Kutta Pwapwa non Om Sai non ewe Kapas allim

Pokiten Jises Kraist a eniwini sefani An kapas allim me ren ewe Soufos Joseph Smith, “a wor ach weweiti ewe popun manau, usun ion kich,” Preseten M. Russell Ballard (1928–2023). Non an omuchunon kapasen pwarata ngeni ewe Mwichefen, Preseten Ballard, atun-an Nikinikitiw non ewe Presetenin ekkewe Engon me Ruemon Aposel, a apasa:

“Sia sinei ion Kot; sia sinei ion ewe Chon Amanau pokiten Joseph Smith, ewe a feino ngeni nein ewe ira ne atin we, an fokkun kutta omusomusen an tipis. …

“Ua mwar, me ua sinei pwe pwan chommong neimi mi pwan sinei, ren ifa usun ach feioch ren ach sinei met kich mi sinei usun popun manauach, pwata sia nonnom ikei, met sipwe fori me aponueta non manauach iteiten ran.”

Ren chon Ewe Mwichefenin Jises Kraist ren Aramas mi Pin Non Fansoun Soponon, ena mirit mi pachenong eu weweoch usun an Kot “unusochun kokkot” un manau. Pwan fateno pwe “ewe kokkotun pwapwa mi nap,” “ewe kokkotun nganseno,” me “ewe kokkotun umoumoch” (Alma 42:8, 11, 15), a “wau ewe monomon seni manau me ewe fatangaw seni fansoun mwach.” Auchea ngeni ena kokkot ina “ewe nongonongen Kraist,” minne mi ionapei ewe popun manau.

Pokiten mi nom rech ewe kapas allim, kich mi sinei pwe kich noun Kot semirit, sia eto ngeni fonufan pwe sipwe weri sossot, ennim, me monneta ne “feito me ren ewe manausefan seni mano, seni ewe pochokun me ningen ewe Nam” (Doctrine and Covenants 76:39). Kich mi sinei ekkewe annuk me sia angei ourour “mi naf pwe [sipwe] sinei och seni ngau” (2 Nifai 2:5). Kich mi sinei sia nom won fonufan ach sipwe tong me angang ngeni ekkoch. Me sia sinei pwe ewe Chon Amanau a fen kokkori kich ach sipwe okkufu ewe fonufan me ach sipwe anisi ekkoch repwe pwan fori (nengeni John 16:33; Doctrine and Covenants 64:2) non amonnetan An we Oruwen Wareto.

Nupwen sia anonga I, met Joseph Smith a eita ngeni “ewe puchorun mongungun ewe Kapas allimen ach Samon Jises Kraist” epwe apochokuna kich fansoun ranin weires me wato wewen me popun ngeni manauach me ngeni manauen ekkoch.

Every Knee Shall Bow, seni Dan Wilson, ese tongeni epwe kapi

Aneaochis, Feioch, Pwapwa

Kot a fen ngeni kich pungun finata pwe sipwe pwisin ponuweni met sipwe finata (nengeni Doctrine and Covenants 101:78; 2 Nifai 2:16). Ren pekin “eu opponu non mettoch meinisin (2 Nephi 2:11), Setan a mumuta an epwe sotuni kich an sipwe aea ngawa ach pungun finata.

Nge ewe Samon Jises Kraist, “an sinei ewe osukoskuk minne epwe feito won aramasen fonufan” non ach fansoun, a kokkori ewe Soufos Joseph Smith, “a kapas ngeni i seni nang, me ngeni i annuk” (Doctrine and Covenants 1:17). Ena tetten minne ewe Samon a pwarano An annuk me mochen ngeni Noun soufos a soposopono non ach fansoun ren Preseten Russell M. Nelson—me ren ewe pwan chok popun. Kot a mochen emweni kich ngeni pwapwa non ei manau me ngeni ningen selestial non ewe manau mwirin.

Aneasochis ngeni an Kot annuk epwe feito seni ach nikitu ngeni me tongei I. Ewe Samon Jises Kraist Pwisin affata pwe ach tongei Kot “ina ewe aewin me auchean annuk” (nengeni Matthew 22:37–38). A sopweno ne awora wewe nupwen A apasa, “Ika ami mi tongei ei, iwe oupwe anneasochisi ai kewe annuk” (John 14:15).

Iei niwinin ach tongei ewe Samon me anneasochisi An kewe annuk. Non ei kinikinin fansoun A awewei eu annuk, ese tongeni siwin a tou me non nang … , minne feioch meinisin ra chok anongonong won—

“Iwe nupwen sipwe angei feioch seni Kot, ina seni ach anneasochis ngeni ewe annuk a anongonong won. (Doctrine and Covenants 130:20–21).

Ina, ewe omuchunon pungun ach pwarano ach tongei ewe Samon ren ach apwonueta An kewe annuk ina ekkewe feioch ra wato pwapwa me mwanek.

Nenengeni manau seni weweochu ewe kapas allim mi niwinsefan me pwarata ikenai a ngeni kich fatafatoch. Ren eu fatochun weweoch usun popun me fetanin manauach, sia sinei pwe “ekkewe ennetin mettoch repwe fori [ach] manau epwe murino a tongeni epwe chok nonno ngeni ekkewe mettoch repwe fori [ach] manau non unusen fansoun esemuch epwe murino ren ukukun epwe fis!”

Ua asopwano ikewe ua poputa me ia, ai chechemeni met a fis chommong ier a no fiti emon chon siwin non Japan. Seni an achocho me ewe achocho an ekkewe misineri me memper, a kuna ewe kapas allim mi niwinsefan an Jises Kraist. Non an kuna ewe kapas allim, a pwan kuna popun manauan, minne a awatteno an kokkot. A pwan kuna ewe kokkotun pwapwa mi nap. Aneasochis ngeni an ewe kokkotun kapas allimen pwon mi pin a wato ngeni i ekkewe feioch me pwapwa, a seikata i non pekin inis me ngun.

An sai a emweni i ngeni an choni ewe Mwichefenin Jises Kraist a mut ngeni i epwe winiti emon chon pwarata usun Jises Kraist. Elter Patrick Kearon seni ewe Mwichen Ekkewe Engon me Ruemon Aposel a wewei ewe pwapwa mi tapweto:

“Pokiten ewe tongen kokkot an Samach non Nang fan iten emon me emon Noun semirit, me pokiten ewe manauen ngaseno me misin an ach Chon Amanau, Jises Kraist, sia tongeni—me sipwe—kon aramas pwapwa won fonufan! Pwan mo nupwen ekkewe monumonun manau non osukosuken fonufan ra aweiresi kich, sia tongeni amonnata ew maritan me memefin pwapwa me kinamwe pokiten ach apinukunuk non Kraist me ach weweiti usun pwisin neniach me non ewe ningen kokkotun pwapwa.

Ua awora ai kinisou ren, me kapasen pwarata usun, ewe kapas allimen Jises Kraist mi niwinsefanito, mi pachenong ewe kokkoten pwapwa mi nap mi wesewesen fot non. Ua etiwa kemi oupwe angei uwan ewe kapas allim me ami oupwe mefi watten pwapwa non ei manau won ami sai ngeni manau ese much.