UBawo waseZulwini uFuna uKuthetha Nawe

Kuye u-Adam no-Eva nabo bonke ababeya kubalandela, ingelosi yayalela, “Wena uya kuguquka uze ubize kuThixo egameni loNyana ngonaphakade” (Moses 5:8).

UYesu wafundisa, “Celani, nophiwa; funani, nofumana; nkqonkqozani, novulelwa” (UMateyu 7:7). “Xa sukuba uthandaza, … [thandaza] kuYihlo … emfihlekweni” (UMateyu 6:6). “Thandazani ngoko nina nenjenje: Bawo wethu osemazulwini, malingcwaliswe igama lakho” (UMateyu 6:9).

UYesu waqhubekeka ukuthandaza kuYise “Waphuma wasinga entabeni esiya kuthandaza, [wa]budlulisa ubusuku bonke ngokuthandaza kuThixo” (ULuka 6:12). “[Kwaye] … wemka waya kuthandaza entabeni” (UMarko 6:46). “Bafika kumhlaba ogama liyiGetsemane: athi kubafunda bakhe, Hlalani phanti apha, ndikhe ndithandaze” (UMarko 14:32). Ngelixa esemnqamlezweni, uYesu wathandazela amajoni awayemxhome Yena kumnqamlezo: “Bawo, baxolele; kuba abayazi into abayenzayo” (ULuka 23:34).

Izibhalo ziyasifundisa ukuze “[ng]amaxesha onke [sikhunge]” (ULuka 21:36; 2 Nifayi 32:9; 3 Nifayi 18:15; IMfundiso neMinqophiso 10:5; 19:38; 20:33; 31:12). “Cebisana neNkosi kuzo zonke izenzo zakho, kwaye iya kukhokelela kokulungileyo” (Alma 37:37). Ngokongezelelo, thina “sinika yonke imibulelo kunye nendumiso ethi imiphefumlo [yethu] iphelele ibe namandla okuba nayo” (Mozaya 2:20), sikuqaphela konke oko uBawo wethu aye akwenzele thina.

UMongameli Russell M. Nelson wacacisa: “Ukuzixabisa ngokwasemoyeni kuqala ngokuqaphela ukuba intsasa nganye sisipho esivela kuThixo. … Yena usilondoloza usuku nosuku kwaye usixhasa umzuzu nomzuzu (bona Mozaya 2:21).”

UNifayi wathi, “kuba ukuba beniya kuphulaphula kuwo uMoya othi umfundise umntu ukuthandaza, beniya kukwazi ukuba kufuneka nithandaze; kuba umoya ongcolileyo awumfundisi umntu ukuba athandaze, kodwa umfundisa ukuba akufuneki athandaze.” (2 Nifayi 32:8).

Inkcukacha ivela ku Uyesu eVusa iNtombi ka[Yayiro], nguGreg K. Olsen

Ngomzekelo woMsindisi wethu nengcebiso yeengelosi nabaprofeti kwiinkulungwane, siyazi ngokucacileyo ukuthandaza mihla le ukuvakalisa umbulelo ngeentsikelelo zethu, kwaye nokugcina umthandazo ezintliziyweni zethu rhoqo. Thina sinoxanduva lokunxibelelana noBawo wethu.

Kodwa okona kuzuke ngakumbi kunoko koku, uBawo wethu waseZulwini uyayiphendula imithandazo yethu. Umbuzo ocingisisiweyo kwelihlabathi sifa kulo ngulo, singazifumana ngcono njani na kwaye siziqiqele iimpendulo, umkhomba-ndlela, nentuthuzelo evela kuBawo wethu?

Ngobu bomi bam obuminyaka ingentla kwamashumi asixhenxe, ndiyazi ukuba uBawo wethu uthetha nathi. Thina asisodwanga. Izithunywa zezulu zisibeke iliso elibukhali kwaye ziyasinceda njengoko sifuna ukulandela uMsindisi.

Ukufumana iimpendulo kwimithandazo yethu kuqala ngokholo lwethu kuBawo waseZulwini nakuNyana waKhe, uYesu Krestu. UYesu wathi, “Musa ukoyika, kholwa kodwa wena” (Marko 5:36). Sithembela kuYe, senza konke okusemandleni ethu ukugcina imiyalelo, kwaye sijonge isandla saKhe kwizinto zonke. “Akukho nto umntu athi akhathaze uThixo ngayo … ngaphandle kwabo bangasivumiyo isandla sakhe kwizinto zonke, baze bangayithobeli imiyalelo yakhe” (IMfundiso neMinqophiso 59:21).

Isandla sikaThixo kubomi bethu asithethi ukuba Yena ubangela okungendawo okanye iintlekele ezimbi ezikwihlabathi lethu. Nangona kunjalo, ithetha ukuba ngamaxesha akho obunzima nawomkhethe, Yena uyakuma ngakuwe, omeleze oko unokwazi ukukwenza, akuthuthuzele, kwaye “uya kuzingcwalisa iimbandezelo zakho zibe yinzuzo kuwe” (2 Nifayi 2:2).

Njengoko sinokholo kuYe size sigcine imiyalelo yaKhe, siye sifunde ukuliva ngcono ilizwi laKhe.

NgeyoMsintsi ngowama-1993, kunyaka wam wokuqala wokuba NgoseMagunyeni Jikelele, uMongameli James E. Faust (1920–2007), owaye lilungu leQumrhu labaPostile Abalishumi ElineSebini ngoko, wamema inkosikazi yam, uKathy, kunye nam ukuba sizimase inkonzo emfutshane yaseBrigham Young University kunye naye. Khumbula, owama-1993 wawuphambi kokufumaneka kwefowuni ezikrelekrele ngokuphangaleleyo, amaqonga onxibelelano, ne-intanethi.

Kwintetho yakhe, ebizwa “The Voice of the Spirit [Ilizwi loMoya],” uMongameli Faust walumkisa: “Kwisizukulwana senu niyakuhendwa ngamazwi wabo baziindumasi bavakalisa izimvo zabo ezixelela ukuba niphile njani, nizanelise njani na iinkanuko zenu, nokuba nibe nayo njani yonke into enqwenelekayo. Kwiintupha zeminwe yenu niyakuba nezitishi zikamabonakude ezifikelela kumakhulu amahlanu. Kuya kubakho zonke iindidi zeenkqubo ezingabambekiyo ezenza ikhompyutha isebenze, iimodem zekhompyutha, oovimba bengqokelela yedatha elungiselelwe ukukhangelwa nokufumaneka ngesiqhuphe, iibhodi zamanqaku osasazo aphambili; kuya kubakho imveliso-lushicilelo eyenziwe ngekhompyutha, izixhobo zokwamkela isathalayithi, namaqonga oqhagamshelwano ayakunifuthanisela ngeenkcukacha. … Ilizwi ekumele nifunde ukuliphaphamela lilizwi loMoya.”

UMongameli Boyd K. Packer (1924–2015), uMongameli weQumrhu labaPostile Abalishumi Elinambini, wafundisa ngelizolileyo, elincinane ilizwi xa wayebalisa ngamava kaJohn Burroughs, ongothanjelwa zizinto ngokwemvelo, njengoko wayehamba nabahlobo kwipaki enesihlwele. Nanga amazwi kaMongameli Packer:

“Ngaphezu kwezandi zobomi besixeko [uMnu. Burroughs] weva ingoma yentaka.

“Waye wama waze wamamela! Abo babenaye babengayivanga. Yena waye wabhekabheka. Akekho ongomnye owayiqaphelayo.

“Yayimhlupha le yokuba wonke umntu aphoswe yinto entle kanje.

“Waye wathatha imali elukhozo kwipokotho yakhe waye wayiphequlela emoyeni. Yathi thaca kwipavumente ngokukhenkceza, okungayodluliyo ingoma yentaka. Wonke umntu waguquka; babeyiva leyo!

“Kunzima ukwahlula ingoma yentaka kwizandi zendlela yesixeko. Kodwa ungayiva yona. Ungayiva yona ngokucace gca ukuba uzifundisa ukuyimamela.”

Imfundiso kaMongameli Packer ngoMoya oyiNgcwele yenzeka ngowama-1979, ixesha apho ubomi babuthe cwaka ngakumbi nengxolo yehlabathi yayidambe ngaphezulu kakhulu kunokuba injalo ngoku.

UMongameli Nelson wafundisa, “Ukuba uzinika ingqalelo ngokungakumbi izinto ezikumaqonga onxibelelwano ngaphezu koko kusetyezwa nguMoya, uyakuba ke uzibeka kumngcipheko wokwasemoyeni.”

UMongameli Faust wathi, “Ukuba kumele siphulaphule ilizwi loMoya, nathi kumele sivule iindlebe, siguqulele iliso lethu lokholo kwintsusa yelizwi, kwaye sijonge ezulwini ngokungagungqiyo.”

Eli lizwi loMoya liza kuzo zizombini iimvakalelo kunye nengqondo zethu. “Ndiya kukuxelela engqondweni yakho nasentliziyweni yakho, ngoMoya oyiNgcwele, oya kuza phezu kwakho kwaye oya kuhlala entliziyweni yakho” (IMfundiso neMinqophiso 8:2). Mamela kwisazela sakho—isityhilelo rhoqo siqala phaya.

Thandazani ngeNtliziyo eKholelwayo

Iimpendulo nokukhanyiselwa azinakunyanzelwa. Thina sithandaza size silinde ngentliziyo ekholelwayo. Ezinye iimpendulo azizokufika kobu bomi, kodwa kwabo bangamalungisa, iNkosi iyakusoloko ithumela uxolo lwaYo (bona UYohane 14:27). Iimpendulo ngokukanintsi ziza xa sithandazela ukunceda abo basingqongileyo. Maxa wambi, zifika “umgca phezu komgca, umyalelo phezu komyalelo” (IMfundiso neMinqophiso 98:12).

Ilizwi lezulu lingeza kuthi ngamaxesha angalindelekanga nakwiindawo ezingalindelekanga, kodwa sifumana awona mathuba aqaphelekayo kwiindawo ezizolileyo nakwiindawo ezingcwalisekileyo. Kwinzolo yemithandazo yam yakusasa nokucinga nzulu, ndifumana iintsikelelo ezingaqhelekanga. Ufundo lwemihla ngemihla, lobuqu, olungaphazamisekiyo lwezibhalo, ngeli lixa luqhelekile ngamanye amaxesha, luzisa ilizwi loMoya ezintliziyweni zethu njengomlilo ngamanye amaxesha.

Ngamaxa athile, ukhanyiselo luvela koko sikufundayo, kwaye ngamanye amaxesha, oko sicinga nzulu ngako kuzisa impendulo kumbandela owahlukileyo. Khumbula amazwi kaMdala Robert D. Hales: “Xa sifuna ukuthetha noThixo, siyathandaza. Ze xa sifuna Yena athethe nathi, siphengulula izibhalo.”

Njengoko ingxolo neziphazamiso zehlabathi zisijikeleza, iNkosi iyalele umprofeti wayo ukuba akhe iitempile ezininzi ngakumbi. Kwezi zindlu zingcwele zeNkosi, njengokuba sishiya imingeni yethu ngaphandle kodwa singena nemithandazo yethu neenkxalabo zethu, sifundiswa iinyaniso zanaphakade.

Kunyaka odlulileyo, uMongameli Nelson wasinika esisithembiso sincamisayo: “Bazalwane noodade bam abathandekayo, nasi isithembiso sam. Akukho nto iya kukunceda ngakumbi ukuba ubambelele kwintonga yesinyithi kunokunqula etempileni rhoqo kangangoko iimeko zakho zikuvumela. Akukho nto iyaku khusela ngakumbi njengokuba udibana neenkungu zobumnyama zehlabathi. Akukho nto iyakomeleza ubungqina bakho beNkosi uYesu Krestu neNtlawulelo yaKhe okanye ikuncede uqonde icebo elimangalisayo likaThixo ngakumbi. Akukho nto iya kuwuthomalalisa umoya wakho ngakumbi ngamaxesha entlungu. Akukho nto iya kuvula amazulu ngakumbi. Akukho nto!”

Inkomfa yajikelele nganye iza neentsikekelelo ezongezelelweyo ezininzi. Kwinyanga ezayo kaTshazimpunzi, kwakhona, sizakuhlangana kwinkomfa yajikelele ukuze sive ilizwi leNkosi. Siza kwinkomfa yajikelele sithandazile kwaye sizilungiselele. Kumntu ngamnye kuthi, kukho iinkxalabo ezicinezelayo kwanemibuzo esulungekileyo. Thina siza ukuze sihlaziye ukholo lwethu kuMsindisi, uYesu Krestu, nokomeleza amandla wethu wokuxhathisa kwisihendo. Siyeza ukuze sifundiswe okuvela phezulu. Mna ndiyakuthembisa ukuba njengoko uzilungiselela kwaye usiza ngomthandazo kwiiseshoni zenkomfa yajikelele, uzakuziva iimpendulo kwiinkxalabo zakho, kwaye uyakukwazi okokuba “isandla sezulu” siphezu kwakho.

Yiba nokholo lokuba uBawo waseZulwini uthetha nawe. Yena uthetha nawe! Luvumele ukholo lwakho kuYe nakuNyana waKhe oyiNtanda likuncede uwohlule kubini umkhusane kwaye ulamkele ilizwi likaBawo. Mna ndiyangqina ukuba ukhona kwaye ukuthanda ngaphezu kokuba amazwi enokutsho.