tial klengar er tial omerolem el bedul a diak a ulebengelel klengar.