Nya Dɛwdzi wɔ Wo Asɛmpa Akwantu mu

Osiandɛ Jesus Christ nam Nkɔnhyɛnyi Joseph Smith do dze N’asɛmpa saan ananmu no ntsi, President M. Russell Ballard (1928-2023) paa mu kãa dɛ “yɛwɔ abrabɔ no botae ho ntseasee, fa hɛn nyimpa ban ho.’’ President Ballard, a nna ɔyɛ Asomafo Duebien hɔn Quorum President no ne Ngyina-ananmunyi no, ne dase a odzi ewiei ma Asɔr no, ɔkãa dɛ:

“Yenyim mbrɛ Nyankopɔn tse; yenyim mbrɛ Agyenkwa no tse, osiandɛ yɛwɔ Joseph, a ɔkɔɔr ndua kwaa mu dɛ banyimba a, ɔrohwehwɛ, no bɔn ho bɔnfakyɛ. …

Ɔyɛ me ahobow, na minyim pefee dɛ hom mu dodowara so dɛmara, wɔ mbrɛ woesi ehyira hɛn ma yenyim dza yenyim a ɔfa hɛn botae wɔ abrabɔ mu ho, siantsir a yɛwɔ ha, dza ɔwɔ dɛ yɛbɔ mbɔdzen yɛ na yewie yɛ wɔ hɛn abrabɔ mu daa daa.

Jesus Christ N’Asɔr a ɔwɔ hɔ ma Nda a Odzi Ekyir Ahotseweefo asɔrmba no, yɛretse Nyankopɔn ne nkwagye ho “nhyehyɛɛ a odzi mu’’ ase kã dɛm nyimdzee no ho. Wɔfrɛ no “enyigye ho nhyehyɛɛ kɛse no,” “ɔpon ho nhyehyɛɛ no,” na “ehumbɔbɔr ho nhyehyɛɛ no” so (Alma 42:8, 11, 5), oyi abrabɔ mu esumasɛm na dza onnsi pi fa hɛn ndaamba ho fi hɔ.’’ Ma ohia tsitsir wɔ dɛm nhyehyɛɛ no mu nye “Christ ne nkyerɛkyerɛ no,’’a ɔyɛ abrabɔ no botae tsitsir.

Osiandɛ yɛwɔ asɛmpa no ntsi, yenyim dɛ yɛyɛ Nyankopɔn ne mba, a ɔdze hɛn baa asaase do dɛ wɔbɔsɔ hɛn ahwɛ, wɔatsew hɛnho, na woesiesie hɛn “a wɔnam Eguambaa no konyimdzi na n’enyimnyam mu no, dze [hɛn] bɛba wusoɛr mu’’ (Nkyerɛkyerɛ na Ahyɛmudzi 76:39). Yenyim mbrasɛm no na wɔakyerɛkyerɛ hɛn “ara yie ma [yeehu] papa na bɔn’’ (2 Nephi 2:5). Yenyim dɛ yɛwɔ asaase do dɛ yɛbɔdodɔ na yɛasom. Na yenyim dɛ Agyenkwa no afrɛ hɛn dɛ yendzi wiadze do konyim na yɛmboa binom ma wɔnyɛ dɛmara (hwɛ John 16:33; Nkyerɛkyerɛ na Ahyɛmudzi 64:2) dze ayɛ Ne Mbae a Otsia Ebien ho ahosiesie.

Ber a yetsim wɔ No do no, dza Joseph Smith frɛɛ no “hɛn Ewuradze Jesus Christ n’Asɛmpa ho ntseatsea mu ngyegyee no’’ ɔbɛhyɛ hɛn dzen wɔ hɛn nkõdzen nda mu na ɔdze mfaso na botae aba hɛn abrabɔ mu na binom abrabɔ mu.

Anankroma Nyina Bɔkotow, Dan Wilson yɛɛ nsaano mfonyin no, mma wɔnnyɛ ne saso

Setsie, Nhyira horow, Dɛwdzi

Nyankopɔn dze pɛ su ama hɛn ama yeetum eebu nkontaa wɔ hɛn nsanmuyi horow ho (hwɛ Nkyerɛkyerɛ na Ahyɛmudzi 101:78; 2 Nephi 2:16). Ɔkã “adze nyina nya otsia no’’ ho no (2 Nephi 2:11), wɔama Satan kwan dɛ ɔnsɔ hɛn nhwɛ ma yɛmfa hɛn pɛ su ndzi dwuma bɔn.

Naaso Ewuradze Jesus Christ, “a [o]nyim mbusu a ɔbɛba adasamba a wɔwɔ asaase do no ntsi, [ɔ]frɛɛ [n]’akowaa Joseph Smith, “na [ɔ]kasaa kyerɛɛ no fi sor, na [ɔ]maa no mbrasɛm’’ (Nkyerɛkyerɛ na Ahyɛmudzi 1:17). Nhwɛdo a Ewuradze dua do dze da Ne mbrasɛm na pɛ edzi kyerɛ No nkɔnhyɛfo no kɔ do wɔ President Russell M. Nelson mu wɔ hɛn nda yi mu—na wɔ ne siantsir kor noara mu. Nyankopɔn pɛ dɛ ogya hɛn kɔ enyigye wɔ abrabɔ yi mu na celestial enyimnyam mu wɔ abrabɔ a ɔtoado no mu.

Setsie ma Nyankopɔn ne mbrasɛm no wɔ dɛ ofi hɛn nokwardzi na ɔdɔ ma No mu ba. Ewuradze Jesus Christ Nankasa paa mu kãa dɛ ebɔdɔ Nyankopɔn no “nye mbrasɛm no dza odzi kan na ɔsõ’’ (hwɛ Matthew 22:37-38). Ɔkɔr do maa nhumu mber a Ɔpaa mu kãa dɛ, “Sɛ hom dɔ me a, hom ndzi me mbrasɛm do” (John 14:15).

Akatua wɔ hɔ ma erodɔ Ewuradze na iridzi Ne mbrasɛm do. Mberano yi mu no, Ɔkãa “mbra bi a wɔhyɛɛ no wɔ sor … , ɔno na nhyira nyina gyina do—

“Na sɛ yenya nhyira bi fi Nyankopɔn hɔ a, nna ɔkyerɛ dɛ yedzi dɛm mbra no a nhyira no gyina do no do” (Nkyerɛkyerɛ na Ahyɛmudzi 130:20–21).

Dɛm ntsi, yɛrekyerɛ hɛn dɔ ma Ewuradze ber a yerisie Ne mbrasɛm no nsuansuando nye nhyira horow a ɔdze enyigye na dɛwdzi ba.

Yerudua asɛmpa a wɔdze asan ananmu na ndɛ nyikyerɛ ahwehwɛ enyiwa mu rohwɛ abrabɔ no ma hɛn pefeeyɛ. Yeenya hɛn fibea na hyɛbea krɔnkrɔn ho nhumu pefee no, yenyim dɛ “ndzɛmba kor noara a wɔbɛma [hɛn] ɔnnkyebo abrabɔ akɔ do yie ankasa no botum wɔayɛ ndzɛmba kor noara a wɔbɛma [hɛn] abrabɔ wɔ mfesantsen ber mu no botum akɔ do yie no ankasa!’’

Mowie wɔ bea a mehyɛɛ ase, a merekaa mo sũahu mfe a abasen kɔ no a menye nsakyereenyi bi a ɔnnkyɛree wɔ Japan nyae. Ɔnam n’enyimia na asɛmpasomafo na asɔrmba hɔn enyimia do no, ohun Jesus Christ n’asɛmpa no a wɔdze asan ananmu aba no. Onyaa asɛmpa no, ohun no botae so, a ɔtserɛɛw n’enyido-adzehu mu. Ohun enyigye ho nhyehyɛɛ kɛse no so. Setsie ma asɛmpa ahyɛmudzi horow nhyehyɛɛ no dze nhyira horow na dɛwdzi brɛɛ no, a wopegyaa no honandua na sunsum mu.

N’akwantu a ogyaa no kɔr asɔrba dwumadzi mu wɔ Jesus Christ N’Asɔr mu no maa no kwan ma ɔbɛyɛɛ Jesus Christ dasefo. Elder Patrick Kearon a ɔkã Asomafo Duebien no hɔn Quorum ho no akã dɛwdzi no a ɔtoado ho asɛm dɛ:

“Osian hɛn Ɔsor Egya No dɔ nhyehyɛɛ ma Ne mba kor biara no ntsi, na osian hɛn Agyenkwa, Jesus Christ No ɔpon abrabɔ na somdwuma no ntsi, yebotum—na ɔsɛ dɛ—yɛyɛ nkorɔfo a hɔn enyi gye papaapa wɔ asaase no do! Ber a abrabɔ mu ehum hwe hɛn wɔ wiadze a ɔhaw taa wɔ mu mpo no, yebotum yɛakyerɛ enyigye a ɔrokɔ do na otsim na asomdwee wɔ hɛn mu, osian hɛn enyidado wɔ Christ mu na hɛn ntseasee wɔ hɛn ankasa hɛn gyinabew wɔ enyigye nhyehyɛɛ fɛɛfɛw no mu ntsi.’’

Medze m’enyisɔ, na dase ma wɔ Jesus Christ n’asɛmpa a wɔasan ananmu aba no ho, a enyigye ho nhyehyɛɛ kɛse no hyɛ mu ara yie no. Moto nsa frɛ hom dɛ hom mbedzi asɛmpa n’eduaba no na wonya dɛwdzi yie wɔ abrabɔ yi mu wɔ hom akwantu mu dze kɔ onnyiewiei nkwa ho.