E rawa nida muri Jisu Karisito ena noda Tomani Koya ena Nona Cakacaka.

Eda vakaitavi ena cakacaka ni iVakabula ni da vukei ira na luve ni Kalou mera yaco talega mera tisaipeli yalodina i Jisu Karisito. Oqo e oka kina na wasei ni Nona kosipeli, ka vakasoqoni ira vata kina na Isireli era veiseyaki tu, ena kena vakayacori na itavi ni iVakabula ena Lotu kei na noda sasagataka meda vakataki Koya. E “sega talega ni vakatau na nomu qaqa ena [Nona cakacaka] na nodra digitaka na tamata mera rogoci iko, na nomu veisureti, se na nomu ivakarau ni yalovinaka mai vuniyalomu.” Me vaka a kaya o Peresitedi Rusell M Nelson: “Na gauna o cakava kina e dua na ka me vukea e dua—ena yasa cava ga ni ilati—me cavu ikalawa i liu ena nona veiyalayalati kei na Kalou ka ciqoma nona cakacaka vakalotu bibi ni papitaiso kei na valetabu, o sa vukea tiko me vakasokumuni o Isireli.”

Me caka me noda cakacaka na cakacaka ni iVakabula, eda vakanamata kina Nona inaki, muria na Nona ivakaro, ka veilomani vakai keda. Nida cakava na Nona cakacaka ena Nona ivakarau (raica na Vunau kei na Veiyalayalati 51:2), ena vo tu eso na ka meda vakasamataka vakataki keda. A tukuna na iVakabula vei ira na Yalododonu era soqoni vata mai na yasayasa vaka-Jekesoni, Misuri:

“Raica, sa sega ni kilikili meu veivakaroti tiko ena ka kecega; ia ko koya sa waraka me kitaka na ka sa tukuni vua sa tamata lialia ka vucesa, io, ena sega na kena isau.

“Ia, au sa kaya vei kemudou, sa kilikili mera gumatua ena cakacaka vinaka ko ira na tamata kecega io, mera vakayacora ga vakai ira na ka e dodonu mera kalougata kina;

“Raica sa tu vei ira na galala mera vakayacora na ka era gadreva. Ia na tamata kecega sa vakayacora na veika dodonu, ena rawata vakaidina na kena isau.” (Vunau kei na Veiyalayalati 58:26–28).

Nida muria na iVakabula, tomani Koya ena Nona cakacaka, ka vukei ira na tani mera yaco mera Nona tisaipeli yalodina, eda vakavulica na veika ena vakavulica o Koya. Baleta ni sega ni vakadonui meda vakavulica e dua tale na ka (raica na Vunau kei na Veiyalayalati 52:9, 36), eda sa vakanamata vakatabakidua kina Nona ivunau (raica na Vunau kei na Veiyalayalati 68:25). Me kena ikuri, eda dau wanonovi vakalevu o ira era dravudravua, vakaleqai tu, kei na malumalumu (raica na Vunau kei na Veiyalayalati 52:40). A vakamatatataki na itukutuku oqo ena gauna a cavuta kina na iVakabula na vosa nei Aisea ena dua na valenilotu mai Nasareci:

“Sa tu vei au na yalo i Jiova, ni sa lumuti au o koya meu vunautaka na itukutuku vinaka vei ira era sa dravudravua; meu vunautaka na sereki vei ira na bobula, kei na rai tale vei ira era sa mataboko, ka vagalalataki ira era sa mavoa,

“Me vunautaki na yabaki vinaka i Jiova” (Luke 4:18–19; raica talega na Aisea 61:1–2).

Na yabaki vinaka ni Turaga e vakaibalebaletaki kina gauna ena bini kina vei ira na Nona tamata na veivakalougatataki kece sara ni veiyalayalati ni Kalou. Eda na muri Jisu Karisito ena noda sureti ira na tani mera ciqoma na veivakalougatataki ni kena caka ka maroroi na veiyalayalati kei na Kalou kei na noda qaravi ira era dravudravua se vakaleqai tu.

Na tomani Jisu Karisito ena Nona cakacaka e ka marautaki baleta na Nona cakacaka, ituvatuva, kei na inaki “e sega ni rawa ni dua e tarova, ena sega talega ni mai tini botoilevu tu” (Vunau kei na Veiyalayalati 3:1). Vei ira era yalolailai mai, e kaya na Turaga: “O koya mo dou kakua kina ni oca ena cakacaka-vinaka, ni dou sa tura tiko na yavu ni dua na cakacaka cecere. Ia ena tubu mai ena veika lalai na veika cecere” (Vunau kei na Veiyalayalati 64:33). Eda laiva vua na Turaga me leqataka na tatamusuki, ka da cakava ga na noda itavi.

E rawarawa cake na noda cakava na noda itavi mai na kena eda na rairai vakasamataka baleta ni sega ni gadrevi meda kauta mai na taledi se gugumatua vakasakiti kina cakacaka ni Turaga. Na Nona gagadre e rawarawa wale na yalodina ga kei na lomasoli. A kaya na Turaga vei ira na Yalododonu mai Katiladi, Oaio, “Raica, sa gadreva na Turaga na yalo kei na vakasama sa vakarau tu” (Vunau kei na Veiyalayalati 64:34). Na Turaga e rawa ni vakavuna mera rawata o ira era sa tuvakarau, ia e sega ni rawa se ena sega ni rawa ni vakavuna mera tuvakarau o ira era rawata. Ena dua tale na kena itukutukuni, kevaka eda sa yalodina ka tu vakarau, sa rawa Vua me vakayagataki keda. Ia se vakacava sara na levu ni taledi e tu vei keda, ena sega ni vakayagataki keda o Koya vakavo kevaka eda sa yalodina kina Nona cakacaka ka tu vakarau meda vukei Koya.

Rau a vakaraitaka ruarua o Samuela kei Anna-Maria Koivisto na nodrau yalodina kei na lomasoli. Ni oti ga vakalailai na nodrau vakamau, erau toki na Koivistos mai Jyväskylä, Finland, ki Göteborg, Suwiteni, me rau laki vakasaqaqara madigi ni cakacaka. Ni yaco yani, a sureti o Baraca Koivisto me laki sikovi Peresitedi Leif G. Mattsson, e dua na daunivakasala ena mataveiliutaki ni iTeki o Göteborg Sweden. Baleta ni sega ni vosataka o Samuela na vosa vaka-Sweden a vakayacori na veivakatarogi ena vosa Vakavalagi.

Ni oti e dua na veitalanoa lekaleka, a kerei Samuel o Peresitedi Mattsson me iliuliu ni kaulotu ena tabanalevu o Utby. A dusia o Samuel na ka sa matata tu: “Ia au sega ni vosa vaka-Sweden”

A kala mai liu ena nona desi o Peresitedi Mattsson ka taroga, “Au a taroga beka kevaka e rawa nio vosa vaka-Sweden, se o sa tu vakarau mo qarava na Turaga?”

A sauma o Samuel, “Ko a taroga kevaka au sa tu vakarau meu qarava na Turaga. E vakakina.”

A ciqoma o Samuel na veikacivi. A ciqoma talega o Anna-Maria eso na veikacivi. Rau a veiqaravi ena yalodina ka vulica me rau vosataka vakavinaka na vosa vaka-Sweden ena ilakolako.

Na yalodina kei na lomasoli me qarava na Turaga sa vakaitovotaki kina na nodrau bula o Samuela kei Anna-Maria. Erau sa tamata qaqa wale ena Lotu. Erau sa veiqaravi ena yalodina ena veigauna kece erau kerei kina. Era sa vakavulici au ni gauna eda veiqaravi kina, eda vakayagataka na taledi e tu vei keda (raica na Vunau kei na Veiyalayalati 60:13), ka na qai vukei keda na Turaga me da rawata na Nona inaki.

Nida tu vakarau meda veiqaravi, eda saga meda kua ni vakacauoca se vosakudrukudru, baleta nida sega ni via vakaboicataka na noda veiqaravi ena dua na sala. Na kudru e rawa ni ivakatakilakila ni sega ni dei, se noda lomana na iVakabula e sega ni vaka na kena ivakarau e dodonu. Kevaka e sega ni caka kina e dua na ka, na vosakudrukudru ena rawa ni yaco me veisaqasaqa kei na Turaga. Na toso oqo e laurai ena bula nei Ezra Booth, e dua na saumaki taumada kina Lotu mai Ohio ka a kacivi me daukaulotu ki Misuri.

Ni biuti Oaio ena Jiune ni 1831, a cudru o Ezra ni so na daukaulotu era vodo qiqidreti ni taubale voli o koya ena katakata ni vulaikatakata, ka vunau voli ena ilakolako. A vosakudrukudru. Ni yaco yani ki Misuri, a vakila ni sa yalolailai. A sega ni vaka na ka a namaka e Misuri. Ia, a rai wavoki ka “vaka me dragali vua na veika e raica.”

Sa yaco me yaloca, dauveivakacacani, ka dau vakanananu cala o Esera. Ni sa biubiu mai Misuri, a sega ni vunau ena nona lako, me vaka a kerei me cakava, a lesu vakatotolo sara ki Ohio. A yaco me lomalomarua na nona vosakudrukudru taumada ka sa qai yali na nona yalodei ena veika vakayalo a sotava taumada. Sega ni dede sa biuta na Lotu o Ezra ka “sa qai ‘biu laivi na lotu Vakarisito ka yaco me tawavakabauta.’”

E rawa tale ga ni yaco vei keda keda sega ni qaqarauni. Kevaka eda sega ni raica tikoga e dua na rai tawamudu, ka vakananumi keda ni cakacaka dina oqo, eda na rawa ni kudruvaka, lomalomarua, ka na qai yali na vakabauta e tu vei keda.

Sa noqu masu ni rawa nida digitaka meda muri Jisu Karisito ena noda tomani Koya ena Nona cakacaka. Nida vakayacora vakakina, sa soli vei keda na “yalayala cecere ka talei sara” (2 Pita 1:4). Na veivakalougatataki oqo e oka kina na vosoti ni ivalavala ca (raica na Vunau kei na Veiyalayalati 60:7; 61:2, 34; 62:3; 64:3), veivakabulai (raica na Vunau kei na Veiyalayalati 6:13; 56:2), kei na bula vakacerecerei (raica na Vunau kei na Veiyalayalati 58:3–11; 59:23). Sa dina sara, ni sa yalataki vei keda na isolisoli cecere duadua e rawa ni solia na Kalou—na bula tawamudu.