Kuht Ukwe Jisus Kraist ke Weluhl ke Orekma Lal

Kuht wi orekma luhn Mwet Lahngo ke kuht kahsruh tuhlihk nuhtin God ekihn mwet tuhma lutlut luhlahlfongi luhn Jisus Kraist. Ma se inge wi pac akahsruhi wosasuc Lal, ma tuhkeni Israel fahsrelihk, ke ahkfalye kunokohn luhn Alu luhn Mwet Lahngo ac srihke in oacna El. ”Ma wo kuht oraclah [ke orekma Lal] tiacna som nuh ke oraclah luhn mwet sahyac nuh [sesr], nuh ke siyuck [lasr], kuh nuh ke orekma kuhlwacng pwacye [lasr].” Prestuhn Russell M. Nelson el ahkpwacyei, “Oacna sie pacl kom oruh oacna sie ma ma kahsruh oacna sie mwet—ke kewana acn in lihsrlihsr uh—oraclah step se nuh ke wuhlweacng nuh sin God ac eis pacptais yohk srihpac ac akwuck ke tempuhl, kom kahsruh orwacni Israel.”

In oruh orekma luhn Mwet Lahngo in orekma lasr, kuht nuhnak ke Srihpacl, liyacacng masap Lal, ac aluhngsei. Ke kuht oruh orekma Lal ke inkacnek Lal (Liye Doctrine and Covenants 51:2}, kuhtuh ma uh tiacna ituckyang suc kuht enenuh in sifacna sokack ac sang. Mwet Lahngo El fahk nuh sin Mwet Luhlahlfongi ma toeni Jackson County, Missouri:

“Liye, tiac wo tuh nga in sapkihn ma nuhkwewa; tuh el suc suhpweyuck in ma nuhkwewa, el sie mwet alsruhngwesr ac el tiac mwet kuhlwacnsap lahlmwetmwet; ohinge el fah tiacna eis mwe kahsruhp.

“Ohinge, mwet uh eneuh in oaru in oruh ma wo, ac oruh ma pucspuc ke kena lalos sifacna, ac oruh in sikyak ma suwohswohs;

“Tuh kuh uh oasr in elos, tuh elos mwet in sifacna sulaclah lalos. Ac fin mwet uh oruh ma wo elos ac fah tiac lihsyucklac” (Doctrine and Covenants 58:26–28).

Ke kuht ukwe Mwet Lahngo, Weluhl ke orekma Lal, ac kahsruh mwet sahyac ekihn mwet tuhma lutlut luhlahlfongi Lal, kuht luti ma El luti. Ke srihpen wacngihn wal sesr in luti ma sahyac ( liye Doctrine and Covenants 52:9, 36), kuht nuhnak tiac eklac nuh ke mwe luti Lal (Liye Doctrine and Covenants 68:25). Oacyacpac, kuht lohacng yohk nuh sin mwet suhkahsruhp, enenuh, ac muhnahs (liye Doctrine and Covenants 52:40). Ma inge ahkuhtweyucki kahlwem ke Mwet Lahngo el fahk kahs lal Isaiah e lohm alu Nazareth:

“Ngun lun Leum oan fuk, mweyen El mosrweyula in fahkak pweng wo nu sin mwet sukasrup; El supweyume in sulkakin lah mwet sruoh ac fah sukosokla, ac mwet kun ac fah sifil eis liyaten, in aksukosokye mwet su muta in keok,

“Ac fahkak lah pacl sac tuku tari Ke Leum.“ (Luke 4:18–19; liye pac Isaiah 61:1–2).

Pacl se luhn Leum inge luhmweyuck nuh ke pacl se ma mwe insewowo in olwelah nuhkewa luhn God ac fah kihteyuck nuh sin mwet Lal. Kuht ukwe Jisus Christ ke kuht ngihsre mwet sahyac in eis mwe insewowo in oruh ac liyacacng olwelah yurun God ac karihngihn mwet suc suhkahsruhp kuh enenuh.

Wi Jisus Kraist ke orekma Lal mwe ahkengan mweyen orekma, akwuck, ac srihpac Lal “tiac kuh in kohsrkohsrlah, tiac pac wacngihn srihpac“ (Doctrine and Covenants 3:1). Nuh selos suc puhla ahsor, Leum el use mwe ahkweye: “Pwacnwacng, tiac tohtohlah in oruh ma wo, mweyen kom akiyac pwelucng ke orekma wowo se. Ac ma tuhkuh ke ma srihk uh yohk“ (Doctrine and Covenants 64:33). Kuht sang nuh sin Leum in fosrngah ke kosrwacni uh, ac kuht oruh orkema lasr muhkwena.

Oruh kunohkohn lasr el fisracsr kuht fin nuhnkuh ke srihpen kuht tiac enenuh in us taluhn yohk upac kuh ma kuht sahslah kac nuh ke orekma luhn Leum. Ma El enenuh uh pa oaru ac kena. Leum El fahk nuh sin Mwet luhlahlfongi e Kirtland, Ohio, “Liye, Jisus El suli kuht in kahsruh ac sang kuh lasr nohfohn in kuhlwacnsuhpuh mwet sahyac ke srihpen El enenuh insiyacsr ac kena lasr uh” (Doctrine and Covenants 64:34). Leum El kuh in oruh mwet ma luhngse inge in kuh, tuhsruhk El tiac kuh fah tiac oruh mwet ma kuh uh in luhngse. Ke kahs sahyac, fin kuht oaru ac kena, El kuh in orekmakihn kuht. Lah fuhkah suhmaht iyacsr ke taluhn lasr uh, Elac tiacna orekmakihn kuht fin kuht tiac oaru nuh ke orekma ac sang kahsruh lasr nuh Sel.

Samuel and Anna-Maria Koivisto ahkkahlwemye kwewana oaru ac kena. Tukun na elos macruhtyak, Koivistos elos som liki acn Jyväskylä, Finland, nuh Göteborg, Sweden, in sukok orekma. Tukun elos ai, Tamuhlwel Koivisto el ngihsreyucklac in muhtwacta yohrohl Prestuhn Leif G. Mattsson, sie mwet kahsruh ke stake prestuhnsi luhn Göteborg Sweden. Mweyen Samuel el tiacna etuh kahs Sweden, eltahl sramsram kahs English.

Tukun muhtwacta srihsrihk se, Prestuhn Mattsson el siyuck sel Samuel elan kuhlwacnsap ekihn mwet kol luhn misineri ke Utby ward. Samuel el fahk: ”Nga nihkihn kahs Sweden.”

Prestuhn Mattsson el kiluckyang nuh ke tepuh lal ah ac siyuck, “Kuh nga siyuck lah kom etuh kahs Sweden, kuh kom luhngse kuhlwacnsuhpuh Leum?”

Samuel el topuk, ”Kom siyuck lah nga luhngse kuhlwacnsuhpuh Leum. Ac nga luhngse.”

Samuel el insese nuh ke kunohkohn sac. Anna-Maria el eis pac kunohkohn. Kewana kuhlwacnsap ke luhlahfongi ac suhmaht lac ke kahs Sweden uh pac.

Oaru ac kena in kuhlwacnsuhpuh Leum ahkuhtweyac moul lal Samuel ac Anna-Maria. Elos mwet pengpeng ke Alu uh. Eos kuhlacnsap ke luhlahlfongi pacl nuhkewa siyuckyuck elos in oruh. Elos lutiyuc lah ke kuht kuhlwacnsap, kuht orekmakihn tahluhn ma oasr yohrohr (liye Doctrine and Covenants 60:13), na Leum Elac kahsre kuht ahksahfyelah srihpac Lal.

Ke kuht kena in kuhlwacnsap, kuht srihke in tiac titi kuh tohrkahskahs, mweyen kuht tiacna ke ahkkolukye kuhlwacnsap lasr ke oacna sie ohiyac. Tohrkahskahs kuh in sahp akucl ke olwelah ma tahfuh luo, kuh lah luhngse lasr nuh sin Mwet Lahngo tiac pa nuh ke ma kuht ke uh. Fin tiac lohacng nuh kac, tohrkahskahs kuh in kapwack nuh ke mwe mweun lain Leum. Eklac se inge liyeyucklac ke moul lal Ezra Booth, mwet etahwi se nuh ke Alu Ohio suc ekihn sie misinacri nuh Missouri.

Ke el som liki Ohio ke Jun 1831, Ezra el kasrkuhsrak lah kuhtuh misinacri kuh in forfor orekmakihn wagon, uh el fahsr na ke fol ke summer, forfor na luti. El torkahskahs. Ke el ai Missouri, el puhla ahsor. Tiac pa nge atac se el petsacelah Missouri. El ngwetngwet ac liye lah ”atacn acn sac arlac ahsor.”

Ezra el muhtacwacack tahfuh luo, ahkoluk, ac kasrkuhsrahkack. Ke el som nuh Missouri, el tiacna forfor fahkwack, oacna ke siyuckyuck sel elan oruh, el silahklahk forlah fohlohklac nuh Ohio. Tohrkahskahs lal sang ahlohloh ac konelah pac luhlahlfongi ma oasr sel ke el tuhfahna muhtacwacack ah. Tiac paht Ezra el som liki Alu uh ac ”’tilac mwet Kristin se ac eklac mwet tilac etuh ke wosasuc kuh God.’”

Oacna sie ma kuh in siyak nuh sesr fin kuht tiacna okak. Fin kuht tiacna akiyac ma yohk sripac ne tok, ahkacsmakihnyekuht lah luhn suc orekma se inge, kuht kuh in tohrkahskahs, tahfuh luo, ac kuh in oruh wacngihnlac luhlahlfongi se in kuht uh.

Nga pruhe tuh kuht in ukwe Jisus Kraist ke kuht Weluhl oruh orekma Lal. Ke kuht oruh, kuht eis ”mwe sang yohk ac saoklana” (Luo Peter 1:4). Mwe insewowo inge nwacnwack nuhnak muhnahs liki ma koluk lasr (liye Doctrine and Covenants 60:7; 61:2, 34; 62:3), 64:3), molelah (liye Doctrine and Covenants 6:13; 56:2), ac moul m pahtpaht (liye Doctrine and Covenants 58:3–11; 59:23). Pacyena, uliyuck nuh sesr mwe sang wo emet God El kuh in use nuh sesr—moul ma pahtpaht.