Yesus Kristus: Fare Athap nge Michmicheg ko Easter

Got, Chitamangdaed nib Manechubog u Tharmiy; Yesus Kristus, ni’ir e fare Fak, nge fare Kan ni Thothup e bay nib chuchugur ngodaed. Rama’enraed ni dariy bi’id memus, murnguy roraed, nge fare bayuliy ko tu’ufeg roraed e ribay rogon ko fare fan nin ngongliy e fayleng ni’ir e fan ni gadaed bay e chiney riy (muguy ko Alma 30:44; Moses 6:62–63).

Ulan fare Mo’olung nin Ntay u Tharmiy u Mm’on nin nga Tharmiy, “rofen nem me tang e pi t’uf u ta’bang, ma gubin pi chon e tharmiy e ra tolul niged e felflaen” (Job 38:7). Ma gadead mel’eg laniyaen’daed. Chiney e ngad rrin’ed u fithik e mich. U fithik e tin nibe buch rodaed, ma gadaed pire’eg e tin nike michmicheg Got ni rib fel’, mab tomilang, mab falfalaen’, ma bay fan ni demuturug e pin’en ni be buch rodaed u fayleng.

Gathi fadaed ni ngad pired ni dan nanged ko mang e ba tu’uf ni ngad rrin’ed. Rayag ni ngad nonad nga tharmiy, gelnag e mich min gelnag e tha’ ko tabinaew nge ggin ni gadaed be par riy, ma gadaed par ni gadaed ba yul’yul’, ni gadaed ba falfalaen’ u dakean e pin’en ni gadaed be mel’eg ni ngad fol gaed riy ko fapi motochiyel rok’ Got. Bayul—bayul—u dakean nge fithik Yesus Kristus era fek e biney e m’ag ko mu’un ko ulung fa boech ban’en.

Fare Athap ko Yafos rok’ Yesus Kristus nge Muruwel rok’

Gubin e rran, fare athap ko Easter nge micmicheg riy e mu’un fapi tawa’ath ngay nge machib ni tay Yesus Kristus ko ngiyal’ ni’i moey u fayleng. Kan mu’ i duugliy rogon u tharmiy, Yesus Kristus e ni gargeleg ni’ir e fare Fak Got (muguy ko Jacob 4:5; Alma 12:33–34; Moses 5:7, 9). Ilaal u fithik’ e gonop nge llowaen’, ma bfel’ u wan’ Got nge girdi’ (muguy ko Luke 2:52). Nikemus ni ba’adag ni nge rrin’ e muruwel nike pi’ e Chitamangin ngak, Yesus Kristus e n’agfan e denen, golnag e m’ar, fosag e yam’, me pi’ e gapas ngak e pi’in nib mar.

Tomuren, ni balaynag e abich rok ko 40 e rran, me micheg ni, “Fare Kan ni Thothup rok Somol e ke yib nga dakenag, ni bachane ke gapgep nigeg ni nggu machibnag e Thin Ni Bfel’ ngak e pi’in gafgow; ke l’oegeg ni nggog ngak e pi’in kan kolrad kan tayrad ni bay ni pagrad, mu gog ngak e pi’in malmit ni bay ra guyed ban’en, ma nggu chuweg ko gafgow e pi’in yibe gafgow nagrad” (Luke 4:18; ngkum guy ko Isaiah 61:1).

Ni fan gadad gubin.

Napan fare bin Tomur e Abich, Yesus Kristus e maluknag e rifrif ay e pi gachalpen (muguy ko John 13:4–8). Ulan e bin ni Kakrom nge bin Be’ech e Fayleng, fare “rran ko yafos” nge “flowa ko yafos” e i’ir nibe yipfan fare sakrament. Ulan e gam’ing ko sacrament, gadadra pii’ e m’ag ngak Chitamangaed ningad feked nga dakaendaed e fithingan Yesus Krisuts, ngad pugugrraengaed Ngak, ngad folgaed ko fapi motochiyel Rok, ninge paer e Thothup Rok’ rodaed (muguy ko Luke 22:19–20; 3 Nephi 18:7, 10–11).

Ulan fare gi Milay’ nu Gethsemane, Yesus e gafgow nib gel ko rogon e gidii’ nima gafgow ni ngeyag ni bayuliydaed. Racha’ ni mop u doewngin nga but’. Ke gafgow ko pi amith ney nifan ngak gubin e gidii’, ni ngeyag ni dabda gafgow gaed ni ga’an gadaedra kalngaen’ (muguy ko Doctrine and Covenants 18:11; 19:16).

Ni ban nag min turguy e kireb nga dakean, Yesus Kristus ni un kakrang min gafgow nag, min tay e tel’iyaw ko rachangol nga dakean lollgen (muguy ko Matthew 27:26, 29; Mark 15:15, 17, 20, 31; Luke 22:63; John 19:1–2). “Gechig ni gafgow riy … e ke palo’ nagdad” (Isaiah 53:5). Ni “chibiyeg ngalang u dakean e kuruth” ni ngeyag ni fekdaed Ngak (muguy ko 3 Nephi 27:14–15). Ni arram rogon nibay u dakean fare kuruth, ma Yesus Kristus e n’agfan rodaed (mugy ko Luke 23:34). Me fith ngak John ni nge i ayuweg e chitiningin (muguy ko John 19:26–27). Ke thamiy ni gowoed e kan n’ag (muguy ko Matthew 27:46; Mark 15:34). Nifan e nge yib i m’ug nib riyul’ e tin nike yog e babyor nib thothup, me ga’ar, Ke yib e belel ngog (muguy ko John 19:28). Napan ni mu’nag urngin e pin’en, “me aw e fan rok” (Luke 23:46; ngkum guy ko John 10:17–18).

Yesus Kristus e mamang rogon ni nge ayuweg e gidii’ rok’ ko pi m’ar, pi mo’owaer, nge pin’en ni yaed be gafgow riy (muguy ko Alma 7:12). Ni baga’ ni pi gafgow ney e ma buch ni bachan e n’en nike mel’eg be’. Ma kamanang rogon ni nge un ngodaed ko falfalaen’, ma kamanang rogon ni nge un ngodaed ko yoer napan nira sug e falfalaen’ rodaed. U fithik’ e murnguy, ma be piningdaed u dakean fithingan, ko laman, ni ngad bad ngak. Be pinning e gidii’ ni gubin nge gubin yang. Be pinningdaed ni ngad guyed ma gadaed nangfan mornga’agen e biney e yafos u dakean e tin nib manechubog. Fa’an gadaedra ayuweg fapi m’ag rodaed, make micheg ni gubin binen’ e ra yib nga ta’abang nibay fal’ngin ngodad (muguy ko Doctrine and Covenants 90:24; Romans 8:28).

Ngiyal’ rok’ nge kanwo’en nike duugliy, e yib fare sulweg yarmen riy—gathi kemus ko rogon ni’i moey machane ko rogon nrayag ni nge buch. Riyul’, ni Yesus Kristus e rayag ni nge chuwegdaed ko gafgow nge denen, ko yam’ nge infiarno, mrayag ni nge ayuwegdaed ngad rrin’ed e tin nib thothup nogdaed, u dakean e mich nge kalngaen’.

Bachan Yesus Kristus, yam’ e gathi ir e tomur. Ko Easter me gamaed be yoeg:

U dakean fare motochiyel nge gelngin e Chitamangin, Yesus e rayag nira pii’ e yafos rok’ ma ki fos bayay (muguy ko John 10:17). Napan nibay e dogur rok’ ulan fare low ko yam’, Yesus Kristus e yani machib me yarmiy tofen e ya’al, nibe ga’ar “bayuliyraed ko kalbus ko yam’” (Doctrine and Covenants 138:16).

Bin dalip e rran ngay ko kadbul riy, me foskoyamʼ. Me noen ngak Mary. Me yibi m’ug ngak l’agruw i gachalpen u dakean e kanawo’ i yean nga Emmaus, ngak fapi Apostles rok’, nge ku boech e gidii’. (Muguy ko Matthew 28; Mark 16; Luke 24; John 20.)

U dakean e mich rok’, me pinning fapi gachalpen ni ngar yon’ed e nug roraed nga barba’ fare barkow; ni yaney, ni rib sug ko niig, ma fare nug e dani magchod (muguy ko John 21:6–11; Luke 5:3–7). Me pii’ gan fapi gachelpen me wenig nag ngak Peter ni dalip yay ni rib tu’uf ni nge pi’ ggan fapi saf nge gamanan rok’ (muguy ko John 21:12–17). Me yaen nga tharmiy, me yoeg ngak fapi gachalpen ni ngar ronod nga gubin yang ngar machib niged e thin nib fel’ ko mornga’agen e Easter ngak urngin e girdi (muguy ko Matthew 28:19–20; Mark 16:15).

Yesus Kristus e ir Facha’ nima Gafaliy e Saaf ni’ir e Fak Got. Ke pii’ e yafos rok’ nifan nogdaed, nge yafos rok’ nifan ngak e pi saaf rok’. U dakean fagi milay’ nge dakean fare kuruth, ke thamiy e amith ndariy be’ nike thamiy bi’id me bayul nagdaed. Ko biney e yafos nge yafos ni manemus, ke dag ngodaed wo’en rogon “ni yam’ era bing kanawo’en e tin ni manemus ban’en.”

U dakean fare Bayul rok Kristus nge fare Foskoyam’ ni tay, fare dogur nge ya’al rodaed era sul biyay nga ta’abang. Ra fel’ e dogur rodaed, nran sulweg rogon ni woed somm’on, ni rib fel’. Kumus ko piy u llolgendaed ni yira fulweg urngin. Ma dabki yib e m’ar ngodaed, nge tym, nge mad’ad, nge man’aey rodaed nira fel’ nge polo’. Bayul rok’ Kristus e rayag ni nge tawa’ath nagdaed ko gubin mit e tin ni bayi buch rodaed ko napan ni bayi dar e ya’al rodaed nge ngiyal’ ni kad m’ad. Napan ni yira kalngaen’, ma yira chuwegdaed ko gubin mit e denen nge kirbaen’ min fekdaed ko tin ni dariy bi’id memus e tu’ufeg nge falfalaen’. Polo’, be’ech, marayag ni ngad suled ko tha’ ko tabinaew rodaed ni rib fel’, ni’ir e fare celestial ni tigil’ Got ni’ir e Chitamangdaed nge Yesus Kristus.

Mrayag ni ngad guyed gidii’en e tabinaew rodaed nib tu’uf rodaed. Napan ni gadaedra mada’nag biyay e pi’in ni rib tu’uf rodaed, ma gadaedra guy daed ni woed e changar nib manechubog—nib gel e tu’uf riy, nangfan, nge fel’. Bayul rok’ Yesus Kristus e rayag ni nge ayuwegdaed nga un tafney nag e tin nib mangil min pagtilin e tin ni dani ga’fan. Guy fare Tathapeg nge tha’ rodaed ngak nibay e mich riy nib gel era fek e gapas, me chubiy daed ngalang, munguynag e gum’ircha’, me ta’arebnag e tabinaew ni manemus.

Fare Athap ko Fla’ab nge Falfalaen’

Easter ngak Yesus Kristus e mu’un fapi winda u tharmiy ngay nibe maab, fapi wo’omngin e gak’iy nibe yo’or, nge butt’ nibe yuqo’ol. Easter ngak Yesus Kristus e mu’un e pi’ e ayuw ngak e pi’in ni dariy e galbithir roraed fa figirngin fa le’enginread, pi’in nibe yim’ ko mik’iy, murus, gafgow, fa mad’ad ni bachan be’. Tay u wun’uy e gidii’, Yesus Kristus nibe pinningdaed ni ngad guyed ma gadaed machib u fithik’ e tu’ufeg nge murunguy, ni woed rogon nike rrin’.

Ko gubin ban’en nib fel’, Yesus Kristus e ke sulweg e fla’ab ni bo’or (muguy ko John 10:10; Alma 40:20–24). Ke micheg ni “fare fayleng e busug, nib gaman urngin riy nifan ngak e gidii’ ni gubin” (Doctrine and Covenants 104: 17). Fare sulyarmen e mu’un fare gospel rok’ ngay nib polo’, fare mat’won e priesthood nge gelngin, nge fapi m’ag nge gam’ing ni rayag ni ngan pire’eg ulan e Galasia rok’, nikan pinning u dakean fithingan, ni’ir e Fare Galasia ku Yesus Kristus ni Fan ko Gidiiʼen Got ko Tin Tomur e Rran.

Easter ngak Yesus Kristus e be yipfan e nu’un rok’ Somoel nibe yo’or nib thothup nibe yib ngak pifak Got u gubin yang, nibe fek nga gum’ircha’en fare yalen ni “pilung u dakean fare Buruy nu Zion” (muguy ko Obadiah 1:21). Somoel e ke pi’ wo’en nib thothup, kanawo’en nib gol rogon nrayag ni ngan rrin’ u fayleng napan nira palog l’agruw ni’ ba’adag e yafos ni manemus ngak machane dabiyag ni nge thapeg.

Irreray e athapeg rog, michmicheg rog, nge mich rog. Gube micheg ni Got fare Chitamangiy, Tathapeg nge Bayul rodaed,Yesus Kristus; nge fare Kan ni Thothup. Ko Easter nge gubin e rran, gu athapeg nira bagdaed me pire’eg e athap ni dariy bi’id manemus nge michmicheg ko fare wo’en e falfalaen’ rok’ Got, nib mu’un fare m’ag ngay nib thothup ko biney e yafos nge bin ni migid e yafos ni dariy bi’id manemus. Gubin e rran’ ma gube athpeg ni fare Bayul rok’ Yesus Kristus ni bay nib riyul’ era chubiydaed ngalang, me ayuwegdaed ngad ayuweged e gidii’, ma gadaed thapaeg e falflaen’ rok’ nib polo’.

Udakean fare athap nge michmicheg ko Easter, Yesus Kristus fare Tathapeg era suguy gum’ircha’endaed me fulweg taban e pi duwer ko ya’al radaed.