Panangsapul iti Rag-o iti Panagdaliasatmo iti Ebanghelio

Gapu ta insubli ni Jesucristo ti ebangheliona babaen ken ni Propeta Joseph Smith, “addaantayo iti pannakaawat iti panggep ti biag, iti kinasiasinotayo,” kinuna ni Presidente M. Russell Ballard (1928–2023). Iti maudi a pammaneknekna iti Simbaan, kinuna ni Presidente Ballard, a nagakem idi a Presidente ti Korum dagiti Sangapulo-ket-dua nga Apostol:

“Ammotayo no asino ti Dios; ammotayo no asino ti Mangisalakan agsipud ta adda kadatayo ni Joseph, a napan iti maysa a kakaywan idi kas maysa nga ubing a lalaki, tapno agkiddaw iti pammakawan kadagiti basolna. …

“Masdaawak, ket siguradoak nga adu kadakayo ti kasta met, no kasano a naparaburantayo a mangammo no ania ti ammotayo maipapan iti panggeptayo iti biag, no apay nga addatayo ditoy, no ania ti rumbeng nga ikagumaantayo nga aramiden ken maipatungpaltayo iti inaldaw a panagbiagtayo.”

Para kadagiti miembro ti Ti Simbaan ni Jesucristo dagiti Santo iti Ud-udina nga Aldaw, dayta a pannakaammo iramanna ti pannakaawat iti “perpekto a plano” ti Dios iti pannakaisalakan. Maawagan met a “ti naindaklan a plano ti kinaragsak,” “ti plano ti pannakasubbot,” ken “ti plano ti panangngaasi ” (Alma 42:8, 11, 15), ket “ikkatenna ti misterio iti biag ken ti di kinatalged iti masakbayantayo.” Napateg iti dayta a plano ti “doktrina ni Cristo,” a kangrunaan iti panggep ti biag.

Gapu ta adda kadatayo ti ebanghelio, ammotayo a datayo dagiti annak ti Dios, a naibaon ditoy daga tapno masubok, madalusan, ken maisagana a “maisalakan babaen ti panagungar ti natay, babaen ti panagballigi ken ti dayag ti Kordero” (Doktrina ken Katulagan 76:39). Ammotayo dagiti bilin ken naibilin a “mangammo ti naimbag manipud iti dakes” (2 Nephi 2:5). Ammotayo nga addatayo ditoy daga tapno agayat ken agserbitayo. Ket ammotayo nga inawagannatayo ti Mangisalakan a mangparmek iti lubong ken tumulong kadagiti dadduma a mangaramid met iti kasta (kitaen iti Juan 16:33; Doktrina ken Katulagan 64:2) kas panagsagana iti Maikadua a Yaayna.

Bayat ti panangipamaysatayo Kenkuana, ti inawagan ni Joseph Smith a “ti makaparagsak nga uni ti ebanghelio ni Apotayo a Jesucristo” ti mangpapigsa kadatayo bayat dagiti narigat nga aldaw ken mangyeg iti kaipapanan ken panggep iti biagtayo ken iti biag dagiti dadduma.

Agparintumengto ti Tunggal Tumeng, ni Dan Wilson, saan a mabalin a kopiaen

Panagtulnog, Dagiti Bendision, Rag-o

Inikkannatayo ti Dios iti wayawaya nga agpili a mainaig iti moralidad tapno mabalintayo ti agsungbat kadagiti pilitayo (kitaen iti Doktrina ken Katulagan 101:78; 2 Nephi 2:16). Kas paset ti “pagsusupadian ti amin a banag” (2 Nephi 2:11), mapalubosan ni Satanas a mangsulisog kadatayo iti di umisu a panangusartayo iti wayawayatayo nga agpili.

Ngem ni Apo Jesucristo, “iti pannakaammona iti didigra a dumtengto kadagiti agindeg iti daga” iti panawentayo, inawaganna ni Propeta Joseph Smith, “kinasaona manipud iti langit, ken binilinna” (Doktrina ken Katulagan 1:17). Dayta a pagtuladan a pangibutaktakan ti Apo kadagiti bilin ken pagayatanna kadagiti propetana ket agtultuloy iti aldawtayo babaen ken ni Presidente Russell M. Nelson—ken gapu iti isu met laeng a rason. Tarigagayan ti Dios nga iturongnatayo iti ragsak iti daytoy a biag ken iti celestial a dayag iti sumaruno a biag.

Ti panagtulnog kadagiti bilin ti Dios ket rumbeng nga agtaud iti debosiontayo ken panagayattayo Kenkuana. Ti mismo nga Apo a ni Jesucristo impakaammona a ti panagayat iti Dios “ti umuna ken kadakkelan a bilin” (kitaen iti Mateo 22:37–38). Nangted iti kanayonan a pannakaawat idi inwaragawagna, “No ayatendak, tungpalenyo dagiti bilbilinko” (Juan 14:15).

Adda gunggona iti panangayat iti Apo ken panangtungpal kadagiti bilinna. Iti daytoy a dispensasion inladawanna “adda paglintegan, a di maibabawi ti pannakaipaulogna iti langit … , a nakaibatayan amin a bendision—

“Ket no makagun-odtayo iti ania man a bendision manipud iti Dios, babaen ti panagtulnog iti dayta a paglintegan a naibatay.” (Doktrina ken Katulagan 130:20–21).

Gapuna, ti kamaudianan a pagbanagan ti panangipakita iti ayattayo iti Apo babaen ti panangtungpal kadagiti bilinna ket dagiti bendision a mangyeg iti ragsak ken rag-o.

Ti panangkita iti biag babaen ti silaw ti naisubli nga ebanghelio ken ti kabaruanan a paltiing ti mangted kadatayo iti kinalawag. Gapu ta addaantayo iti nalawag a pannakaawat iti nadiosan a nagtaudan ken pagtungpalantayo, ammotayo a “dagiti mismo a banag a mangaramidto iti mortal a biagtayo iti kasayaatan a magun-od daytoy ket ti isu met laeng a bambanag a mamagbalbaliw iti biagtayo iti amin a kinaagnanayon iti kasayaatan a panagbalbaliw daytoy!”

Agpatinggaak iti nangrugiak, iti pananglagipko iti padasko iti sumagmamano a tawenen ti napalabas iti maysa a nabiit pay a convert idiay Japan. Babaen ti kinagagetna ken ti kinagaget dagiti misionario ken miembro, nasarakanna ti naisubli nga ebanghelio ni Jesucristo. Iti panangbirokna iti ebanghelio, natakuatanna met ti panggepna, a nangpalawa iti sirmatana. Nasarakanna met ti naindaklan a plano ti kinaragsak. Ti panagtulnog kadagiti katulagan ti ebanghelio ti plano ti Dios ket nangyeg kenkuana kadagiti bendision ken rag-o, a nangtulong kenkuana iti temporal ken naespirituan.

Ti panagdaliasatna a nangiturong iti panagbalinna a miembro ti Simbaan ni Jesucristo ket nangpalubos kenkuana nga agbalin a maysa a saksi ni Jesucristo. Inladawan ni Elder Patrick Kearon ti Korum dagiti Sangapulo-ket-dua nga Apostol ti ragsak a kas dagiti sumaganad:

“Gapu iti plano ti Nailangitan nga Amatayo iti annakna, ken gapu iti makasubbot a biag ken mision ti Mangisalakantayo, ni Jesucristo, mabalin—ken rumbeng—a datayo ti agbalin a karagragsakan a tattao ditoy daga! Adda man dagiti bagyo ti biag a sumangbay kadatayo, mabalintayo a patanoren ti dumakdakkel ken agnanayon a rikna ti rag-o ken talna gapu iti namnama ken Cristo ken pannakaawat iti lugartayo iti napintas a plano ti ragsak.”

Ipaayko ti panagyamanko, ken pammaneknekko, iti naisubli nga ebanghelio ni Jesucristo, agraman ti naindaklan a plano ti kinaragsak a nailanad a nauneg iti dayta. Awisenkayo a makiranud kadagiti bunga ti ebanghelio ken mangrikna iti ad-adu a rag-o iti daytoy a biag iti panagdaliasatyo nga agturong iti biag nga agnanayon.