“Find Joy in Your Gospel Journey,” Liahona, July 2025.
ຂ່າວສານປະຈຳເດືອນ Liahona, ເດືອນກໍລະກົດ 2025
ຊອກຫາຄວາມຊື່ນຊົມໃນການເດີນທາງແຫ່ງພຣະກິດຕິຄຸນຂອງທ່ານ
ຜົນຮັບຂັ້ນສຸດທ້າຍຂອງການສະແດງຄວາມຮັກຂອງເຮົາຕໍ່ພຣະຜູ້ເປັນເຈົ້າ ໂດຍການຮັກສາພຣະບັນຍັດຂອງພຣະອົງ ແມ່ນພອນທີ່ນຳຄວາມສຸກ ແລະ ຄວາມຊື່ນຊົມມາໃຫ້.
ຮູບຖ່າຍສະມາຊິກຂອງສາດສະໜາຈັກທີ່ມີຄວາມສຸກໃນປະເທດໄທ ໂດຍ ຄຣິສຕິນາ ສະມິດ
ໃນຂະນະທີ່ຮັບໃຊ້ເປັນຜູ້ນຳເຜີຍແຜ່ໃນປະເທດຍີ່ປຸ່ນເມື່ອຫລາຍປີກ່ອນ, ຂ້າພະເຈົ້າໄດ້ໄປຮ່ວມປະຊຸມໃນທ້າຍອາທິດ ໃນເມືອງຊົນນະບົດແຫ່ງໜຶ່ງ ໃນມຸມທີ່ໄກຂອງເຂດເຜີຍແຜ່ຂອງພວກເຮົາ. ປະທານທ້ອງຖິ່ນໄດ້ຈັດໃຫ້ຂ້າພະເຈົ້າດຳເນີນການສຳພາດຊາຍຄົນໜຶ່ງທີ່ໄດ້ເຂົ້າຮ່ວມສາດສະໜາຈັກເມື່ອໜຶ່ງປີກ່ອນ ແລະ ກຳລັງສະແຫວງຫາທີ່ຈະໄດ້ຮັບໃບຮັບຮອງເຂົ້າພຣະວິຫານ. ລາວຫວັງວ່າຈະໄດ້ຮັບຂອງປະທານສັກສິດຂອງລາວເອງໃນວັນຄົບຮອບ ຫລື ໃກ້ວັນຄົບຮອບໜຶ່ງປີຂອງການຮັບບັບຕິສະມາຂອງລາວ.
ລະຫວ່າງການສົນທະນາຂອງພວກເຮົາ, ສະມາຊິກໃໝ່ຄົນນີ້ໄດ້ບັນຍາຍເຖິງຄວາມກະຕັນຍູຢ່າງເລິກເຊິ່ງສຳລັບພອນທີ່ລາວໄດ້ຮັບໃນໜຶ່ງປີ ນັບຕັ້ງແຕ່ລາວໄດ້ຮັບບັບຕິສະມາ. ລາວມັກເຂົ້າຮ່ວມກອງປະຊຸມສິນລະລຶກປະຈຳອາທິດ ແລະ ການປະຊຸມອື່ນໆ. ລາວມີສ່ວນຮ່ວມຢ່າງເລິກເຊິ່ງໃນກິດຈະກຳຂອງສາຂາຂອງລາວ. ສຳລັບຂ້າພະເຈົ້າແລ້ວ, ລາວໄດ້ເປີດເຜີຍຄວາມໝັ້ນໃຈໃນພັນທະສັນຍາ ທີ່ເປັນຜົນມາຈາກການເຂົ້າໃຈຈຸດປະສົງຂອງພຣະກິດຕິຄຸນຂອງລາວ, ຊຶ່ງຕອນນີ້ເປັນສ່ວນສຳຄັນໃນຕົວລາວ. ລາວເປັນສານຸສິດທີ່ປ່ຽນໃຈເຫລື້ອມໃສຂອງພຣະຄຣິດ ຜູ້ໄດ້ປະສົບກັບການປ່ຽນແປງອັນໃຫຍ່ຫລວງໃນໃຈ (ເບິ່ງ ໂມໄຊຢາ 5:2).
ສ່ວນທີ່ເຫລືອຂອງການສົນທະນາຂອງພວກເຮົາໄດ້ດຳເນີນໄປຕາມແບບແຜນແຫ່ງຄວາມຫວັງ. ພວກເຮົາໄດ້ສົນທະນາກ່ຽວກັບພິທີການ ແລະ ພັນທະສັນຍາ ທີ່ຈະເປັນສ່ວນໜຶ່ງຂອງປະສົບການໃນພຣະວິຫານຂອງລາວ. ລາວໄດ້ຕອບຄຳຖາມຢ່າງໝັ້ນໃຈຕໍ່ແຕ່ລະຄຳຖາມມາດຕະຖານ ທີ່ກ່ຽວກັບຂ້ອງກັບການໄດ້ຮັບໃບຮັບຮອງເຂົ້າພຣະວິຫານ.
ຫລັງຈາກການສຳພາດ, ຂ້າພະເຈົ້າຈື່ໄດ້ວ່າ ເຄີຍໄດ້ບອກກັບປະທານທ້ອງຖິ່ນວ່າ ຂ້າພະເຈົ້າຮູ້ສຶກກະຕັນຍູຫລາຍພຽງໃດທີ່ໄດ້ພົບກັບຊາຍທີ່ດີເດັ່ນຄົນນັ້ນ. ຂ້າພະເຈົ້າໄດ້ບອກເພິ່ນວ່າ ຂ້າພະເຈົ້າມີຄວາມປະທັບໃຈຫລາຍ ທີ່ຜູ້ສອນສາດສະໜາ ແລະ ສະມາຊິກໄດ້ພົບເຫັນ, ແລະ ລ້ຽງດູທາງວິນຍານ, ຄົນທີ່ມີຄຸນສົມບັດ ແລະ ອະນາຄົດທີ່ດີເຊັ່ນນັ້ນ.
ຂ້າພະເຈົ້າຕົກຕະລຶງ ເມື່ອປະທານທ້ອງຖິ່ນໄດ້ແບ່ງປັນວ່າ ເມື່ອຊາຍຄົນນີ້ເລີ່ມຮຽນຮູ້ຈາກຜູ້ສອນສາດສະໜາ ແລະ ເຂົ້າໂບດເມື່ອໜຶ່ງປີກ່ອນ, ລາວບໍ່ມີບ່ອນຢູ່ອາໄສ ແລະ ຢູ່ໃນ—ສະພາບທີ່ຍາກລຳບາກຫລາຍ—ແທບຈະສິ້ນຫວັງ. ຈາກນັ້ນປະທານທ້ອງຖິ່ນໄດ້ບັນຍາຍວ່າ ການສຶກສາພຣະກິດຕິຄຸນຂອງອ້າຍນ້ອງຄົນນີ້ ແລະ ການປ່ຽນໃຈເຫລື້ອມໃສຂອງລາວເປັນເວລາຫລາຍເດືອນ ໄດ້ນຳໄປສູ່ການປ່ຽນແປງທີ່ໜ້າອັດສະຈັນ, ເຮັດໃຫ້ລາວຢູ່ໃນເສັ້ນທາງແຫ່ງການກຸ້ມຕົນເອງທາງວິນຍານ ແລະ ທາງໂລກ ແລະ ເຮັດໃຫ້ລາວມີຈຸດປະສົງ ແລະ ຄວາມຊື່ນຊົມ.
ພຣະກິດຕິຄຸນໄດ້ເຮັດໃຫ້ລາວເຫັນຢ່າງແຈ່ມແຈ້ງກ່ຽວກັບຈຸດປະສົງຂອງຊີວິດຂອງລາວ. ຄວາມຈິງຂອງພຣະກິດຕິຄຸນທີ່ແຈ່ມແຈ້ງ ແລະ ລ້ຳຄ່າໄດ້ຕອບຄຳຖາມອັນສຳຄັນຂອງຄວາມເປັນມະຕະ, ເລີ່ມຈາກຄວາມຮູ້ທີ່ວ່າ “ພຣະເຈົ້າເປັນພຣະບິດາເທິງສະຫວັນຂອງເຮົາ, ແລະ ເຮົາເປັນລູກຂອງພຣະອົງ. … ພຣະເຈົ້າຮູ້ຈັກເຮົາເປັນສ່ວນຕົວ ແລະ ຮັກເຮົາ.” ໃນແຜນຂອງພຣະອົງ, “ພຣະບິດາເທິງສະຫວັນໄດ້ … ຈັດຫາຂອງປະທານ ແລະ ການນຳພາຫລາຍຢ່າງ ເພື່ອຊ່ວຍໃຫ້ເຮົາກັບໄປຫາທີ່ປະທັບຂອງພຣະອົງ.”
ນັ້ນຄືພອນສຳລັບຊາຍຜູ້ນີ້, ຊຶ່ງມີໃຫ້ສຳລັບລູກໆຂອງພຣະເຈົ້າທຸກຄົນຢ່າງເທົ່າທຽມກັນ ຜ່ານທາງພຣະກິດຕິຄຸນຂອງພຣະເຢຊູຄຣິດ.
ຈຸດປະສົງຂອງຊີວິດ
ເນື່ອງຈາກພຣະເຢຊູຄຣິດໄດ້ຟື້ນຟູພຣະກິດຕິຄຸນຂອງພຣະອົງຜ່ານທາງສາດສະດາໂຈເຊັບ ສະມິດ, “ເຮົາຈຶ່ງເຂົ້າໃຈຈຸດປະສົງຂອງຊີວິດ, ວ່າເຮົາເປັນໃຜ,” ປະທານເອັມ ຣະໂຊ ບາເລີດ ໄດ້ປະກາດ (1928–2023). ໃນປະຈັກພະຍານຄັ້ງສຸດທ້າຍຂອງເພິ່ນຕໍ່ສາດສະໜາຈັກ, ປະທານບາເລີດ, ຊຶ່ງຕອນນັ້ນໄດ້ເປັນປະທານກຸ່ມອັກຄະສາວົກສິບສອງແທນຊົ່ວຄາວ, ໄດ້ກ່າວວ່າ:
“ເຮົາຮູ້ວ່າ ພຣະເຈົ້າຄືໃຜ; ເຮົາຮູ້ວ່າພຣະຜູ້ຊ່ວຍໃຫ້ລອດຄືໃຜ, ເພາະເຮົາມີໂຈເຊັບ, ຜູ້ຊຶ່ງໄດ້ເຂົ້າໄປໃນປ່າຕອນຍັງນ້ອຍ, ສະແຫວງຫາການໃຫ້ອະໄພບາບຂອງເພິ່ນ. …
“ຂ້າພະເຈົ້າປະຫລາດໃຈ, ແລະ ແນ່ໃຈວ່າ ພວກທ່ານຫລາຍຄົນກໍຮູ້ສຶກແນວນັ້ນເຊັ່ນກັນ, ດ້ວຍຄວາມຍິນດີຢ່າງຍິ່ງທີ່ໄດ້ຮູ້ວ່າ ເຮົາຮູ້ຫຍັງກ່ຽວກັບຈຸດປະສົງໃນຊີວິດຂອງເຮົາ, ເປັນຫຍັງເຮົາຈຶ່ງຢູ່ທີ່ນີ້, ເຮົາຄວນພະຍາຍາມເຮັດຫຍັງ ແລະ ບັນລຸຫຍັງໃນຊີວິດປະຈຳວັນຂອງເຮົາ.”
ສຳລັບສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ຄວາມຮູ້ນັ້ນແມ່ນລວມທັງຄວາມເຂົ້າໃຈເຖິງ “ແຜນແຫ່ງຄວາມລອດ” ທີ່ສົມບູນແບບຂອງພຣະເຈົ້າ. ຊຶ່ງຮູ້ອີກວ່າເປັນ “ແຜນແຫ່ງຄວາມສຸກອັນຍິ່ງໃຫຍ່,” “ແຜນແຫ່ງການໄຖ່,” ແລະ “ແຜນແຫ່ງຄວາມເມດຕາ” (ແອວມາ 42:8, 11, 15), ມັນ “ເອົາຄວາມລຶກລັບອອກຈາກຊີວິດ ແລະ ຄວາມບໍ່ແນ່ນອນອອກຈາກອະນາຄົດຂອງເຮົາ.” ສິ່ງສຳຄັນຕໍ່ແຜນນັ້ນຄື “ຄຳສອນຂອງພຣະຄຣິດ,” ຊຶ່ງເປັນຈຸດໃຈກາງຂອງຈຸດປະສົງຂອງຊີວິດ.
ເພາະວ່າເຮົາມີພຣະກິດຕິຄຸນ, ເຮົາຈຶ່ງຮູ້ວ່າ ເຮົາເປັນລູກຂອງພຣະເຈົ້າ, ຖືກສົ່ງມາສູ່ໂລກເພື່ອຈະໄດ້ຮັບການທົດລອງ, ຂັດເກົາ, ແລະ ກຽມພ້ອມທີ່ຈະ “ຖືກນຳອອກມາໂດຍການຟື້ນຄືນຊີວິດຈາກຄວາມຕາຍ, ຜ່ານໄຊຊະນະ ແລະ ລັດສະໝີພາບຂອງພຣະເມສານ້ອຍ” (ຄຳສອນ ແລະ ພັນທະສັນຍາ 76:39). ເຮົາຮູ້ຈັກພຣະບັນຍັດ ແລະ ໄດ້ຮັບການແນະນຳ “ຢ່າງພຽງພໍຈົນ [ເຮົາ] ຮູ້ຈັກຄວາມດີຈາກຄວາມຊົ່ວ” (2 ນີໄຟ 2:5). ເຮົາຮູ້ວ່າເຮົາຢູ່ເທິງໂລກເພື່ອຮັກ ແລະ ຮັບໃຊ້. ແລະ ເຮົາຮູ້ວ່າພຣະຜູ້ຊ່ວຍໃຫ້ລອດໄດ້ເອີ້ນເຮົາໃຫ້ເອົາຊະນະໂລກ ແລະ ຊ່ວຍເຫລືອຄົນອື່ນໃຫ້ເຮັດເຊັ່ນດຽວກັນ (ເບິ່ງ ໂຢຮັນ 16:33; ຄຳສອນ ແລະ ພັນທະສັນຍາ 64:2) ໃນການກຽມພ້ອມສຳລັບການສະເດັດມາຄັ້ງທີສອງຂອງພຣະອົງ.
ເມື່ອເຮົາສຸມໃຈໃສ່ທີ່ພຣະອົງ, ສິ່ງທີ່ໂຈເຊັບ ສະມິດ ໄດ້ເອີ້ນວ່າ “ສຽງໂຫ່ຮ້ອງຂອງພຣະກິດຕິຄຸນຂອງອົງພຣະເຢຊູຄຣິດເຈົ້າຂອງເຮົາ” ຈະເພີ່ມຄວາມເຂັ້ມແຂງໃຫ້ແກ່ເຮົາໃນຊ່ວງວັນທີ່ຫຍຸ້ງຍາກ ແລະ ນຳຄວາມໝາຍ ແລະ ຈຸດປະສົງມາສູ່ຊີວິດຂອງເຮົາ ແລະ ຊີວິດຂອງຄົນອື່ນ.
Every Knee Shall Bow [ທຸກຫົວເຂົ່າຈະຄຸລົງ], ໂດຍ ແດນ ວິວສັນ, ຫ້າມລອກແບບ
ການເຊື່ອຟັງ, ພອນ, ຄວາມຊື່ນຊົມ
ພຣະເຈົ້າໄດ້ປະທານອຳເພີໃຈທາງສິນທຳໃຫ້ເຮົາ ເພື່ອວ່າເຮົາຈະມີຄວາມຮັບຜິດຊອບຕໍ່ການເລືອກຂອງເຮົາ (ເບິ່ງ ຄຳສອນ ແລະ ພັນທະສັນຍາ 101:78; 2 ນີໄຟ 2:16). ໃນສ່ວນໜຶ່ງຂອງ “ການກົງກັນຂ້າມໃນທຸກຢ່າງ” (2 ນີໄຟ 2:11), ຊາຕານໄດ້ຖືກອະນຸຍາດໃຫ້ລໍ້ລວງເຮົາ ເພື່ອໃຫ້ໃຊ້ອຳເພີໃຈຂອງເຮົາໃນທາງທີ່ຜິດ.
ແຕ່ອົງພຣະເຢຊູຄຣິດເຈົ້າ, “ໂດຍທີ່ຮູ້ເຖິງຄວາມເສຍຫາຍທີ່ຈະມາສູ່ຜູ້ອາໄສຂອງແຜ່ນດິນໂລກ” ໃນສະໄໝຂອງເຮົາ, ໄດ້ເອີ້ນສາດສະດາໂຈເຊັບ ສະມິດ, “ໄດ້ກ່າວກັບລາວຈາກສະຫວັນ, ແລະ ມອບບັນຍັດໃຫ້ລາວ” (ຄຳສອນ ແລະ ພັນທະສັນຍາ 1:17). ແບບແຜນນັ້ນ ທີ່ພຣະຜູ້ເປັນເຈົ້າເປີດເຜີຍພຣະບັນຍັດ ແລະ ພຣະປະສົງຂອງພຣະອົງຕໍ່ສາດສະດາຂອງພຣະອົງ ຍັງຄົງດຳເນີນຕໍ່ໄປໃນສະໄໝຂອງເຮົາ ກັບປະທານຣະໂຊ ເອັມ ແນວສັນ—ແລະ ດ້ວຍເຫດຜົນອັນດຽວກັນ. ພຣະເຈົ້າປາດຖະໜາທີ່ຈະນຳພາເຮົາໄປສູ່ຄວາມສຸກໃນຊີວິດນີ້ ແລະ ໄປສູ່ລັດສະໝີພາບຊັ້ນສູງໃນຊີວິດໜ້າ.
ການເຊື່ອຟັງພຣະບັນຍັດຂອງພຣະເຈົ້າຄວນມາຈາກຄວາມອຸທິດຕົນ ແລະ ຄວາມຮັກຂອງເຮົາຕໍ່ພຣະອົງ. ອົງພຣະເຢຊູຄຣິດເຈົ້າເອງໄດ້ປະກາດວ່າ ການຮັກພຣະເຈົ້າ “ແມ່ນກົດບັນຍັດຂໍ້ໃຫຍ່ ແລະ ຂໍ້ຕົ້ນ” (ເບິ່ງ ມັດທາຍ 22:37–38). ພຣະອົງໄດ້ໃຫ້ຄວາມຮູ້ແຈ້ງຕື່ມອີກ ເມື່ອພຣະອົງໄດ້ປະກາດວ່າ, “ຖ້າພວກເຈົ້າຮັກເຮົາ, ພວກເຈົ້າກໍຈະເຊື່ອຟັງກົດບັນຍັດຂອງເຮົາ” (ໂຢຮັນ 14:15).
ມີລາງວັນສຳລັບການຮັກພຣະຜູ້ເປັນເຈົ້າ ແລະ ການຮັກສາພຣະບັນຍັດຂອງພຣະອົງ. ໃນຍຸກສະໄໝນີ້ ພຣະອົງໄດ້ບັນຍາຍວ່າ “ມີກົດ, ອອກຄຳສັ່ງໄວ້ໃນສະຫວັນຢ່າງປ່ຽນແປງບໍ່ໄດ້ … , ຊຶ່ງໃນນັ້ນ ພອນທັງປວງໄດ້ຖືກກຳນົດໄວ້ແລ້ວ—
“ແລະ ເມື່ອພວກເຮົາໄດ້ຮັບພອນປະການໃດຈາກພຣະເຈົ້າ, ຍ່ອມເປັນໄປເພາະການເຊື່ອຟັງຕໍ່ກົດນັ້ນ ຊຶ່ງມັນໄດ້ຖືກກຳນົດໄວ້ແລ້ວ” (ຄຳສອນ ແລະ ພັນທະສັນຍາ 130:20–21).
ດັ່ງນັ້ນ, ຜົນຮັບຂັ້ນສຸດທ້າຍຂອງການສະແດງຄວາມຮັກຂອງເຮົາຕໍ່ພຣະຜູ້ເປັນເຈົ້າ ໂດຍການຮັກສາພຣະບັນຍັດຂອງພຣະອົງເປັນພອນທີ່ນຳຄວາມສຸກ ແລະ ຄວາມຊື່ນຊົມມາໃຫ້.
ການເບິ່ງຊີວິດຜ່ານທັດສະນະຂອງພຣະກິດຕິຄຸນທີ່ຖືກຟື້ນຟູ ແລະ ການເປີດເຜີຍສະໄໝໃໝ່ ເຮັດໃຫ້ເຮົາມີຄວາມຊັດເຈນ. ດ້ວຍມຸມມອງທີ່ຊັດເຈນກ່ຽວກັບທີ່ມາ ແລະ ຈຸດໝາຍປາຍທາງອັນສູງສົ່ງຂອງເຮົາ, ເຮົາຮູ້ວ່າ “ສິ່ງທີ່ຈະເຮັດໃຫ້ຄວາມເປັນ ມະຕະ [ຂອງເຮົາ] ດີທີ່ສຸດເທົ່າທີ່ ມັນ ຈະສາມາດເປັນໄປໄດ້ ຄືສິ່ງ ດຽວກັນກັບ ທີ່ຈະເຮັດໃຫ້ຊີວິດ [ຂອງເຮົາ] ຊົ່ວນິລັນດອນ ດີທີ່ສຸດເທົ່າທີ່ ມັນ ຈະສາມາດເປັນໄປໄດ້!”
ສະຫລຸບ
ຂ້າພະເຈົ້າຈົບໃນບ່ອນທີ່ຂ້າພະເຈົ້າໄດ້ເລີ່ມຕົ້ນ, ຈື່ຈຳປະສົບການຂອງຂ້າພະເຈົ້າເມື່ອຫລາຍປີກ່ອນ ກັບຜູ້ປ່ຽນໃຈເຫລື້ອມໃສໃໝ່ໃນປະເທດຍີ່ປຸ່ນ. ຜ່ານທາງຄວາມພາກພຽນຂອງລາວ ແລະ ຄວາມພາກພຽນຂອງຜູ້ສອນສາດສະໜາ ແລະ ສະມາຊິກ, ລາວໄດ້ພົບພຣະກິດຕິຄຸນຂອງພຣະເຢຊູຄຣິດທີ່ຖືກຟື້ນຟູ. ໃນການຊອກຫາພຣະກິດຕິຄຸນ, ລາວຍັງໄດ້ຄົ້ນພົບຈຸດປະສົງຂອງລາວນຳອີກ, ຊຶ່ງໄດ້ຂະຫຍາຍວິໄສທັດຂອງລາວ. ລາວຍັງໄດ້ພົບເຫັນແຜນແຫ່ງຄວາມສຸກອັນຍິ່ງໃຫຍ່ນຳອີກ. ການເຊື່ອຟັງຕໍ່ພັນທະສັນຍາຂອງພຣະກິດຕິຄຸນຂອງແຜນນັ້ນໄດ້ນຳພອນ ແລະ ຄວາມຊື່ນຊົມມາໃຫ້ລາວ, ຍົກລາວຂຶ້ນທັງທາງໂລກ ແລະ ທາງວິນຍານ.
ການເດີນທາງຂອງລາວໄດ້ນຳພາລາວມາສູ່ການເປັນສະມາຊິກໃນສາດສະໜາຈັກຂອງພຣະເຢຊູຄຣິດ ເຮັດໃຫ້ລາວກາຍເປັນພະຍານຂອງພຣະເຢຊູຄຣິດ. ແອວເດີ ແພທຣິກ ເຄຍຣັນ ແຫ່ງກຸ່ມອັກຄະສາວົກສິບສອງ ໄດ້ບັນຍາຍຄວາມຊື່ນຊົມດັ່ງນີ້:
“ເປັນເພາະແຜນແຫ່ງຄວາມຮັກຂອງພຣະບິດາເທິງສະຫວັນຂອງເຮົາສຳລັບລູກໆຂອງພຣະອົງແຕ່ລະຄົນ, ແລະ ເປັນເພາະພຣະຊົນຊີບທີ່ໄຖ່ ແລະ ພາລະກິດຂອງພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ, ເຮົາສາມາດເປັນ—ແລະ ຄວນ—ເປັນຜູ້ຄົນທີ່ມີຄວາມຊື່ນຊົມຫລາຍທີ່ສຸດໃນໂລກ! ແມ່ນແຕ່ຂະນະທີ່ມໍລະສຸມຊີວິດຢູ່ໃນໂລກທີ່ວຸ້ນວາຍກະທົບກະເທືອນເຮົາຢ່າງໜັກ, ແຕ່ເຮົາສາມາດປູກຝັງຄວາມຮູ້ສຶກແຫ່ງຄວາມຊື່ນຊົມທີ່ເຕີບໂຕ ແລະ ຄົງຢູ່ ແລະ ຄວາມສະຫງົບສຸກພາຍໃນ ເພາະຄວາມຫວັງຂອງເຮົາໃນພຣະຄຣິດ ແລະ ຄວາມເຂົ້າໃຈຂອງເຮົາເຖິງພື້ນທີ່ຂອງເຮົາເອງໃນແຜນແຫ່ງຄວາມສຸກທີ່ສວຍງາມໄດ້.”
ຂ້າພະເຈົ້າຂໍສະແດງຄວາມກະຕັນຍູຂອງຂ້າພະເຈົ້າສຳລັບ, ແລະ ປະຈັກພະຍານເຖິງ, ພຣະກິດຕິຄຸນທີ່ຖືກຟື້ນຟູຂອງພຣະເຢຊູຄຣິດ, ລວມທັງແຜນແຫ່ງຄວາມສຸກອັນຍິ່ງໃຫຍ່ ທີ່ຝັງຢູ່ໃນນັ້ນຢ່າງເລິກເຊິ່ງ. ຂ້າພະເຈົ້າເຊື້ອເຊີນທ່ານໃຫ້ຮັບສ່ວນໝາກຜົນຂອງພຣະກິດຕິຄຸນ ແລະ ຮູ້ສຶກມີຄວາມຊື່ນຊົມຫລາຍຂຶ້ນໃນຊີວິດນີ້ ໃນການເດີນທາງໄປສູ່ຊີວິດນິລັນດອນຂອງທ່ານ.
© 2025 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, July 2025. Laotian. 19601 331