Ntate ea Maholimong o Batla ho Bua le Uena

Ho Adama le Eva le bohle ba neng ba tla ba latela, lengeloi le laetse,“Le tla baka ‛me le bitse ho Molimo ka lebitso la Mora ka ho sa feleng” (Moshe 5:8).

Jesu o rutile a re: “Kopa, ´me u tla fuoa; batla, ´me u tla fumana; kokota, ´me u tla buleloa” (Mattheu 7:7). “Ha u rapela, … rapela ho Ntata´o … lekunutung” (Mattheu 6:6). “ Ke ka mokhoa ona ka baka leo ha le rapela le re: Ntat‛a rona ea maholimong, lebitso la hao le ke le khethehe” (Mattheu 6:9).

Jesu o ne a rapela Ntate oa Hae a sa khaotse. “A nyolohela thabeng ho ea rapela, ‛me a hlola bosiu bohle a ntse a rapela Molimo” (Luka 6:12). “‛Me … a tloha a ea thabeng ho ea rapela” (Mark 6:46). “‛Me ba fihla sebakeng se neng se bitsoa Khethesemane : ‛me a re ho barutuoa ba hae, Lulang mona, ha ke ea ho rapela” (Mareka 14:32). Ha a le sefapanong, Jesu o ile a rapella masole a mo thakhisitseng: “Ntate, bats′oarele; hobane ha ba tsebe seo ba se etsang” (Luka 23:34).

Mangolo a halalelang a re eletsa ho “rapela kamehla” (Luka 21:36; 2 Nefi 32:9; 3 Nefi 18:15; Lithuto tsa Tumelo le Lilekane 10:5; 19:38; 20:33; 31:12). “Eletsana le Morena liketsong tsohle tsa hau, ’me o tla u tataisa bakeng sa molemo” (Alma 37:37). Holim‛a moo, re “isa liteboho tsohle le thoriso eo meea eohle ea [rona] e nang le matla a ho ba le tsona,” (Mosaia 2:20), re elelloa tsohle tseo Ntate oa rona a re etsetsang tsona.

Mookameli Russell M. Nelson o oa hlalosa: “Boitlhompho ba moea bo qala ka ho elelloa hore hoseng ho hong le ho hong ho hocha ke mpho e tsoang ho Molimo. … O re boloka letsatsi le letsatsi ‛me o re ts′ehetsa ho tloha motsotsong o mong ho ea ho o mong (bona Mosaia 2:21).”

Nefi o ile a re, “Haeba le ne le ka mamela Moea o rutang motho ho rapela, le ne le tla tseba hore le tlameha ho rapela; hobane moea o mobe ha o rute motho ho rapela, empa o mo ruta hore a se rapele.” (2 Nefi 32:8).

Lintlha tse tsoang ho Kreste o Tsosa Morali oa Jairus Bafung, ka Greg K. Olsen

Ka mohlala oa Mopholosi oa rona le keletso ea mangeloi le baporofeta ka lilemo-lemo tse makholo, re tseba ka ho hlaka ho rapela letsatsi le letsatsi ho bonts′a teboho bakeng sa lithlohonolofatso tsa rona, le ho boloka thapelo lipelong tsa rona kamehla. Re na le boikarabelo ba ho buisana le Ntat′a rona.

Empa esita le se setle le ho feta, Ntat′a rona ea Maholimong o arabela lithapelo tsa rona. Potso e utloahalang lefats′eng lena la ho shoa ke hore, re ka amohela le ho utloisisa betere joang likarabo, tataiso, le mats′eliso a tsoang ho Ntate?

Lilemong tse fetang mashome a supileng tsa bophelo ba ka, kea tseba hore Ntat′a rona o bua le rona. Ha re bang. Libopuoa tsa leholimo lia re hlokomela le ho re thusa ha re ntse re batla ho latela Mopholosi.

Ho fumana likarabo tsa lithapelo tsa rona ho qala ka tumelo ea rona ho Ntat′a rona ea Maholimong le ho Mora oa Hae, Jesu Kreste. Jesu o itse, “Se ts´abeng, le lumele feela” (Mareka 5:36). Re ts′epela ho eena, re etsa sohle seo re ka se khonang ho boloka litaelo, le ho lebella letsoho la hae linthong tsohle. “Haho ka letho leo motho a khopisang Molimo … haese ba sa boleleng letsoho la hae linthong tsohle, ´me ba sa mamele litaelo tsa hae” (Lithuto tsa Tumelo le Lilekane 59:21).

Letsoho la Molimo bophelong ba rona ha le bolele hore o baka bobe kapa litlokotsi tse ts′abehang tse lefats′eng la rona. Leha ho le joalo, ho bolela hore linakong tsa mathata a hau le ho hlokeloa toka, O tla ema le uena, a matlafatse bokhoni ba hau, a u ts′elise, ´me “a hlohonolofatse litsietsi tsa hau molemong oa hau.” (2 Nefi 2:2).

Joaloka ha re e na le tumelo ho eena le ho boloka litaelo tsa Hae, ka tlholeho re ithuta ho utloa lentsoe la hae haholoanyane.

Ka Loetse 1993, selemo sa ka sa pele ke le Boetapeleng ba Kakaretso, Mookameli James E. Faust (1920–2007), eo e neng e le setho sa Lekhotla la ba Leshome le Metso e ´Meli, o ile a re mema mmoho le molekane oa ka, Kathy, ho ea thapelong Brigham Young University le eena. Hopola, 1993 e ne e le pele ho fumaneha ho pharalletseng ha li-smartphone, mecha ea litaba ea sechaba le marang-rang.

Puong ea hae, eo sehlooho se reng “Lentsoe la Moea,” Mookameli Faust o ile a lemosa, a re: “Molokong oa lona le tla ts′oenngoa ke melumo e mengata ea mantsoe a le bolellang mokhoa oa ho phela, kamoo le ka khotsofatsang litakatso tsa lona, ​​kamoo le ka bang le tsohle tseo le lihlokang. Le tla ba le likanale tsa se-ea-le-moea pono tse fihlang ho makholo a mahlano menoaneng ea lona. Ho tla ba le mefuta eohle ea software, li-modem tsa likomporo tse sebelisanang, li-database, le lipapatso tsa litsebiso; ho tla ba le khatiso ea li-computer tse nyenyane, lisebelisoa tse amohelang molaetsa oa sathelaete, le marang-rang a puisano a tla le bipetsa ka tlhaiso-leseling. … Lentsoe leo le tlamehang ho ithuta ho le mamela ke lentsoe la Moea.”

Mookameli Boyd K. Packer (1924–2015), Mookameli oa lekhotla la ba Leshome le Metso e ´Meli o ile a ruta ka lentsoe le bonolo, le nyane la Moea ha a pheta se kileng sa e tsahalla John Burroughs, setsebi sa tlhaho, ha a ne a tsamaea le metsoalle ea hae serapeng se tletseng batho. Mantsoe a Mookameli Packer ke a na:

“Ka holim’a melumo ea bophelo ba litoropong [Mong. Burroughs] a utloa pina ea nonyana.

“O ile a ema ´me a mamela! Ba neng ba e na le eena ba ne ba e s’o ka ba e utloa. A qamaka ho potoloha. Ha ho motho e mong ea neng a e hlokometse.

“Ho ile ha mo ts′oenya hore e mong le e mong a hloloe ke ntho e ntle hakana.

O ile a nts′a chelete ea ts′epe ka pokothong ea hae ´me a e phetholela moeeng. E ile ea otla tsela e katiloeng ka molumo, o sa feteng molumo oa nonyana. E mong le e mong a reteleha; ba ne ba ka utloa seo!

“Ho thata ho arola melumo eohle ea sephethe-phethe sa litoropong pina ea nonyana. Empa u ka e utloa. U ka e utloa ka ho hlaka haeba u ikoetlisetsa ho e mamela.”

Lithuto tsa Mookameli Packer ka Moea o Halalelang li etsahetse ka 1979, nako eo bophelo bo neng bo khutsitse haholo ´me lerata la lefats′e le ne le theohile ho feta ha joale.

Mookameli Nelson o ile ruta a re, “Haeba o ela hloko litaba ho tsoa ho mecha ea litaba tsa sechaba ho feta linyenyelletso tsa moea, u ipeha kotsing ea moea.

Mookameli Faust o ile a re, “haeba re batla ho mamela lentsoe la Moea, le rona re lokela ho bula litsebe tsa rona, re fetolele leihlo la tumelo ho mohloli oa lentsoe, le ho sheba ka tieo maholimong.”

Lentsoe la Moea le fihla ho botho ba rona ba kelello le maikutlo. “Ke tla u joetsa mohopolong ua hau le pelong ea hau, ka Moea o Halalelang, o tla tla ho uena ´me o tla lula pelong ea hau. ” (Lithuto tsa Tumelo le Lilekane 8:2). Mamela letsoalo la hao—hangata ts′enolo e qala moo.

Rapelang ka Pelo e Lumelang

Likarabo le maikutlo a ke ke a qobelloa. Re ea rapela ´me re ema ka pelo e lumelang. Likarabo tse ling li ke ke tsa tla bophelong bona, empa ho ba lokileng, Morena o tla romela khotso ea Hae kamehla (bona Johanne 14:27). Likarabo hangata litla ha re rapella ho thusa ba re potileng. Ka linako tse ling, li tla “mola ka mola, molao ka molao” (Lithuto tsa Tumelo le Lilekane 98:12).

Lentsoe la leholimo le ka tla ho rona ka linako tse sa lebelloang le libakeng tseo re sa li lebellang, empa re fumana menyetla ea rona e hlokomelehang ka ho fetisa libakeng tse khutsitseng le libakeng tse halalelang. Boikhutsong ba lithapelong tsa ka tsa hoseng le ho thuisa ka botebo, ke fumana litlhohonolofatso tse sa tloaelehang. Palo ea letsatsi le letsatsi, ea botho, e sa sitisoeng ea mangolo a halalelang , ha e le tloaelo ka linako tse ling, e tlisa lentsoe la Moea lipelong tsa rona joalo ka mollo ka linako tse ling.

Ka linako tse ling, maikutlo a tsoa ho seo re se balang ka ho khetheha, ´me ka linako tse ling, seo re se nahanisisang se tlisa karabo ho taba e fapaneng haholo. Hopola mantsoe a Moholo Robert D. Hales: “Ha re batla ho bua le Molimo, rea rapela. ´Me ha re batla hore A bue le rona, re batlisisa mangolo a halalelang.”

Ha lerata le lits´itiso tsa lefats´e li ntse li re pota-pota, Morena o laetse moporofeta oa Hae ho aha litempele tse ngata. Kahare ho matlo a na a halalelang a Morena, a halalelang a Morena, joaloka ha re siea mathata a rona ka ntle empa re kena ka lithapelo le mats´oenyeho a rona, re rutoa linnete tsa bosafeleng.

Selemo se fetileng, Mookameli Nelson o ile a re fa ts´episo ena e makatsang: “baena le likhaitseli ba ratehang, ts´episo ea ka ke ena. Ha ho letho le tla u thusa haholo ho ts´oarella ho lere la ts´epe ho feta ho khumamela ka tempeleng khafetsa ha maemo a u lumella. Ha ho letho le tla u sireletsa ho feta joaloka ha u kopana le ´muoane oa lefifi la lefats´e. Ha ho letho le tla tlatsetsa bopaki ba hau ka Morena Jesu Kreste le Topollo ea hae kapa le tla u thusa ho utloisisa morero oa Molimo o babatsehang ho feta. Ha ho letho le tla thoba moea oa hau ho feta linakong tsa bohloko. Ha ho letho le tla bula maholimo ho feta. Letho!”

Seboka se seng le se seng se akaretsang se tlisa mahlohonolo a mangata a eketsehileng. Khoeling e tlang ea ´Mesa, hape,re tla kopana sebokeng se akaretsang ho utloa lentsoe la Morena. Re tla sebokeng se akaretsang re rapetse hape re itokisitse. Ho e mong le e mong oa rona, ho na le mats′oenyeho a hatellang le lipotso tse tebileng. Re tla ho tla nchafatsa tumelo ea rona ho Mopholosi oa rona, Jesu Kreste, le ho matlafatsa bokhoni ba rona ba ho hanyetsa liteko. Re tla ho tla rutoa ho tsoa holimo Ke le ts´episa hore joaloka ha le itokisa le ho tla ka thapelo e tletseng ho likopano tsa seboka se akaretsang, le tla ikutloela likarabo tsa mats´oenyeho a lona, ´me le tla tseba hore “letsoho la maholimo” le holim′a lona.

Eba le tumelo ea hore Ntat´au ea Maholimong o bua le uena. O etsa joalo! Etsa hore tumelo ea hau ho Eena le Mora oa Hae ea Ratoang e u thuse ho arola lesira le ho amohela lentsoe la Ntat’au Ke paka hore o teng ´meo le rata hofeta kamoo mantsoe a ka bolelang.