Yɛka Jesus Christ do ber a Yɛnye No yɛ N’Edwuma

Yɛyɛ hɛn kyɛfã wɔ Agyenkwa n’edwuma mu ber a yɛboa Nyankopɔn ne mba so ma wɔbɛyɛ Jesus Christ n’esuafo anokwafo. Erekyɛ N’asɛmpa ka iyi ho, dze boaboa Israel a wɔabɔ apetse ano, dze ayɛ hɛn ahyɛdze wɔ Agyenkwa N’Asɔr mu na yɛaper abɛyɛ dɛ Ɔno. Hɛn “konyimdzi [wɔ N’edwuma mu] nngyina kwan a binom bɛsan mu eyi dɛ wobetsie [hɛn], [hɛn] nsato, anaa [hɛn] nokwar ayamuyie ndzeyɛɛ.” President Russell M. Nelson kãa dɛ: “Ber biara a yɛbɛyɛ biribiara a ɔboa obi—wɔ ntwamutam n’afã biara no—ma wɔnye Nyankopɔn edzi ahyɛmu na wɔagye hɔn enuma na ayɛdze etsitsir horow no, nna yɛroboa ma wɔaboa Israel ano.”

Ama Agyenkwa N’edwuma aabɛyɛ hɛn edwuma no, yetsim wɔ No botae do, yedzi Ne mbrasem do, na yɛdɔ hɛnho nkorkor. Ber yɛyɛ N’edwuma wɔ nankasa No kwan do no (hwɛ Nkyerɛkyerɛ na Ahyɛmudzi 51:2), wogya ndzɛmba bi ma hɛn ankasa hɛn nsusui. Agyenkwa no kãa kyerɛɛ ahotseewfo a wɔaboa ano wɔ Jackson County, Missouri:

“Na hwɛ, ɔnnsɛ dɛ mehyɛ hom wɔ ndzɛmba nyinara mu; osiandɛ nyia wɔhyɛ no wɔ ndzɛmba nyinara mu no yɛ onyihafo na ɔnnyɛ akowaa nyansafo; dɛm ntsi, orinnya akatua biara.

“Nokwar mese dɛ, ɔsɛ dɛ nyimpa dze enyimpi yɛ adzepa, na wɔdze hɔnankasa hɔn pɛ yɛ ndzɛmba pii, ama woeetum aada ndzeyɛtsenenee pii edzi;

“Osiandɛ tum no wɔ hɔn mu ntsi, wɔyɛ dza hɔnankasa wɔpɛ. Na susuampaara dɛ adasa yɛ papa no wɔrennyew hɔn akatua wɔ kwan biara do” (Nkyerɛkyerɛ na Ahyɛmudzi 58:26–28).

Ber a yɛka Agyenkwa no do no, ka No ho wɔ N’edwuma mu, na yɛboa binom ma wɔbɛyɛ N’esuafo mapa no, yɛkyerɛ dza Ɔbɛkyerɛ. Osiandɛ yennyi kwan dɛ yɛbɛkyerɛ asɛm fofor biara ntsi (hwɛ Nkyerɛkyerɛ na Ahyɛmudzi 52:9, 36), yetsim wɔ Ne nkyerɛkyerɛ do a yemmfi ho (hwɛ Nkyerɛkyerɛ na Ahyɛmudzi 68:25). Bio, hɛn enyi kɔ hɔn a wɔyɛ ehiafo, wɔwɔ ahohiahia mu, na wɔyɛ mberew do (hwɛ Nkyerɛkyerɛ na Ahyɛmudzi 52:40 Ntsimu yinom da edzi pefee ber a Agyenkwa no serɛɛ kãa Isaiah ne nsɛm wɔ Nazareth synagogue mu.

“Ewuradze no Sunsum wɔ mo do, osiandɛ ɔasera me dɛ membɛkã nsɛmpa nkyerɛ ehiafo; ɔasoma me dɛ membɛpaa ɔgye mma ndɔmmum, nye adzehu mma enyifurafo, na membɛgye hɔn a woepirapira hɔn,

“Na membɛka Ewuradze n’enyisɔ afrenhyia” (Luke 4:18-19; san so hwɛ Isaiah 61:1-2)

Ewuradze n’enyisɔ afrenhyia gyina hɔ ma mber a wɔdze Nyankopɔn ahyɛmudzi nhyira nyina bogu No nkorɔfo do. Yɛka Jesus Christ do ber a yɛto nsa frɛ binom ma wɔgye nhyira a ɔwɔ enye Nyakopɔn ridzi na eresie ahyɛmu na wɔ ber a erohwɛ ehiafo na hɔn a kwan bi do no wɔwɔ ahohiahia mu.

Yɛdze hɛnho bɔ Jesus Christ wɔ N’edwuma mu yɛ enyigye osiandɛ No ndwuma, nhyehyɛɛ, na no botae “wonnkotum asɛɛ, na wonnkotum ama ɔayɛ kwa” (Nkyerɛkyerɛ na Ahyɛmudzi 3:1). Hom a hom nya abagura nkatse no, Nyame maa afotu; “Dɛm ntsi, mma hom mmberɛ wɔ papayɛ ho, osiandɛ hom rotow dwumadzi kɛse bi ne fapem. Na ndzɛmba nkakraba mu na dza ɔyɛ akɛse fi mu ba” (Nkyerɛkyerɛ na Ahyɛmudzi 64:33 Hom mma yɛmma Nyame ndwen otwa ber no ho, na yɛnyɛ hɛn kyɛfa.

Yɛreyɛ hɛn kyɛfa yɛ mberɛw dodow kyɛn dza yesusu osiandɛ yennhia talent anaa tum soronko dze ayɛ Nyame n’edwuma. Dza Ɔrehwehwɛ ara nye enyimpisi na ɔpɛ. Ewuradze see Ahotseweefo a wɔwɔ Kirtland, Ohio, dɛ “Hwɛ Ewuradze rohwehwɛ akoma nye adwen pa.”Nkyerɛkyerɛ na Ahyɛmudzi 64:34) Nyankopɔn botum ama nyia ɔpɛ no eetum ayɛ, mbom Onnkotum anaa Ɔrennhyɛ nyia obotum asom no na onnyi pɛ. Anaa so dɛ, sɛ yɛ wɔ enyimpisi na pɛ a, Obotum nye hɛn edzi dwuma. Ɔmmfa ho talent a yɛwɔ, Ɔnnye hɛn nndzi dwuma gyedɛ yɛwɔ enyimpisi ma N’edwuma na pɛ dɛ yɛbɔboa No.

Samuel na Anna-Maria Koivisto kyerɛɛ hɔn pisi na pɛ. Hɔn awar ekyir ara na, Koivistofo no fii Jyväskylä, Finland, kɔr Göteborg, Sweden, dɛ wɔrokɔhwewɛ edwumayɛ ho akwan. Wokoduree no, wɔto nsa frɛɛ Onuabanyin Koivisto dɛ ɔnkɛsera President Leif G. Mattsson, ɔpamfo wɔ Göteborg Sweden Stake president na n’apamfo mu. Ɔnam dɛ Samuel nnkã Sweden kasa ntsi, wɔyɛɛ mpɛnsampɛnsamu no wɔ Ngyiresi Borɔfo kasa mu.

Nsera tsiabaa ekyir no, President Mattsson frɛɛ Samuel dɛ ɔnsom dɛ asɛmpasomafo banodzinyi wɔ Utby ward. Samuel kyerɛɛ mprɛmprɛn ɔhaw no dɛ: “Mennkã Sweden kasa.”

President Mattison kyea noho wɔ pon no do na obisaa me pefee dɛ, “Mibisa dɛ ibotum akã Sweden kasa, anaa dɛ ayɛ krado dɛ ebɔsom Ewuradze?”

Samuel yi ano dɛ, ”Ibisa dɛ mayɛ krado dɛ mobosom Ewuradze a. Na mayɛ. krado”

Samuel gyee ɔfrɛ no. Anna-Maria so gyee ɔfrɛ horow. Hɔn beenu soom wɔ nokwar mu na wosũae kã Sweden kasa wɔ kwan fɛɛfɛw mu wɔ mber no mu.

Pisi na pɛ a wɔdze som Nyame ada edzi wɔ Samuel na Anna-Maria hɔn abrabɔ mu. Nna wɔyɛ ekunyin ahobrɛadzefo wɔ Asɔr no mu. Wɔasom nokwar mu ber biara wɔafrɛ hɔn. Wɔakyerɛ me dɛ sɛ yɛsom a, yɛdze talent horow a yɛwɔ (hwɛ Nkyerɛkyerɛ na Ahyɛmudzi 60:13), na Nyakopɔn boa ma yewie No botae.

Sɛ yɛwɔ ɔpɛ dɛ yɛbɔsom a, yɛmmper nkasa nntsia anaa yennhwinhwin, osiandɛ yɛmmpɛ dɛ nkekaa biara ba hɛn ɔsom ho wɔ kwan biara do. Kasatsia botum ayɛ hɛn pisi a onntsim ho sɛnkyerɛdze, anaa dɛ hɛn dɔ ma Agyenkwa no nnyɛ dza otwar dɛ ɔyɛ. Sɛ yɛgyaa no dɛmara, nwinnwinii botum akɔ kan abɛyɛ etuatsew koraa etsia Nyankopɔn. Dɛm kankɔ yi yehu wɔ Ezra Booth, nyimpa a odzi kan sakyeree baa Asɔr a ɔwɔ Ohio a wɔfrɛɛ no asɛmpasomafo kɔr Missouri.

Ofii Ohio wɔ Obiradzi 1831 mu no, Ezra yɛɛ basaa dɛ asɛmpasomfo bi tum dze ntaabowhɛn tu kwan ber a ɔno nantsew ɔhyew ber mu, robɔ nsɛmpa no dawur. Ohwinhwinii. Odur Missouri no, onyaa no abagura. Missouri annyɛ dɛ ma n’enyi da kwan. Mbom, ɔtotoo n’enyiwa na ɔhyɛɛ no nsew dɛ “nsusui no enyi ayɛ kusuw.”

Ezra bɛyɛ okyingyefo, ekutiabɔnyi na ɔkasatsiafo. Ofii Missouri no, nkyɛ ɔwɔ dɛ ɔkã nsɛmpa ber a nna ɔrokɔ no, tse dɛ ma wɔakã no, ɔsanee kɔr Ohio ntsɛmara dɛ mbrɛ obotum. N’ahyɛse ehwinhwin bɛyɛɛ ehihimii na ewiei no ɔyew n’awerɛhyɛmu a ɔwɔ sunsum mu suahu a onyaa no ahyɛse no. Annkyɛr Ezra fii Asɔr no mu na “ewiei no ogyaa Christiansom na ɔbɛyɛɛ obi a ɔnngye Nyame nndzi.’”

Sɛ yɛannhwɛ yie a dɛm botum ato hɛn. Sɛ yennsie onnyiewiei nhumu a, ankaakaa hɛnho nyia n’edwuma nye yi a, bia yɛbɛkasa etsia, ehihim, na yɛayew hɛn gyedzi a yɛwɔ.

Mobɔ mpaa dɛ yɛbɛsan mu eyi dɛ yɛbɛka Jesus Christ do ber a Yɛnye No yɛ N’Edwuma. Yɛreyɛ no, wɔma hɛn “anohoba a ɔsom bo” (2 Peter 1:4) Nhyira yinom nye bɔnfakyɛ (hwɛ Nkyerɛkyerɛ na Ahyɛmudzi 60:7; 61:2, 34; 62:3; 64:3), nkwagye (hwɛ Nkyerɛkyerɛ na Ahyɛmudzi 6:13; 56:2), na nkwagye ntowdo (hwɛ Nkyerɛkyerɛ na Ahyɛmudzi 58:3-11; 59:23) Ampa, wɔdze Nyame n’akyɛdze no mu dza ɔyɛ kɛse abɔ hɛn anohoba—onnyiewiei nkwa.