UJesu Kristu: IThemba neSethembiso sePhasika

UNkulunkulu, uBaba wethu oseZulwini; UJesu Kristu, iNdodana Yakhe eThandekayo; kanye noMoya oNgcwele baseduze nathi. Ukukhanya kwabo okungapheliyo futhi baphakade, uzwelo, kanye nothando oluhlengayo kuhlangene nenjongo yendalo kanye nobukhona bethu (bheka ku Alima 30:44; Mose 6:62–63).

EMkhandlwini waseZulwini owandulela impilo yasemhlabeni, “izinkanyezi zokusa zahlabelela kanyekanye, nawo wonke amadodana [namadodakazi] kaNkulunkulu ajabula” (UJobe 38:7). Sakhetha ukukhetha. Manje sesihamba ngokukholwa. Ngalokho esihlangabezana nakho, sithola ubuhle obuthenjisiwe bukaNkulunkulu, ukucacelwa, injabulo, kanye nenjongo phakathi kokungaqiniseki kwempilo, ukuphelelwa yithemba, kanye nobunzima.

Asihloselwe ukuzulazula sodwa ekuphileni okungenasiqiniseko. Singakhuluma namazulu, sakhe ukholo kanye nokuba semdenini kanye nabomuzi wonke kanye nasemphakathini wabaNgcwele, futhi sibe yithi ngempela, singabakhululekile, singabajabulile ngokuhlonipha imiyalelo kaNkulunkulu ngokuthokoza. Inhlawulo—kuJesu Kristu iletha ukuba sesivumelwaneni.

Ithemba leMpilo noMsebenzi KaJesu Kristu

Usuku ngalunye, ithemba kanye nesethembiso sePhasika kuhlanganisa izibusiso kanye nezimfundiso uJesu Kristu azifundisa ngesikhathi somsebenzi Wakhe wasemhlabeni ophelele. Egcotshwe ngaphambili ekuqaleni, uJesu Kristu wazalwa eyiNdodana kaNkulunkulu eZelwe Yodwa (bheka ku Jakobe 4:5; Alima 12:33–34; Mose 5:7, 9). Wakhula ekuhlakanipheni, nasekukhuleni, nasemseni kuNkulunkulu nakubantu (bona NgokukaLuka 2:52). Efuna kuphela ukwenza intando kaYise, uJesu Kristu wathethelela izono, welapha ubuthakathaka, wavusa abafileyo, futhi waduduza abagulayo nabanesizungu.

Ngesinye isikhathi, emva kokuzila ukudla izinsuku ezingama-40, Wafakaza wathi “Umoya weNkosi uJehova uphezu kwami; ngokuba uJehova ungigcobile ukuba ngishumayele izindaba ezinhle kwabathotshisiweyo; ungithumele ukubopha abanhliziyo ezaphukileyo, nokumemezela ukukhululwa kwabathunjwa nokuvulelwa kweziboshwa itilongo” (NgokukaLuka 4:18; bheka futhi U-Izaya 61:1).

Yithi-ke labo.

Esidlweni Sakusihlwa Sokugcina, uJesu Kristu wageza izinyawo zabafundi Bakhe (bheka NgokukaJohane 13:4–8). Emhlabeni oMdala kanye noMusha, enga “manzi aphilayo” kanye “nesinkwa sokuphila” uqobo wamisa isidlo esingcwele. Esimisweni sesidlo esingcwele, sibiza uBaba futhi senze isivumelwano sokubizwa ngegama likaJesu Kristu, simkhumbule njalo, futhi sigcine imiyalelo Yakhe ukuze umoya Wakhe ube nathi (bona NgokukaLuka 22:19–20; 3 Nefi 18:7, 10–11).

Ensimini yaseGetsemane, uJesu wezwa ubuhlungu kakhulu kunalokho umuntu angakuzwa ukuze asihlenge futhi asihlawulele. Igazi laliphuma kuzo zonke iziqu zoboya. Wezwa ubuhlungu babobonke, ukuze singabuzwa ubuhlungu uma siphenduka (bheka IMfundiso neziVumelwano 18:11; 19:16).

Ekhashelwa futhi emangalelwa ngamanga, kwahlekiswa ngaye futhi wabhaxabulwa, nomqhele wameva wabekwa ekhanda Lakhe elithobekileyo (bheka ku NgokukaMathewu 27:26, 29; NgokukaMarku 15:15, 17, 20, 31; NgokukaLuka 22:63; NgokukaJohane 19:1–2). “Wachotshozwa ngenxa yobubi bethu … ngemivimbo yayo siphilisiwe thina” (U-Isaya 53:5). “Waphakanyiselwa phezulu esiphambanweni“ ukuze adonsele bonke abantu Kuye (bheka ku 3 Nefi 27:14–15). Nokho, nasesiphambanweni, uJesu Kristu wathethelela (bheka ku NgokukaLuka 23:34). Wacela uJohane ukuthi anakekele unina (bheka ku NgokukaJohane 19:26–27). Wazizwa elahliwe (bheka NgokukaMathewu 27:46; NgokukaMarku 15:34). Ukuze umbhalo ugcwaliseka, Wathi womile (bheka NgokukaJohane 19:28). Kwathi lapho konke sekufeziwe, Yena ngokwakhe “wawudela umoya wakhe” (NgokukaLuka 23:46; bheka futhi NgokukaJohane 10:17–18).

UJesu Kristu uyayazi indlela yokusisiza ekuguleni, ebuthakathakeni, kwisizungu, ekuhlukanisweni kanye nasebunzimeni (bheka u-Alima 7:12). Ukuhlupheka okunjengalokhu kuvame ukuza njengomphumela wokukhetha kwabanye. Uyayazi nendlela yokujabula kanye nathi ekujabuleni kwethu nasekubongeni kwethu, ukukhala kanye nathi lapho injabulo yethu igcwele. Ngesisa, Usibiza egameni Lakhe, ngezwi Lakhe, emhlambini Wakhe. Ubiza wonke umuntu yonke indawo. Usimema ukuthi siyibuke futhi siyiqonde impilo yasemhlabeni ngehlo laphakade. Njengoba sihamba ngobuqotho futhi sigcina izivumelwano zethu, Uthembisa ukuthi zonke izinto zingasebenzelana ukuze kube kuhle kithi (bona IMfundiso neziVumelwano 90:24; KwabaseRoma 8:28).

Ngesikhathi Sakhe kanye nangendlela Yakhe, ukubuyiselwa kuyeza—hhayi nje kuphela endleleni izinto ezaziyiyo kodwa nakulokho ezingaba yikho. Impela, uJesu Kristu angasikhulula ebugqilini kanye nasesonweni, ekufeni kanye nasesihogweni, futhi angasisiza ukuba sifeze ubunjalo bethu ngokukaNkulunkulu njengoba siba ngaphezulu kwalokho esingakucabanga, ngokholo kanye nangokuphenduka.

Ngenxa kaJesu Kristu, ukufa akusiso isiphetho. NgePhasika simemezela ukuthi:

Ngomyalo nangamandla avela kuYise, uJesu wayekwazi ukudela impilo Yakhe aphinde ayithathe futhi (bheka NgokukaJohane 10:17). Ngesikhathi umzimba Wakhe ulele ethuneni, uJesu Kristu wasiza futhi wahlela izinto ezweni lemimoya, ememezela “ukukhululwa kwabo kuwo amaketango okufa” (IMfundiso neziVumelwano 138:16).

Ekuseni ngosuku lwesithathu, wavuka ethuneni. Wakhuluma noMariya. Wabonakala kubafundi ababili endleleni eya e-Emawuse, kubaPhostoli Bakhe, kanye nakwabanye. (Bheka NgokukaMathewu 28; NgokukaMarku 16; NgokukaLuka 24; NgokukaJohane 20.)

Ngobufakazi Bakhe, wamema abafundi Bakhe ukuthi baphonse amanethi abo ngakwelinye icala lomkhumbi; kulokhu, nakuba kugcwele izinhlanzi , amanethi awazange agqabuke (bheka NgokukaJohane 21:6–11; NgokukaLuka 5:3–7). Wapha abafundi ukudla futhi wancenga uPetru kathathu ukuba ondle izimvu Zakhe (bheka NgokukaJohane 21:12–17). Wenyukela ezulwini, ememezela ukuthi abafundi Bakhe ngaleso sikhathi kanye nathi sonke manje kufanele sabelane ngezindaba ezinhle zePhasika kanye nevangeli Lakhe kuzo zonke izizwe, izihlobo, nabantu (bheka NgokukaMathewu 28:19–20; NgokukaMarku 16:15).

UJesu Kristu unguMelusi wethu Omuhle kanye neMvana kaNkulunkulu. Wanikelela ngempilo Yakhe, futhi unikela ngempilo Yakhe, kuzo izimvu Zakhe. Ensimini nasesiphambanweni, Wathwala okungabekezeleleki futhi wasihlawulela. Esikhathini naphakade, Usikhombisa ngesibonelo ukuthi “ukufa kuyivula kanjani indlela eya kulo iphakade.”

Ngamandla eNhlawulo nokuVuka kukaKristu, imizimba yethu kanye nemimoya yethu izophinde ihlanganiswe ekuvukeni kwabafileyo komzimba. Siyoba nenkazimulo, sibuyiselwe ebusweni nasemzimbeni, isitho nesitho. Ngisho nezinwele zamakhanda ethu ziyobuyiselwa. Siyokhululeka ekuguleni kwesikhathi, izifo, izingozi ezingokomzimba, kanye nokukhubazeka kwengqondo. INhlawulo kaKristu ingasibusisa ukuthi sinqobe lonke uhlobo lokwehlukana komoya kanye nokufa komoya. Ngombandela wokuphenduka, sikhululiwe kuso sonke isono kanye nosizi futhi sivulelwe othandweni olugcwele noluphakade kanye nenjabulo. Simsulwa, sihlanzekile, sikhululekile, singabuyela ebudlelwaneni bethu bomndeni esibuthanda kakhulu ebukhoneni obukhazimulayo, basezulwini bukaNkulunkulu uBaba wethu kanye noJesu Kristu.

Sizophinde sibabone abathandekayo bethu. Uma sihlanganiswa futhi nalabo esibathandayo, sizobonana ngehlo laphakade—ngothando olukhulu, ukuqonda, kanye nomusa. INhlawulo kaJesu Kristu ingasisiza sikhumbule okubalulekile futhi sikhohlwe okungabalulekile. Ukubona uMsindisi wethu kanye nobudlelwane ngokukholwa okukhulu kanye nokubonga kuletha ukuthula, kususa imithwalo, kubuyisana izinhliziyo, futhi kuhlanganisa imindeni ngesikhathi naphakade.

IThemba Lenala Nenjabulo

IPhasika kuJesu Kristu libandakanya ukuvuleka kwamafasitela ezulu, ukwanda kwesithelo somvini, nokuba kuhle kwamasimu. IPhasika kuJesu Kristu libandakanya ukududuza nokunakekela abafelokazi nezintandane, abalambile nabangakwazi ukuzisiza, labo abesabayo, abahlukunyezwayo, noma abazithola besendleleni enobugozi bengenacala. Ngokusinaka ngamunye, uJesu Kristu usimema ukuba sibone futhi sibe izikhonzi ezinothando kanye nozwelo, njengoba enza.

Kuzo zonke izinto ezinhle, uJesu Kristu ubuyisela ngokuchichimayo (bheka NgokukaJohane 10:10; Alima 40:20–24). Uthembisa ukuthi “umhlaba ugcwele, futhi kunokwanele nokuseleyo” (IMfundiso neziVumelwano 104:17). Ukubuyisela Kwakhe zonke izinto kubandakanya ukuphelela kwevangeli Lakhe, igunya namandla akhe obupristi, kanye nezimiso ezingcwele nezivumelwano ezitholakala eBandleni Lakhe, elibizwa ngegama Lakhe, ngisho iBandla likaJesu Kristu labaNgcwele beziNsuku zokuGcina.

IPhasika likaJesu Kristu libandakanya izindlu ezingcwele ezengeziwe zeNkosi ezisondela eduze kwabantwana bakaNkulunkulu ezindaweni eziningi, kuletha ezinhliziyweni zethu imfundiso “abasindisi entabeni yaseSiyoni” (bona U-Obhadiya 1:21). INkosi isinika indlela yokungcwelisa, engenabugovu yokuba sinikele emhlabeni lokho abathandekayo abangasekho abakudingayo nabakufisayo amaphakadeni abangenakuzitholela kona.

Linjalo-ke ithemba lami, isethembiso, kanye nobufakazi. Ngiyafakaza ngoNkulunkulu uBaba wethu; uMsindisi noMhlengi wethu, uJesu Kristu; noMoya oNgcwele. NgePhasika nansuku zonke, sengathi singathola ithemba laphakade kanye nesethembiso kulo isu likaNkulunkulu lenjabulo, kanye nendlela yalo yesivumelwano yokuguqulwa okuvela kuNkulunkulu kusuka empilweni efayo kuya kukho ukungafi kanye nokuphila okuphakade. Usuku ngalunye sengathi ukuqinisekiswa kweNhlawulo kaJesu Kristu kungayisusa imithwalo yethu, kusisize siduduze abanye osizini lwabo, futhi sikhulule imiphefumulo yethu ukuthi ithole injabulo Yakhe ephelele.

Ngethemba kanye nesethembiso sePhasika, uJesu Kristu ugcwalisa ukulangazelela kwezinhliziyo zethu futhi aphendule imibuzo yemiphefumulo yethu.