Jesu Kreste: Ts′epo le Ts′episo ea Paseka

Molimo, Ntat´a rona oa Bosafeleng ea Maholimong; Jesu Kreste Mora oa Hae ea Ratoang, le Moea o Halalelang ba haufi le rona ka seqo Leseli la bona le se nang moeli le le sa feleng, kutloelo-bohloko, le lerato la topollo li hokahantsoe morerong oa tlholeho le motheo oa bophelo ba rona. (see Alma 30:44; Moshe 6:62–63).

Lekhotleng la pele ho tsoalo Leholimong, “linaleli tsa hoseng tsa bina hammoho, le bara bohle [le barali] ba Molimo ba hooa ka thabo.” (Jobo 38:7). Re khethile khetho. Joale re tsamaea ka tumelo. Ka boiphihlelo ba rona, re sibolla botle ba Molimo bo ts’episitsoeng, ho hlaka, thabo, le morero har’a ho hloka botsitso ha bophelo ba ho shoa, ho nyahama, le liqholotso.

Ha rea rereloa ho lelera re le bang ka ho hloka botsitso ho teng. Re ka buisana le leholimo, ra aha tumelo le bonngoe malapeng le ka matlong le sechabeng sa Bahalaleli, ’me ra fetoha ra ba borona ba ’nete, ba lokolohileng, ba sebele, ba thabileng ka boithatelo le ka thabo ho mamela litaelo tsa Molimo. Topollo—Topollo—ho le ka Jesu Kreste e tlisa boteng bona ba selekane.

Ts′epo ea Bophelo le Mosebetsi oa Jesu Kreste.

Letsatsi le letsatsi, ts′epo le ts′episo ea Paseka li kenyelletsa mahlohonolo le lithuto tseo Jesu Kreste a li arolelaneng nakong ea bosebeletsi ba Hae ba bophelong ba ho shoa bo phethahetseng lefats′eng O behiloe matsoho esale pele ts′imolohong, Jesu Kreste o ile a tsoaloa e le Mora ea nots′i oa Molimo (bona Jakobo 4:5; Alma 12:33–34; Moshe 5:7, 9). A hola tlhalefong, le boemong, le kamano e ntle le Molimo le batho (bona Luka 2:52). A batla feela ho etsa thato ea Ntat′ae, Jesu Kreste o ile a ts′oarela libe, a folisa mafu, a tsosa bafu, me a ts′elisa ba kulang le ba hlorileng.

Hang, ka mor’a ho itima lijo ka matsatsi a 40, o ile a paka, “Moea oa Morena o holim’a ka, hobane o ntlotselitse ho bolela evangeli ho mafutsana; o nthomile ho folisa ba pelo li robehileng, ho bolella ba kholehong tokoloho, le ho phekola ba foufetseng, ho lokolla ba hatelletsoeng” (Luka 4:18; bona hape Esaia 61:1).

Ke e mong le e mong oa rona.

Selallong sa ho Qetela, Jesu Kreste o ile a hlatsoa maoto a barutuoa ba Hae (bona Johanne 13:4–8). Lefats′eng la Khale le le Lecha, “metsi a phelang” le “bohobe ba bophelo” ka Boeena o ile a theha selello. Ka ts’ebeletso e halalelang ea selallo, re bitsa ho Ntate ’me re etsa selekane sa ho nka lebitso la Jesu Kreste, ho Mo hopola kamehla, le ho boloka litaelo tsa Hae, e le hore re tle re be le Moea oa Hae kamehla a be le rona. (bona Luka 22:19–20; 3 Nefi 18:7, 10–11).

Serapeng sa Gethsemane, Jesu o ile a utloa bohloko bo fetang boo motho a ka bo mamellang, e le ho re pholosa le ho re etsetsa topollo. Mali a ile a tsoa lesojoaneng le leng le le leng. O ile a mamella bohloko bona bakeng sa bohle, e le hore re tle re se ke ra bo mamella haeba re ka baka (bona Lithuto tsa Tumelo le Lilekane 18:11; 19:16).

A ekoa a ba a qosoa ka bohata, Jesu Kreste o ile a songoa le ho shapuoa, le moqhaka oa meutloa a roesoa hloohong ea Hae e ikokobelitseng (bona Mattheu 27:26, 29; Mareka 15:15, 17, 20, 31; Luka 22:63; Johanne 19:1–2). “O hlokofalitsoe ka lebaka la bokhopo ba rona … ka maqeba a hae re folisitsoe” (Isaia 53:5). O ile a “phahamisetsoa sefapanong” ho re hulela ho eena (bona 3 Nefi 27:14–15). Leha ho le joalo, esita le sefapanong, Jesu Kreste o ile a ts′oarela (bona Luka 23:34). O ile a kopa Johanne hore a hlokomele ’mae (bona Johanne 19:26–27). O ile a ikutloa a lahliloe (bona Mattheu 27:46; Mareka 15:34). Hore lengolo le halalelang le ke phethahale, O ile a re o nyoriloe (bona Johanne 19:28). Ha tsohle li se li phethehile, eena ka bo-eena “a nehela moea” (Luka 23:46; bona hape Johanne 10:17–18).

Jesu Kreste o tseba ho re thusa maloetseng, mefokolong, bolutung, ho behoa ka thoko le mathateng (bona Alma 7:12). Hangata mahlomola a joalo a tla ka lebaka la khetho ea ba bang. Hape o tseba ho thaba le rona thabong le tebohong ea rona, ho lla le rona ha thabo ea rona e tletse. Ka bonolo, o re bitsa ka lebitso la hae, ka lentsoe la hae, lesakeng la hae. O bitsa motho e mong le e mong hohle. O re mema ho bona le ho utloisisa bophelo ba ho shoa ka pono ea bosafeleng. Ha re ntse re tsamaea ka ho otloloha le ho boloka lilekane tsa rona, o ts′episa hore lintho tsohle li ka sebetsa molemong oa rona (bona Lithuto tsa Tumelo le Lilekane 90:24; Ba-Roma 8:28).

Ka nako ea hae le ka tsela ea hae, tsosoloso e ea tla—eseng feela ka moo lintho li neng li le ka teng empa le ho seo li ka bang sona. Ka ’nete, Jesu Kreste a ka re lokolla litlamong le sebeng, lefung le liheleng, ’me a ka re thusa ho phethahatsa boleng ba rona ba bomolimo ha re ntse re fetoha ho feta kamoo re neng re nahanne, ka tumelo le pako.

Ka lebaka la Jesu Kreste, lefu ha se pheletso. Ka Paseka re phatlalatsa:

Ka taelo le matla a tsoang ho Ntat’ae, Jesu o ne a ka nehelana ka bophelo ba Hae ’me a bo nka hape (bona Johanne 10:17) Ha setopo sa Hae se ntse se robetse lebitleng, Jesu Kreste o ile a sebeletsa le ho hlophisa lefats′eng la meea, a phatlalatsa “topollo ea bona litlamong tsa lefu” ( Lithuto tsa Tumelo le Likane 138:16).

Hoseng ha letsatsi la boraro, A tsoha lebitleng. O ile a bua ho Maria. O ile a itlhahisa ho barutuoa ba babeli tseleng e eang Emmause, Baapostola ba hae, le ba bang. (Bona Mattheu 28; Mareka 16; Luka 24; Johanne 20.)

Ka bopaki bo khahlehang, a memela barutuoa ba hae ho akhela matlooa a bona ka lehlakoreng le leng la sekepe; lekhetlong lena, le hoja a ne a boetse a tletse litlhapi, matlooa ha aa ka a robeha (bona Johanne 21:6–11; Luka 5:3–7). O ile a fepa barutuoa ´me a kopa Peterose ka makhetlo a mararo hore a fepe linku le likonyana tsa hae (bona Johanne 21:12–17). O ile a nyolohela leholimong, a bolela hore barutuoa ba hae nakong eo le rōna bohle joale re lokela ho arolelana litaba tse khanyang tsa Paseka le evangeli ea hae ho lichaba tsohle, leloko, le batho (bona Mattheu 28:19–20; Mareka 16:15).

Jesu Kreste ke Molisa oa rona ea Molemo le Konyana ea Molimo. O fane ka bophelo ba hae bakeng sa, le ho fana ka bophelo ba hae ho, linku tsa hae. Serapeng le sefapanong, o ile a jara tse sa mamelleheng le ho re shoela. Ka nako le ka ho sa feleng, o re bonts′a ka mohlala hore ke joang “lefu le bulang tsela e isang bophelong bo sa feleng.”

Ka matla a Topollo le ho Tsoha bafung ha Kreste, ’mele ea rona le meea ea rona e tla kopanngoa tsohong ea ’mele. Re tla ba ba khanyang, ba tsosolositsoeng sefahlehong le sebopehong sa ’mele, maoto le matsoho. Esita le meriri oa lihlooho tsa rona o tla tsosolosoa. Re tla lokoloha ho tsoa bokuling ba lefats’e, mafung, kotsing ea ’mele le ho se phele hantle kelellong. Topollo ea Kreste e ka re hlohonolofatsa ho hlola mofuta o mong le o mong oa karohano ea semoea le lefu la semoea. Ka lebaka la pako, re lokolotsoe sebeng se seng le se seng le masoabi ’me re buletsoe ho botlalo ba bofeleng ba lerato le thabo. Re hloekile, re se na letheba, re lokolohile, re ka khutlela likamanong tsa rōna tsa malapa tseo re li ratang ka ho fetisisa boteng bo khanyang, ba leholimo ba Molimo Ntate le Jesu Kreste.

Re tla bona baratuoa ba rona hape. Ha re kopana hape le bao re ba ratang, re tla bonana ka ponano ea bosafeleng—ka lerato le leholo, kutloisiso, le mosa. Topollo ea Jesu Kreste e ka re thusa ho hopola seo e leng sa bohlokoa le ho lebala seo se seng bohlokoa. Ho bona Mopholosi oa rona le likamano ka tumelo e kholo le teboho ho tlisa khotso, ho phahamisa meroalo, ho boelanya lipelo, le ho kopanya malapa ka nako le ka ho sa feleng.

Ts′epo ea Nala le Thabo

Paseka ho Jesu Kreste e akarelletsa ho buleha ha menyako ea leholimo, ho ata ha litholoana tsa morara, le masimo ho fetoha a khahlehang. Paseka ho Jesu Kreste e kenyelletsa ho ts′elisa le ho hlokomela bahlolohali le likhutsana, ba lapileng le ba hlokang thuso, ba ts′ohileng, ba hlekefetsoang, kapa ba ts′oeroeng ke kotsi ba se na molato. Ka ho elelloa e mong le e mong, Jesu Kreste o re memela ho bona le ho sebeletsa ka lerato le kutloelo-bohloko, joalo ka ha a etsa.

Linthong tsohle tse molemo, Jesu Kreste o tsosolosa ka bongata (bona Johanne 10:10; Alma 40:20–24). O ts’episa hore “lefats’e le tletse, ’me ho na le ho lekaneng e sita le ho baballa” (Lithuto tsa Tumelo le Lilekane 104:17). Tsosoloso ea hae ea lintho tsohle e kenyeletsa botlalo ba evangeli ea Hae, matla a boprista le matla a Hae, le melao le lilekane tse halalelang tse fumanoang Kerekeng ea Hae, e bitsoang ka lebitso la Hae, esita le Kereke ea Jesu Kreste ea Bahalaleli ba Matsatsi a BofeloMehla ea Kajeno.

Paseka ho Jesu Kreste e kenyelletsa ho eketseha ha matlo a halalelang a Morena ho atamela haufi le bana ba Molimo libakeng tse ngata, ho tlisa lipelong tsa rona thuto ea “bapholosi Thabeng ea Sione” (bona Obadia 1:21). Morena o fana ka tsela e halaletsang, e senang boikhabi bakeng sa rona ho fana lefats′eng seo baratuoa ba falletseng ba se hlokang le takatso ea bosafeleng eo ba sitoang ho iphumanela eona.

Se joalo ke eona ts′epo ea ka, ts′episo, le bopaki. Ke paka ka Molimo Ntate oa rona; Mopholosi le Molopolli oa rona, Jesu Kreste; le Moea o Halalelang. Ka Paseka le letsatsi le leng le le leng, e se eka re ka fumana ts′epo le tšepiso e sa feleng morerong o halalelang oa thabo oa Molimo, o nang le tsela ea selekane ea phetoho e halalelang ho tloha bophelong ba hoshoa ho ea bophelong bo sa shoeng le bophelong bo sa feleng. Letsatsi le leng le le leng e ka bonnete ba Topollo ea Jesu Kreste bo ka phahamisa meroalo ea rona, le ho re thusa ho ts´elisa ba bang mahlomoleng a bona, le ho lokolla meea ea rona ho amohela thabo ea hae e tletseng.

Ka ts´epo le ts´episo ea Paseka, Jesu Kreste o tlatsa litabatabelo tsa lipelo tsa rona le ho araba lipotso tsa meea ea rona.