« ព្រះយេស៊ូវគ្រីស្ទ ៖ សេចក្តីសង្ឃឹម និងការសន្យានៃបុណ្យអ៊ីស្ទើរ » លីអាហូណា ខែមេសា ឆ្នាំ២០២៥ ។
សារលិខិតប្រចាំខែ លីអាហូណា ខែមេសា ឆ្នាំ២០២៥
ព្រះយេស៊ូគ្រីស្ទ ៖ សេចក្តីសង្ឃឹម និងការសន្យានៃបុណ្យអ៊ីស្ទើរ
តាមរយៈសេចក្តីសង្ឃឹម និងការសន្យានៃបុណ្យអ៊ីស្ទើរ ព្រះយេស៊ូវគ្រីស្ទបំពេញបំណងប្រាថ្នានៃដួងចិត្តរបស់យើង និងឆ្លើយសំណួរនៃព្រលឹងរបស់យើង ។
រចនារូបភាពដោយ ម៉ៃឃល ដិនហ្វត
សូមបង្កើតពេលវេលាស្ងប់ស្ងាត់មួយ និងកន្លែងនៃទីបរិសុទ្ធខាងវិញ្ញាណនៅពេលប្អូនអានសារលិខិតនេះ ។
ជាញឹកញយ ពិភពលោករបស់យើងមានសំឡេងរំខាន រញ៉េរញ៉ៃជាមួយនឹងការក្លែងបន្លំ និងអំនួត ។ ប៉ុន្តែនៅពេលយើងបើកចិត្តឲ្យទូលាយ ស្មោះត្រង់ និងទទួលយកការពិតចំពោះការយល់ដឹងអំពីខ្លួនយើង និងចំពោះឥទ្ធិពលរបស់ព្រះ នោះសេចក្តីសង្ឃឹម និងការសន្យានៃបុណ្យអ៊ីស្ទើរនៅក្នុងព្រះយេស៊ូវគ្រីស្ទនឹងក្លាយជាការពិត ។ នៅក្នុងគ្រាបែបនេះ យើងទូលអង្វរ ៖
« តើខ្ញុំអាចជួបសមាជិកគ្រួសាររបស់ខ្ញុំ មិត្តភក្តិរបស់ខ្ញុំ មនុស្សជាទីស្រឡាញ់របស់ខ្ញុំម្តងទៀតដោយរបៀបណា ? »
« នៅក្នុងពិភពលោកមួយដែលទំនាក់ទំនងឆាប់សាបរលាប ដែលមនុស្សរមែងធ្វើសកម្មភាព ‹ ខ្ញុំជ្រើសយកខ្លួនឯង › តើខ្ញុំរកឃើញ និងមានអារម្មណ៍នៃភាពសុខសាន្ត សេចក្តីសង្ឃឹម និងសេចក្តីរួបរួមគ្នាជាមួយនឹងព្រះ ( សូមមើល គោលលទ្ធិ និងសេចក្ដីសញ្ញា ១០៧:១៩ ) ជាមួយអស់អ្នកដែលនៅជុំវិញខ្ញុំ និងខ្លួនខ្ញុំផ្ទាល់នៅឯណា ? »
« តើមាននរណាម្នាក់ដែលខ្ញុំអាចស្រឡាញ់—ហើយដែលនឹងពិតជាស្រឡាញ់ខ្ញុំដែរទេ ? តើទំនាក់ទំនងសេចក្តីសញ្ញាអាចរីកចម្រើន និងមាននិរន្ដរភាពមិនមែនដូចជារឿងនិទានទេ ប៉ុន្តែដោយមាននូវចំណងដែលរឹងមាំជាងចំណងនៃសេចក្ដីស្លាប់ ដែលពិតជាសប្បាយរីករាយ និងជានិច្ចនិរន្ដរ៍បានដែរទេ ? »
« នៅកន្លែងដែលមានការឈឺចាប់ ការរងទុក្ខ និងភាពអយុត្តិធម៌ច្រើន តើខ្ញុំអាចរួមចំណែកដល់ភាពសុខសាន្ត ភាពសុខដុមរមនា និងការយល់ដឹងនៅក្នុងព្រះយេស៊ូវគ្រីស្ទ និងនៅក្នុងដំណឹងល្អ និងសាសនាចក្រដែលបានស្ដារឡើងវិញរបស់ទ្រង់ដោយរបៀបណា ? »
នៅក្នុងរដូវកាលបុណ្យអ៊ីស្ទើរនេះ ខ្ញុំចែកចាយទីបន្ទាល់របស់ខ្ញុំអំពីព្រះយេស៊ូវគ្រីស្ទ និងអំពីការសន្យា និងសេចក្តីសង្ឃឹមរបស់ទ្រង់ ។
ការសន្យានៃកម្មសិទ្ធិនៃសេចក្ដីសញ្ញា និងគោលបំណង
ព្រះ ជាព្រះវរបិតាដែលគង់នៅស្ថានសួគ៌ដ៏អស់កល្បជានិច្ចរបស់យើង ព្រះយេស៊ូវគ្រីស្ទ ជាព្រះរាជបុត្រាស្ងួនភ្ងារបស់ទ្រង់ និងព្រះវិញ្ញាណបរិសុទ្ធគឺគង់នៅជិតយើងដោយផ្ទាល់ ។ ពន្លឺដ៏គ្មានទីបញ្ចប់ និងអស់កល្បជានិច្ច សេចក្តីមេត្តា និងសេចក្តីស្រឡាញ់នៃការប្រោសលោះរបស់ទ្រង់ទាំងទ្វេបានត្របាញ់ចូលគ្នា នៅក្នុងគោលបំណងនៃការបង្កបង្កើតដែលបញ្ជាក់ពីធាតុផ្សំ និងគោលបំណងនៃការមានជីវិតរបស់យើង ( សូមមើល អាលម៉ា ៣០:៤៤; ម៉ូសេ ៦:៦២–៦៣ ) ។
នៅក្នុងក្រុមប្រឹក្សានៃជីវិតមុនផែនដីនៅឯស្ថានសួគ៌ « ក្នុងកាលដែលផ្កាយព្រឹកបានច្រៀងជាមួយគ្នា ហើយបុត្រា [ និងបុត្រី ] ទាំងអស់របស់ព្រះបានស្រែកអរសាទរ » ( យ៉ូប ៣៨:៧ ) ។ យើងបានជ្រើសរើសជម្រើសមួយ ។ ឥឡូវនេះយើងដើរដោយសេចក្តីជំនឿ ។ តាមរយៈបទពិសោធន៍ផ្ទាល់ខ្លួនរបស់យើង យើងរកឃើញសេចក្តីសន្យាដ៏ស្រស់ស្អាត ភាពច្បាស់លាស់ សេចក្តីអំណរ និងគោលបំណងរបស់ព្រះ នៅចំណោមភាពមិនច្បាស់លាស់ ការបាក់ទឹកចិត្ត និងបញ្ហាប្រឈមមុខទាំងឡាយនៃជីវិតរមែងស្លាប់នេះ ។
យើងមិនតម្រូវឲ្យធ្វើដំណើរតែម្នាក់ឯងនៅក្នុងភាពមិនប្រាកដប្រជានៃការមានជីវិតនោះទេ ។ យើងអាចទាក់ទងនឹងស្ថានសួគ៌ ស្ថាបនាសេចក្តីជំនឿ និងភាពមានចំណែកនៅក្នុងគ្រួសារ និងនៅក្នុងដំណឹងល្អ និងសាសនាចក្រ ហើយក្លាយជាខ្លួនយើងដ៏ពិត សេរី ពិតប្រាកដ និងរីករាយបំផុត តាមរយៈការគោរពតាមឆន្ទៈ និងរីករាយក្នុងការប្រតិបត្តិតាមព្រះបញ្ញត្តិរបស់ព្រះ ។ ដង្វាយធួន—នៅជាមួយ—នៅក្នុង និងតាមរយៈព្រះយេស៊ូវគ្រីស្ទនាំមកនូវកម្មសិទ្ធិនៃសេចក្តីសញ្ញានេះ ។
សេចក្តីសង្ឃឹមនៃព្រះជន្ម និងបេសកកម្មរបស់ព្រះយេស៊ូវគ្រីស្ទ
ជារៀងរាល់ថ្ងៃ សេចក្តីសង្ឃឹម និងការសន្យានៃបុណ្យអ៊ីស្ទើររួមមាននូវពរជ័យ និងការបង្រៀនដែលព្រះយេស៊ូវគ្រីស្ទបានចែកចាយក្នុងអំឡុងពេលការបម្រើក្នុងជីវិតរមែងស្លាប់ដ៏ឥតខ្ចោះរបស់ទ្រង់ ។ បានតែងតាំងជាមុនតាំងពីការចាប់ផ្តើម ព្រះយេស៊ូវគ្រីស្ទបានប្រសូត្រមកជាព្រះរាជបុត្រាបង្កើតតែមួយរបស់ព្រះ ( សូមមើល យ៉ាកុប ៤:៥; អាលម៉ា ១២:៣៣–៣៤; ម៉ូសេ ៥:៧, ៩ ) ។ ទ្រង់កាន់តែធំប្រកបដោយប្រាជ្ញារឹតតែច្រើនឡើង ហើយជាទីគាប់ព្រះហឫទ័យដល់ព្រះ និងចិត្តមនុស្សផង ( សូមមើល លូកា ២:៥២ ) ។ ស្វែងរកដើម្បីធ្វើតាមតែឆន្ទៈរបស់ព្រះវរបិតារបស់ទ្រង់ប៉ុណ្ណោះ ព្រះយេស៊ូវគ្រីស្ទបានអភ័យទោសបាប ព្យាបាលជំងឺទាំងឡាយ បានប្រោសមនុស្សស្លាប់ឲ្យរស់ឡើងវិញ និងលួងលោមអ្នកឈឺនិងឯកោ ។
មានពេលមួយ បន្ទាប់ពីតមអាហារ ៤០ ថ្ងៃរួច ទ្រង់បានថ្លែងទីបន្ទាល់ថា « ព្រះវិញ្ញាណព្រះអម្ចាស់សណ្ឋិតលើខ្ញុំ ពីព្រោះទ្រង់បានចាក់ប្រេងតាំងខ្ញុំឲ្យផ្សាយដំណឹងល្អដល់មនុស្សទ័លក្រ ទ្រង់បានចាត់ខ្ញុំឲ្យមកដើម្បីនឹង ប្រោសមនុស្សដែលមានចិត្តសង្រេង ហើយប្រកាសប្រាប់ពីសេចក្តីប្រោសលោះដល់ពួកឈ្លើយ និងសេចក្តីភ្លឺឡើងវិញដល់មនុស្សខ្វាក់ហើយឲ្យ ដោះមនុស្សដែលត្រូវគេជិះជាន់ឲ្យរួច » ( លូកា ៤:១៨ សូមមើលផងដែរ អេសាយ ៦១:១ ) ។
នោះគឺយើងម្នាក់ៗ ។
នៅអាហារពេលល្ងាចចុងក្រោយបង្អស់ ព្រះយេស៊ូវគ្រីស្ទបានលាងជើងឲ្យសិស្សរបស់ទ្រង់ ( សូមមើល យ៉ូហាន ១៣:៤–៨ ) ។ នៅក្នុងទាំងជំនាន់ដែលព្រះយេស៊ូវមានព្រះជន្មលើផែនដី និងសម័យព្រះគម្ពីរមរមន « ទឹករស់ » និង « នំបុ័ងនៃជីវិត » អង្គទ្រង់ផ្ទាល់ បានបង្កើតពិធីសាក្រាម៉ង់ ។ នៅក្នុងពិធីសាក្រាម៉ង់ដ៏ពិសិដ្ឋ យើងអំពាវនាវដល់ព្រះវរបិតា ហើយយើងបានសន្យាដើម្បី លើកដាក់មកលើខ្លួនយើងនូវព្រះនាមរបស់ព្រះយេស៊ូវគ្រីស្ទ ហើយចងចាំទ្រង់ជានិច្ច ហើយកាន់តាមព្រះបញ្ញត្តិទាំងឡាយរបស់ទ្រង់ ប្រយោជន៍ឲ្យយើងអាចបានព្រះវិញ្ញាណរបស់ទ្រង់ គង់នៅជាមួយនឹងយើងជាដរាប ( សូមមើល លូកា ២២:១៩–២០; នីហ្វៃទី ៣ ១៨:៧, ១០–១១ ) ។
នៅក្នុង សួនច្បារគែតសេម៉ានី ព្រះយេស៊ូវបានរងទុក្ខច្រើនជាងមនុស្សអាចរងទុក្ខបានដើម្បីប្រោសលោះ និងធួនសម្រាប់យើង ។ ព្រះលោហិតបានហូរមកពីគ្រប់រន្ធញើស ។ ទ្រង់បានទទួលរងការឈឺចាប់ទាំងនេះសម្រាប់មនុស្សទាំងអស់ ដើម្បីកុំឲ្យយើងអាចរងទុក្ខ បើសិនជាយើងប្រែចិត្ត ( សូមមើល គោលលទ្ធិ និងសេចក្ដីសញ្ញា ១៨:១១; ១៩:១៦ ) ។
ត្រូវបានគេក្បត់ និងចោទប្រកាន់មិនពិត ព្រះយេស៊ូវគ្រីស្ទត្រូវបានគេចំអក និងវាយដំ ហើយមកុដបន្លាត្រូវបានដាក់លើព្រះកេសារបស់ទ្រង់ ( សូមមើល ម៉ាថាយ ២៧:២៦, ២៩; ម៉ាកុស ១៥:១៥, ១៧, ២០, ៣១; លូកា ២២:៦៣; យ៉ូហាន ១៩:១–២ ) ។ « ទ្រង់ត្រូវរបួស ដោយព្រោះអំពើរំលងរបស់យើង … យើងរាល់គ្នាបានប្រោសឲ្យជា ដោយសារស្នាមរំពាត់នៅអង្គទ្រង់ » ( អេសាយ ៥៣:៥ ) ។ ទ្រង់ត្រូវបាន « លើកឡើងនៅលើឈើឆ្កាង » ដើម្បីនាំគ្រប់មនុស្សទាំងអស់ឲ្យមករកទ្រង់ ( សូមមើល នីហ្វៃទី ៣ ២៧:១៤–១៥ ) ។ ទោះបីជាយ៉ាងណាក៏ដោយ សូម្បីតែនៅលើឈើឆ្កាង ព្រះយេស៊ូវគ្រីស្ទក៏បានធ្វើការអភ័យទោសផងដែរ ( សូមមើល លូកា ២៣:៣៤ ) ។ ទ្រង់បានស្នើសុំឲ្យយ៉ូហានមើលថែទាំម្តាយរបស់ទ្រង់ ( សូមមើល យ៉ូហាន ១៩:២៦–២៧ ) ។ ទ្រង់មានអារម្មណ៍ថាត្រូវបានគេបោះបង់ចោល ( សូមមើល ម៉ាថាយ ២៧:៤៦; ម៉ាកុស ១៥:៣៤ ) ។ តែដើម្បីឲ្យបានសម្រេចតាមបទគម្ពីរ នោះទ្រង់មានបន្ទូលថា ខ្ញុំស្រេកទឹកណាស់ ( សូមមើល យ៉ូហាន ១៩:២៨ ) ។ នៅពេលដែលការណ៍ទាំងអស់ត្រូវបានសម្រេច នោះទ្រង់ « បានប្រគល់វិញ្ញាណ » របស់ទ្រង់ ( លូកា ២៣:៤៦; សូមមើលផងដែរ យ៉ូហាន ១០:១៧–១៨ ) ។
ព្រះយេស៊ូវគ្រីស្ទជ្រាបពីរបៀបជួយយើងនៅក្នុងជំងឺ ឈឺចាប់ ភាពឯកោ ភាពតែឯង និងការលំបាកទាំងឡាយរបស់យើង ( សូមមើល អាលម៉ា ៧:១២ ) ។ ការរងទុក្ខបែបនេះជាញឹកញាប់កើតមកពីលទ្ធផលនៃជម្រើសរបស់អ្នកដទៃ ។ ទ្រង់ក៏ជ្រាបពីរបៀបដើម្បីមានអំណរជាមួយយើងនៅក្នុងសេចក្តីរីករាយ និងការដឹងគុណរបស់យើង របៀបព្រះកន្សែងជាមួយយើងនៅពេលដែលសេចក្តីអំណររបស់យើងពោរពេញផងដែរ ។ ដោយភាពទន់ភ្លន់ ទ្រង់បានហៅយើងនៅក្នុងព្រះនាមរបស់ទ្រង់ ដោយព្រះសូរសៀងរបស់ទ្រង់ ឲ្យចូលទៅក្នុងហ្វូងចៀមរបស់ទ្រង់ ។ ទ្រង់ហៅទៅមនុស្សទាំងអស់នៅគ្រប់ទីកន្លែង ។ ទ្រង់អញ្ជើញយើងឲ្យមើល និងយល់ពីជីវិតរមែងស្លាប់តាមរយៈទស្សនវិស័យដ៏អស់កល្ប ។ ពេលដែលយើងដើរដោយទៀងត្រង់ និងរក្សាសេចក្តីសញ្ញារបស់យើង នោះទ្រង់សន្យាថាអ្វីៗទាំងអស់អាចផ្សំគ្នាសម្រាប់សេចក្ដីល្អដល់យើង ( សូមមើល គោលលទ្ធិ និងសេចក្ដីសញ្ញា ៩០:២៤; រ៉ូម ៨:២៨ ) ។
នៅក្នុងពេលវេលា និងរបៀបរបស់ទ្រង់ ការស្តារឡើងវិញកើតមាន—មិនត្រឹមតែទៅតាមរបៀបដែលអ្វីៗបានធ្លាប់មានប៉ុណ្ណោះទេ ប៉ុន្តែថែមទាំងទៅនឹងអ្វីដែលវាអាចក្លាយជាផងដែរ ។ ពិតណាស់ ព្រះយេស៊ូវគ្រីស្ទអាចរំដោះយើងចេញពីទាសភាព និងអំពើបាប ចេញពីសេចក្តីស្លាប់ និងស្ថាននរក ហើយអាចជួយយើងបំពេញអត្តសញ្ញាណដ៏ទេវភាពរបស់យើង ពេលយើងកាន់តែក្លាយជាអ្វីដែលលើសពីយើងធ្លាប់គិត តាមរយៈសេចក្តីជំនឿ និងការប្រែចិត្ត ។
សេចក្តីសន្យានៃការរំដោះ
ដោយសារតែព្រះយេស៊ូវ នោះសេចក្ដីស្លាប់មិនមែនជាទីបញ្ចប់ឡើយ ។ នៅឯពិធីបុណ្យអ៊ីស្ទើរយើងប្រកាស ៖
តាមរយៈព្រះបញ្ញត្ដិ និងអំណាចពីព្រះវរបិតារបស់ទ្រង់ នោះព្រះយេស៊ូវគ្រីស្ទបានដាក់ជីវិតរបស់ទ្រង់ចុះ ហើយយកមកវិញម្តងទៀតបាន ( សូមមើល យ៉ូហាន ១០:១៧ ) ។ ខណៈពេលដែលព្រះសពរបស់ទ្រង់នៅក្នុងផ្នូរ ព្រះយេស៊ូវគ្រីស្ទបានទៅបម្រើ និងរៀបចំនៅក្នុងពិភពវិញ្ញាណ ដោយប្រកាសថា « សេចក្ដីប្រោសលោះរបស់គេឲ្យរួចពីចំណងទាំងឡាយនៃសេចក្ដីស្លាប់ » ( គោលលទ្ធិ និងសេចក្ដីសញ្ញា ១៣៨:១៦ ) ។
នៅព្រឹកថ្ងៃទីបី ទ្រង់បានមានព្រះជន្មឡើងវិញពីផ្នូរ ។ ទ្រង់បានមានព្រះបន្ទូលទៅកាន់ ម៉ារ៉ា ។ ទ្រង់បានបង្ហាញព្រះកាយទៅដល់សិស្សពីរនាក់នៅលើផ្លូវទៅកាន់ ភូមិអេម៉ោស សាវករបស់ទ្រង់ និងអ្នកដទៃទៀត ។ ( សូមមើល ម៉ាថាយ ២៨; ម៉ាកុស ១៦; លូកា ២៤; យ៉ូហាន ២០ ) ។
នៅក្នុងទីបន្ទាល់ ទ្រង់បានអញ្ជើញសិស្សរបស់ទ្រង់ឲ្យបោះសំណាញ់របស់ពួកគេទៅផ្នែកម្ខាងទៀតនៃទូក លើកនេះបើទោះបីជាសំណាញ់ពោរពេញទៅដោយត្រីម្តងទៀត ក៏សំណាញ់មិនបានរហែកដែរ ( សូមមើល យ៉ូហាន ២១:៦–១១; លូកា ៥:៣–៧ ) ។ ទ្រង់បានផ្តល់អាហារដល់សិស្សទាំងឡាយ និងបានអង្វរជាមួយពេត្រុសបីដងឲ្យផ្តល់អាហារដល់ចៀម និងកូនចៀមរបស់ទ្រង់ ( សូមមើល យ៉ូហាន ២១:១២–១៧ ) ។ ទ្រង់បានឡើងទៅស្ថានសួគ៌ ប្រកាសថាសិស្សរបស់ទ្រង់ពេលនោះ និងយើងទាំងអស់គ្នានៅពេលឥឡូវនេះគួរតែចែកចាយដំណឹងដ៏រុងរឿងរបស់បុណ្យអ៊ីស្ទើរ និងដំណឹងល្អរបស់ទ្រង់ជាមួយគ្រប់ជាតិសាសន៍ និងប្រជាជន ( សូមមើល ម៉ាថាយ ២៨:១៩–២០; ម៉ាកុស ១៦:១៥ ) ។
ព្រះយេស៊ូវគ្រីស្ទគឺជាអ្នកគង្វាលដ៏ល្អរបស់យើង និងជាកូនចៀមរបស់ព្រះ ។ ទ្រង់បានលះបង់ជីវិត និងប្រគល់ជីវិតរបស់ទ្រង់សម្រាប់ចៀមរបស់ទ្រង់ ។ នៅក្នុងសួនច្បារ និងនៅលើឈើឆ្កាង ទ្រង់បានបង់ថ្លៃដែលមិនអាចទ្រាំបាន និងធួនសម្រាប់យើង ។ នៅក្នុងពេលវេលា និងភាពអស់កល្បជានិច្ច ទ្រង់បានបង្ហាញយើងតាមរយៈគំរូអំពីរបៀបដែល « សេចក្តីស្លាប់បើកផ្លូវទៅកាន់ភាពអស់កល្បជានិច្ច » ។
តាមរយៈព្រះចេស្តានៃដង្វាយធួន និងការរស់ឡើងវិញរបស់ព្រះគ្រីស្ទ រាងកាយ និងវិញ្ញាណរបស់យើងនឹងត្រូវបានផ្គុំគ្នានៅក្នុងរាងកាយដែលរស់ឡើងវិញ ។ យើងនឹងមានភាពរុងរឿង នឹងបានស្តារឡើងវិញនៅក្នុងទឹកមុខ និងទម្រង់នៃរាងកាយ អវយវៈសព្វសារពើរទាំងអស់ ។ សូម្បីតែសក់នៅលើក្បាលរបស់យើងក៏នឹងត្រូវបានស្តារឡើងវិញផងដែរ ។ យើងនឹងមានសេរីភាពពីភាពរមែងស្លាប់ ជំងឺ គ្រោះថ្នាក់នៃរាងកាយ និងភាពអសមត្ថភាពខាងផ្លូវចិត្ត ។ ដង្វាយធួនរបស់ព្រះគ្រីស្ទអាចប្រទានពរដល់យើងឲ្យយកឈ្នះលើការបែកខ្ញែកខាងវិញ្ញាណ និងសេចក្ដីស្លាប់ខាងវិញ្ញាណគ្រប់ប្រភេទ ។ នៅក្នុងលក្ខខណ្ឌនៃការប្រែចិត្ត នោះយើងត្រូវបានដោះលែងពីរាល់អំពើបាប និងទុក្ខព្រួយ ហើយបានបើកទៅរកភាពពេញលេញដ៏អស់កល្បនៃសេចក្តីស្រឡាញ់ និងសេចក្តីអំណរ ។ ដោយមានភាពបរិសុទ្ធ ស្អាត សេរីភាព នោះយើងអាចត្រឡប់ទៅវិញនៅក្នុងទំនាក់ទំនងគ្រួសារដ៏ជាទីស្រឡាញ់បំផុតរបស់យើងក្នុងវត្តមានសេឡេស្ទាលដ៏រុងរឿងរបស់ព្រះជាព្រះបិតារបស់យើង និងព្រះយេស៊ូវគ្រីស្ទ ។
យើងនឹងជួបមនុស្សជាទីស្រឡាញ់របស់យើងម្តងទៀត ។ នៅពេលដែលយើងបានជួបជុំជាមួយមនុស្សជាទីស្រឡាញ់ នោះយើងនឹងមើលគ្នាទៅវិញទៅមកដោយទស្សនវិស័យដ៏អស់កល្ប—ដោយក្ដីស្រឡាញ់ ការយោគយល់ និងសេចក្ដីសប្បុរសកាន់តែខ្លាំង ។ ដង្វាយធួនរបស់ព្រះយេស៊ូវគ្រីស្ទអាចជួយយើងចងចាំអ្វីដែលសំខាន់ និងបំភ្លេចអ្វីដែលមិនសំខាន់ ។ ការមើលឃើញព្រះអង្គសង្គ្រោះរបស់យើង និងទំនាក់ទំនងជាមួយនឹងសេចក្តីជំនឿ និងការដឹងគុណកាន់តែធំ នាំមកនូវភាពសុខសាន្ត ជួយសម្រាលបន្ទុក ផ្សះផ្សាដួងចិត្ត និងបង្រួបបង្រួមគ្រួសារក្នុងពេលវេលា និងភាពអស់កល្បជានិច្ច ។
សេចក្តីសង្ឃឹមនៃភាពសម្បូរបែប និងសេចក្តីអំណរ
បុណ្យអ៊ីស្ទើរនៅក្នុងព្រះយេស៊ូវគ្រីស្ទ ពរជ័យរួមមានការបើកបង្អួចស្ថានសួគ៌ ផលផ្លែទំពាំងបាយជូរកើនគុណទ្វេដង និងដីក្លាយជាដែនដីសប្បាយណាស់ ។ បុណ្យអ៊ីស្ទើរក្នុងព្រះយេស៊ូវគ្រីស្ទរួមមានទាំងការលួងលោម និងការថែទាំស្ត្រីមេម៉ាយ និងកុមារកំព្រា អ្នកដែលឃ្លាន និងគ្មានជំនួយ អ្នកដែលភ័យខ្លាច ដែលគេរំលោភបំពាន ឬត្រូវបានជួបទុក្ខដោយមិនដឹងអ្វីសោះ ។ ដោយនឹកឃើញដល់បុគ្គលម្នាក់ៗ ព្រះយេស៊ូវគ្រីស្ទអញ្ជើញយើងឲ្យឃើញ ហើយបម្រើដោយក្ដីស្រឡាញ់ និងក្ដីមេត្តាដូចទ្រង់បានធ្វើ ។
នៅក្នុងរឿងល្អៗទាំងអស់ ព្រះយេស៊ូវគ្រីស្ទស្តារឡើងវិញនូវភាពពេញបរិបូរ ( សូមមើល យ៉ូហាន ១០:១០; អាលម៉ា ៤០:២០–២៤ ) ។ ទ្រង់សន្យាថា « ផែនដីបានពោរពេញ ហើយមានបរិបូរគ្រប់គ្រាន់ និងនៅសល់ទៀតផង » ( គោលលទ្ធិ និងសេចក្ដីសញ្ញា ១០៤:១៧ ) ។ ការស្តារឡើងវិញនៃអ្វីៗទាំងអស់របស់ទ្រង់រួមមានភាពពេញលេញនៃដំណឹងល្អរបស់ទ្រង់ អំណាច និងសិទ្ធិអំណាចបព្វជិតភាពរបស់ទ្រង់ ពិធីបរិសុទ្ធ និងសេចក្ដីសញ្ញាដ៏ពិសិដ្ឋដែលមាននៅក្នុងសាសនាចក្ររបស់ទ្រង់ ដែលបានហៅតាមព្រះនាមរបស់ទ្រង់ សូម្បីតែសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
បុណ្យអ៊ីស្ទើរនៅក្នុងព្រះយេស៊ូវគ្រីស្ទរួមបញ្ចូលទាំងព្រះដំណាក់ដ៏បរិសុទ្ធជាច្រើនទៀតរបស់ព្រះអម្ចាស់ ដែលមាននៅជិតៗបុត្រាបុត្រីរបស់ព្រះនៅកន្លែងជាច្រើន ដែលនាំចូលមកក្នុងបេះដូងរបស់យើងនូវគោលលទ្ធិនៃ « ព្រះអង្គសង្គ្រោះនៅលើភ្នំស៊ីយ៉ូន » ( សូមមើល អូបាឌា ១:២១ ) ។ ព្រះអម្ចាស់បានផ្តល់នូវវិធីដ៏បរិសុទ្ធ និងមិនអាត្មានិយមសម្រាប់យើងដើម្បីផ្តល់ជូននៅលើផែនដីនូវអ្វីដែលមនុស្សជាទីស្រឡាញ់ដែលបានចាកចេញទៅត្រូវការ និងប្រាថ្នាក្នុងភាពអស់កល្បជានិច្ច ដែលពួកគេមិនអាចទទួលបានសម្រាប់ខ្លួនពួកគេផ្ទាល់ ។
នេះគឺជាសេចក្តីសង្ឃឹម ការសន្យា និងជាទីបន្ទាល់របស់ខ្ញុំ ។ ខ្ញុំសូមធ្វើជាសាក្សីថាព្រះជាព្រះវរបិតារបស់យើង ព្រះអង្គសង្គ្រោះ និងព្រះប្រោសលោះរបស់យើង គឺព្រះយេស៊ូវគ្រីស្ទ និងព្រះវិញ្ញាណបរិសុទ្ធគឺពិត ។ នៅក្នុងបុណ្យអ៊ីស្ទើរ និងជារៀងរាល់ថ្ងៃ សូមឲ្យយើងរកឃើញសេចក្តីសង្ឃឹម និងការសន្យាដ៏អស់កល្បជានិច្ចនៅក្នុងផែនការនៃសុភមង្គលដ៏ទេវភាពរបស់ព្រះ ជាមួយនឹងផ្លូវនៃសេចក្តីសញ្ញានៃការផ្លាស់ប្តូរដ៏ទេវភាពចេញមកពីជីវិតរមែងស្លាប់ទៅជាអមតភាព និងជីវិតអស់កល្បជានិច្ច ។ ជារៀងរាល់ថ្ងៃសូមឲ្យភាពប្រាកដប្រជានៃដង្វាយធួនរបស់ព្រះយេស៊ូវគ្រីស្ទជួយសម្រាលបន្ទុករបស់យើង ជួយយើងលួងលោមអ្នកដទៃដែលមានទុក្ខ និងដោះលែងព្រលឹងរបស់យើងដើម្បីទទួលបានសេចក្តីអំណរពេញលេញរបស់ទ្រង់ ។
តាមរយៈសេចក្តីសង្ឃឹម និងការសន្យានៃបុណ្យអ៊ីស្ទើរ ព្រះយេស៊ូវគ្រីស្ទបំពេញបំណងប្រាថ្នានៃដួងចិត្តរបស់យើង និងឆ្លើយសំណួរនៃព្រលឹងរបស់យើង ។
© ឆ្នាំ២០២៥ ដោយ Intellectual Reserve, Inc. All rights reserved ។ បោះពុម្ពនៅ ស.រ.អា. ។ ការអនុម័តជាភាសាអង់គ្លេស ៖ ៦/១៩ ។ ការអនុម័តឲ្យបកប្រែ ៖ ៦/១៩ ។ ការបកប្រែនៃ Monthly Liahona Message, April 2025. Cambodian. 19612 258