Yene Inemesit ke Isaŋ Ikɔ-Abasi Fo

Koro Jesus Christ amafiak ada ikɔ Abasi Esie edi oto ke Prophet Joseph Smith, “Nyin iminyene ifiɔk ibaŋa ntak uwem, ibaŋa owo emi nnyin idide,” President M. Russel Ballard eketiŋ ntre (1928–2023). Ke akpatre ikɔ ntiense esie, President Ballard, emi kini oro ekedide Acting President eke Eboho mme Apostles Duopeba, ama etiŋ ete:

Nnyin imifiɔk enye emi Abasi edide; nnyin imifiɔk se Andinyaŋa edide, koro iminyene Joseph, emi akakade ikɔt eto nte ekpri eyen eren, okoyom erifen nnɔ ke mme idiɔk ŋkpɔ esie. …

“Akpa mi idem, ndien ami mmɔfiɔk ke akpa ediwak mbufo idem ŋko, ke nte ediɔŋde nnyin ndifiɔk se nnyin ifiɔkde ibaŋa ntak uwem, ye ntak emi nnyin idude mi, se akpanade nte nnyin idomo ndinam inyuŋ ikan inam ke uwem nnyin ke usen ke usen.”

Eke mbon Ufɔk Abasi Jesus Christ Mme Ndisana Owo ke Ukperedem Usen, ifiɔk oro esine ndifiɔk mbaŋa “mfɔn-mma uduak erinyaŋa ukpɔŋ” eke Abasi. Efiɔkde enye ŋko nte “akwa uduak inemesit,” “uduak erifak,” ye “uduak mbɔm” (Alma 42:8, 11, 15), oro “osio ndedibe ŋkpɔ efep ke uwem ye unana-idorenyin ke uwem ini iso nnyin efep.“ Akpan ŋkpɔ ke uduak emi edi “ikpɔ ukpepŋkpɔ eke Christ,” emi odude ke esit ufɔn uwem.

Koro nnyin inyenede ikɔ Abasi, nyin imidiɔŋɔ ke nnyin idi nditɔ Abasi, emi ekedɔŋde idi ererimbot man edomo nnyin, ediɔŋ nnyin, enyuŋ ebeŋe nnyin idem, man nnyin “iwɔrɔ idi oto ke ini eriset ke mkpa, oto ke erikan ye ubɔŋ Eyen Erɔŋ” (Doctrine ye Covenants 76:39). Nyin imidiɔŋɔ ibet ndien ema enyuŋ ekpep nnyin “mfɔn-mfɔn man [nnyin] idiɔŋɔ eti ke idiɔk” (2 Nephi 2:5). Nnyin imidiɔŋɔ ite ke nnyin idu mi ke ererimbot ndima nyuŋ ŋwam. Ndien nnyin imidiɔŋɔ ite ke Andinyaŋa ama okoot nnyin ete ikan ererimbot inyuŋ iŋwam mbon efen ndinam ntre (se John 16:33; Doctrine ye Covenants 64:2) ke ndibeŋe-idem mbaŋa Eddi Esie Ɔyɔhɔ Ikaba.

Nte nnyin iwukde enyin ise Enye, se Joseph Smith okokotde, “edinem uyom eke ikɔ Abasi Ɔbɔŋ nnyin Jesus Christ” eyesɔŋɔ nnyin idem ke mme usen afanikɔŋ onyuŋ ada ibɔrɔ ye ufɔn esin ke uwem nnyin ye ke uwem mbon efen.

Kpukpru Erɔŋ Eyetɔŋɔ, otode Dan Wilson, owo idiwetke isio

Ŋkopitem, Edidiɔŋ, Idara

Abasi ɔnɔ nyin unen ndimek eti man nyin ikeme ndinɔ ibat mbaŋa mme mbumek nyin {se Doctrine and Covenants 101:78; 2 Nephi 2:16). Nte ubak ŋkpɔ ke “ubiɔŋɔ ke kpukpru ŋkpɔ” (2 Nephi 2:11), eyak Satan odomo nnyin man ida unen-edimek nnyin inam se mifɔnke.

Edi Ɔbɔŋ Jesus Christ “ɔfiɔkde nsobo emi edisimde mme owo ke ererimbot” ke eyo nnyin emi, ama okot Prophet Joseph Smith, “etiŋ-ikɔ oto ke heaven ɔnɔ enye, onyuŋ ɔnɔ enye ibet.” (Doctrine ye Covenants 1:17). Uduot oro emi Abasi ayarade ibet Esie ɔnɔ mme prophet Esie ke akaka iso tutu ke eyo nnyin emi ye President Russell M. Nelson—ye ke ukem ntak oro. Abasi oyom ndida nnyin usuŋ nka inemesit ke uwem emi ye ubɔŋ eke celestial ke uwem efen.

Ndikop item nnɔ mbet Abasi ana ɔwɔrɔ oto nsukibuot ye ima emi nnyin inyenede inɔ Enye. Ɔbɔŋ Jesus Christ ke Idemesie ama asian ete ke ndima Abasi “edi akpa ye akamba ibet” (see Matthew 22:37–38). Enye ama akaiso ndinam anwaŋa ete “Edieke mbufo emade mi, enim mbet mi” (John 14:15).

Utip odu ke ndima Ɔbɔŋ nyuŋ nnim ibet Esie. Ke eyo emi Enye ama anam anwaŋa, “ewuhɔ, enimde ke heaven … , emi owo mmikemeke ndikpuhɔde, emi edoride kpukpru edidiɔŋ—

“Ndien adaŋa oro nte nnyin ibɔde edidiɔŋ ndomokiet ito Abasi, edi koro iminim ewuhɔ emi akamade edidiɔŋ oro” (Doctrine ye Covenants 130:20–21).

Ke ntre, se idikutde ke akpatre nte nnyin iwutde Ɔbɔŋ ima nnyin ke ndinim ibet Esie edi mme edidiɔŋ emi adade inemesit ye idara edi.

Ndise uwem ke enyin mfiak-mmen-ndi ikɔ Abasi ye eriyarade eke eyo emi ɔnɔ nnyin ndausuŋ. Ye nnen-nnen ifiɔk kaabaŋa edisana ntɔŋɔ ye utit nnyin, nnyin imidiɔŋɔ ite ke mme “ata ŋkpɔ emi edinamde uwem isɔŋ [nnyin] otim ɔfɔn edi ata ukem-ukem ŋkpɔ emi edinamde uwem [nnyin] ke ofuri nsinsi otim ɔfɔn nte ekpedide!”

Ami nyetre ke ebiet eke ami nkɔtɔŋɔde, ke nditi ifiɔk ukpep mi eke ediwak isua emi ekebede mbaŋa obufa owo ufɔk Abasi kiet ke Japan. Otode ke ntiŋ-enyin esie ye ntiŋ-enyin eke mme ɔkwɔrɔ-ikɔ Abasi ye mbon ufɔk Abasi, enye ama okut mfiak-mmen-ndi ikɔ-Abasi Jesus Christ. Ke ndikut ikɔ-Abasi oro, enye ŋko ama edikut ufɔn esie, emi akatatde ŋkukut esie. Enye ŋko ama edikut akwa uduak inemesit. Nsukibuot nnɔ uduak ediomi eke ikɔ-Abasi emi ama ɔnɔ enye edidiɔŋ ye idaresit, emenede enye ke ŋkpɔ spirit ye ke ŋkpɔ obukidem.

Isaŋ esie adade aka ndidi owo Ufɔk Abasi Jesus Christ ama anam enye akabade edi ntiense Jesus Christ. Elder Patrick Kearon eke Eboho mme Apostle Duopeba ama etiŋ abaŋa idara emi etienede ete:

“Otode ke edima uduak eke Ete Heaven nnyin emi Enye enyenede ɔnɔ owo nnyin kiet-kiet, ye otode ke uwem erifak ye utom Andinyaŋa nnyin, Jesus Christ, nnyin imikeme—ndien ana—idi ata mbon uyɔhɔ-idara ke isɔŋ! Kpa nte oyobio uwem eke idiɔk ererimbot emi amiade odoro nnyin, nnyin imikeme ndinyene ŋkɔri ye ekikere idara ye ntotuŋɔ emem eke idorenyin ke Christ ye ifiɔk nnyin kabaŋa itie nnyin ke ediye uduak inemesit.”

Ami mmɔnɔ ekɔm mi mbaŋa, ye ikɔ ntiense eke, mfiak-mmen-ndi ikɔ-Abasi Jesus Christ, ke esit edide akwa uduak inemesit emi esinede ata-ntɔtuŋɔ ke esit esie. Ami mmokot mbufo nte etabi mfri ikɔ-Abasi enyuŋ ekop ekese inemesit ke uwem emi ke usuŋ isaŋ mbufo emi adade aka nsinsi uwem.