Jezikri: Espwa ak Pwomès Pak la

Èldè Gerrit W. Gong

Nan Kolèj Douz Apot yo

Atravè espwa ak pwomès Pak la, Jezikri satisfè atant nan kè nou yo epi reponn kesyon nan nanm nou yo.

Tanpri kreye yon moman trankil ak yon plas kòm sanktyè espirityèl lè w ap li mesaj sa a.

Twò souvan, mond nou an gen bri, li ankonbre avèk pretèks ak ògèy. Men lè nou atantif, onèt, ak vilnerab avèk tèt nou e avèk Bondye, espwa ak pwomès Pak nan Jezikri a vin reyèl. Nan moman sa yo, nou sipliye:

“Kouman mwen ka wè manm fanmi mwen, zanmi mwen, byeneme m nan ankò?”

“Nan yon mond relasyon souvan-pwovizwa kote ‘moun chwazi tèt pa yo’, ki kote m ap jwenn ak santi lapè, espwa, ak kominyon avèk Bondye (gade Doktrin ak Alyans 107:19), avèk moun ki antoure m yo, epi ak tèt mwen?”

“Èske gen yon moun mwen ka renmen—e kimoun ki pral reyèlman renmen m? Èske relasyon alyans yo ka grandi ak dire, pa tankou yon istwa envante, men avèk koneksyon pi solid pase kòd lanmò, vrè kè kontan epi pou tout tan?”

“Kote ki gen anpil doulè, soufrans, ak enjistis, kijan mwen ka kontribye pou lapè, amoni, ak konpreyansyon nan Jezikri ak nan levanjil ak Legliz retabli Li a?”

Pandan sezon Pak sa a, mwen pataje temwayaj mwen konsènan Jezikri ak pwomès ak espwa Li.

Pwomès ak Rezondèt Apatenans nan Alyans la

Bondye, Papa Etènèl nou nan Syèl la; Jezikri, Pitit Gason Byeneme L la; ak Sentespri a pèsonèlman pwòch nou. Limyè enfini ak etènèl yo, konpasyon, ak lanmou redanmtè yo antrelase nan objektif kreyasyon an ak fabrik egzistans nou (gade Alma 30:44; Moyiz 6:62–63).

Nan Konsèy premòtèl la nan Syèl la, “zetwal maten yo te chante ansanm, epi tout pitit gason yo [ak pitit fi] Bondye yo te rele ak kè kontan” (Jòb 38:7). Nou te chwazi chwa. Kounyea, nou mache selon lafwa. Atravè pwòp eksperyans pa nou, nou dekouvri bote, klète, lajwa, ak rezondèt Bondye te pwomèt nan mitan ensètitid, dekourajman ak difikilte yo nan mòtalite a.

Nou pa t destine pou nou mache poukont nou nan ensètitid egzistans lan. Nou ka kominike avèk syèl la, bati lafwa ak apatenans nan fanmi ak nan fwaye ak kominote Sen yo, epi vin vèsyon tèt nou ki pi vrè, pi lib, pi otantik, pi jwaye a atravè obeyisans volontè ak nan lajwa pou kòmandman Bondye yo. Ekspyasyon—eks-pya-syon—nan epi atravè Jezikri pote apatenans nan alyans sa a.

Espwa nan Lavi ak nan Misyon Jezikri

Chak jou, espwa ak pwomès Pak la enkli benediksyon ak ansèyman Jezikri te pataje pandan ministè mòtèl pafè Li a. Pre-òdone nan kòmansman an, Jezikri te fèt kòm Sèl Pitit Gason Literal Bondye (gade Jakòb 4:5; Alma 12:33–34; Moyiz 5:7, 9). Li te grandi nan sajès ak wotè, epi Li te aji nan fason ki te fè ni Bondye ni lèzòm plezi (gade Lik 2:52). Nan chèche sèlman pou L fè volonte Papa Li, Jezikri te padone peche, geri enfimite, leve moun ki mouri, epi rekonfòte moun ki malad ak solitè.

Yon fwa, apre 40 jou ap jene, Li te temwaye: “Lespri Bondye a sou mwen, paske Li te chwazi m pou m preche levanjil la bay pòv yo; li te voye m pou m geri tout kè ki brize, pou m fè tout prizonye konnen yo delivre, epi pou m fè tout avèg yo konnen yo kapab wè ankò, pou m delivre moun y ap maltrete yo” (Lik 4:18; gade tou Ezayi 61:1).

Sa a se chak nan nou.

Nan Dènye Soupe a, Jezikri te lave pye disip Li yo (gade Jan 13:4–8). Nan Ansyen ak Nouvo Mond yo, “dlo vivan” an ak “pen lavi a”Limenm te etabli sentsèn nan. Nan òdonans sentsèn nan, nou rele Papa a epi nou fè alyans pou n pran non Jezikri sou tèt nou, toujou sonje Li, epi respekte kòmandman Li yo, pou nou ka toujou gen Lespri Li avèk nou (gade Lik 22:19–20; 3 Nefi 18:7, 10–11).

Nan Jaden Jetsemani a, Jezi te soufri plis pase lòm ka soufri pou rachte ak ekspye pou nou. San te soti nan chak twou swè li yo. Li te soufri doulè sa yo pou tout moun, pou nou pa soufri si nou ta repanti (gade Doktrin ak Alyans 18:11; 19:16).

Anba trayizon ak fo akizasyon, Jezikri te sibi mokri ak move tretman, epi yo te mete yon kouwòn pikan sou tèt enb Li (gade Matye 27:26, 29; Mak 15:15, 17, 20, 31; Lik 22:63; Jan 19:1–2). “Se akòz mechanste nou kifè yo te kraze L anba kou … avèk tout kou Li te resevwa yo, Li ban nou gerizon” (Ezayi 53:5). Yo te “leve Li sou kwa a” pou rale nou vin jwenn Li (gade 3 Nefi 27:14–15). Men, menm sou kwa a, Jezikri te padone (gade Lik 23:34). Li te mande Jan pou l pran swen manman Li (gade Jan 19:26–27). Li te santi L abandone (gade Matye 27:46; Mak 15:34). Pou ekriti a te ka akonpli, Li te di Li swaf (gade Jan 19:28). Lè tout bagay te akonpli, Li menm poukont Li “te remèt lespri Li” (Lik 23:46; gade tou Jan 10:17–18).

Jezikri konnen kijan pou pote nou sekou nan maladi, enfimite, solitid, izolasyon, ak difikilte nou yo (gade Alma 7:12). Souvan kalite afliksyon sa yo vini kòm konsekans chwa lòt moun. Li konnen tou kijan pou L rejwi avèk nou nan rejwisans ak gratitid nou, kijan pou L kriye avèk nou lè lajwa nou konplè. Avèk tandrès, Li rele nou nan non Li, ak vwa Li, vin antre nan twoupo Li a. Li rele chak moun toupatou. Li envite nou pou n gade ak konprann lavi mòtèl la atravè yon pèspektiv etènèl. Pandan n ap mache dwat epi kenbe alyans nou yo, Li pwomèt ke tout bagay ka travay ansanm pou byen nou (gade Doktrin ak Alyans 90:24; Women 8:28).

Nan tan ak fason pa Li, retablisman vini—non sèlman nan jan bagay yo te ye, men tou pou sa yo ka vin tounen. Vrèman, Jezikri kapab libere nou anba esklavaj ak peche, anba lanmò ak lanfè, epi Li ka ede nou akonpli idantite divin nou pandan n ap vin pi plis pase sa nou te janm imajine, atravè lafwa ak repantans.

Pwomès Delivrans la

Gras a Jezikri, lanmò se pa lafen. Pandan Pak la nou deklare:

Lanmò konkeri; lòm libere.

Kris la pote laviktwa.

Selon kòmandman ak pouvwa nan men Papa Li, Jezi te kapab bay lavi Li epi pran li ankò (gade Jan 10:17). Pandan kò Li te kouche nan tonm nan, Jezikri te sèvi ak òganize nan mond dèzespri a, pou deklare “redanmsyon yo anba grif lanmò” (Doktrin ak Alyans 138:16).

Nan maten twazyèm jou a, Li te leve soti nan tonm nan. Li te pale avèk Mari. Li te parèt kote de disip yo sou wout Emayis la, Apot Li yo, ak lòt moun. (Gade Matye 28; Mak 16; Lik 24; Jan 20.)

Nan temwayaj chiasmatik, Li te envite disip Li yo pou yo jete filè yo sou lòt bò bato a; fwa sa a, malgre yo te ranpli ak pwason, filè yo pa t dechire (gade Jan 21:6–11; Lik 5:3–7). Li te nouri disip yo epi Li te sipliye Pyè twa fwa pou l nouri twoupo ak ti mouton Li yo (gade Jan 21:12–17). Li te monte nan syèl la, Li deklare ke disip Li yo lèsa a ak nou tout kounyea ta dwe pataje nouvèl glorye Pak la ak levanjil Li a avèk tout nasyon, fanmi, ak pèp (gade Matye 28:19–20; Mak 16:15).

Jezikri se Bon Bèje nou ak Ti Mouton Bondye a. Li te bay lavi Li akoz, epi bay lavi Li pou, mouton Li yo. Nan jaden an ak sou kwa a, Li te sipòte bagay ki ensipòtab epi ekspye pou nou. Nan letan ak letènite, Li montre nou pa legzanp kijan jan chante a di “sa mort a ouvert le chemin jusqu à l éternité.”

Atravè pouvwa Ekspyasyon ak Rezirèksyon Kris la, kò nou ak lespri nou pral reyini nan yon rezirèksyon fizik. Nou pral vin gloriye, retabli nan aparans ak fòm fizik, manm pou manm. Menm cheve nan tèt nou pral retabli. Nou pral libere anba afliksyon mòtalite yo, maladi, aksidan fizik, ak enkapasite mantal. Ekspyasyon Kris la kapab beni nou pou nou simonte tout kalite separasyon espirityèl ak lanmò espirityèl. Sou kondisyon repantans, nou libere anba tout peche ak lapenn epi nou jwenn wout pou yon plenitid etènèl lanmou ak lajwa. Sen, pwòp, lib, nou ka retounen nan relasyon familyal nou pi renmen yo nan prezans selès, glorye Bondye Papa nou ak Jezikri.

Nou pral wè moun nou renmen yo ankò. Lè nou reyini avèk moun nou renmen yo, nou youn pral wè lòt avèk yon pèspektiv etènèl—avèk pi gwo lanmou, konpreyansyon, ak jantiyès. Ekspyasyon Jezikri a kapab ede nou sonje sa ki enpòtan epi bliye sa ki pa enpòtan. Wè Sovè nou ak relasyon nou avèk pi gwo lafwa ak rekonesans pote lapè, sa soulaje fado, rekonsilye kè, e ini fanmi yo nan letan ak letènite.

Espwa Abondans ak Lajwa

Pak nan Jezikri enkli ke fenèt syèl yo louvri, fwi pye rezen an miltipliye, epi peyi yo vin pi bèl toujou. Pak nan Jezikri enkli rekonfòte ak pran swen vèv yo ak òfelen yo, moun ki grangou ak dekouraje yo, moun ki pè, ki abize, oswa ke yo kenbe nan move sitiyasyon malgre inosans yo. Konsyan de yo chak, Jezikri envite nou pou nou wè ak sèvi avèk lanmou ak konpasyon, jan Li fè.

Nan tout bon bagay, Jezikri retabli abondaman (gade Jan 10:10; Alma 40:20–24). Li pwomèt ke “tè a ranpli, epi gen ase pou pataje” (Doktrin ak Alyans 104:17). Retablisman tout bagay Li a enkli plenitid levanjil Li a, otorite ak pouvwa prètriz Li a, ak òdonans ak alyans sakre yo nou jwenn nan Legliz Li a, ki pote non Li, ki se Legliz Jezikri pou Sen Dènye Jou yo.

Pak nan Jezikri enkli plis kay sen Senyè a k ap vini pi pre pitit Bondye yo nan anpil kote, pou pote nan kè nou doktrin “sovè sou mòn Siyon” an (gade Abdias 1:21). Senyè a bay yon fason sanktifye, san egoyis pou ke sou tè a, nou ofri sa moun ki mouri nou yo bezwen ak dezire nan letènite ke yo pa ka jwenn pou tèt pa yo.

Sa se espwa, pwomès ak temwayaj mwen. Mwen temwaye de Bondye Papa nou; Sovè nou ak Redanmtè nou an, Jezikri; ak Sentespri a. Pandan Pak la epi chak jou, se pou nou jwenn espwa ak pwomès etènèl nan plan bonè diven Bondye a, avèk chemen alyans transfòmasyon divin li a pou soti nan mòtalite a antre nan imòtalite ak lavi etènèl la. Chak jou se pou sètitid Ekspyasyon Jezikri a soulaje fado nou yo, ede nou rekonfòte lòt moun ki nan lapenn yo, epi libere nanm nou pou resevwa lajwa konplè Li.

Atravè espwa ak pwomès Pak la, Jezikri satisfè atant nan kè nou yo epi Li reponn kesyon nan nanm nou yo.

© 2025 pa Intellectual Reserve, Inc. All rights reserved. Enprime nan Etazini Damerik. Apwobasyon anglè: 6/19. Apwobasyon tradiksyon: 6/19. Tradiksyon Monthly Liahona Message, April 2025. Haitian. 19612 036