Surotentayo ni Jesucristo babaen ti Pannakiramantayo iti Aramidna

Makiramantayo iti aramid ti Mangisalakan bayat ti panangtulongtayo kadagiti annak ti Dios nga agbalin met a napudno a disipulo ni Jesucristo. Ramanen daytoy ti panangibinglay iti ebangheliona, iti kasta ti panangummong iti naiwaras nga Israel, babaen ti panangtungpal kadagiti pagrebbengan iti Simbaan ti Mangisalakan ken babaen ti panangikagumaan nga agbalin a kas Kenkuana. Ti “panagballigitayo [iti aramidna] ket saan nga agpannuray no kasano a pilien ti dadduma ti panangawatda kadagiti awis[tayo], wenno kadagiti pudno nga aramid[tayo] iti kinaimbag.” Insuro ni Presidente Russel M. Nelson: “Ania man nga oras nga aramidenyo ti ania man a mangtulong iti asino man—iti agsumbangir ti belo—mangala iti addang iti panangaramid kadagiti katulagan iti Dios ken panangawat kadagiti kasapulan nga ordinansa ti panagbuniag ken templo, tumultulongkayo a mangummong iti Israel.”

Tapno pagbalinen ti aramid ti Mangisalakan a kas aramidtayo, agpokustayo kadagiti panggepna, tungpalentayo dagiti bilinna, ken agiinnayattayo. Nupay ar-aramidentayo ti trabahona iti wagasna (kitaen iti Doktrina ken Katulagan 51:2), adda dagiti bambanag a mabati kadatayo tapno maammuantayo a bukbukodtayo. Kinuna ti Mangisalakan kadagiti Santo a naguummong idiay Jackson County, Missouri:

“Ta adtoy, saan a maikanada nga agbilinak iti amin a banag; ta isu a mapilpilit iti amin a banag isu met laeng ti sadut ket saan a masirib a katulongan; gapuna awan ti awatenna a gunggona.

Pudno kunak, nasken a siaanep a makiraman dagiti tao iti nasayaat nga aramid, ket agaramidda iti adu a banag iti bukodda a pagayatan, ket agipatungpalda iti adu a kinalinteg;

“Ta adda kadakuada ti bileg, a nagbalinanda nga agtignay para iti bagbagida. Ket no la ket agaramid dagiti tao iti nasayaat saan a nainkalintegan a mapukawda ti gunggonada” (Doktrina ken Katulagan 58:26–28).

Bayat ti panangsurottayo iti Mangisalakan, makiramantayo iti aramidna, ken tulongan dagiti dadduma nga agbalin a napudno a disipulona, isurotayo no ania ti isurona koma. Gapu ta saantayo nga autorisado a mangisuro iti sabali pay (kitaen iti Doktrina ken Katulagan 52:9, 36), kanayon nga agpokustayo iti pannursurona (kitaen iti Doktrina ken Katulagan 68:25). Mainayon pay, ad-adda a maseknantayo kadagiti napanglaw, agkasapulan, ken nalupoy (vulnerable) (kitaen iti Doktrina ken Katulagan 52:40). Nalawag dagitoy a naipaganetget idi inadaw ti Mangisalakan manipud iti Isaias iti maysa a sinagoga idiay Nazaret:

“Adda kaniak ti Espiritu ti Apo. Pinilinak a mangikasaba iti Naimbag a Damag kadagiti napanglaw, Imbaonnak a mangiwaragawag iti pannakawayawaya dagiti balud, Iti pannakakita manen dagiti bulsek, Iti pannakaruk-at dagiti maparparigat,

“Ken mangipakaammo a dimtengen ti tiempo a panangsubbot ti Apo kadagiti tattaona.” (Lucas 4:18–19; kitaen met iti Isaias 61:1–2).

Ti dimtengen ti tiempo ti Apo tuktukoyenna ti tiempo inton amin a bendision ti katulagan ti Dios maiteddo kadagiti tattaona. Surotentayo ni Jesucristo babaen ti panangawistayo kadagiti dadduma nga umawat kadagiti bendision ti panagaramid ken panangtungpal kadagiti katulaganda iti Dios ken babaen ti panangaywan kadagiti napanglaw wenno dagiti agkasapulan.

Makaparagsak ti makikadua ken ni Jesucristo iti aramidna agsipud ta dagiti aramid, plano, ken panggepna “saan a mapaay, wenno masayang” (Doktrina ken Katulagan 3:1). Para kadagiti maup-upay, imbalakad ti Apo: “Gapuna, saankayo koma a mabannog nga agaramid iti nasayaat, ta isagsaganayo ti pamuon ti naindaklan nga aramid. Ket agtaud kadagiti babassit a banag ti naindaklan” (Doktrina ken Katulagan 64:33). Bay-antayo ti Apo a maseknan iti panagani, ket aramidentayo laeng ti pasettayo.

Ti panangaramidtayo iti pasettayo ket nasimsimple ngem ti mabalintayo a panunoten gapu ta saantayo a kasapulan nga iyeg dagiti naisangsangayan a talento wenno abilidad iti aramid ti Apo. Ti laeng kalikagumanna ket panagkumit ken kinatallugod. Kinuna ti Apo kadagiti Santo idiay Kirtland, Ohio, “Adtoy, kalikaguman ti Apo ti puso ken ti natallugod a panunot” (Doktrina ken Katulagan 64:34). Kabaelan ti Dios a pabaelen dagiti sitatallugod, ngem saanna a kabaelan wenno saannanto nga aramiden a sitatallugod dagiti makabael. Iti sabali a pannao, no naikumit ken sitatallugodtayo, mabalinnatayo nga usaren. Ngem uray kasano ti kinalaingtayo, dinatayo usaren malaksid no nakakumittayo iti aramidna ken sitatallugodtayo a tumulong Kenkuana.

Impakita da Samuel ken Anna-Maria Koivisto ti panagkumit ken kinatallugod. Di nagbayag kalpasan ti kasarda, immakar dagiti Koivistos manipud Jyväskylä, Finland, nga agturong idiay Göteborg, Sweden, tapno agbirokda iti trabaho. Kalpasan ti isasangpetda, naawis ni Brother Koivisto a bumisita ken ni Presidente Leif G. Mattsson, maysa a mammagbaga iti Göteborg Sweden Stake presidency. Gapu ta saan nga agsasao ni Samuel iti Swedish, Ingles ti nausar iti interbiu.

Kalpasan ti apagbiit a panagbisitana, kiniddaw ni Presidente Mattsson ken ni Samuel nga agserbi kas ward mission leader iti Utby Ward. Imbaga ni Samuel a nalawag: “Ngem diak makasao ti Swedish.”

Nagsandig ni Presidente Mattsson iti rabaw ti lamisaanna ket sinaludsodna, “Dinamagko kadi no makasaoka iti Swedish, wenno sidadaanka kadi nga agserbi iti Apo?”

Simmungbat ni Samuel, “Dinamagmo no sitatallugodak nga agserbi iti Apo. Ket wen sitatallugodak.”

Inawat ni Samuel ti calling. Inawat met ni Anna-Maria dagiti calling. Agpadada a nagserbi a napudno ken nasursuroda ti agsao iti napintas a Swedish bayat ti panagdaliasatda.

Ti panagkumit ken kinatallugod nga agserbi iti Apo ti nangiladawan iti biag da Samuel ken Anna-Maria. Gagangayda a bannuar iti Simbaan. Sipupudno a nagserbida tunggal maawisda nga agserbi. Insuroda kaniak a no agserbitayo, usarentayo dagiti talento nga adda kadatayo (kitaen iti Doktrina ken Katulagan 60:13), ket tulongannatayo ti Apo a mangitungpal kadagiti panggepna.

No sitatallugodtayo nga agserbi, ikagkagumaantayo ti saan nga agreklamo wenno agtanabutob, gapu ta ditay kayat a rugitan ti serbisiotayo iti aniaman a wagas. Ti panagreklamo ket mabalin a maysa a pagilasinan ti panagduadua iti panagkumit, wenno ti panagayattayo iti Mangisalakan ket saan a kas iti rumbeng koma a kasasaadna. No saan a makontrol, ti panagtanabutob ket mabalin a rumang-ay iti direkta a panagrebelde iti Apo. Daytoy a panagrang-ay ket makita iti biag ni Ezra Booth, maysa kadagiti immuna a convert iti Simbaan idiay Ohio a naawagann a kas misionario iti Missouri.

Bayat ti ipapanawna idiay Ohio idi Hunio 1831, nasakit ti nakem ni Ezra ta adda dagiti misionario a nagbiahe babaen iti karison idinto ta isu ket masapul a magna iti pudot ti kalgaw, a mangasaba iti dalan. Nagtan-tanabutob. Idi simmangpet idiay Missouri, nariknana ti pannakaupay. Saan a kas iti ninamnamana ti Missouri. Imbes ketdi, kinitana ti aglawlawna ket napaliiwna a “nagparang a nakaay-ay-ay ti kasasaad.”

Ad-adda a nagbalinen ni Ezra a managduadua, sarkastiko, ken manangkritikar. Apaman a pimmanaw iti Missouri, imbes a mangasaba bayat ti panagdaliasatna, kas iti nakiddaw nga aramidenna, nagsubli idiay Ohio iti kabiitan a panawen. Ti damo a panagtanabutobna ket nagbalin a panagduadua ken kamaudiananna napukawna ti panagtalekna kadagiti immun-una a naespirituan a padasna. Di nagbayag pimmanaw iti Simbaan ket “kamaudiananna‘ binaybay-anna ti Kinakristiano ket nagbalin nga agnostiko.’”

Mabalin met a mapasamak dayta kadatayo no saantayo nga agannad. No saantayo a taginayonen ti agnanayon a pannirigan, a mangipalagip iti bagitayo no asino a talaga ti akin-aramid iti daytoy, mabalin nga agreklamotayo, agduaduatayo, ket kamaudiananna mapukawtayo ti pammati nga adda kadatayo.

Ikararagko a mabalintayo a pilien a suroten ni Jesucristo babaen ti pannakiramantayo iti aramidna. No aramidentayo dayta, maikkantayo “kadagiti naindaklan ken napapateg a sagut nga inkarina” (2 Peter 1:4). Karaman kadagitoy a bendision ti pannakapakawan dagiti basol (kitaen iti Doktrina ken Katulagan 60:7; 61:2, 34; 62:3; 64:3), pannakaisalakan (kitaen iti Doktrina ken Katulagan 6:13; 56:2), ken pannakaitan-ok (kitaen iti Doktrina ken Katulagan 58:3–11; 59:23). Pudno, naikari kadatayo ti kadakkelan a sagut a maited ti Dios—ti agnanayon a biag.