“Magpalapit sa Akon”

Pinalangga ko nga mga kauturan, kalipay ko nga makaupod kamo sa sining pangkabilogan nga komperensya sang Ang Simbahan ni Jesucristo sang mga Santos sa Ulihing mga Adlaw. Iya ini Simbahan. Nagatipon kita sa mga bilding kag mga balay sa bilog nga kalibutan sa Iya ngalan.

Ginadala naton ang Iya ngalan kon magsulod kita sa Iya ginharian paagi sa kasugtanan. Sia ang nabanhaw kag ginhimaya nga Anak sang Dios. Mga mortal kita, nga makasala kag mapatay. Pero, sa Iya pagpalangga sa kada isa sa aton, ginaagda kita sang Manluluwas nga mas magpalapit sa Iya.

Ari ang imbitasyon Niya sa aton: “Magpalapit sa akon kag magapalapit ako sa inyo; pangitaa ako sing matutum kag makita ninyo ako; magpangayo kag magabaton kamo; magpanuktok kag pagabuksan ini sa inyo.”

May mga panahon nga pamatyag naton malapit kita sa Manluluwas nga si Jesucristo. Pero kon kaisa, sa tunga sang mga pagtilaw naton sa kabuhi, makabatyag kita nga malayo sa Iya kag nagahandum sang pasalig nga nabal-an Niya ang ara sa sulod sang aton tagipusuon kag palangga Niya kita bilang mga indibidwal.

Ang imbitasyon sang Manluluwas may upod nga pamaagi para mabatyagan ina nga pasalig. Magpalapit sa Iya paagi sa pagdumdom sa Iya pirme. Pangitaa Sia sing matutom paagi sa pagtuon sang balaan nga kasulatan. Magpangayo sa Amay nga Langitnon paagi sa hugot nga pangamuyo para mabatyagan mo nga mas malapit sa Iya Pinalangga nga Anak.

May simple lang nga paagi para hunahunaon ini. Amo ina ang inyo ginahimo kon naseparar kamo sing malawig sa pinalangga nga mga abyan. Nagapangita kamo sang paagi nga makig-angot sa ila, ginahatagan ninyo sing bili ang bisan ano nga mensahe nga mabaton ninyo halin sa ila, kag himuon ninyo ang tanan para buligan sila.

Kon pirme ini nagakatabo, kon mas madugay, mas nagadalom ang pagbakod sang pag-abyanay, kag mabatyagan ninyo ang inyo mga kaugalingon nga mas nagalapitay pa gid. Kon malawig na nga wala sang importante nga komunikasyon kag sang oportunidad nga magbuligay, magaluya ang pag-abyanay.

Palangga ni Jesucristo ang tagsa sa aton. Nagatanyag Sia sinang oportunidad nga makapalapit kita sa Iya. Pareho sang mapinalanggaon nga abyan, amo man sini ang inyo himuon, makig-angot paagi sa pagpangamuyo sa Amay nga Langitnon sa ngalan ni Jesucristo, magpamati sang hamili nga giya halin sa Balaan nga Espiritu, kag dayon malipayon nga magserbisyo sa iban para sa Manluluwas. Indi magdugay mabatyagan ninyo ang bugay sang pagpalapit sa Iya.

Sang bata pa ako, naeksperiyensyahan ko ang kalipay sang pagpalapit sa Manluluwas—kag sang paglapit Niya sa akon—paagi sa simple nga mga pagtuman sa mga kasugoan. Sang bata pa ako, nagabaton kami sang sakramento sa panggab-i nga miting. Madumduman ko pa ang isa ka partikular nga gab-i, masobra na 75 ka tuig ang nagligad, sang madulom kag matugnaw sa gwa. Madumduman ko ang balatyagon sang kasanag kag kalipay sa sulod sang simbahan sang marealisar ko nga gintuman ko ang kasugoan nga magtipon ang mga Santos para mag-ambit sang sakramento, nga nagapakighisugot sa aton Amay nga Langitnon nga pirme dumdumon ang Iya Anak kag tumanon ang Iya mga kasugoan.

Sa paghingapos sang miting sina nga gab-i, nagkanta kami sang himno nga “Abide with Me; ‘Tis Eventide,” nga may indi malimtan nga mga tinaga, “O Ginuo, updi ako sini nga gab-i.”

Nagdala sa akon ining mga tinaga sang indi matakos nga pamatyagan sang Espiritu, bisan bata pa ako. Nabatyagan ko ang pagpalangga kag kalapit sang Manluluwas sinang kagab-ihon paagi sa pagpasulhay sang Balaan nga Espiritu.

Tinuig ang nagligad gusto ko balikan liwat ang pareho nga balatyagon sang pagpalangga sang Manluluwas kag sang kalapit nga nabatyagan ko sa Ginuo sa sinang pang-sakramento nga miting sang bata pa ako. Gani gintuman ko naman ang isa ka kasugoan: gin-usisa ko ang balaan nga mga kasulatan.

Sa libro nga Lucas, nabasahan ko ang ika-tatlo nga adlaw sang Paglansang sa Iya sa krus kag paglubong, sang nag-abot ang tampad nga mga alagad, tungod sa pagpalangga sa Manluluwas, para haplasan ang Iya lawas. Pag-abot nila, nakita nila nga ang bato napahigad na gikan sa pwertahan sang lulubngan kag ang Iya lawas wala na didto.

Duha ka anghel ang nagatindog sa unhan kag namangkot kon ngaa nahadlok sila:

“Ngaa bala ginapangita ninyo ang buhi sa tunga sang mga patay?

“Wala Sia diri, kundi nabanhaw: panumduma kon paano nga nagpamulong Sia sa inyo, sang didto pa Sia sa Galilea,

“Nga nagasiling, Ang Anak sang tawo dapat itugyan sa mga kamot sang mga tawong makasasala, kag ilansang sa krus, kag sa ikatlong adlaw mabanhaw.”

Sina nga gab-i sa kasisidmon, duha ka disipulo ang nagalakat halin sa Jerusalem sa dalanon pakadto sa Emaus, kag nagpakita ang nabanhaw nga Ginuo sa ila kag naglakat upod sa ila.

Ang libro ni Lucas nagatugot sa aton nga maglakat upod sa ila sina nga gab-i:

“Kag natabo ini, nga, sang nagasugilanon sila kag nagapamangkutanay, si Jesus gid nagpalapit kag nagbuylog sa ila.

“Apang ang ila mga mata nakulapan sa bagay nga wala sila makakilala sa iya.

“Kag nagsiling sia sa ila, Ano bala nga mga sugid ining ginahambalan ninyo sang nagalakat kamo kag nagdulog sila, nga nagakasubo?

“Nian ang isa sa ila, nga ginhingalanan si Cleofas, nagsabat sa iya, “Ikaw lamang bala ang dumalayon sa Jerusalem nga wala makahibalo sang mga butang nga nahanabo didto sa sining mga adlaw?”

Ginsugiran nila Sia sang ila kasubo nga napatay si Jesus nga kuntani naglaum sila nga Sia ang mangin Manunubos sang Israel.

Ayhan may pagpalangga sa tingug sang nabanhaw nga Ginuo sang naghambal Sia sa sining duha ka masinulub-on kag nagakalisod nga mga disipulo.

Sa pagpadayon ko sa pagbasa, nakita ko ining mga tinaga nga nagpalipay sa akon tagipusuon, pareho sang nabatyagan ko sang bata pa ako:

“Gani naghinampot sila sa minoro nga ginapakadtuan nila: nagpahayag sia nga daw magapadayon pa.

“Apang ginpilit nila sia, nga nagasiling, “Pabilin ka sa amon, kay kahapunon na kag malapit na ang gab-i”. Gani nagsulod sia sa pagpabilin sa ila.”

Ginbaton sang Manluluwas ang pangagda sina nga gab-i nga magsulod sa puluy-an sang Iya mga disipulo. Nagkaon Sia kaupod nila. Nagkuha Sia sang tinapay, ginbendisyunan ini, ginpihak-pihak ini, kag ginhatag sa ila. Nabuksan ang ila mga mata, kag nakilala nila Sia. Kag nadula Sia sa ila panulok.

Ginsulat ni Lucas para sa aton ang mga balatyagon sadtong bulahan nga mga disipulo: “Kag nagsinilingay sila, Wala bala nagdabdab ang aton mga tagipusuon sa sulod naton sang nagpamulong sia sa aton sa dalan, sang nagatalastas sia sa aton sang mga kasulatan?”

Dayon ang duha ka disipulo dali-dali nga nagbalik sa Jerusalem agud sugiran ang onse ka Apostoles kon ano ang natabo. Samtang ginasugid nila ang ila eksperiyensya, nagpakita liwat ang Manluluwas.

Nagtindog Sia sa tunga nila kag “nagsiling sa ila: Paghidaet sa inyo” Dayon ginrebyu Niya ang mga propesiya sang Iya misyon sa pagbayad sa mga sala sang tanan nga anak sang Iya Amay kag sa paghukas sang mga gapos sang kamatayon.

“Kag nagsiling sia sa ila, Amo ining nasulat, nga ang Cristo magaantos kag mabanhaw sa ikatlo nga adlaw:

“Kag nga ang paghinulsol kag ang kapatawaran sang mga sala iwali sa iya ngalan sa tanan nga kapungsuran, sumugod sa Jerusalem.

“Kamo amo ang mga saksi sining mga butang.”

Pareho sa Iya pinalangga nga mga disipulo, ang tagsa ka anak sang Amay nga Langitnon nga nagpili nga magsulod paagi sa bunyag nakighisugot nga mangin saksi sang Manluluwas kag atipanon ang mga nagakinahanglan sa bilog naton nga mortal nga kabuhi. Ining pangako gin-athag sa aton sang dungganon nga propeta sa Libro ni Mormon nga si Alma madamo nga siglo na ang nagligad sa Mga Tubig sang Mormon:

“Tungod maluyag kamo nga magsulod sa panong sang Dios, kag tawagon nga iya katawhan, kag sugot nga magpas-an sang mga palas-anon sang isa kag isa agud nga mangin mamag-an ang mga ini;

“Huo, kag handa nga magpangalisud upod sinang mga nagapangalisud; huo, kag magpaumpaw sinang mga nagakinahanglan sang kaumpawan, kag magtindog bilang mga saksi sang Dios sa tanan nga tion kag sa tanan nga butang, kag sa tanan nga lugar … , bisan tubtob sa kamatayon, agud matubos kamo sang Dios, … agud makaangkon kamo sang kabuhi nga walay katapusan.”

Kon matinumanon kamo sa sining mga promisa, makita ninyo nga ginatuman sang Ginuo ang Iya promisa nga mangin isa upod sa inyo sa inyo pagserbisyo, para mangin mamag-an ang inyo mga palas-anon. Makilala ninyo ang Manluluwas, kag sa kadugayan mangin pareho kamo sa Iya kag “mangin perpekto sa iya.” Sa pagbulig sa iban para sa Manluluwas, makita ninyo nga nagapalapit pa gid kamo sa Iya.

Madamo sa inyo may mga mahal sa kabuhi nga nagatalang gikan sa dalan padulong sa kabuhi nga walay katapusan. Nagapanumdom kamo kon ano pa ang inyo himuon agud mapabalik sila. Makasalig kamo sa Ginuo nga magpalapit sa ila samtang nagaalagad kamo sa Iya nga may pagtuo.

Mahimo nga natandaan ninyo ang saad sang Ginuo kanday Joseph Smith kag Sidney Rigdon sang mahilayo sila sa ila mga pamilya nga nagaalagad sa Iya: “Mga abyan ko nga Sidney kag Joseph, ang inyo mga pamilya yara sa maayo nga kahimtangan; yara sila sa akon pag-inakop, kag himuon ko para sa ila ang sa pagbanta ko makapaayo sa ila; tungod ako gamhanan.”

Sa inyo pagpaayo sang mga pilas sang mga nagakinahanglan, ang gahum sang Ginuo magapabakod sa inyo. Magauntay ang Iya mga butkon upod sang inyo mga butkon sa pagbulig kag pagbugay sang mga anak sang aton Amay nga Langitnon.

Ang tagsa ka nakighisugot nga alagad ni Jesucristo magabaton sang Iya direksyon halin sa Espiritu samtang ginabugayan nila kag ginaalagaran ang iban para sa Iya. Dayon ila mabatyagan ang pagpalangga sang Manluluwas kag makit-an ang kalipay sa pagpalapit sa Iya.

Saksi ako sang Pagkabanhaw sang Ginuo nga daw pareho lang nga yara ako sadtong gab-i upod ang duha ka disipulo sa puluy-an sa dalan pa-Emaus. Kabalo ako nga buhi Sia.

Ini ang matuod Niya nga Simbahan—ang Simbahan ni Jesucristo. Sa Adlaw sang Paghukom, magaatubang kita sa Manluluwas. Mangin oras ini sang dako nga kasadya sa ila nga, sa sining kabuhi, nagpalapit sa Iya sa Iya serbisyo kag malipayon nga makapaabot nga mabatian ang Iya mga pulong: “Maayo gid, ulipon nga maayo kag matutom.”

Nagapamatuod ako bilang saksi sang nabanhaw nga Manluluwas kag aton Manunubos, sa ngalan ni Jesucristo, amen.