Gadaedra Leak Yesus Kristus ni Yibe Un Ngak ko Muruwel Rok’

Gadaed ma un ngabang e muruwel rok’ fare Tathapeg napan ni gadaedra pi’ e ayuw ngak pifak Got ni krayag ni ngar manged pi gachalpen Yesus Kristus nib yul’yul’. Biney e mu’un i weliy mornga’agen fare gospel Rok’, nibe yipfan fare kunuy pi u Isreal ngay, ma yibe un ko fapi pigpig ulan e Galasia rok’ fare Tathapeg ma yibe gay rogon ni ngad bod Ir. Rogon “fal’ngin daed [ko muruwel Rok’] e gathi be yean u rogon e mel’eg ko gidii’ ni nge non [ngodaed], fa rogon ni yaedra thapeg fapi mulwol [rodaed], fa rogon ni yaedra fanay e tu’ufeg [rodaed],” President Russell M. Nelson e micheg, “Gubin ngiyal’ ni gara rrin’ ban’en nira ayuweg bee’—u barba’ fare veill—ni nge ngongliy e m’ag ngak Got me thapeg e tawfe nge fapi gam’ing ko temple, ma arram ni gabe un i pii’ e ayuw i kunuy pi u Israel.”

Ra ngan tay fare muruwel rok’ fare Tathapeg ni muruwel rodaed, ma ngad sap gaed ko tin nib ga’fan Ngak, fol ko fapi motochiyel Rok’, min tu’ufeg e gidii’. Ma napan ni yibe rrin’ e muruwel Rok’ ko rogon ni ba’adag (muguy ko Doctrine and Covenants 51:2), ma boech ban’en era milfan ngodaed ni ngad guyed rogon. Fare Tathapeg e yoeg ngak fapi Saint nike mukun nga Missouri, Jackson County:

“Ya musapgaed, gathi gubin ngiyalʼ ma nggu motochiyel nag ngom gubin ni ngam rrinʼ; ya enra par ma yibe pug oren ngak e nʼen ni nge rrinʼ, era par nib malmal ma dabi mang e tapigpig nib pasig; e dabi thapeg e tawa’ath.

“Arragon, en Tathapeg ke yoeg ni ngam rrin’ed tin fel’, ngam rrin’ e tin fel’ u laniyaen’daed, ni nge yoeg e tin mat’aw ngay;

“Ya bay gelinginrad, ni bay mat’wonraed ningar dugliyed. Ma fa’anra yaedra rrin’ e tin nib fel’ ma arram ndabra chuw fare tawa’ath roraed” (Doctrine and Covenants 58:26–28).

Napan ni gaedra laek wo’en fare Tathapeg, min un ngak ko muruwel Rok’, min ayuweg e gidii’ ni ngar manged pi gachalpen nib yul’yul’, ma aram ni gadaed be machib nag e n’en nra machib nag. Bachan e dan pi’ mat’won daed ni ngad machib niged boech ban’en (muguy ko Doctrine and Covenants 52:9, 36), kemus ni ngad machib niged fapi yalen Rok’ (muguy ko Doctrine and Covenants 68:25). Ma kab tu’uf, ni ngad pi’ed e ayuw ngak e pi’in nibe gafgow, btu’uf e ayuw rok’ (muguy ko Doctrine and Covenants 52:40). Pi thin ney e ri tomilang nag fare Tathapeg napan ni yoeg fapi thin rok’ Isaiah ulan fare tagil’ e mo’olung u Nazareth:

“Fare Kan ni Thothup rok Somol e ke yib nga dakenag, ni bachane ke gapgep nigeg ni nggu machib nag e Thin Ni Bfel’ ngak e pi’in gafgow; ke l’oegeg ni nggog ngak e pi’in kan kolrad kan tayrad ni bay ni pagrad, mu gog ngak e pi’in malmit ni bay ra guyed ban’en, ma nggu chuweg ko gafgow e pi’in yibe gafgow nagrad,

“Machib ko fare duw ni ngiyal’ ngak Somoel ni ba’adag” (Luke 4:18–19; ngkum guy ko Isaiah 61:1–2).

Fare duw ni ngiyal’ ngak Somoel e be yipfan fare ngiyal’ mra yib urngin mit e tawa’ath rok’ Got nga dakean e gidii’ rok’. Gadaed ma laek wo’en Yesus Kristus napan ni gadaedra pining e gidii’ ni ngar thapegned fapi tawa’ath ko ngongliy nge fol ko fapi m’ag ngak Got ni yibe ayuweg e pi’in nibe gafgow.

Un ngak Yesus Kristus ko fare mururwel Rok’ e reb e muruwel nth’abi fel’, nikan ngongliy, ma fan e “dabyag ni ngan thilyeg, fa ngan pag” (Doctrine and Covenants 3:1). Pi’in nibe mulaen’, Somoel e ke fanow nag: “Ere dabi chalbadad i ngongliy e ngongol ni bfel’, ya gabe un i fal’eg e def ko fare muruwel ni rib fel’. Ya tin nib achig era ga’ ko tin nib baga’” (Doctrine and Covenants 64:33). Paged Somoel nge mang ir e tafney nag fare ngiyal’ riy, magdaed rrin’ e birodaed e muruwel.

Rrin’ed e birodaed e muruwel e moem ni bachan e dani tu’uf ni ngam mang be’ nib salap fa be’ nib cheg ni nge mang bang ko fare muruwel rok’ Somoel. N’en nib tu’uf e kemus ni ngam gay rogon maga michmicheg. Somoel e yoeg ngak fapi Saint u Kirtland, Ohio, “Amsap, Somoel e ma sap nga gum’ircha’ nge maen’ay nib munguy” (Doctrine and Covenants 64:34). Got e rayag ni nge ligin e gidii’ ni ba’adag ni nge rrin’ ni nge rrin’, machane dabiyag ni nge ligin e gidii rrin’ed.’ ni dabun ni nge rrin’. Biney e be yipfan, ni fa’anra gadaed ba’adag ma gadaedra gay rogon, ma rayag ni nge yus nagdaed. Machane demuturug rogon fani chag gaed, ya dabi yus nagdaed makums ni fa’anra gadaedra michmicheg i rrin’ e muruwel Rok’ ni gadaed ba’adag ni ngad ayuyweged.

Samuel nge Anna-Maria Koivisto nra daged ni yow ba’adag ma yow be michmicheg. Tomuren nikar mabgol gow, Koivistos era chuw guw u Jyväskylä, Finland, nga Göteborg, Sweden ni bachan e muruwel. Napan nrab taw gow, Brother Koivisto e ni pining ni nge mada’ nag President Leif G. Mattsson, reb ko Stake Presidency u Göteborg Sweden. Bachan e darma noen Samuel nu Swedish, ere ni tay fare mo’oung ni thin ni Mariken.

Tomuren fare mo’olung, me fith President Mattsson i Samuel ni nge pigpig ni’ir fare tiyugang’ ko fare ward mission ulan fare Utby Ward. Me yoeg Samuel ni’ir e: “Darma noen ni Swedish.”

Me chugur nag President Mattson me fith, “Kug fith ngom ko rayag ni ngam noen ni Swedish, fa gara adag ni ngam pigpig ngak Somoel?”

Me fulweg Samuel, “Kam fith ni fa’an gara adag ni nggu pigpig ngak Somoel. Ma Gura Rrin’.”

Fanay Samuel e biney e pigpig ko galasia. Ma ka arrogon Anna-Maria ni thapeg boech fapi pigpig ko galasia. Yow l’agruw nra pigpig gow u fithik’ e yul’yul’ ma kiyow fil e thin nu Swedish.

Michmicheg nge adag ni ngar pigpig gow ngak Somoel e ke ayuweg e yafos rok’ Samuel nge Anna-Maria. Yow l’agrow nibe’ nib ga’fan row ulan e Galasia. Kar ul’ul’ gow ni yow be pigpig u galasia ni gubin ngiyal’ ni yira fith ngorow. Kar filew ngong ni napan ni gadedra pigpig, ma aram ni gadaed be yus nag e pin’en ni gadaed bchag riy (muguy ko Doctrine and Covenants 60:13), ma Somoel e bayi ayuwegdaed ngad mu’ niged e muruwel Rok’.

Napan ni gadaed ba’adag ni ngad pigpig gaed, ngad gayed rogon ni dabda togopluw gaed, ni ngeyag ni dabin fekyathin e pi pigpig rodaed. Tuwthin ni dabuy e ir e pow riy nibe m’ug ni dabundaed ni ngad michmicheged, fa be m’ug ni tu’ufeg rodaed ngak fare Tathapeg e dani riyul’. Ma fa’anra dabin guy, ma nonnon e rayag nira mon’og nge mang togopluw ngak Somoel. Rogon e biney e kan guy ko yafos rok Ezra Booth, reb e tamachib nib be’ech ko Galasia u Ohio nin pining ni nge pigpig u Missouri.

Napan ni chuw u Ohio ko June 1831, me puwaen’ Ezra ni bachan boech fapi tamachib e ranod ulan e wagon ma ir e nge yean u but’ u tar’en e yal’ nib gel, ni nge machib. Ere i nonnon. Napan ni yibi taw nga Missouri, me ri yibi aw nga but’. Missouri e gathi aram rogon ni lemnag. Napan, ni yibi guy ya’an me yoloey ni “ya’an e gin’ey e gowoed bangi ban’en nib gafgow.”

Ezra e ri gel e nonnon rok’ nibe ogtharan, fekyathin, nge puwaen’ ni tay. Napan ni chuw u Missouri, ni dani machib, ni woed rogon nikan noeg ngak, me sul nga Ohio ni rib papay. Nonnon rok’ ni tay u mm’on ni tabab ko fare pipig e tabab nag i gathay fare thothup ko mo’og nra yib ni fa’anra rrin’ u fithik’ e munguy nge adag. De n’uw napan ngay me chuw Ezra ko Galasia “me pag urngin ban’an ko Kristainity nge mang be’ ni dani michuwaen’ ku Got.”

Biney e krayag nira buch rodaed ni fa’anra dabda kol ayuw gaed. Fa’anra dabda sap gaed ko tin nib manechubog ban’en, ni gadaed be pugorran fan e cha’en ni gadaed be rrin’ e biney e muruwel nifan, ma bay nrayag ni gadaedra nonnon, waergaed, ma krayag nra mul e mich rodaed.

Gube meybil nag nrayag ni ngad laked Yesus Kristus ni yibe un ngak ko muruwel Rok’. Fa’an gadaedra rrin’ ma “ireray rogon nike tow’ath nagdad ko pin’en nib th’abi fel’” (2 Peter 1:4). Tiney e tawa’ath e mu’un e n’agfan ngay ko denen (muguy ko Doctrine and Covenants 60:7; 61:2, 34; 62:3; 64:3), wo’en e thap (muguy ko Doctrine and Covenants 6:13; 56:2), nge bin th’abi tolang ko falfalaen’ (muguy ko Doctrine and Covenants 58:3–11; 59:23). Arragon, makun michmicheg ngodaed fare bin th’abi ga’ e tawa’ath nike pi’ Got—yafos ni manechubog.