Jesus Christ: Easter Enyidado na Anohoba No

Nyankopɔn, hɛn Onnyiewiei Egya a ɔwɔ sor; Jesus Christ, No Dɔba; na Sunsum Krɔnkrɔn no bɛn hɛn ankasa. Hɔn kan, ayamuhyehye, na ɔpon dɔ a ɔmmbɔadze na onnyi ewiei no wɔawen afora abɔdze na hɛn asetsena no botae mu. (hwɛ Alma 30:44; Moses 6:62–63).

Abrabɔ ansaana yɛreba ɔnnkyebo asetsena yi mu Ɔsor Baguabɔ mu no, “adzekyee nworaba bɔɔ mu toow ndwom, na Nyame mba nyinara bɔɔ ose wɔ enyigye ntsi” (Job 38:7). Yɛfaa nsanmuyi. Sesei yɛdze gyedzi nantsew. Ɔnam hɛn sũahu do no, yehu Nyankopɔn ne fɛw, pefeeyɛ, dɛw, na botae ho anohoba wɔ ɔnnkyebo asetsena ne dadwen, abagura, na taferbanyinmbɔmu horow mu.

Ɔnnyɛ hɛn hyɛber dɛ yɛbɛnantsew ankonam mu wɔ abrabɔ a ntseasee anaa kwankyerɛ nnyi mu. Yebotum nye sor edzi nkitaho, epegya gyedzi na fɛkuwbɔ wɔ ebusua mu nye Ahotseweefo fifo na sɔn mu, na yɛabɛyɛ anokwafo, fahodzifo, na dɛwdzifo mapã ɔnam setsie ma Nyankopɔn ne mbrasɛm wɔ pɛ na enyigye mu ara do no. Werdambɔ—ɔay-kor-wɔ—a odua na ɔnam Jesus Christ do na ɔdze ahyɛmu fɛkuwbɔ yi ba.

Jesus Christ N’abrabɔ na Botae ho Enyidado

Da biara, nhyira na nkyerɛkyerɛ a Jesus Christ kyɛɛ wɔ No ɔnnkyebo somdwuma a odzi mu no mu no kã Easter n’enyidado na anohoba ho. Wɔhyehyɛɛ no ahyɛse no, wɔwoo Jesus Christ dɛ Nyankopɔn Ne Ba Kortoo no (hwɛ Jacob 4:5; Alma 12:33–34; Moses 5:7, 9). Onyinii wɔ nyansa nye tsipɛn mu, na Nyankopɔn nye nyimpa hɔ enyimpa mu (hwɛ Luke 2:52). Ɔhwehwɛɛ nko dɛ ɔbɛyɛ N’Egya Ne pɛ no, Jesus Christ dze bɔn kyɛɛ, saa yar, nyaan ewufo, na ɔkyekyee ayarfo na ankonam no hɔn werɛ.

Ber bi, a odzii mbuada nda 40 ekyir no, Ɔgyee dase dɛ: “Ewuradze no Sunsum wɔ mo do, osiandɛ ɔasera me dɛ membɛkã nsɛmpa nkyerɛ ehiafo; Ɔasoma me dɛ membɛsa akoma a ebubu yar, membɛpaa ɔgye mma ndɔmmum, nye adzehu mma enyifurafo, na membɛgye hɔn a woepirapira hɔn” (Luke 4:18; san so hwɛ Isaiah 61:1).

Ɔno yɛ hɛn mu kor biara.

Ewimbir Edzidzi a Odzi Ekyir no, Jesus Christ hohoor N’Asomafo no anan ho (hwɛ John 13:4–8). Wiadze Dadaw na Fofor mu no, “nkwa nsu” na “nkwa bodoo” no Noara na Ɔhyehyɛɛ sacrament no. Sacrament ayɛdze mu no, yɛfrɛ Egya no na yedzi ahyɛmu dɛ yɛbɛfa Jesus Christ ne dzin ato hɛn do, yɛakaa No aber nyina, na yeesie Ne mbrasɛm ama yeenya No Sunsum ma ɔnye hɛn atsena aber nyina (hwɛ Luke 22:19–20; 3 Nephi 18:7, 10–11).

Gethsemane Ture mu no, Jesus hun amandze kyɛn ma nyimpa botum egyina ano dze poon hɛn bɔɔ werdam maa hɛn. Bɔgyaa fii honandua tokur biara mu bae. Ohun amandze maa obiara, ama sɛ yenu hɛnho a, yennhu amandze (hwɛ Nkyerɛkyerɛ na Ahyɛmudzi 18:11; 19:16).

Woyii no mae na wobuaa no atsɛnkyew no, wosii Jesus Christ atwetwe na wɔkaã no mpire, na wɔdze nsoɛ katraka dze hyɛɛ N’ahobrɛadze tsir no do (hwɛ Matthew 27:26, 29; Mark 15:15, 17, 20, 31; Luke 22:63; John 19:1–2). “Woposoow no wɔ hɛn emumuyɛ ntsi … ne mbaa ano na wɔdze asa hɛn yarba” (Isaiah 53:5). “Wɔmaa no do sɛɛn mbeamudua no do wɔ sor” dze atwe hɛn abɛn no (hwɛ 3 Nephi 27:14–15). Naaso, wɔ mbeamudua do no mpo, Jesus Christ dze bɔn kyɛɛ (hwɛ Luke 23:34). Ɔserɛɛ John dɛ ɔnhwɛ Ne nã mma no (hwɛ John 19:26–27). Ɔtsee nkã dɛ wɔapow no (hwɛ Matthew 27:46; Mark 15:34). Ma kyerɛwsɛm no ahyɛ mã no, Ɔsee dɛ nsukɔm dze No (hwɛ John 19:28). Owiee ne nyina no, Nankasa “wui” (Luke 23:46; san so hwɛ John 10:17–18).

Jesus Christ nyim mbrɛ osi bɔboa hɛn wɔ hɛn yarba, mberɛwyɛ, ankonamyɛ, na nkõdzen mu. (hwɛ Alma 7:12). Atseetsee a ɔtsetse dɛm yinom taa ba ɔnam binom hɔn nsanmuyi horow no nsusnsuando ntsi. Ɔsan so nyim mbrɛ osi nye hɛn bedzi dɛw wɔ hɛn enyikadze na enyisɔ mu, mbrɛ osi nye hɛn bosũ sɛ hɛn dɛw hyɛ mã a. Botooyɛ mu ara, Ɔdze Ne ndze frɛ hɛn wɔ Ne dzin mu, bɛkã No nguankuw ho. Ɔfrɛ obiara a ɔwɔ beebiara. Ɔto nsa frɛ hɛn dɛ yendua onnyiewiei adzehu do nhwɛ na yɛntse ɔnnkyebo abrabɔ yi ase. Ber a yɛnantsew tsenenee kwan do na yesie hɛn ahyɛmudzi no, Ɔhyɛ hɛn bɔ dɛ ndzɛmba nyina bɔkɔ do yie ama hɛn yieyɛ (hwɛ Nkyerɛkyerɛ na Ahyɛmudzi 90:24; Romanfo 8:28).

Ne mber mu na kwan do no, nsanananmu ba—nnyɛ wɔ mbrɛ nna ndzɛmba si tse no mu nko, mbom wɔ dza wobotum abɛyɛ. Ampaara, Jesus Christ botum agye hɛn efi nkowaasom na bɔn mu, fi owu na hɛl mu, na obotum aboa hɛn ma yɛahyɛ hɛn awosu krɔnkrɔn no mã ber a yedua gyedzi na nnuho do bɛyɛ dza ɔbor hɛn esusudze do.

Ɔnam Jesus Chris ntsi, owu nnyɛ ewiei no. Easter ber no yɛpaa mu kã dɛ:

Ɔnam mbrasɛm na tum fi N’Egya hɔ do no, Jesus tum dze No nkwa to hɔ na Ɔsan fa no bio (hwɛ John 10:17). Ber a Ne nyimpadua da nda no mu no, Jesus Christ yɛɛ somdwuma wɔ sunsum wiadze, paa mu kãa “hɔn ɔpon fi owu mpokyerɛ mu” (Nkyerɛkyerɛ na Ahyɛmudzi 138:16).

Da a otsĩa ebiasa n’anapa no mu no, Ɔsoɛree fi nda no mu. Ɔkasaa kyerɛ Mary. Opuee esũafo beenu do wɔ kwan a odzi kɔ Emmaus no do, N’Asomafo do, na binom so do. (Hwɛ Matthew 28; Mark 16; Luke 24; John 20.)

Ɔnam dasedzi soronko do no, Ɔtoo nsa frɛɛ N’esũafo dɛ wɔmfa asawu no ngu hɛamba n’afã noho; dɛm aber yi, mpo dɛ nna nam ahyɛ no mã no, asawu no anntsew (hwɛ John 21:6–11; Luke 5:3–7). Ɔmaa N’esũafo no edziban na ɔtotɔe serɛɛ Peter mpɛn ebiasa dɛ ɔnyɛn No nguan na nguambaa no (hwɛ John 21:12–17). Ɔfoow kɔr sor, paa mu kãa dɛ N’esũafo na nkyii hɛn nyinara sesei nye aman nyina, ebusuakuw na nkorɔfo dɛ yɛnkyɛ Easter enyimnyamsɛm no na N’asɛmpa no (hwɛ Matthew 28:19–20; Mark 16:15).

Jesus Christ yɛ hɛn Oguanhwɛfo Pa na Nyame Eguambaa no. Ɔdze No nkwa maa na ɔdze No nkwa ma, No nguan. Ture no mu na wɔ mbeamudua do no, Ɔsoaa dza wonnkotum asoa na ɔbɔpoon hɛn bɔn ho werdam. Mber na mfesantsen mu no, Ɔnam fasusu do kyerɛ hɛn mbrɛ “owu si bue mfesantsen kwan no.”

Ɔnam Christ No Werdambɔ na Wusoɛr tum do no, hɛn honandua na sunsum bɛsan akã abɔ mu wɔ honandua mu wusoɛr. Yɛbɛyɛ enyimnyam, wɔdze hɛn enyimsu na nyimpadua bɛsan ananmu, nsa na nsa. Hɛn tsinhwi mpo bɛsan ananmu. Yebenya fahodzi fi mber mu yarba, nyimpadua mu akwanhyia, na adwen mu yarba ho. Christ no Werdambɔ no botum ehyira hɛn ma yeedzi sunsum mu mpaapaamu na sunsum mu owu biara do konyim. Ogyina nnuho do no, yenya fahodzi fi bɔn na awerɛhow biara ho na wɔma hɛn onnyiewiei dɔ na dɛwdzi mãhyɛ ho kwan. Hɛn ho atsew, asan, na yɛwɔ fahodzi no, yebotum dze hɛn ebusũa nkitahodzi a ɔsom hɛn bo no asan akɔ Nyankopɔn hɛn Egya na Jesus Christ hɔn celestial enyim, enyimnyam bea no.

Yebohu hɛn adɔfo bio. Sɛ yɛnye hɔn a yɛdɔ no kã bɔ mu a, yebohu hɛnho hɛnho wɔ onnyiewiei adzehu mu—a yɛdze ɔdɔ kɛse, ntseasee, na ayamuyie. Jesus Christ No Werdambɔ no botum aboa hɛn ma yɛakaa dza ohia na hɛn werɛ efir dza onnhia. Yɛdze gyedzi kɛse na enyisɔ ruhu hɛn Agyenkwa na nkitahodzi horow no dze asomdwee ba, yi adzesoa horow, ka akoma bɔ mu, na ɔka ebusua ebusua bɔ mu wɔ mber na mfesantsen mu.

Mbordo na Dɛw ho Enyidado

Sor ntokura robuei, wenyin eduaba rosow mbɔhombɔho, na nsaase reyɛ enyika kã Easter wɔ Jesus Christ mu no ho. Easter wɔ Jesus Christ mu no erohwɛ na erekyekye ekunafo na ngyanka hɔn werɛ, hɔn a kɔm dze hɔn na wonnyi mboa biara, hɔn a wosuro, hɔn a wobu hɔn enyimtsia, anaa wɔwɔ esian bi mu a wonnyim ho hwee no ka ho. Ɔdwen ankorankor biara ho no, Jesus Christ to nsa frɛ hɛn dɛ yɛnhwɛ na yɛmfa dɔ na ayamuhyehye nsom, tse dɛ mbrɛ Ɔyɛ no.

Ndzɛmba pa nyinara mu no, Jesus Christ dze nsanananmu mbordo ba (hwɛ John 10:10; Alma 40:20–24). Ɔbɔ anohoba dɛ “asaase do ahyɛ mã, na pii wɔ hɔ ma ɔbor do” (Nkyerɛkyerɛ na Ahyɛmudzi 104:17). N’asɛmpa ne mãhyɛ, N’asɔfodzi tumdzi na tum, na ayɛdze krɔnkrɔn horow na ahyɛmudzi horow wɔ N’Asɔr mu, wɔfrɛ no wɔ Ne dzin mu, mpo Jesus Christ N’Asɔr a ɔwɔ hɔ ma Nda a Odzi Ekyir Ahotseweefo kã ndzɛmba nyinara a Ɔdze san ananmu no ho.

Ewuradze N’asɔrfi piinara a ɔrebɛn Nyankopɔn mba wɔ mbeambea pii, dze “agyenkwa wɔ Zion Bepɔw do” (hwɛ Obadiah 1:21) nkyerɛkyerɛ no reba hɛn akoma mu ka Easter wɔ Jesus Christ mu no ho. Ewuradze ma hɛn kwan a ho tsew a pɛsɛankonya nnyi mu ma yɛdze ma wɔ asaase yi do, dza adɔfo a woewu kɔ no hia na wɔdɔ pɛ wɔ mfesantsen mu a, wonnkotum enya ama hɔnho.

Iyi na m’enyidado, anohoba, na dasegye tse. Megye dase wɔ Nyankopɔn hɛn Egya; hɛn Agyenkwa na Pomfo, Jesus Christ; na Sunsum Krɔnkrɔn no ho. Easter ber na da biara no, yenya onnyiewiei enyidado na anohoba wɔ Nyankopɔn n’enyigye nhyehyɛɛ krɔnkrɔn no mu, nye n’ahyɛmu anamɔn kwan a ɔdze nsesa krɔnkrɔn fi ɔnnkyebo kɔ bɛkyebo na onnyiewiei nkwa ba no mu. Da biara mma Jesus Christ No Werdambɔ no nokwaryɛ no mpegya hɛn adzesoa horow, ɔmboa hɛn ma yɛnkyekye adasa hɔn werɛ wɔ hɔn awerɛhow mu, na ɔmma hɛn akra fahodzi a yɛdze benya Ne dɛw ne mãhyɛ.

Ɔnam Easter enyidado na anohoba do no, Agyenkwa no hyɛ hɛn akoma do ebisadze horow no mã na oyi hɛn akra ne nsɛmbisa ano.