Ginasunod Naton si Jesucristo paagi sa Pag-upod sa Iya sa Iya Buluhaton

Nagapakigbahin kita sa buluhaton sang Manluluwas samtang ginabuligan naton ang mga anak sang Dios nga mangin tampad man nga mga disipulo ni Jesucristo. Dala diri ang pagpakigbahin sang Iya ebanghelyo, nga nagaresulta sa pagtipon sang Israel, paagi sa pagtuman sang mga responsibilidad sa Simbahan sang Manluluwas kag paagi sa pagtinguha nga mangin pareho sa Iya. Ang aton “kadalag-an [sa Iya buluhaton] wala nagadepende sa pilion nga reaksyon sang iban sa [aton], sa [aton] mga imbitasyon, ukon sa [aton] sinsero nga mga buhat sang kaayo.” Gintudlo ni Pangulong Russell M. Nelson: “Sa tagsa nga himuon ninyo ang bisan ano nga nagabulig sa bisan kay sin-o—sa magtimbang nga bahin sang kabuhi—nga magtikang padulong sa paghimo sang mga kasugtanan upod sa Dios kag pagbaton sang ila kinahanglanon nga mga ordinansa sang bunyag kag templo, nagabulig kamo sa pagtipon sang Israel.”

Para himuon ang buluhaton sang Manluluwas nga aton, magtutok kita sa Iya mga katuyuan, magtuman sang Iya mga kasugoan, kag magpalanggaanay. Samtang ginahimo naton ang Iya buluhaton sa Iya paagi (tan-awa sa Doktrina kag mga Kasugtanan 51:2), may mga butang nga kita na dapat ang mamensar kon paano himuon. Siling sang Manluluwas sa mga Santos nga nagtipon sa Jackson County, Missouri:

“Kay tan-awa, indi nagakabagay nga magsugo ako sa tanan nga butang; kay sia nga ginapilit sa tanan nga butang isa ka matamad kag indi maalam nga alagad; gani, wala sia sing may mabaton nga padya.

“Sa pagkamatuod ginasiling ko, dapat mangin mapisan ang mga tawo sa pagpakigbahin sa maayo nga kawsa, kag maghimo sing madamo nga butang paagi sa ila kaugalingon nga pagbuot, kag magpahanabo sing madamo nga pagkamatarong;

“Kay ang gahum yara sa ila sa diin may ikasarang sila nga mangin hilway sa pagpili. Kag kon nagahimo ang mga tawo sang maayo, indi nila madula ang ila padya” (Doktrina kag mga Kasugtanan 58:26–28).

Kon ginasunod naton ang Manluluwas, ginaupdan Sia sa Iya buluhaton, kag ginabuligan ang iban nga mangin tampad Niya nga mga disipulo, ginatudlo naton kon ano ang Iya itudlo. Tungod indi kita awtorisado sa pagtudlo sang lain (tan-awa sa Doktrina kag mga Kasugtanan 52:9, 36), wala kita nagalisa sa Iya doktrina (tan-awa sa Doktrina kag mga Kasugtanan 68:25). Dugang pa, ginahatagan naton sang partikular nga atensyon ang mga pigado, nagakinahanglan, kag wala sang ikasarang (tan-awa sa Doktrina kag mga Kasugtanan 52:40). Ginklaro sang Manluluwas ining mga punto sang ginsambit niya si Isaias sa isa ka sinagoga sa Nazaret:

“Ang Espiritu sang Ginuo yari sa akon, tungod kay ginpili niya ako sa pagwali sang maayong balita sa mga imol; ginpadala niya ako [sa pag-ayo sang mga napaslawan], sa pagpahibalo sang kahilwayan sa mga bihag, kag sa pag-ayo sang panulok sang mga bulag, sa paghilway sang mga ginapigos,

“Sa pagbantala sang tuig nga nahamut-an sang Ginuo” (Lucas 4:18–19; tan-awa man sa Isaias 61:1–2).

Ang tuig nga nahamut-an sang Ginuo nagatumod sa panahon nga ang tanan nga bugay sang kasugtanan sang Dios ibubo sa Iya katawhan. Ginasunod naton si Jesucristo paagi sa pag-agda sa iban nga batunon ang mga bugay sang paghimo kag pagtuman sang mga kasugtanan sa Dios kag pag-atipan sang mga imol ukon indi gani nagakinahanglan.

Ang pag-upod kay Jesucristo sa Iya buluhaton makahalawhaw tungod ang Iya buluhaton, kag mga plano, kag mga katuyuan “indi sarang mapaslawan, ukon mangin wala’y pulos” (Doktrina kag mga Kasugtanan 3:1). Sa mga nagaluya, naglaygay ang Ginuo: “Karon, indi magpaluya sa paghimo sang maayo, kay nagapasad kamo sang pundasyon sing isa ka dako nga buluhaton. Kag halin sa magagmay nga mga butang nagaluntad inang mga dalagko” (Doktrina kag mga Kasugtanan 64:33). Tugti ang Ginuo nga magpalibog sa ani, kag himuon lang naton ang aton bahin.

Ang paghimo sang aton bahin simple lang sangsa ginahunahuna naton tungod indi naton kinahanglan magdala sang nagalalapaw nga talento ukon abilidad sa buluhaton sang Ginuo. Ang Iya lamang ginapangayo amo ang dedikasyon kag kahanda. Siling sang Ginuo sa mga Santos sa Kirtland, Ohio, “Tan-awa, ginapangayo sang Ginuo ang tagipusuon kag handa nga panghunahuna” (Doktrina kag mga Kasugtanan 64:34). Mahimo sang Ginuo ang handa nga tawo nga makasarang, apang indi Niya mahimo ukon pagahimuon ang tawo nga may ikasarang nga mangin handa. Buot silingon, kon dedikado kita kag handa, magamit Niya kita. Pero bisan ano pa sa aton ka talentado, indi Niya kita paggamiton luwas kon dedikado kita sa Iya buluhaton kag handa kita sa pagbulig sa Iya.

Si Samuel kag Anna-Maria Koivisto nagpakita sang dedikasyon kag kahanda. Pagkatapos nila makasal, ang pamilya Koivisto nagsaylo halin sa Jyväskylä, Finland, pakadto sa Göteborg, Sweden, para mangita sang mga oportunidad sa karera. Pag-abot didto, gin-imbitar si Brother Koivisto nga makigkita kay President Leif G. Mattsson, counselor sa Göteborg Sweden Stake presidency. Tungod indi makahambal si Samuel sa Swedish, ginhimo ang interbyu sa English.

Pagkatapos sang malip-ot nga paghambalanay, ginpangabay ni President Mattson si Samuel nga mag-alagad bilang ward mission leader sa Utby Ward. Ginmuno ni Samuel ang kabudlayan niya: “Pero indi ako kabalo maghambal sa Swedish.”

Naghamboy si President Mattsson sa iya lamisa kag prangka nga namangkot, “Namangkot bala ako kon kabalo ka maghambal sang Swedish, ukon handa ka nga magserbisyo sa Ginuo?”

Sabat ni Samuel, “Namangkot ka kon handa bala ako magserbisyo sa Ginuo. Kag handa ako.”

Ginbaton ni Samuel ang calling. Nagbaton man si Anna-Maria sang mga calling. Matutom sila duha nga nagserbisyo kag nakatuon sila nga maghambal sang matahum nga Swedish sa kadugayan.

Ang dedikasyon kag kahanda sa pagserbisyo sa Ginuo makita mo sa kabuhi ni Samuel kag Anna-Maria. Ordinaryo sila nga mga baganihan sang Simbahan. Matutom sila nga nagaserbisyo tagsa nga pangabayon sila. Gintudlo nila sa akon nga kon magserbisyo kita, ginagamit naton ang aton mga talento (tan-awa sa Doktrina kag mga Kasugtanan 60:13), kag dayon ginabuligan kita sang Ginuo nga matuman ang Iya mga katuyuan.

Kon handa kita nga magserbisyo, ginatinguhaan naton nga indi magreklamo ukon magkumod, tungod indi naton gusto nga mantsahan ang aton pagserbisyo sa bisan ano nga paagi. Ang pagreklamo mahimo nga senyales sang nagapalya nga dedikasyon, ukon ang aton pagpalangga sa Manluluwas indi gid amo sina ka dako. Kon pabay-an lang naton, ang pagkumod-kumod magalab-ot sa mismo pagrebelde sa Ginuo. Makita naton ini sa kabuhi ni Ezra Booth, isa sa una nga mga miyembro sang Simbahan sa Ohio nga gintawag bilang misyonero sa Missouri.

Sang maghalin sia sa Ohio sang Hunyo 1831, naglain ang iya buot kay ang iban nga misyonero nakasakay sa karosa samtang kinahanglan niya maglakat sa kainiton sang panahon, nga nagawali sa dalanon. Nagkumod sia. Sang mag-abot sia sa Missouri, nadismaya sia. Indi amo sadto ang iya ginapaabot sa Missouri. Sa baylo, gintulok niya ang palibot kag nagmuno nga “daw kasubo sang lugar.”

Amat-amat si Ezra nga nadulaan sang pagsalig, nangin sarkastiko, kag kritiko. Paghalin niya sa Missouri, imbes nga magwali samtang nagapanglakaton, nga amo ang ginapahimo sa iya, nagbalik sia insigida sa Ohio. Ang iya pagkumod-kumod sang umpisa nahulog sa pagduhaduha kag sang ulihi pagkadula sang iya pagsalig sa iya espiritwal nga mga eksperiyensya sang primero. Wala madugayi naghalin si Ezra sa Simbahan kag “sang ulihi gin-abandonar ang Kristiyanismo kag wala na sang ginatuohan.’”

Mahimo man ini matabo sa aton kon indi kita maghalong. Kon indi kita magmentinar sang wala katapusan nga perspektibo, nga padumdumon ang aton kaugalingon kon kay sin-o gid bala ini nga buluhaton, mahimo nga magkumod kita, magduhaduha, kag sa ulihi mawad-an sang aton pagtuo.

Ginapangamuyo ko nga kabay pilion naton nga magsunod kay Jesucristo paagi sa pag-upod sa Iya sa Iya buluhaton. Kon himuon naton ini, ginahatagan kita sang “hamili kag tama kadako nga mga saad” (2 Pedro 1:4). Upod sining mga bugay ang kapatawaran sang sala (tan-awa sa Doktrina kag mga Kasugtanan 60:7; 61:2, 34; 62:3; 64:3), kaluwasan (tan-awa sa Doktrina kag mga Kasugtanan 6:13; 56:2), kag pangkahitaasan (tan-awa sa Doktrina kag mga Kasugtanan 58:3–11; 59:23). Matuod gid, ginpromisa sa aton ang pinakadako nga regalo nga mahatag sang Dios—ang kabuhi nga wala katapusan.