A Demad er a Babeluades a Soal Mengedecheduch er Kau

Meng ngara Adam me a Eva me tirkel rokui el moltirakl er tir, ea anghel a ulsisechakl, “Bom mouchel e momekedong er a Dios loba ngklel a Ngelekel elmo cherechar” (Moses 5:8).

A Jesus a ulsisechakl: “Molengit, me bom ngai; mosiik, me bo betik; molengod, me lobok el kiriu” (Mateus 7:7). “Sel moluluuch, … moluluuch el mora Demam … el ngikel diak ke desang” (Mateus 6:6). “Ng ua tiakid cho moluluuch: Demam el ngara babeluades, Bo le modanges a chedaol el ngklem” (Mateus 6:9).

Jesus a blechoel meluluuch el mora Demal. “Ng tilobed el mora rois el mo meluluuch, e millemolem er sel rokir el kesus el ngara nglunguuch el mora Dios” (Lukas 6:12). “E … ngii a mirael el mor a rois elmo meluluuch” (Markus 6:46). “E solang me te mlor a basio lomekedong er ngii el Gethsemane: e ngii a dilu er a rubengkel el kmo, Bo mdengchokl er tiang, e ngak bo kululuuch” (Markus 14:32). Meng ngara kerus, a Jesus a meluluuch el kirir a re soldau el milngerus er Ngii: “Chedam, mousubes a kngterir: ele tirka diak el lodenge loruul” (Lukas 23:34).

A chedaol lechukl a olisechakl er kid elmo “blechoel meluluuch” (Lukas 21:36; 2 Nephi 32:9; 3 Nephi 18:15; Doctrine and Covenants 10:5; 19:38; 20:33; 31:12). “Mosiik a ngeseu er a Rubak er a rokui el tekoi el moruul, e ngii a mekrolau el mora ungil” (Alma 37:37). A lmuut el tang, ke “doluut a rokui el lomereng el saol ma chetengakl me a [rengud] el rokir loba mui el klisiich” (Mosiah 2:20), el mesa el kmo ng rokui el tekoi el Demad a meruul el kired.

A President Russell M. Nelson a silodii: “Sel loleketek a reng er a rengud a omuchel sel dolchesuar el kmo a bekl el beches el ngesechel a sils a sengk er a Dios. … Ngii a omes er kid er a bekl el klebesei e oltekau er kid er a bekl el bung (mesa Mosiah 2:21).”

A Nephi a dilul kmo: “Alsekum e kom rongesii a Reng er a Dios el olisechakl er a chad el kmo ngkirel meluluuch e ko mo medengei el kmo ngkiriu el meluluuch; le mekngit el reng a olisechakl er ngii el kmo ngdiak el kirel meluluuch, ng bai olisechakl er tir el kmo ng diak ek kiriu el meluluuch” (2 Nephi 32:8).

Komakai el teletelel a Kristo el Olekiis er a Ngelekel a Jairus el Redil, mla er a Greg K. Olsen.

Ngokiu er a okesiul a Osebeled me a osisecheklir a re anghel me a re profet el meketeket el taem, e kede meduch el meluluuch er a bekl el sils el lochotii a omereng saol el kirel a dolai klengeltengat, e blechoel mengeluoleu a nglunguched meng delalmel er a rengud. Ng ngerecheled el mengedecheduch el mora Demad.

Ea lmuut el ngaruchei el kobkelii, a Demad er a Babeluades a onger a nglunguched. A utebengal el ker er tial klechad er a beluulechad a kmo, ng mekerang a bo dungil ngmai e dungil medengei a nger, ulekrael, ma ongelaod el ngara Demad el mei?

Ngokiu er a bekord el klou er a okeuid el rak er a klengar er ngak, ak medengei el kmo a Demad a mengedecheduch el me rekid. Ng diak el dil kid el tang. A re ngar el ngara Babeluades omes er kid e olngeseu er kid sel dosiik elmo oltirakl er a Osobel.

Melai a nger el lokiu a nglunguched a omuchel er a klaumerang er kid er a Demad er a Babeluades me a Ngelekel, er a Jesus Kristo. A Jesus a dilu el kmo, “Lak ke medakt, e di moumerang” (Markus5:36). Kede oumerang er Ngii, mora bkul rebab el sebeched el loltirakl a lechul, e omes a urellel er a rokui el tekoi. “A lak a telmelel a chad eng mededaes a rengul a Dios … ngdi tirkel el diak el leues a urellel chimal er a rokui el tekoi, e oltirakl a lechul” (Doctrine me a Covenants 59:21).

A urellel a Dios er a elsel a klengar er kid a diak el belkul a kmo Ngii a uchul a mekngit malechub a meringel el kereor el ngar tial beluulechad ee kid. Ngdi, tia belkul a kmo sel taem el kau a chelbangel a metarchebesul ma chelbirukel lomeruul, Ngii a mo dechor re bita er kau, smisiich a ngarngii er kau, mengelaod er kau, e “chemedaol aikel longarem el blo er ngii a uchul a klisichem” (2 Nephi 2:2).

Mesel doumerang er Ngii e oltirakl a lechul, e kede mo meduch el lungil rongesii a ngerel.)

Sera Ongetiu el buil er a 1993, kot el rak er ngak el General Authority, ea President James E. Faust (1920–2007), el mle chedal a Chelechad er a re Teruich ma terung el Apostol, a siotai er a bechik ra, Kathy, me ngak elmo er a to attend er a Brigham Young University devotional lobengkel. Molbedebek, a 1993 a uchei er a bol loberek a usbechel a reua smartphones, social media, me a internet.

Ngera cheldechedechal, el kmo “The Voice of the Spirit,” ea President Faust a ulemeklatk: “Ngar tial telcherool el mngarngii e kom mo mechitikaik er a betok el ngor el melekoi er kemiu el mekerang om kiei, mekerang om moldeu a rengmiu, mekerang om ngara omeliul a rokui el tekoi. Ng kirem el lolab a mo bedul a eiim el dart el delmerab er a television el ngara chekngelel chimam. Ngmo rengii a betok el kakerous el klekedall er a mesil, kakerous el cheldecheduch el lokiu er a seng, klou el cheldelel a tekoi el kirel a skel a tekoi, me a bulletin boards; ng morngii a oteruul klaleu lokiu er a mesil, mesil lomerek a tekoi, me a tekoi el ngara melidiul el mekekau er a tekoi. … Sel ngor el kau a kirem el mesuub el loltirakl er ngii a ngor er a Reng.”

A President Boyd K. Packer (1924–2015), President er a Cheldebechel er a Teruich ma terung el Apostol, a ulsisechakl el kirel sel chelelakl, kekerei el ngor er a Reng el kirel a lulchesaur er ngii a John Burroughs, chad el loumerang a di tekoi er a klechad, er a lorael lobengterir a re sechelil lokiu er a park. Aikakid a tekingel a President Packer:

“Ngar bab er a cherdechel a klengar er tial meseked el beluu ea [ngikal chad el Burroughs] a rongesii a charem el mengitakl.

“Ng mlo chelelakl e orenges! Tirkel lulbengkel a dimlak el rengesii. Ngul emeraech el lomes. Ngdiak a chad el miltebengar.

“Ng milngesang er ngii el kmo a re bekl el chad a dimlak el betebengar a tekoi el kmal klebokel.

“Ngiluu a deel ludoud er a boket er ngii e mildeklii elmo rebab. Ng silbechii er a sment el ngarngii a ngerel, el diak el klou el ua sel cheliteklel ngkel charm. A rechad a ulebult; te sebecherir el rongesii!

“Ng etiteuokel a domii er a ikal betok el cherodech er a meseked el beluu sel cheliteklel a charm. Ngdi kau a sebechem el rongesii. Kau a sebechem el lungil rongesii alsekum e ke omeksau er kau elmo orenges er ngii.”

A osisecheklel a President Packer el kirel a Chedaol Reng a mildung er a 1979, er a taem el klengar a mle chelelakl ea cherodech er a beluulechad a liluut el mle kekerei er a kuk chelechal taem.

A President Nelson olisechakl, “Alsekum e kau a klou a temem el lomes a ikel tekoi er a melidiul er a bai kuk lolekoi a Reng, e seikid e kau a mla sisebau er a etiteuokel rael.”

A President Faust a melekoi, “Alsekum e kede rongesii sel ngor er a Reng, e kid meng dirrek el kired el mok a dingad, meltii sel osenged er a klaumerang el kirel sel madedok er a ngor, e diak el mesim omroled el bedul a babeluades.”

Tial ngor er a Reng a mei el mora uldesued ma dolchesaur. “Ngii a mo ouchais er kid el lokiu er a uldesued me a rengud, lokiu a Chedaol Reng, el ngii e mei er kid e kiei er a chelsel a rengud. Morenges er a uldesuem—ocholt a blechoel lomuchel er sei.

Moluluuch el Reng Loumerang

Nger ma domtab a diak el sebechel morimel. Kede meluluuch e mengiil loba reng el loumerang. Bebil er a nger a diak el mei er tial klengar, ngdi mo er tirkel mekedung, a Rubak a blechoel loldurokl er a budech er Ngii (mesa Johanes 14:27). A nger a blechoel mei sel doluluuch elmo olengeseu er tirkel kmeed er kid Bebil er a taem, eng mei el “luldasu me a tara uldasu, llach me a tara llach” (Doctrine me a Covenants 98:12).

A ngor er a babeluades a sebechel me rekid er a di mitil a taem er a ngidil basio, ngdi kid a metik a ikel kot el lungil techal er a ikel mechelelakl el delemerab me a chedaol el basio. Sel cheleklel a nglunguchek ma kumtetab ersel mochu tutau, e ak metik a ngdech el klengeltengat. A blechoel, el ngara rengud, el diak el mengodech el lomengiuel a chedaol lechukl, meng kora di omelekl el tekoi, a nguu a ngor er a Reng el mera rengud el ua ngau sel bebil er a taem.

Ngarngii a taem, ea domelchesiu a bleketakl el mei sel donguiu, ea kuk bebil er a taem, e ngikel dolbedebek el lokeed a nger el kirel a kmal ngodech el tekoi. Molbedebek a tekingel a Elder Robert D. Hales: “Sel soad el mengedecheduch er a Dios, e kede meluluuch. Ea lsoad Ngii a longedecheduch er kid, e kede menguiu chedaol llechukl.”

Mesel cherodech ma mengesang el tekoi er tial beluulechad el loliuekl er kid, ea Rubak a mla mekrolii a profet er Ngii el mekedechor a lmuut el betok el templo. Ngara ikal chedaol el blil a Rubak, esel dechoit a ikal de charem el tekoi er a rikl e soiiseb el lokiu a nglunguched me a mengesang a uldesued, e kede mosisechakl er a klemerang el kirel a diak a ulebengelel klengar.

Tal rak er a memong, ea President Nelson a mileskid tial mengerngird el telbiil: “Betik er a renguk el rodam rodos, tiakid a telbilek. Ng diak a mo ngosukau el mesisiichlurrekodel a tekingel a Dios el uai sel bom blechoel mesiou el ngara templo a blol sebechiu. Ng diak a ngii di el ngerang elm o omecheliu er kemiu er a iilkolk er a beluulechad. Ng diak a ngii di el ngerang el mo smisichii a klaumera er kemiu er a Rubak el Jesus Kristo me a Tngakireng er Ngii ma lechub e lengesukemiu el medengelii a meang el moktek er a Dios elmo mui. Ng diak a ngii di el ngerang elmo sobechakl a rengmiu elmo mui er a taem er a ringel. Ng diak a ngii di el ngerang el mekengii babeluades elmo klou. Ng diak!”

A bekl el klou longdibel a meskid a dechelel el lobdois el klengeltengat. Tial merael mei el Ongeuang el buil, el deluut, e kede mo kaseues er aklou longdibel elmo rongesii a ngerel a Rubak. Kede mei er a klou longdibel el mla meluluuch e keltmokl. Le derta er kid, eng ngarngii a omekberaud el mengesang me a tekoi el soad el loker. Kede mlei elmo omekbeches a klaumerang er kid er a Osebeled, Jesus Kristo, e melisiich a klisiched el lotengeklii a ngibes ek reng. Kede mlei el mosisechakl er bab. Ak yaksok er kau el kmo mesel kau a mengetmokl e mei el ngara nglunguuch el mora ongdibel er a klou el longdibel, e ke mo melchesuar a nger el kirel a tekoi el teluadel er a uldesuem, e kau a mo medengei el kmo “a chimal a babeluades” a obengkem.

Bol ngarngii a klaumerang er kau el kmo a Demam er a Babeluades a mengedecheduch lekor kau. Ngii a melekoi! Mei ma klaumerang er kau er Ngii ma Betik er aRengul Ngelekel le ngosukau el mengii a kateng e mrengesii a ngerel a Demam. A kuchais el Ngii a ngar sei e betik a renguk er kau el diak a tekoi elmo smodii.