“Mag-angkon sang Kalipay sa Imo Pagpangabuhi sang Ebanghelyo,” Liahona, Hulyo 2025.
Bulanan nga Mensahe sa Liahona, Hulyo 2025
Mag-angkon sang Kalipay sa Imo Pagpangabuhi sang Ebanghelyo
Ang pinakamataas nga resulta sang pagpakita sang aton pagpalangga sa Ginuo paagi sa pagtuman sang Iya mga kasugoan amo ang mga bugay nga nagadala sang kalipay kag kasadya.
Litrato sang malipayon nga mga miyembro sang Simbahan sa Thailand iya ni Cristina Smith
Samtang nagaserbisyo bilang mission leader sa Japan pila ka tuig na ang nagligad, nagkadto ako sa weekend conference sa uma nga siyudad sa isa sa malayo nga lugar sa amon misyon. Ginpatigayon sang district president nga mainterbyu ko ang isa ka tawo nga nagpamiyembro sa Simbahan sang nagligad nga tuig kag nagahandum nga makabaton sang temple recommend. Nagalaum sia nga makabaton sang iya kaugalingon nga endowment sa tion mismo ukon malapit sa petsa sang primero nga anibersaryo sang iya bunyag.
Samtang nagahambalanay kami, ginlaragway sining bag-o nga miyembro kon daw ano kadako sang iya pagpasalamat sa madamo nga bugay nga iya nabaton sa sulod sang tuig nga ginbunyagan sia. Nasadyahan sia nga magkadto sa sakramento kada semana kag sa iban nga mga miting. Nangin imbolbado sia kaayo sa aktibidades sa ila branch. Para sa akon, ginapakita niya ang kompiyansa sa kasugtanan nga naghalin sa paghangop sang iya katuyuan sa ebanghelyo, nga karon, nangin suod na nga bahin niya. Ginbag-o na sia nga disipulo ni Cristo nga nakaeksperiyensya sang dako nga pagbag-o sang tagipusuon (tan-awa sa Mosias 5:2).
Ang bilog namon nga paghinambalanay may makita nga paglaum. Gin-istoryahan namon ang mga ordinansa kag mga kasugtanan nga mangin bahin sang iya eksperiyensya sa templo. Ginsabat niya sing husto ang tagsa ka talaksan nga mga pamangkot nga kinahanglan sa pagbaton sang temple recommend.
Pagkatapos sang interbyu, madumduman ko nga ginhambalan ko ang district president nga nagapasalamat gid ako nga makilala ang amo sadto ka dalayawon nga tawo. Ginhambal ko sa iya nga nakadayaw gid ako nga nakita sang mga misyonero kag mga miyembro, kag ginsagod sa espirituhanon, ang isa ka tawo nga may amo sini nga kalidad kag potensyal.
Nakibot ako sang ginsugid sang district president nga sang magsugod ining tawo sa pagbaton sang mga leksyon sa misyonero kag magsimba masobra isa ka tuig na ang nagligad, wala ini sia sang maestaran kag ara sa mabudlay—halos wala paglaum—nga sirkumstansya. Dayon ginlaragway sang district president nga ang pagtuon sining brother sang ebanghelyo kag ang iya pagkahaylo sa sulod sang pila ka bulan nagdala sang milagroso nga pagbag-o, nga nagpahamtang sa iya sa banas sang espiritwal kag temporal nga pagtindog sa kaugalingon kag naghatag sa iya sang katuyuan kag kasadya.
Ang ebanghelyo naghatag sa iya sang maathag nga panan-aw sang katuyuan sang iya kabuhi. Ang simple kag bilidhon nga mga kamatuoran sang ebanghelyo nagdala sang mga sabat sa importante nga mga pamangkot parte sa kabuhi sa duta, nga nagsugod sa ihibalo nga “ang Dios amo ang aton Amay nga Langitnon, kag kita Iya mga anak. … Personal kita nga kilala sang Dios kag palangga Niya kita.” Sa Iya plano, “ang Amay nga Langitnon … naghatag sang madamo nga regalo kag mga giya para buligan kita nga makabalik sa Iya presensya.”
Amo sini ang nangin bugay sa sining tawo, nga matigayon man sang tanan nga anak sang Dios paagi sa ebanghelyo ni Jesucristo.
Ang Katuyuan sang Kabuhi
Tungod ginpanumbalik ni Jesucristo ang Iya ebanghelyo paagi kay Propetang Joseph Smith, “may paghangop kita sang katuyuan sang kabuhi, kon sin-o kita,” siling ni Pangulong M. Russell Ballard (1928–2023). Sa iya katapusan nga testimonya sa Simbahan, si Pangulong Ballard, anay Akting nga Pangulo sang Korum sang Dose ka Apostoles, nagsiling:
“Kilala naton kon sin-o ang Dios; kilala naton kon sin-o ang Manluluwas tungod may ara kita sang Joseph, nga nagkadto sa kakahuyan sang bata pa sia, nga nagapangayo sang kapatawaran sang iya mga sala. …
“Nagadayaw ako, kag sigurado madamo man sa inyo, kon daw ano kita kaswerte nga nakahibalo kita sang nahibal-an naton parte sa aton katuyuan sa kabuhi, kon ngaa ari kita diri, kon ano dapat ang ginatinguhaan naton nga himuon kag lab-uton sa aton adlaw-adlaw nga pagpangabuhi.”
Para sa mga miyembro sang Ang Simbahan ni Jesucristo sang mga Santos sa Ulihing mga Adlaw, ina nga ihibalo may upod nga pag-intiendi sang “perpekto nga plano” sang kaluwasan sang Dios. Nga ginakilala man bilang “ang dako nga plano sang kalipayan,” “ang plano sang pagtubos,” kag “ang plano sang kaluoy” (Alma 42:8, 11, 15), iya sini “ginakakas ang misteryo sang kabuhi kag ang pagkawala-kasegurohan sang aton palaabuton.” Kinahanglanon sa sina nga plano “ang doktrina ni Cristo,” nga amo ang sentro sang katuyuan sang kabuhi.
Tungod may ara kita sang ebanghelyo, kabalo kita nga mga anak kita sang Dios, nga ginpadala sa duta para tilawan, pinuhon, kag ihanda para “magabangon sa pagkabanhaw sang mga minatay paagi sa kadalag-an kag himaya sang Kordero” (Doktrina kag mga Kasugtanan 76:39). Kabalo kita sang mga kasugoan kag gin-istruksyonan “sing nagakaigo nga [aton] mahibal-an ang maayo sa malain” (2 Nefi 2:5). Kabalo kita nga ari kita sa duta para magpalangga kag magserbisyo. Kag kabalo kita nga gintawag kita sang Manluluwas para daugon ang kalibutan kag buligan man ang iban nga himuon ini (tan-awa sa Juan 16:33; Doktrina kag mga Kasugtanan 64:2) bilang paghanda para sa Iya Ika-duha nga Pagkari.
Samtang nagatutok kita sa Iya, ang ginatawag ni Joseph Smith nga “ang malipayon nga tunog sang Ebanghelyo sang aton Ginuong Jesucristo” magapabakod sa aton sa mga adlaw sang kabudlayan kag magadala sang kahulugan kag katuyuan sa aton mga kabuhi kag sa kabuhi sang iban.
Every Knee Shall Bow [Ang Tagsa ka Tuhod Magaluhod], ni Dan Wilson, indi mahimo kopyahon
Pagtuman, Mga Bugay, Kalipay
Ginhatagan kita sang Dios sang moral nga kahilwayan sa pagpili para mangin may salabton kita sa aton mga pagpili (tan-awa sa Doktrina kag mga Kasugtanan 101:78; 2 Nefi 2:16). Bilang bahin sang “oposisyon sa tanan nga butang” (2 Nefi 2:11), gintugtan si Satanas nga magtentar sa aton para gamiton naton sang indi husto ang aton kahilwayan sa pagpili.
Pero ang Ginuong Jesucristo kay “nakahibalo sang mga kalamidad nga magaabot sa mga pumuIuyo sang duta” sa aton panahon, nagtawag kay Propetang Joseph Smith, “naghambal sa iya halin sa langit, kag naghatag sa iya sang mga kasugoan” (Doktrina kag mga Kasugtanan 1:17). Ina nga sulundan kon paano ginapahayag sang Ginuo ang Iya mga kasugoan kag pagbuot sa Iya mga propeta nagapadayon sa aton panahon kay Pangulong Russell M. Nelson—kag sa amo man nga rason. Gusto sang Dios nga giyahan kita padulong sa kalipayan sa sining kabuhi kag sa selestiyal nga himaya sa madason nga kabuhi.
Ang pagtuman sang mga kasuguan sang Dios dapat halin sa aton debosyon kag pagpalangga sa Iya. Ang Ginuong Jesucristo Mismo nagpahayag nga ang higugmaon ang Dios amo ang “una kag dako nga sugo” (tan-awa sa Mateo 22:37–38). Naghatag pa gid Sia sang dugang nga ihibalo sang nagsiling Sia nga, “Kon ginahigugma ninyo ako, tumanon ninyo ang akon mga sugo” (Juan 14:15).
May premyo sa pagpalangga sa Ginuo kag pagtuman sang Iya mga kasugoan. Sa sining dispensasyon naglaragway Sia sang “layi, indi mabawi nga mando sa langit … , kon sa diin ang tanan nga bugay napasad—
“Kag kon makabaton kita sang bisan ano nga bugay gikan sa Dios, ini bangod sa pagtuman sinang layi kon sa diin ini napasad” (Doktrina kag mga Kasugtanan 130:20–21).
Gani, ang pinakamataas nga resulta sang pagpakita sang aton pagpalangga sa Ginuo paagi sa pagtuman sang Iya mga kasugoan amo ang mga bugay nga nagadala sang kalipay kag kasadya.
Ang pagtan-aw sa kabuhi paagi sa lente sang ginpanumbalik nga ebanghelyo kag moderno nga rebelasyon nagahatag sa aton sang kaathagan. Upod sang klaro nga perspektibo sang aton diosnon nga ginhalinan kag kapalaran, nakahibalo kita nga “ang mga butang nga magahimo sang [aton] mortal nga kabuhi nga pinakamanami amo mismo ang mga butang nga magahimo sang [aton] kabuhi sa wala katapusan nga pinakamanami nga pwede ini mangin!”
Konklusyon
Magatapos ako kon diin ako nagsugod, sa pagdumdom sang akon eksperiyensya tinuig na ang nagligad upod ang bag-o nga miyembro sa Japan. Paagi sa iya katutom kag sa katutom sang mga misyonero kag mga miyembro, nakita niya ang ginpanumbalik nga ebanghelyo ni Jesucristo. Sang makita niya ang ebanghelyo, nadiskubrehan man niya ang iya katuyuan, nga nagpalapad sang iya panan-awan. Nakita man niya ang dako nga plano sang kalipayan. Ang pagtuman sang mga kasugtanan sang ebanghelyo sa sulod sang plano naghatag sa iya sang mga bugay kag kalipay, nga nagapataas sa iya sa temporal kag espirituhanon.
Ang iya pagpanglakaton padulong sa pagkamiyembro sang Simbahan ni Jesucristo nagtugot sa iya nga mangin saksi ni Jesucristo. Si Elder Patrick Kearon sang Korum sang Dose ka Apostoles naglarawan sang kalipay nga nagasunod:
“Tungod sang mapinalanggaon nga plano sang aton Amay nga Langitnon para sa tagsa Niya ka anak, kag tungod sang nagatubos nga kabuhi kag misyon sang aton Manluluwas nga si Jesucristo, sarang kita—kag dapat gid—mangin pinakamalipayon nga mga tawo sa duta! Bisan pa sa paglampos sang mga unos sang kabuhi sa aton sa sining magamo nga kalibutan, sarang kita magpadako sang nagatubo kag nagapadayon nga kalipay kag kalinong bangod sang aton paglaum kay Cristo kag sang aton pag-intiendi sang aton lugar sa matahum nga plano sang kalipayan.”
Ginatanyag ko ang akon pagpasalamat, kag testimonya, sa ginpanumbalik nga ebanghelyo ni Jesucristo, kag sa dako nga plano sang kalipayan nga nahamtang sa tunga sini. Ginaimbitar ko kamo nga magkaon sang mga bunga sang ebanghelyo kag magbatyag sang mas dako nga kalipay sa sining kabuhi sa inyo pagpanglakaton padulong sa kabuhi nga wala katapusan.
© 2025 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, July 2025. Hiligaynon. 19601 861