Jemaron̄ Ļoor Jisōs Kraist kōn Kobaļo̧k Ippān ilo Jerbal eo An

Jej bōk koņaad ilo jerbal eo an Rilo̧mo̧o̧r ilo ad jipan̄ ajri ro nejin Anij barāinwōt erom rikaļoor tiljek ro an Jisōs Kraist. Menin ekitbuuj kwaļo̧k gospel eo An, kōn aiintok Israel eo ejepelōklōk, kōn kakūrm̧ool eddo ko ilo Kabun̄ eo an Rilo̧mo̧o̧r im kōn kajjieon̄ erom āinwōt E. Ad “wejepedik [ilo jerbal eo An] ejjab pedped ioon wāween an ro jet kāālet n̄an uwaake [kōj], n̄an kūr ko [ad], ak n̄an jerbal in jouj ko [ad] rem̧ool.” Būreejtōn Nelson ekar kwaļo̧k: “Jabdewōt iien kwoj kōm̧m̧an jabdewōt men me ej jipan̄ jabdewōt armej—ilo jim̧or jait ko an rōn̄ōl eo—bōk juon bun̄tōn m̧aanļo̧k n̄an kōm̧m̧ani bujen ko ippān Anij im aer bōk kain̄i ko an peptaij im tampeļ ko remenin aikuj, kwoj jipan̄ aiintok Israel.

N̄an kōm̧m̧ane bwe jerbal eo an Rilo̧mo̧o̧r en ad jerbal, jej kalimjōk jibadbad ko An, kōjparok kein ko An, im iakwe doon. Ilo ad kōm̧m̧ane jerbal eo An ilo wāween eo An (lale Katak im Bujen Ko 51:2), jet men ko kar doori n̄an kōj n̄an pukōti kōn kōj make. Rilo̧mo̧o̧r eo ekar jiron̄ Rikwojarjar ro me raar aindoon ilo Jackson County, Missouri:

“Bwe lo, ejjab ekkar bwe In aikuj jiron̄ kom̧ ilo men otemjeļo̧k; bwe eo kipel e ilo men otemjeļo̧k, ejja in wōt ej karejeran eo ejowan im jajeļo̧kjeņ; kōn menin ej bōk ejjeļo̧k wōņāān.

“Em̧ool Ij ba, armej reaikuj kanooj m̧ōņōņō in poub kōn tokjān, im kōm̧m̧an elōn̄ men ko kōn wōt anemkwōj in kāālet eo aer, im kwaļo̧k eļap em̧m̧an;

“Bwe kajoor eo epād ilo er, eo kōn e rej ripinej jenkwaer make. Im toun wōt an armej kōm̧m̧an em̧m̧an rej jamin ilo jabdewōt wāween m̧wijkōk jān wōņāer” (Katak im Bujen Ko 58:26–28).

Ilo ad ļoor Rilo̧mo̧o̧r, kobaļo̧k Ippān ilo jerbal eo An, im jipan̄ ro jet erom rikaļoor tiljek ro An, jej katakin ta eo E kar katakin. Kōnke jejjab mālim n̄an katakin bar jabdewōt men (lale Katak im Bujen Ko 52:9,), jej kalimjōk katak eo An ejjab oktak (lale Katak im Bujen Ko 68:25). Ilo kakkobaba, jej kōmaatļo̧k ad n̄an ro me rejeram̧ōl, aikuj, im rim̧ōjņo̧ (lale Katak im Bujen Ko 52:40). Aorōk kein kar kalikkari ke Rilo̧mo̧o̧r ekar kōnono jān Aiseia ilo im̧ōn jar eo ilo Nazareth:

“Jetōb an Irooj ej Ioō, bwe Ear kapit Eō bwe in kwaļo̧k gospel n̄an ro ri jeram̧ōl, Ear jilkinļo̧k Eō bwe in kwaļo̧k kōtļo̧k n̄an ro rej mour wōt, im loļo̧kjeņ n̄an ro re pilo, bwe In kōtļo̧k ro ar ko̧kkure er,

“Bwe In kwaļo̧k iiō eo em̧m̧an an Irooj” (Luk 4:18–19; lale bar Aiseia 61:1–2).

Iiō eo em̧m̧an an Irooj ej kōnono kōn iien eo n̄e aolep kōjeraam̧m̧an ko an bujen eo an Anij naaj kōjabōn armej ro An. Jej ļoor Jisōs Kraist kōn kūr ro jet n̄an bōk kōjeraam̧m̧an ko an kōm̧m̧an im kōjparok bujen ko ippān Anij im kōn kea kōn ro me rej jeram̧ōl ak n̄e ejjab pād ilo aikuj.

Kobaļo̧k ippān Jisōs Kraist ilo jerbal eo An ej kam̧ōņōņō kōnke jerbal ko, karōk ko, im jibadbad ko An “rej jamin likjab, im ejjab maron̄ lōn̄ ejjeļo̧k tokjāer” (Katak im Bujen Ko 3:1). N̄an ro me rej en̄jake ebbweer, Irooj ekar kapilōk: “Kōn menin, jab mōk ilo kōm̧m̧an em̧m̧an, bwe kom̧ij likūt pedped in juon jerbal eļap. Im jān men ko reddik ej jebarļo̧k men eo eļap.” (Katak im Bujen Ko 64:33). Jen kōtļo̧k bwe Irooj en inepata kōn iien m̧adm̧ōd eo, im jen baj kōm̧m̧ane ijo koņaad.

Kōm̧m̧ane ijo koņaad epidodoļo̧k jān ad maron̄ ļōmņake kōnke jejjab aikuj bōktok tōļan ko ejej uwaer ak maron̄ ko n̄an jerbal eo an Irooj. Men eo E ej aikuji ej kallim̧ur im m̧ōņōņō eo eļam waan. Irooj ekar ba n̄an Rikwojajrar eo ilo Kirtland, Ohio, “Lo, Irooj ej aikuj bōro eo im ļōmņak eo em̧ōņōņō” (Katak im Bujen Ko 64:34). Irooj emaron̄ leļo̧k n̄an kōj maron̄ eo n̄an kōm̧m̧ani men ko, ak E eban maron̄ ak ejjamin kōm̧m̧an bwe jen m̧ōņōņō. Ilo bar juon wāween ba, eļan̄n̄e jej kallim̧ur im m̧ōņōņō, E emaron̄ kōjerbal kōj. Bōtaab jekdo̧o̧n ta ewi jon̄an ad kapeel, E ejjamin naaj kōjerbal kōj ijello̧kin jej kallim̧ur n̄an jerbal eo An im m̧ōņōņō in jipan̄ E.

Samuel im Anna-Maria Koivisto raar kwaļo̧k jim̧or kallim̧ur im m̧ōņōņō. Ejjab to ālkin m̧are eo aer, Koivisto ro raar em̧m̧akūt jān Jyväskylä, Finland, n̄an Göteborg, Sweden, n̄an pukot jerbal ko rem̧m̧an. Ālkin jikrōkļo̧k, Brother Kivisto kar kajjitōk ippān n̄an loļo̧k Būreejtōn Leif G. Mattsson, juon rikakpilōklōk ilo Göteborg Sweden Stake būreejtōnji eo. Kōnke Samuel ekar jab kōnono kajin Swedish, intōrpiu eo ekar kōm̧m̧an ilo kajin In̄lij.

Alkin juon iien loļo̧k ekadu, Būreejtōn Mattsson ekar kajjitōk ippān Samuel n̄an jerbal āinwōt juon ritōl an mijen an ward ilo Utby Ward eo. Samuel ekar kwaļo̧k men eo alikkar: “Ak ijjab kōnono kajin Swedish.”

Būreejtōn Mattsson ekar jeļā jān tebōļ eo an im kar jab idāiki an kajjitōk, “Ikar ke kajjitōk eļan̄n̄e kwomaron̄ kōnono kajin Swedish, ak kwoj ke m̧ōņōņō in jerbal n̄an Irooj ?”

Samuel ekar uwaak, “Kwar kajjitōk eļan̄n̄e ikar m̧ōņōņō in jerbal n̄an Irooj. Im n̄aij.”

Samuel ekar bōk kūr eo. Anna-Maria ekar barāinwōt bōk kūr ko. Erro jim̧or kar jerbal tiljek im kar katak n̄an kōnono kajin Swedish ilo iien eo rekar jerbal.

Kallim̧ur im m̧ōņōņō n̄an jerbal n̄an Irooj kar kwaļo̧k kadkad in mour ko an Samuel im Anna-Marie. Er rej armej ro rejjab oktak ilo Kabun̄ in. Raar tiljek jerbal aolep iien kar kajjitōk ippāerro. Raar katakin eō bwe n̄e jej jerbal, jej kōjerbal tōļan ko ewōr ippād (lale Katak im Bujen Ko 60:13), innām Irooj ej jipan̄ kōj kadedeļok jibadbad ko An.

N̄e jej m̧ōņōņō in jerbal, jej kajjieon̄ jab jekpen ņae ak aln̄ūrn̄ūr, kōnke jejjab kōņaan jerwane jerbal in jipan̄ eo ad ilo jabdewōt wāween. Jekpen ņae emaron̄ in juon kakōļļe in pere kallim̧ur eo an juon, ak iakwe eo ad n̄an Rilo̧mo̧o̧r ejjab āinwōt n̄e ekar aikuj in kar. N̄e jekjek eo jab etale, aln̄ūrn̄ūr emaron̄ in eddōkļo̧k n̄an an lukkuun in jum̧ae Irooj. Eddōkļo̧k in kar loe ilo mour eo an Ezra Booth, juon rioktak im̧aan tata n̄an Kabun̄ in ilo Ohio eo kar kūri āinwōt juon mijenede n̄an Missouri.

Ke ekar em̧m̧akūt jān Ohio ilo Juun in 1831 eo, Ezra ekar inepata bwe jet mijenede ro raar maron̄ in itok itak kōn waikōn ilo an kar etetal laļļo̧k ilo bwil ilo jōm̧ar, kwaļo̧k naan ilo iaļ eo ļo̧k. Ekar aln̄ūrn̄ūr. Ke ekar itakļo̧k ilo Missouri, ekar en̄jake an ebbwer. Missouri ekar jab ta eo ekar kōtmene. Ijello̧kin, ekar reito reitak im kar kile bwe “kōtmene eo ekar bwe an marok.”

Eza ekar ļapļo̧k an pere, ba naan in jum̧ae, im kōraat. Ke ekar likūt Missouri, ijello̧kin kwaļo̧k naan ke ekar etal, āinwōt kar kajjitōk ippān n̄an kōm̧m̧ane, ekar jepļaakļo̧k n̄an Ohio ilo iien eo em̧ōkaj emaron̄ in kar. Aln̄ūrn̄ūr eo an im̧aan tata ekar ejaak n̄an itweļo̧k im āliktata n̄an jerwane lōke eo ilo en̄jake in jetōb ko an im̧aanļo̧k. Ejjab to Ezra ekar ilo̧k jān Kabun̄ in im “āliktata kōjerwawaik Christianity im erom juon eo ejjab tōmak ewōr Anij .’”

Ejja menin wōt emaron̄ waļo̧k n̄an kōj eļan̄n̄e jejjab mejmejkaruo. Eļan̄n̄e jejjab dāpij wōt juon kōļmenļo̧kjeņ indeeo, kakeememej kōj an wōn lukkuun jerbal in, jemaron̄ jekpen ņae, itweļo̧k, im āliktata jerwane tōmak eo ad.

Ij jar bwe jemaron̄ kāālet n̄an ļoor Jisōs Kraist kōn kobaļo̧k Ippān ilo jerbal eo An. Ilo ad kōm̧m̧ane, jej leļo̧k “kallim̧ur ko An reļap tata im aorōk” (2 Piter 1:4). Kōjeraam̧m̧an kein rekitbuuj jeorļo̧k jerawiwi (lale Katak im Bujen Ko 60:7; 61:2, 34; 62:3; 64:3), lo̧mo̧o̧r (lale Katak im Bujen Ko 6:13; 56:2), im mour ijo eutiej tata (lale Katak im Bujen Ko 58:3–11; 59:23). Ilo m̧ool, kar kallim̧uri kōj kōn menin letok eo eļap tata Anij emaron̄ letok—mour indeeo.