Kwigirira Icyizere Imbere y’Imana

Bavandimwe banjye nkunda, nshimishijwe no kuvugana namwe uyu munsi, muri iki giterane rusange cy’ingenzi. Amaso yanjye akomeje gusaza. Murakoze kubwo kunyihanganira uko ntambutsa ubutumwa bwanjye.

Tubaho mu minsi yo gukaza umurego mu Itorero rya Yesu Kristo ry’Abera b’Iminsi ya Nyuma. Nuzura umunezero uko mbona iterambere mu bice byinshi.

Nterwa ishema by’umwihariko n’urubyiruko rwacu. Umubare munini wabo urimo guha abandi ubufasha. Bari gushakisha abakurambere babo ndetse bagakora imigenzo mu ngoro. Abasore n’inkumi bacu barimo gutanga ubusabe bwabo bwo gukora umurimo w’ivugabutumwa urebeye ku mibare yanditse. Igisekuru kirimo kubyiruka nk’abayoboke b’indahemuka ba Yesu Kristo.

Vuba aha nahuye n’umwuzukuruza wanjye mushya. Iyo ntekereje ku bigeragezo azahura na byo mu buzima bwe, niyumvamo icyifuzo gikomeye cyo kumufasha kubaka ukwizera muri Yesu Kristo. Kubahiriza inkuru nziza Ye ni ngombwa kubw’ibyishimo bye by’ahazaza.

Kimwe natwe twese, na we azahura n’ibigeragezo. Twese tuzahura n’uburwayi, ugutenguhwa, igishuko n’igihombo. Ibyo bigeragezo bishobora guca intege ukwigirira icyizere kwacu. Ariko, abigishwa ba Yesu Kristo dufite uruhushya rwo kugera ku cyizere mu buryo butandukanye.

Iyo dukoze kandi tukubahiriza ibihango n’Imana, dushobora kugira icyizere gituruka kuri Roho. Nyagasani yabwiye Umuhanuzi Joseph Smith ko icyizere cyacu gishobora “[gu]komer[a] mu maso y’Imana.” Ibaze ihumure ryo kugira icyizere mu maso y’Imana!

Nimvuga kugira icyizere imbere y’Imana, ndashaka kuvuga kugira icyizere mu kwegera Imana none aha! Ndashaka kuvuga ku gusenga dufite icyizere ko Data wo mu Ijuru atwumva, kandi ko asobanukiwe ibyo dukeneye kurusha uko tubisobanukiwe. Ndashaka kuvuga ku kugira icyizere cy’uko adukunda kuruta uko dushobora kubitekereza, ko yohereza abamarayika ngo babane natwe hamwe n’abo dukunda. Ndashaka kuvuga kugira icyizere cy’uko yifuza gufasha buri umwe muri twe kugera ku byo ashoboye.

Noneho, ese ni gute tubona icyo cyizere? Nyagasani asubiza iki kibazo muri aya magambo ati: “Amara yanyu … niyuzure urukundo [ruhebuje] ku bantu bose, … kandi [ubupfura] bwanyu burimbishe ibitekerezo byanyu ubutitsa; noneho icyizere cyanyu kizakomere mu maso y’Imana.”

Uru ni rwo rufunguzo! Mu magambo ya Nyagasani ubwe, urukundo ruhebuje n’ubupfura bifungura uburyo bwo kwigirira icyizere imbere y’Imana! Bavandimwe, ibi dushobora kubikora! Icyizere cyacu gishobora by’ukuri gukomera mu maso y’Imana, none aha!

Mureke turebe ku rukundo ruhebuje n’ubupfura.

Icya mbere, urukundo ruhebuje. Imyaka ibiri ishize, nasabye buri umwe muri twe, nk’abayoboke ba Yesu Kristo, kuba abanyamahoro. Ndasubiramo ibyo navuze icyo gihe nti: “Umujinya nta na rimwe wemeza. Amahane ntawe yubaka. Ubushyamirane ntibuzigera butanga ibisubizo byamurikiwe.

Urukundo ruhebuje ku bantu bose ni ikimenyetso cy’abanyamahoro! Ni ngombwa ko tugira urukundo ruhebuje igihe tuvugana n’abandi, yaba ku karubanda cyangwa ahiherereye. Ndashimira bamwe muri mwe batwaye inama yanjye iheruka ku mutima. Ariko turacyashobora kurushaho gukora ibyiza.

Amahane ariho ubu mu biganiro byo mu ruhame no ku mbuga nkoranyambaga ateye impuruza. Amagambo y’urwango ni intwaro zica. Ubushyamirane bubuza Roho Mutagatifu kuba umusangirangendo wacu uhamye.

Nk’abayoboke ba Yesu Kristo, dukwiye gufata iya mbere nk’abanyamahoro. Uko urukundo ruhebuje ruba igice cya kamere yacu, tuzagabanya ubukaka mu gusuzugura abandi. Tuzahagarika gucira imanza abandi. Tuzagirira urukundo ruhebuje abantu b’ubwoko bwose. Urukundo ruhebuje ku bantu bose ni ngombwa kugira ngo dutere imbere. Urukundo ruhebuje ni umusingi w’indangakamere y’ubumana.

Mureke twinginge Data wo mu Ijuru ngo yuzuze imitima yacu urukundo ruhebuje—cyane cyane kuri abo bigoye gukunda—kuko urukundo ruhebuje ari impano ituruka kuri Data wo mu Ijuru ku bayoboke b’ukuri ba Yesu Kristo. Umukiza ni Igikomangoma cy’Amahoro. Turi ibikoresho Bye by’amahoro

Noneho, nimureke tuvuge ku bupfura. Nyagasani atubwira kurimbisha ubudasiba ibitekerezo byacu ubupfura. Ibaze imbaraga uzakira kuri buri gitekerezo icyo ari cyo cyose cyiza nukirimbisha ubupfura. Ubupfura butuma buri kintu cyose kirushaho kuba cyiza kandi kigashimisha! Ku rundi ruhande, ibaze ikizaba, niwongera ubupfura ku bitekerezo byanduye, ibitekerezo by’ubugome, cyangwa ibitekerezo bibabaje. Ubupfura buzirukana ibyo bitekerezo. Ubupfura buzakubohora ibitekerezo bigutera guhangayika, byaguteza akaga.

Bavandimwe, uko isi igenda yiyongera mu ntege nke, dukeneye gukura twiyongera mu buziranenge. Ibitekerezo, amagambo n’ibikorwa byacu bikeneye kuba birangwa n’ubupfura budacogora kandi byuzuye urukundo ruzira inenge rwa Yesu Kristo ku bantu bose. Amahirwe akomeye imbere yacu ni uguhinduka abantu Imana ikeneye ko tuba bo.

Kuramiriza mu nzu ya Nyagasani uhozaho byongera ubushobozi bwacu bw’ubupfura n’urukundo ruhebuje. Bityo rero, igihe tumara mu ngoro cyongera icyizere cyacu imbere ya Nyagasani. Kongera igihe mu ngoro bizadufasha kwitegura Ukuza kwa Kabiri k’Umukiza wacu, Yesu Kristo. Ntabwo tuzi umunsi n’isaha by’ukuza Kwe. Ariko nzi ko Nyagasani ari kunyihutisha kubasaba kwitegura uwo munsi “ukomeye kandi uteye ubwoba.”1

Uko dushakisha byimazeyo ukugira urukundo ruhebuje no kuzuza ubupfura ubuzima bwacu, icyizere cyacu mu kwegera Imana kiziyongera. Ndabasaba gutera intambwe zigambiriwe mu kongera icyizere cyanyu imbere ya Nyagasani. Noneho, uko dusanga Data wo mu Ijuru dufite icyizere cyiyongereye, tuzuzura umunezero mwinshi, kandi ukwizera kwanyu muri Yesu Kristo kuziyongera. Tuzatangira kwiyumvamo ububasha bwa roho burenze ibyiringiro byacu bikomeye.

Dushimira Nyagasani kubwo kongera umuvuduko mu kubaka ingoro mu myaka ishize. Turangajwe imbere na We, uyu munsi turatangaza imigambi yo kubaka ingoro muri buri hantu 15 hakurikira:

• Reynosa, Megizike

• Chorrillos, Peru

• Rivera, Irigwe

• Campo Grande, Burezile

• Porto, Porutugali

• Uyo, Nijeriya

• San Jose del Monte, Filipine

• Nouméa, Nuveli Kaledoni

• Liverpool, Ositaraliya

• Caldwell, Idaho

• Flagstaff, Arizona

• Rapid City, South Dakota

• Greenville, South Carolina

• Norfolk, Virginia

• Spanish Fork, Utah

Ndahamya ko Yesu Kristo, Umucunguzi wa Isirayeli, ayobora iri, ITorero Rye. Arimo gutegura kongera kugaruka. Ndiringira ko natwe twitegura Kumwakira. Ibi ndabisengeye mu izina rya Yesu Kristo, amena.