“Heavenly Father Wants to Speak to You,” Liahona, March 2025.
ຂ່າວສານປະຈຳເດືອນ Liahona, ເດືອນມີນາ 2025
ພຣະບິດາເທິງສະຫວັນຢາກ ກ່າວກັບທ່ານ
ຈົ່ງໃຫ້ສັດທາຂອງທ່ານໃນພຣະບິດາເທິງສະຫວັນ ແລະ ພຣະບຸດທີ່ຮັກຂອງພຣະອົງຊ່ວຍທ່ານເປີດມ່ານ ແລະ ຮັບເອົາສຸລະສຽງຂອງພຣະບິດາ.
ເຮົາເປັນບຸດ ແລະ ທິດາຂອງພຣະເຈົ້າ, ອາໄສຢູ່ໃນໂລກນຳກັນ ໄກຈາກບ້ານແຫ່ງສະຫວັນຂອງເຮົາ. ນີ້ຄືຊ່ວງມະຕະຂອງເຮົາ, ເປັນເວລາຮັບຮ່າງກາຍຂອງເຮົາ, ເລືອກຄວາມດີເໜືອຄວາມຊົ່ວຮ້າຍ, “ຊີມລົດຊາດອັນຂົມຂື່ນ, ເພື່ອວ່າ [ເຮົາ] ຈະຮູ້ຈັກໃຫ້ຄຸນຄ່າແກ່ຄວາມດີ” (ໂມເຊ 6:55), ເຕີບໂຕໃນສັດທາຂອງເຮົາໃນພຣະຜູ້ຊ່ວຍໃຫ້ລອດຂອງເຮົາ ພຣະເຢຊູຄຣິດ ແລະ ການຊົດໃຊ້ອັນສັກສິດຂອງພຣະອົງ, ແລະ ນ້ອມຮັບແຜນແຫ່ງຄວາມສຸກຂອງພຣະບິດາຂອງເຮົາ. ເຮົາຢູ່ທີ່ນີ້ເພື່ອກາຍເປັນເໝືອນດັ່ງພຣະບິດາເທິງສະຫວັນຂອງເຮົາ.
ໂດຍບໍ່ມີຄວາມຊົງຈຳກ່ຽວກັບຊີວິດກ່ອນມະຕະຂອງເຮົາ, ບາງຄັ້ງ, ເຮົາກໍຮູ້ສຶກໂດດດ່ຽວສຳລັບໂລກທີ່ເຮົາໄດ້ປະໄວ້ຂ້າງຫລັງ. ພຣະບິດາຂອງເຮົາໄດ້ປະທານຂອງປະທານທາງວິນຍານໃຫ້ແກ່ເຮົາ ເພື່ອໃຫ້ເຮົາຍັງຄົງສາມາດຕິດຕໍ່ກັບພຣະອົງໄດ້ ແລະ ຮັບການນຳພາ, ການຊີ້ນຳ, ແລະ ການປອບໂຍນຈາກພຣະອົງ. ເຮົາຮູ້ຈັກຂອງປະທານນີ້ເປັນຢ່າງດີ; ເຮົາເອີ້ນມັນວ່າ ການອະທິຖານ.
ຈົ່ງອະທິຖານຫາພຣະບິດາເທິງສະຫວັນຂອງທ່ານ
ຕໍ່ອາດາມ ແລະ ເອວາ ແລະ ທຸກຄົນທີ່ຈະຕາມພວກເພິ່ນ, ທູດສະຫວັນໄດ້ແນະນຳວ່າ, “ເຈົ້າຈົ່ງກັບໃຈ ແລະ ຮ້ອງຫາພຣະເຈົ້າໃນພຣະນາມຂອງພຣະບຸດຕະຫລອດໄປ” (ໂມເຊ 5:8).
ພຣະເຢຊູໄດ້ສິດສອນວ່າ, “ຈົ່ງໝັ່ນຂໍແລ້ວເຈົ້າຈະໄດ້ຮັບ, ຈົ່ງໝັ່ນຊອກຫາແລ້ວເຈົ້າກໍຈະໄດ້ພົບ; ຈົ່ງໝັ່ນເຄາະແລ້ວຈະມີຜູ້ໄຂໃຫ້ເຈົ້າ” (ມັດທາຍ 7:7). “ແຕ່ສຳລັບເຈົ້າເມື່ອອະທິຖານ, … ຈົ່ງອະທິຖານຫາພຣະບິດາຂອງເຈົ້າ … ໃນທີ່ລັບລີ້” (ມັດທາຍ 6:6). “ດ້ວຍເຫດນັ້ນ ພວກເຈົ້າຄວນອະທິຖານດັ່ງນີ້: ຂ້າແດ່ພຣະບິດາເຈົ້າ ຂອງພວກຂ້ານ້ອຍທັງຫລາຍ, ຂໍໃຫ້ພຣະນາມຂອງພຣະອົງຊົງເປັນທີ່ເຄົາລົບບູຊາ” (ມັດທາຍ 6:9).
ພຣະເຢຊູໄດ້ອະທິຖານຫາພຣະບິດາເທິງສະຫວັນຢູ່ສະເໝີ. “ພຣະອົງໄດ້ຂຶ້ນໄປເທິງພູໜ່ວຍໜຶ່ງເພື່ອອະທິຖານ, ແລະ ໃຊ້ເວລາອະທິຖານຫາພຣະເຈົ້າຢູ່ທີ່ນັ້ນຕະຫລອດຄືນ” (ລູກາ 6:12). “ແລະ … ພຣະອົງໄດ້ຂຶ້ນໄປເທິງພູເຂົາ ເພື່ອອະທິຖານ” (ມາຣະໂກ 6:46). “ແລ້ວ [ພວກເພິ່ນ] ກໍໄປຮອດບ່ອນໜຶ່ງທີ່ຊື່ວ່າ ເຄັດເຊມາເນ: ພຣະອົງກ່າວແກ່ພວກເພິ່ນວ່າ, ຈົ່ງນັ່ງຢູ່ທີ່ນີ້ ໃນຂະນະທີ່ເຮົາໄປອະທິຖານ” (ມາຣະໂກ 14:32). ຂະນະທີ່ຢູ່ເທິງໄມ້ກາງແຂນ, ພຣະເຢຊູໄດ້ອະທິຖານເພື່ອພວກທະຫານທີ່ຄຶງພຣະອົງວ່າ: “ພຣະບິດາເອີຍ, ໂຜດຍົກໂທດໃຫ້ພວກເຂົາດ້ວຍເຖີດ; ພວກເຂົາບໍ່ຮູ້ວ່າພວກເຂົາພວມເຮັດຫຍັງລົງໄປ” (ລູກາ 23:34).
ພຣະຄຳພີແນະນຳເຮົາໃຫ້ “ອະທິຖານຢູ່ທຸກເວລາ” (ລູກາ 21:36; 2 ນີໄຟ 32:9; 3 ນີໄຟ 18:15; ຄຳສອນ ແລະ ພັນທະສັນຍາ 10:5; 19:38; 20:33; 31:12). “ຈົ່ງປຶກສານຳພຣະຜູ້ເປັນເຈົ້າໃນການກະທຳທັງໝົດຂອງລູກ, ແລະ ພຣະອົງຈະຊີ້ທາງໃຫ້ລູກເພື່ອຄວາມດີ” (ແອວມາ 37:37). ນອກຈາກນີ້, ເຮົາ “ຖວາຍຄວາມຂອບພຣະໄທ ແລະ ສັນລະເສີນທັງໝົດ ຊຶ່ງທັງຈິດວິນຍານ [ຂອງເຮົາ] ມີອຳນາດເປັນເຈົ້າຂອງ” (ໂມໄຊຢາ 2:20), ໂດຍຮັບຮູ້ທຸກສິ່ງທີ່ພຣະບິດາກະທຳເພື່ອເຮົາ.
ປະທານຣະໂຊ ເອັມ ແນວສັນ ໄດ້ອະທິບາຍວ່າ: “ການນັບຖືຕົນເອງທາງວິນຍານເລີ່ມຕົ້ນດ້ວຍການຮັບຮູ້ວ່າ ແຕ່ລະເຊົ້າວັນໃໝ່ເປັນຂອງປະທານຈາກພຣະເຈົ້າ. … ພຣະອົງປົກປັກຮັກສາເຮົາໃນແຕ່ລະວັນ ແລະ ສະໜັບສະໜູນເຮົາຈາກຊ່ວງໜຶ່ງໄປຫາອີກຊ່ວງໜຶ່ງຂອງຊີວິດ (ເບິ່ງ ໂມໄຊຢາ 2:21).”
ນີໄຟໄດ້ກ່າວວ່າ, “ຖ້າຫາກພວກທ່ານຈະເຊື່ອຟັງພຣະວິນຍານຊຶ່ງສິດສອນມະນຸດໃຫ້ອະທິຖານ, ພວກທ່ານຈະຮູ້ວ່າພວກທ່ານຕ້ອງອະທິຖານ; ເພາະວິນຍານຊົ່ວບໍ່ສິດສອນມະນຸດໃຫ້ອະທິຖານ, ແຕ່ສິດສອນເຂົາວ່າບໍ່ຕ້ອງອະທິຖານ” (2 ນີໄຟ 32:8).
ລາຍລະອຽດຈາກ Christ Raising the Daughter of Jairus [ພຣະຄຣິດນຳລູກສາວຂອງຢາອີໂຣກັບຄືນມາມີຊີວິດ], ໂດຍ ກະເຣກ ເຄ ອໍເຊັນ
ຈາກຕົວຢ່າງຂອງພຣະຜູ້ຊ່ວຍໃຫ້ລອດຂອງເຮົາ ແລະ ຄຳແນະນຳຂອງທູດສະຫວັນ ແລະ ສາດສະດາຕະຫລອດຫລາຍສັດຕະວັດ, ເຮົາຮູ້ດີວ່າຕ້ອງອະທິຖານທຸກວັນ ເພື່ອສະແດງຄວາມກະຕັນຍູສຳລັບພອນຂອງເຮົາ, ແລະ ຮັກສາຄຳອະທິຖານຢູ່ໃນໃຈເຮົາຢູ່ສະເໝີ. ເຮົາມີໜ້າທີ່ຮັບຜິດຊອບທີ່ຈະສື່ສານກັບພຣະບິດາຂອງເຮົາ.
ແຕ່ສິ່ງທີ່ໜ້າສັນລະເສີນກວ່ານັ້ນກໍຄື, ພຣະບິດາຜູ້ສະຖິດຢູ່ໃນສະຫວັນຂອງເຮົາຊົງຕອບຄຳອະທິຖານຂອງເຮົາ. ຄຳຖາມທີ່ຊວນຄິດຢູ່ໃນໂລກມະນຸດນີ້ກໍຄື, ເຮົາຈະຮັບ ແລະ ເຂົ້າໃຈຄຳຕອບ, ການຊີ້ນຳ, ແລະ ການປອບໂຍນທີ່ມາຈາກພຣະບິດາຂອງເຮົາໄດ້ດີຂຶ້ນແນວໃດ?
ຕະຫລອດໄລຍະເວລາຫລາຍກວ່າເຈັດທົດສະວັດຂອງຊີວິດ, ຂ້າພະເຈົ້າຮູ້ວ່າພຣະບິດາຂອງເຮົາກ່າວກັບເຮົາ. ເຮົາບໍ່ໄດ້ຢູ່ຄົນດຽວ. ຜູ້ຢູ່ໃນສະຫວັນຈະເບິ່ງແຍງເຮົາ ແລະ ຊ່ວຍເຫລືອເຮົາ ເມື່ອເຮົາສະແຫວງຫາທີ່ຈະຕິດຕາມພຣະຜູ້ຊ່ວຍໃຫ້ລອດ.
ການໄດ້ຮັບຄຳຕອບຕໍ່ຄຳອະທິຖານຂອງເຮົາເລີ່ມຕົ້ນດ້ວຍສັດທາຂອງເຮົາໃນພຣະດາເທິງສະຫວັນຂອງເຮົາ ແລະ ໃນພຣະບຸດຂອງພຣະອົງ, ພຣະເຢຊູຄຣິດ. ພຣະເຢຊູໄດ້ກ່າວວ່າ, “ຢ່າວິຕົກເລີຍ, ຈົ່ງເຊື່ອເທົ່ານັ້ນ” (ມາຣະໂກ 5:36). ເຮົາໄວ້ວາງໃຈໃນພຣະອົງ, ເຮັດໃຫ້ສຸດຄວາມສາມາດຂອງເຮົາເພື່ອຮັກສາພຣະບັນຍັດ, ແລະ ຫລຽວຫາພຣະຫັດຂອງພຣະອົງໃນທຸກສິ່ງທັງປວງ. “ບໍ່ມີສິ່ງໃດທີ່ມະນຸດຈະເຮັດໃຫ້ພຣະເຈົ້າຂຸ່ນເຄືອງ … ຍົກເວັ້ນແຕ່ຜູ້ທີ່ ບໍ່ສາລະພາບວ່າພຣະຫັດຂອງພຣະອົງຢູ່ໃນທຸກສິ່ງທັງປວງ, ແລະ ບໍ່ເຊື່ອຟັງຕໍ່ພຣະບັນຍັດຂອງພຣະອົງ” (ຄຳສອນ ແລະ ພັນທະສັນຍາ 59:21).
ພຣະຫັດຂອງພຣະເຈົ້າໃນຊີວິດຂອງເຮົາບໍ່ໄດ້ໝາຍຄວາມວ່າ ພຣະອົງເປັນຕົ້ນເຫດຂອງຄວາມຊົ່ວຮ້າຍ ຫລື ຄວາມເສົ້າສະຫລົດທີ່ໜ້າຢ້ານກົວໃນໂລກຂອງເຮົາ. ເຖິງຢ່າງໃດກໍຕາມ, ມັນໝາຍຄວາມວ່າ ໃນຊ່ວງເວລາທີ່ທ່ານມີຄວາມຍາກລຳບາກ ແລະ ຄວາມບໍ່ຍຸດຕິທຳ, ພຣະອົງຈະຢູ່ຄຽງຂ້າງທ່ານ, ເພີ່ມຄວາມເຂັ້ມແຂງໃຫ້ແກ່ຄວາມສາມາດຂອງທ່ານ, ປອບໂຍນທ່ານ, ແລະ “ຕັ້ງຄວາມທຸກຂອງລູກໄວ້ເພື່ອຜົນປະໂຫຍດຂອງລູກ” (2 ນີໄຟ 2:2).
ຟັງສຸລະສຽງຂອງພຣະອົງ
ເມື່ອເຮົາມີສັດທາໃນພຣະອົງ ແລະ ຮັກສາພຣະບັນຍັດຂອງພຣະອົງ, ເຮົາຈະຮຽນຮູ້ທີ່ຈະຟັງສຸລະສຽງຂອງພຣະອົງໄດ້ດີຂຶ້ນໂດຍທຳມະຊາດ.
ໃນເດືອນກັນຍາ ປີ 1993, ປີທຳອິດຂອງຂ້າພະເຈົ້າໃນຖານະເຈົ້າໜ້າທີ່ຊັ້ນຜູ້ໃຫຍ່, ປະທານເຈມ ອີ ຟາວ (1920–2007), ຊຶ່ງຕອນນັ້ນເພິ່ນເປັນສະມາຊິກຂອງກຸ່ມອັກຄະສາວົກສິບສອງ, ໄດ້ເຊື້ອເຊີນແຄຕີ້ ພັນລະຍາຂອງຂ້າພະເຈົ້າ ແລະ ຂ້າພະເຈົ້າໃຫ້ເຂົ້າຮ່ວມກອງປະຊຸມໃຫ້ຄຳດົນໃຈທີ່ມະຫາວິທະຍາໄລ ບຣິກຳ ຢັງ ກັບເພິ່ນ. ຈື່ໄດ້ບໍວ່າ, ປີ 1993 ເປັນຊ່ວງກ່ອນທີ່ຈະມີໂທລະສັບມືຖື, ສື່ສັງຄົມ, ແລະ ອິນເຕີເນັດທີ່ແຜ່ຫລາຍ.
ໃນຄຳປາໄສຂອງເພິ່ນ, ມີຫົວຂໍ້ວ່າ “ສຸລະສຽງຂອງພຣະວິນຍານ,” ປະທານຟາວໄດ້ເຕືອນວ່າ: “ໃນຍຸກຂອງທ່ານ ທ່ານຈະຖືກລະດົມດ້ວຍສຽງອັນຫລາກຫລາຍ ທີ່ບອກວ່າທ່ານຄວນໃຊ້ຊີວິດແນວໃດ, ຈະສະໜອງຄວາມຕ້ອງການຂອງທ່ານແນວໃດ, ແລະ ຈະມີທຸກສິ່ງໄດ້ແນວໃດ. ທ່ານຈະມີຊ່ອງໂທລະພາບຫລາຍເຖິງຫ້າຮ້ອຍຊ່ອງໃຫ້ເລືອກ. ມັນຈະມີຊອບແວ, ໂມເດັມຄອມພິວເຕີແບບໂຕ້ຕອບ, ຖານຂໍ້ມູນ, ແລະ ກະດານຂ່າວທຸກປະເພດ, ຈະມີການຈັດພິມຈາກຄອມພິວເຕີ, ເຄື່ອງຮັບສັນຍານຈາກດາວທຽມ, ແລະ ເຄືອຂ່າຍການສື່ສານທີ່ຈະເຮັດໃຫ້ທ່ານຫາຍໃຈບໍ່ອອກດ້ວຍຂໍ້ມູນຢ່າງຫລວງຫລາຍ. … ສຽງທີ່ທ່ານຕ້ອງຮຽນຮູ້ທີ່ຈະຟັງຄືສຸລະສຽງຂອງພຣະວິນຍານ.”
ປະທານບອຍ ເຄ ແພ໊ກເກີ (1924–2015), ປະທານກຸ່ມອັກຄະສາວົກສິບສອງ, ໄດ້ສິດສອນກ່ຽວກັບສຸລະສຽງແຜ່ວເບົາຂອງພຣະວິນຍານ ໂດຍເລົ່າປະສົບການຂອງ ຈອນ ເບີໂຣ, ນັກທຳມະຊາດວິທະຍາ, ຂະນະທີ່ລາວກຳລັງຍ່າງໄປກັບໝູ່ເພື່ອນໃນສວນສາທາລະນະທີ່ເຕັມໄປດ້ວຍຜູ້ຄົນ. ຕໍ່ໄປນີ້ແມ່ນຖ້ອຍຄຳຂອງປະທານແພ໊ກເກີ:
“ທ່າມກາງສຽງຕ່າງໆໃນຊີວິດເມືອງ [ທ້າວ ເບີໂຣ] ໄດ້ຍິນສຽງນົກຮ້ອງ.
“ລາວໄດ້ຢຸດ ແລະ ຟັງ! ຄົນທີ່ຢູ່ກັບລາວບໍ່ໄດ້ຍິນສຽງນັ້ນ. ລາວຫລຽວເບິ່ງອ້ອມຮອບ. ບໍ່ມີໃຜສັງເກດເຫັນເລີຍ.
“ລາວບໍ່ພໍໃຈທີ່ທຸກຄົນພາດສິ່ງທີ່ສວຍງາມນັ້ນ.
“ລາວໄດ້ຈົກເອົາເງິນຫລຽນຈາກຖົງຂອງລາວ ແລະ ໄດ້ໂຍນມັນຂຶ້ນເທິງອາກາດ. ມັນໄດ້ຕົກລົງໃສ່ພື້ນດັງຕິ່ງ, ບໍ່ໄດ້ດັງແຮງກວ່າສຽງນົກຮ້ອງ. ທຸກຄົນໄດ້ຫັນມາເບິ່ງ, ເຂົາເຈົ້າໄດ້ຍິນມັນ!
“ເປັນເລື່ອງຍາກທີ່ຈະແຍກສຽງຂອງເມືອງທັງໝົດຈາກສຽງນົກຮ້ອງເລີຍ. ແຕ່ທ່ານສາມາດໄດ້ຍິນມັນ. ທ່ານສາມາດໄດ້ຍິນມັນຢ່າງຊັດເຈນຖ້າຫາກທ່ານຝຶກຝົນຕົນເອງໃຫ້ຕັ້ງໃຈຟັງ.”
ຄຳສອນຂອງປະທານແພ໊ກເກີກ່ຽວກັບພຣະວິນຍານບໍລິສຸດໄດ້ເກີດຂຶ້ນໃນປີ 1979, ຊຶ່ງເປັນຊ່ວງເວລາທີ່ຊີວິດງຽບສະຫງົບກວ່າ ແລະ ສຽງຕ່າງໆຂອງໂລກງຽບລົງກວ່າຕອນນີ້ຫລາຍ.
ປະທານແນວສັນໄດ້ສິດສອນວ່າ, “ຖ້າຫາກທ່ານເອົາໃຈໃສ່ຕໍ່ຂ່າວສານຈາກສື່ສັງຄົມຫລາຍກວ່າສຽງສື່ມຂອງພຣະວິນຍານ, ແລ້ວທ່ານກໍຈະເຮັດໃຫ້ຕົນເອງຕົກຢູ່ໃນຄວາມສ່ຽງທາງວິນຍານ.”
ປະທານຟາວໄດ້ກ່າວວ່າ, “ຖ້າເຮົາຢາກຟັງສຸລະສຽງຂອງພຣະວິນຍານ, ເຮົາກໍຕ້ອງເປີດຫູຂອງເຮົາ, ຫັນຕາແຫ່ງສັດທາໄປທີ່ແຫລ່ງຂອງສຽງນັ້ນ, ແລະ ຫລຽວຂຶ້ນໄປທາງຟ້າສະຫວັນ.”
ສຸລະສຽງຂອງພຣະວິນຍານນີ້ມາເຖິງທາງສະຕິປັນຍາ ແລະ ຄວາມຮູ້ສຶກຂອງເຮົາ. “ແທ້ຈິງແລ້ວ, ຈົ່ງເບິ່ງ, ເຮົາຈະບອກເຈົ້າໃນຈິດໃຈ ແລະ ໃນຫົວໃຈຂອງເຈົ້າ, ໂດຍພຣະວິນຍານບໍລິສຸດ, ຊຶ່ງຈະມາສູ່ເຈົ້າ ແລະ ຈະມາສະຖິດຢູ່ໃນຫົວໃຈຂອງເຈົ້າ” (ຄຳສອນ ແລະ ພັນທະສັນຍາ 8:2). ຟັງຈິດສຳນຶກຜິດຊອບຂອງທ່ານ—ການເປີດເຜີຍມັກຈະເລີ່ມຕົ້ນຈາກທີ່ນັ້ນ.
ລະຫວ່າງການໄປຢ້ຽມຢາມ Girls’ Home Boys’ Town Complex ໃນເມືອງມາກິນາ, ປະເທດຟີລິບປິນ, ໃນເດືອນກຸມພາ ປີ 2024, ແອວເດີ ແອນເດີເຊັນ ໄດ້ສິດສອນເດັກນ້ອຍວ່າ ພວກເຂົາເປັນລູກຂອງພຣະເຈົ້າ: “ພຣະອົງຮັກພວກເຈົ້າ. ແລະ ພວກເຈົ້າສາມາດອ້ອນວອນພຣະອົງໄດ້. ພຣະອົງຈະໄດ້ຍິນຄຳອະທິຖານຂອງພວກເຈົ້າ.”
ອະທິຖານດ້ວຍໃຈທີ່ເຊື່ອ
ຄຳຕອບ ແລະ ຄວາມປະທັບໃຈ ບໍ່ສາມາດຖືກບັງຄັບໄດ້. ເຮົາອະທິຖານ ແລະ ເຮົາລໍຖ້າດ້ວຍໃຈທີ່ເຊື່ອ. ຄຳຕອບບາງອັນຈະບໍ່ເກີດຂຶ້ນໃນຊີວິດນີ້, ແຕ່ສຳລັບຜູ້ທີ່ຊອບທຳ, ພຣະຜູ້ເປັນເຈົ້າຈະສົ່ງສັນຕິສຸກມາໃຫ້ສະເໝີ (ເບິ່ງ ໂຢຮັນ 14:27). ຄຳຕອບມັກຈະມາເມື່ອເຮົາອະທິຖານເພື່ອຊ່ວຍຜູ້ທີ່ຢູ່ອ້ອມຂ້າງເຮົາ. ບາງຄັ້ງ, ຄຳຕອບຈະມາ “ເທື່ອລະບັນທັດ, ເປັນຂໍ້ເລັກໆໜ້ອຍໆ” (ຄຳສອນ ແລະ ພັນທະສັນຍາ 98:12).
ສຽງຈາກສະຫວັນສາມາດມາເຖິງເຮົາໄດ້ໃນເວລາທີ່ບໍ່ຄາດຄິດ ແລະ ໃນສະຖານທີ່ທີ່ບໍ່ຄາດຄິດ, ແຕ່ເຮົາຈະພົບໂອກາດທີ່ໂດດເດັ່ນທີ່ສຸດຂອງເຮົາໃນບ່ອນທີ່ງຽບສະຫງົບ ແລະ ສັກສິດ. ໃນຄວາມງຽບສະຫງົບຂອງການອະທິຖານ ແລະ ການໄຕ່ຕອງໃນຕອນເຊົ້າ, ເຮົາຈະພົບພອນທີ່ບໍ່ທຳມະດາ. ການອ່ານພຣະຄຳພີທຸກວັນ, ເປັນສ່ວນຕົວ, ໂດຍບໍ່ຖືກລົບກວນ, ເຖິງແມ່ນບາງຄັ້ງຈະເປັນເລື່ອງປົກກະຕິ, ຈະເຮັດໃຫ້ສຸລະສຽງຂອງພຣະວິນຍານເຂົ້າສູ່ໃຈຂອງເຮົາເໝືອນໄຟໃນບາງເວລາ.
ບາງຄັ້ງ, ຄວາມປະທັບໃຈແມ່ນມາຈາກສິ່ງທີ່ເຮົາກຳລັງອ່ານໂດຍສະເພາະ, ແລະ ໃນບາງເວລາ, ສິ່ງທີ່ເຮົາກຳລັງໄຕ່ຕອງ ຈະໃຫ້ຄຳຕອບກັບຄວາມກັງວົນໃນເລື່ອງອື່ນທີ່ແຕກຕ່າງກັນຫລາຍ. ຈື່ຖ້ອຍຄຳຂອງແອວເດີ ຣໍເບີດ ດີ ແຮວສ໌ ໄດ້ບໍທີ່ວ່າ: “ເມື່ອເຮົາຢາກເວົ້າກັບພຣະເຈົ້າ, ເຮົາອະທິຖານ. ແລະ ເມື່ອເຮົາຢາກໃຫ້ພຣະອົງກ່າວກັບເຮົາ, ເຮົາຄົ້ນຄວ້າພຣະຄຳພີ.”
ໃນຂະນະທີ່ສຽງ ແລະ ສິ່ງລົບກວນຕ່າງໆຂອງໂລກ ໝຸນອ້ອມຮອບຕົວເຮົາຢູ່, ພຣະຜູ້ເປັນເຈົ້າໄດ້ຊີ້ນຳສາດສະດາຂອງພຣະອົງໃຫ້ສ້າງພຣະວິຫານເພີ່ມຫລາຍຂຶ້ນເລື້ອຍໆ. ໃນບ້ານອັນສັກສິດເຫລົ່ານີ້ຂອງພຣະຜູ້ເປັນເຈົ້າ, ເມື່ອເຮົາປະຄວາມທ້າທາຍຂອງເຮົາໄວ້ຂ້າງນອກ ແຕ່ເຂົ້າໄປດ້ວຍຄຳອະທິຖານ ແລະ ຄວາມກັງວົນຂອງເຮົາ, ແລ້ວເຮົາຈະໄດ້ຮັບການສິດສອນຄວາມຈິງຂອງນິລັນດອນ.
ປີແລ້ວນີ້, ປະທານແນວສັນໄດ້ໃຫ້ຄຳສັນຍາທີ່ອັດສະຈັນນີ້ວ່າ: “ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ນີ້ຄືຄຳສັນຍາຂອງຂ້າພະເຈົ້າ. ບໍ່ມີສິ່ງໃດທີ່ຈະຊ່ວຍທ່ານໃຫ້ຈັບຮາວເຫລັກໄວ້ໃຫ້ແໜ້ນ ຫລາຍໄປກວ່າ ການນະມັດສະການໃນພຣະວິຫານເປັນປະຈຳເທົ່າທີ່ສະພາບການຈະເອື້ອອຳນວຍ. ບໍ່ມີສິ່ງໃດຈະປົກປ້ອງທ່ານ ຫລາຍໄປກວ່າ ເມື່ອທ່ານພົບກັບໝອກແຫ່ງຄວາມມືດຂອງໂລກ. ບໍ່ມີສິ່ງໃດທີ່ຈະຄໍ້າຊູປະຈັກພະຍານຂອງທ່ານ ເຖິງອົງພຣະເຢຊູຄຣິດເຈົ້າ ແລະ ການຊົດໃຊ້ຂອງພຣະອົງ ຫລື ຊ່ວຍໃຫ້ທ່ານເຂົ້າໃຈແຜນອັນດີເລີດຂອງພຣະເຈົ້າ ຫລາຍໄປກວ່າ ນີ້. ບໍ່ມີສິ່ງໃດທີ່ຈະເລົ້າໂລມຈິດວິນຍານຂອງທ່ານ ຫລາຍໄປກວ່າ ນີ້ໃນຊ່ວງເວລາແຫ່ງຄວາມເຈັບປວດ. ບໍ່ມີສິ່ງໃດທີ່ຈະເປີດຟ້າສະຫວັນ ຫລາຍໄປກວ່າ ນີ້. ບໍ່ມີສິ່ງໃດ!”
ກອງປະຊຸມໃຫຍ່ສາມັນແຕ່ລະຄັ້ງຈະນຳພອນເພີ່ມເຕີມອັນອຸດົມສົມບູນມາໃຫ້. ໃນເດືອນເມສາທີ່ຈະມາເຖິງນີ້, ອີກເທື່ອໜຶ່ງ, ພວກເຮົາຈະພົບກັນໃນກອງປະຊຸມໃຫຍ່ສາມັນ ເພື່ອຟັງສຸລະສຽງຂອງພຣະຜູ້ເປັນເຈົ້າ. ເຮົາມາຮ່ວມກອງປະຊຸມໃຫຍ່ສາມັນດ້ວຍການອະທິຖານ ແລະ ການກຽມພ້ອມ. ສຳລັບເຮົາແຕ່ລະຄົນ, ກໍມາພ້ອມກັບຄວາມກັງວົນທີ່ເລັ່ງດ່ວນ ແລະ ຄຳຖາມທີ່ໃຈຈົດຈໍ່. ເຮົາມາເພື່ອຕໍ່ເຕີມສັດທາຂອງເຮົາໃນພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ, ແລະ ເພື່ອເພີ່ມຄວາມເຂັ້ມແຂງໃຫ້ແກ່ຄວາມສາມາດຂອງເຮົາ ທີ່ຈະຕ້ານທານກັບການລໍ້ລວງ. ເຮົາມາເພື່ອຮັບການສິດສອນຈາກເບື້ອງບົນ. ຂ້າພະເຈົ້າສັນຍາກັບທ່ານວ່າ ເມື່ອທ່ານກຽມພ້ອມ ແລະ ມາຮ່ວມກອງປະຊຸມໃຫຍ່ສາມັນພາກຕ່າງໆດ້ວຍການອະທິຖານ, ທ່ານຈະຮູ້ສຶກເຖິງຄຳຕອບສຳລັບຄວາມກັງວົນຂອງທ່ານ, ແລະ ທ່ານຈະຮູ້ວ່າ “ພຣະຫັດຂອງສະຫວັນ” ຢູ່ເທິງທ່ານ.
ຈົ່ງມີສັດທາວ່າພຣະບິດາເທິງສະຫວັນຂອງທ່ານກຳລັງກ່າວກັບທ່ານ. ພຣະອົງເປັນແນວນັ້ນແທ້ໆ! ຂໍໃຫ້ສັດທາຂອງທ່ານໃນພຣະອົງ ແລະ ພຣະບຸດທີ່ຮັກຂອງພຣະອົງ ຈົ່ງຊ່ວຍທ່ານເປີດມ່ານ ແລະ ຮັບເອົາສຸລະສຽງຂອງພຣະບິດາຂອງທ່ານ. ຂ້າພະເຈົ້າເປັນພະຍານວ່າ ພຣະອົງຢູ່ທີ່ນັ້ນ ແລະ ຮັກທ່ານຫລາຍກວ່າຄຳເວົ້າຈະສາມາດບັນຍາຍໄດ້.
© 2025 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, March 2025. Laotian. 19605 331