Iesu Kristo: Te Kaantaninga ao te Berita n te Itita

Te Atua, Tamara are i Karawa ae Akea Tokina; Iesu Kristo, Ana Rikitemanna; ao Te Tamnei ae Raoiroi a uakaan ma ngaira. Otaia, aia nanoanga, ao aia tangira n kamaiu ae akea tokiia a waeaki ibuakon te kaantaninga ibukin te karikibwai ao rabwatan rikira (taraa Aramwa 30:44; Mote 6:62–63).

N te Boowi i Karawa n te maiu imwain te maiu n rabwata, “ngke a bootaki n anene ni kimareirei taian itoi ni ngaina ao a bane [Natin] te Atua n takaka ni kakatonga” (Iobi 38:7). Ti rinea te inaomata n rinerine. Ngkai tia nakonako inanon te onimaki. Man oin ara taneiai, ti kunea bwa e tamaroa ana berita te Atua, te mataata, kimwareirei, ao te kaantaninga ribuakon aki ataakin kanoan te maiu ae mamate, te bwarannano, ao kaangaanga.

Ti aki katauaki bwa tina nakonako n ti ngaira inanon te maiu n aki ataibwai. Ti kona n reitiira ma karawa, karikirakea te onimaki ao n namakinna ae ngaira kain te utu ao te mwenga ao aia komiunite Aika Itiaki, ao n riki bwa ae kakaonimaki, inaomata, ao te kabanea n kokoaua, kimwareirei n aomata rinanon te kukurei ma te ongeaba nakon ana tua te Atua. Mwakuri ni Kamaiu—mwakuri–ni–kamaiu—inanon ao rinanon Iesu Kristo e uota te namakin bwa ngaira kain te berita ae tabu.

Te Kaantaninga n Maiun ao ana Mition Iesu Kristo

Ni katoa bong, te kaantaninga ao te berita n te Itita e airi ma kakabwaia ao reirei are Iesu Kristo e tibwauaia inanon ana mwakuri n ibuobuoki ae kororaoi iaon te aba. E a kaman katabuaki man te moan, Iesu Kristo e bungiaki bwa Ana Rikitemanna te Atua (taraa Iakobwa 4:5; Aramwa 12:33-34; Mote 5: 7, 9). E riki rake Iesu n rabakau ma n ikawai, ma n akoaki iroun te Atua ma aomata (taraa Ruka 2:52). Ukoran karaoan nanon Tamana, e kabwarai bure Iesu, kamaoi aoraki, kautiia maate, ao n karaunanoia ake a aoraki man maroaa.

N te taina, imwiin ana aki mamatam inanon 40 te bong, E taku: “E mena Tamnein te Uea iaou, bukina bwa e a tia ni kabirai bwa N na tataekina te euangkerio nakoia akana aki kaubwai, e kanakomaiai ni kamaiuia ake a uruaki nanoia bwa n na tuangiia taenikai tekainaomataaki, ao akana a mataki te manga nooraba, ao bwa a na kainaomataia akana a uruaki nanoia” (Ruka 4:18; taraa naba Itaia 61:1).

Anne ngaira n tatabemaniira.

N te Kabanea n Katairiki, Iesu Kristo e teboki waeia Ana reirei (taraa Ioane 13;4-8). N te Aonaaba ae Boou ao ae e a Mane, te “ran ni kamaiu” ao “kariki ni kamaiu” bon Ngaia ae karaoa te toa. N te otenati ae tabu ae te toa, ti kakoaua nakon te Tama ao ti berita bwa ti na katokaa iaora aran Iesu Kristo, n aki toki n Ururingnga, ma n kawakin Ana tua, bwa e aonga n memena Tamneina iroura (taraa Ruka 22:19-20; 3 Nibwaai 18:7, 10-11).

Inanon te Onaroka are Ketetemwane, Iesu e rinanon te maraki ae riaon riki bwaai ake e kona n rinanoi te aomata ibukin kamaiuakira ao kabwaraan ara bure. E waanako te rara man bwangabwangan rabwatana. E rinanoni karawaawataaki aikai ibukiia aomata ni kabane, bwa ti aonga n aki karawaawataaki ngkana ti rairi nanora (taraa Reirei ao Berita aika Tabu 18:11; 19:16).

Kamwaneaki man kairua bukinana, Iesu Kristo e bwainikirinaki man kataereaki, ao n baunaki n te akanta Atuna ae mangori (taraa Mataio 27:26, 29; Mareko 15:15, 17, 20, 31; Ruka 22:63; Ioane 19:1-2). “E kamanatuaki i bukin ara bure … ao ti kamaiuaki n Oreana” (Itaia 53:5). E “tabekaki rake iaon te kaibangaki” n burimaunia aomata Nakoina (taraa 3 Nibwaai 27: 14–15). Ao e ngae n anne, ngke e a tine n te kaibangaki, e kabwarai buure Iesu Kristo (taraa Ruka 23;34). E tuanga Ioane bwa e na tararua Tinana (taraa Ioane 19:26-27). E namakina te kitanaki (taraa Mataio 27:46; Mareko 15:34). Bwa e na kakoroaki nanon koroboki aika tabu, E taku E taka (taraa Ioane 19:28). Ngke a bane n koro nanon bwaai, E “kaki tamneina” (Ruka 23:46; taraa naba Ioane 10:–17-18).

Iesu Kristo e ataa aron buokan aorakira, mamaarara, maroara, katinanikuara, ao rawawatara (taraa Aramwa 7:12). Aekaki n rawawata angin te tai bon mwiin aia rinerine aomata. E ataa naba kakukureiara inanon kukureira ma kakaitaura, arona n tang ma ngaira ngkana ti onrake n te kimwareirei. Ma te amarau, E weteira n Arana, ni Bwanaana, nakon Ana nanai. E wewete nakoia aomata n taabo nako. E kaoira bwa ti na nooria man oota n te maiu ae mamate rinanon te taratara ae akea tokina. Ngkana ti nakonako i nanon te raoiroi man kawakin ara berita aika tabu, E berita bwa bwaai ni kabane a na kaai ni mwakuri ibukin ae raoiroi ibukira (taraa Reirei ao Berita aika Tabu 90:24; I-Rom 8:28).

N Ana tai ma ana kawai, e roko kaokan bwaai—tiaki n ti aroia ngkoa ma aroia ae ana rikirake nako iai. Ni koauana, Iesu Kristo e kona n kainaomataira man te tautoronaki ao te bure, man te mate ao moone, ao e kona n buokira n kakoroi nanon kinaaki mai ieta ngkana ti rikirake riaon are ti kantaningaia, rinanon te onimaki ma te rairannano.

Bwa ibukin Iesu Kristo, te mate tiaki te toki. N te Itita ti taekina:

Man te tua ao man mwaakan Tamana, Iesu e kona n anga Maiuna ao ni manga anaia (taraa Ioane 10:17). Ngke e wene Rabwatana n te ruanimate, Iesu Kristo e mwakuri n ibuobuoki man baronga te aba n tamnei, n katanoata “kaboakia man ana kabaebae te mate” (Reirei ao Berita aika Tabu 138:16).

N moaningabongin te kateniua ni bong, E teirake man te ruanimate. E taetae nakon Maria. E kaoti nakoia ana reirei uoman iaon kawaia nako Emwauti, Ana Abotoro, ao tabeman riki. (Taraa Mataio 28; Mareko 16; Ruka 24; Ioane 20.)

N te kakoaua ae okioki, E kaoia Ana reirei bwa ana kabwaka aia karaun n iteran te booti are teuana; n te tai aio, e manga onrake n te ika, ma e aki tabwena aia karaun (taraa Ioane 21:6–11; Ruka 5:3–7). E kamwarakeia ana reirei ao e butiia Betero bwa ena kamwarakeia Ana nanai ao tiibu te teei (taraa Ioane 21:12–17). E waerake nako karawa, n katanoata bwa Ana reirei n te tai arei ao ai ngaira ni kabane ngkai ti riai n tibwaua rongorongon te Itita ae mimitong ao Ana euangkerio nakon aaba, reeti, ao aomata nako (taraa Mataio 28: 19–20; Mareko 16:15).

Iesu Kristo bon ara Tia Kawakin Tiibu ae Tamaroa ao ana Tibutetei te Atua. E tia n anga Maiuna, ao e anga Maiuna, nakoia Ana tiibu. N te onaroka ao iaon te kaibangaki, E uota te uota ae rawawata ao e mate ibukin ara bure. Inanon te tai ma ae akea tokina, E kaota nakoira rinanon ana katooto aron “te mate ni kauka te kawai nakon te maiu ae akea tokina.”

Man mwaakan ana Mwakuri ni Kamaiu Kristo ao Mangautina, rabwatara ao tanmeira a na manga botaki n ae kororaoi. Ti na mimitong, kaokaki aron taraan moara ma rabwata, rii nakon te rii. Ira atuuna naba ana bane n oki. Ti na kainaomataki man te kara, aoraki, te ikoaki, ao aorakin te iango. Ana Mwakuri ni Kamaiu Kristo e kona n kakabwaiaira bwa tina tokanikai iaon te mate n rabwata ao te mate n tamnei. Man te rairannano, ti kainaomataaki man te bure ao te rawawata ao e kaukaki nakoira te tangira ma te kimwareirei ae bwanin n akea tokina. Kororaoi, itiaki, inaomata, ti kona n okiri ara utu aika tangiraki iroura inanon te mimitong, imatan te Atua Tamara ma Iesu Kristo n te Tiretio.

Ti kona n manga noria aika tangiraki iroura. Ngkana ti kaitibooaki ma ake ti tangiria, ti kona n manga noriira ma te taratara ae akea tokina—ma te tangira, te atatai, ao te akoi ae korakora. Ana Mwakuri ni Kamaiu Iesu Kristo e kona n buokira n kauringiira bwa tera ae kakawaki riki ao n mwaninga ae e aki kakawaki. Taraakin ara Tia Kamaiu ao ara reitaki ma te onimaki ae korakora ao te kakaitau e na uota te rau, kabebetei rawawatara, kaioki nanora, kabaei utu n te maiu aio ao ae akea tokina.

Te Kaantaninga n ae Bati ao te Kimwareirei

Te Itita iroun Iesu Kristo e airi ma ukin wintoon karawa, uaan te kai ni kurebe a taboro, ao a kakukurei taabo. Te Itita iroun Iesu Kristo e airi ma karauan nanoia ma tararuakiia aika tia n mate buuia ao aia karo, aika baki man aki konabwai, aika a maaku, bwainikirinaki, ke n reke n te kangaanga n tiaki oin nanoia. N tabeaianga ibukin temanna ma temanna, Iesu Kristo e kaoira bwa ti na noria man ibuobuoki ma te tangira ao te nanoanga, n ai Arona.

N bwaai ni kabane aika tamaroa, Iesu e kaoka ae bati riki (taraa Ioane 10:10; Aramwa 40:20–24). E berita nakoira “bwa e onrake te aonaba, ao e tau mwaitina ao e nikirana” (Reirei ao Berita aika Tabu 104:17). N ana kaokibwai iaon bwaai ni kabane ao e airi ma bwaninin Ana euangkerio, ana kariaia ma mwaakan Ana nakoanibonga, ao otenati aika tabu ma berita aika tabu aika kona n reke n Ana Ekaretia, ae aranaki n Arana, ae Ana Ekaretia Iesu Kristo ibukiia Aika Itiaki ni Boong aika Kakaitira.

Te Itita iroun Iesu Kristo e airi ma ana auti te Uea aika tabu aika a kaniiaki nakoia natin te Atua n taabo aika bati, n uoti nakon nanora ana reirei ”taan kamaiu iaon Maungan Tion” (taraa Obetaia 1:21). Te Uea e katauraoia n te kawai ae tabu, man aki aonikai nakoira bwa ti na anganiia aika tangiraki iroura ake a tia n kitana te aonaaba aio te bwai are a tangiria man kainnanoia n te maiu ae akea tokina are aki kona n karekea i bon ibukiia.

Ai arona naba ma au kantaninga, berita, ao kakoaua. I kakoaua nakon te Atua ae Tamara, ara Tia Kamaiu ao ara Tia Kabooi Maiura, Iesu Kristo, ao te Tamnei ae Raoiroi. N te Itita ao ni katoa bong, ti a bane n karekea te kaantaninga ae akea tokina ma te berita n ana babaire ni kaukurei te Atua mai ieta, ma kawain te berita ae tabu ma te bitaki ma karawa man te maiu ae mamate nakon te maiu ae aki mamate ao ae akea tokina. N te bong ae koraki ao e kakoauaaki Ana Mwakuri ni Kamaiu Iesu Kristo bwa e kabebetei rawawatara, e buokiira ni uota te raunnano nakoia ake a nanokawaki, ao n kainaomatai tamnei ni karekea bwaninin Kimwareireina.

Rinanon te kaantaninga ao te berita n te Itita, Iesu Kristo e kaonii man kaekai titiraki ake inanora.