Tarigagayan ti Nailangitan nga Ama a Makasaritanakayo

Kada Adan ken Eva ken amin a sumurot kadakuada, inbilin ti maysa nga anghel, “Agbabawikayo ken umawagkayo iti Dios iti nagan ti Anak iti agnanayon” (Moises 5:8).

Insuro ni Jesus, “Agdawatkayo, ket maikkankayto, agsapulkayo, ket makasarakkayto; umawagkayo, ket mailukatankayto” (Mateo 7:7 “No agkararagkayo, … agkararagkayo iti Amayo … iti nalimed” (Mateo 6:6). “Kastoy ngarud ti panagkararagyo: Amami nga addaka sadi langit, madaydayaw koma ti naganmo” (Mateo 6:9).

Nagtultuloy a nagkararag ni Jesus iti Amana. “Napan isuna iti bantay tapno agkararag, ket nagtultuloy iti agpatnag a nagkararag iti Dios” (Lucas 6:12). “Ket … pimmanaw a napan iti bantay tapno agkararag” (Marcos 6:46). “Ket dimtengda iti maysa a lugar a nanaganan iti Getsemane: ket kinunana kadagiti disipulona, Agtugawkayo ditoy, bayat ti panagkararagko” (Marcos 14:32). Bayat ti kaaddana iti krus, inkararagan ni Jesus dagiti soldado a nangilansa Kenkuana: “Ama, pakawanem ida; ta dida ammo ti ar-aramidenda” (Lucas 23:34).

Balakadannatayo dagiti nasantuan a kasuratan nga “agkararag a kanayon” (Lucas 21:36; 2 Nephi 32:9; 3 Nephi 18:15; Doktrina ken Katulagan 10:5; 19:38; 20:33; 31:12). “Agpabalakadka iti Apo iti amin nga aramidem, ket iturongnaka iti pagsayaatam” (Alma 37:37). Mainayon pay, “itedtayo ti amin a panagyaman ken panagdayaw a kabaelan ti sibubukel a kararuatayo” (Mosiah 2:20), a bigbigentayo ti amin nga ar-aramiden ti Amatayo para kadatayo.

Inlawlawag ni Presidente Russell M. Nelson: “Mangrugi ti naespirituan a panagraem iti bagi iti pannakabigbig a tunggal baro nga agsapa ket maysa a sagut manipud iti Dios. … Taginayonennatayo iti inaldaw ken saranayennatayo iti tunggal kanito (kitaen iti Mosiah 2:21).”

Kinuna ni Nephi, “No dumngegkayo iti Espiritu a mangisuro iti tao nga agkararag, maammuanyo a masapul nga agkararagkayo; gapu ta saan nga isuro ti dakes nga espiritu ti tao nga agkararag, ngem isurona a saan nga agkararag.” (2 Nephi 32:8).

Detalye manipud iti Ni Cristo a Mangpagpagungar iti Anak a Babai ni Jairo, ni Greg K. Olsen

Babaen ti pagwadan ti Mangisalakantayo ken ti balakad dagiti anghel ken propeta iti panaglabas dagiti siglo, nalawag nga ammotayo ti agkararag iti inaldaw tapno iyebkas ti panagyaman kadagiti bendisiontayo, ken agtalinaed iti kararag iti pusotayo a kanayon. Addaantayo iti pagrebbengan a makiuman iti Amatayo.

Ngem ad-adda pay a nadayag, sungbatan ti Amatayo idiay Langit dagiti kararagtayo Ti nainkapanunotan a saludsod iti daytoy mortal a lubong ket, kasano a nasaysayaat a maawat ken maawatantayo dagiti sungbat, panangiturong, ken liwliwa nga aggapu iti Amatayo?

Babaen ti nasurok a pito a dekada a panagbiagko, ammok a makisarsarita kadatayo ni Amatayo. Ditayo agmaymaysa. Dagiti nailangitan a parsua ti mangbantay ken tumulong kadatayo bayat ti panagkalikagumtayo a mangsurot iti Mangisalakan.

Mangrugi ti panangawat kadagiti sungbat kadagiti kararagtayo iti pammatitayo iti Nailangitan nga Amatayo ken iti Anakna, ni Jesucristo. Kinuna ni Jesus, “Dikayo agbuteng, mamatikayo laeng” (Marcos 5:36). Agtalektayo kenkuana, aramidentayo ti amin a kabaelantayo a mangtungpal kadagiti bilin, ken sapulentayo ti imana iti amin a banag. “Awan ti pagbasolan ti tao iti Dios … malaksid kadagiti saan a mangipudno iti imana iti amin a banag, ken dagiti di agtungpal kadagiti bilinna” (Doktrina ken Katulagan 59:21).

Ti ima ti Dios iti biagtayo dina kayat a sawen nga Isu ti pakaigapuan dagiti dakes wenno nakaam-amak a trahedia nga adda iti lubongtayo. Nupay kasta, kayatna a sawen nga iti panawen ti rigat ken kinaawan hustisia, agtakderto Isuna iti sibaymo, papigsaenna dagiti kabaelam, liwliwaennaka, ken “ikonsagrarna dagiti sagabaem nga agpaay iti pagimbagam” (2 Nephi 2:2).

No addaantayo iti pammati Kenkuana ken tungpalentayo dagiti bilinna, gagangay a masursurotayo a nasaysayaat a mangngegan ti timekna.

Idi Septiembre 1993, umuna a tawenko kas General Authority, ni Presidente James E. Faust (1920–2007), maysa a miembro idi ti Korum dagiti Sangapulo ket Dua nga Apostol, inawisnakami ken ni baketko a ni Kathy, a tumabuno iti maysa a debosional iti Brigham Young University a kaduana. Laglagipen, nga idi 1993 ket sakbay ti nasaknap a pannakagun-od dagiti smartphone, social media, ken internet.

Iti saritana, a napauluan iti “Ti Timek ti Espiritu,” namakdaar ni Presidente Faust: “Iti kaputotanyo mangngeganyonto dagiti nakaad-adu a timek a mangibagbaga kadakayo no kasano ti agbiag, no kasano a mapnek dagiti tarigagayyo, no kasano nga addaankayo ​​amin iti daytoy. Addanto agingga iti lima gasut a channel ti telebision iti murdong ti ramayyo. Addanto amin a kita ti software, interactive computer modem, database, ken bulletin board; addanto desktop publishing, satellite receiver, ken network ti komunikasion a mangleppesto kadakayo iti impormasion. … Ti timek a nasken a sursuruenyo nga ipangag isu ti timek ti Espiritu.”

Ni Presidente Boyd K. Packer (1924–2015), Presidente ti Korum dagiti Sangapulo ket Dua nga Apostol, insurona ti naulimek, bassit a timek ti Espiritu iti panangisalaysayna iti maysa a padas ni John Burroughs, maysa a naturalista, bayat ti pannagnana a kaduana dagiti gagayyemna iti napusek a parke. Adtoy dagiti balikas ni Presidente Packer:

“Iti laksid dagiti gagangay nga arimbangaw iti siudad nangngegan ni [Mr. Burroughs] ti kanta ti maysa a tumatayab.

“Nagsardeng ket dinengngegna! Saan a nangngeg dagiti kaduana daytoy. Kimmita iti aglawlaw. Awan ti asino man a nakadlaw iti daytoy.

“Nariribukan a saan a makita ti tunggal maysa ti napintas unay a maysa a banag.

“Nangala iti sensilio iti bulsana sa impalatokna iti tangatang. Natinnag daytoy iti sementado a kalsada ket nangpataud iti uni, a saan a napigpigsa ngem ti kanta ti tumatayab. Timmaliaw ti amin; mangngegda dayta!

“Narigat a mailasin iti amin nga uni ti trapiko iti siudad ti kanta ti tumatayab. Ngem mangngeganyo daytoy. Mangngeganyo daytoy a silalawag no sanayenyo ti bagiyo a dumngeg iti daytoy.”

Napasamak dagiti pannursuro ni Presidente Packer maipapan iti Espiritu Santo idi 1979, panawen a naulimek nga amang ti biag ken ad-adda a naparmek ti arimbangaw ti lubong idi ngem ita.

Insuro ni Presidente Nelson, “No ad-adda nga ipapaaymo ti atension kadagiti feed manipud iti social media ngem kadagiti arasaas ti Espiritu, ngarud ikabkabilmo ti bagim iti naespirituan a peggad.”

Kinuna ni Presidente Faust, “No dumngegtayo iti timek ti Espiritu, nasken a luktantayo met dagiti lapayagtayo, iturongtayo ti mata ti pammati iti pagtaudan ti timek, ken kumita a sititibker nga agturong iti langit.”

Daytoy a timek ti Espiritu ket umay nga agpadpada iti panunot ken riknatayo. “Ibagak kenka iti panunotmo ken iti pusom, babaen ti Espiritu Santo, ti dumteng kenka ken agnaed iti pusom” (Doktrina ken Katulagan 8:2). Denggem ti konsiensiam—masansan a mangrugi sadiay ti paltiing.

Agkararagkayo nga addaan iti Mamatpati a Puso

Saan a mapilit dagiti sungbat ken impresion. Agkararagtayo ken aguraytayo nga addaan iti mamatpati a puso. Sumagmamano a sungbat ti saanto nga umay iti daytoy a biag, ngem kadagiti nalinteg, kanayon nga ibaonto ti Apo ti kappiana (kitaen ti Juan 14:27). Masansan nga umay dagiti sungbat no agkarkararagtayo a mangtulong kadagiti adda iti aglawlawtayo. No dadduma, umayda “iti tunggal binatog, iti tunggal annuroten” (Doktrina ken Katulagan 98:12).

Mabalin nga umay kadatayo ti timek ti langit kadagiti di ninamnama a panawen ken kadagiti di ninamnama a lugar, ngem masarakantayo dagiti kadadakkelan a gundawaytayo kadagiti naulimek nga espasio ken sagrado a lugar. Iti kinaulimek dagiti nasapa a panagkararag ken panagutob iti bigat, makitak dagiti karkarna a bendision. Ti inaldaw, personal, saan a masinga a panagbasa kadagiti nasantuan a kasuratan, nupay rutina no dadduma, ket mangisangbay iti timek ti Espiritu iti pusotayo a kas iti apuy no dadduma.

No dadduma, dagiti impresion ket espesipiko manipud iti no ania dagiti basbasaentayo, ken no dadduma, ti pampanunotentayo ket mangyeg iti sungbat iti naiduma unay a pakaseknan. Laglagipen dagiti balikas ni Elder Robert D. Hales: “No kayattayo a kasarita iti Dios, agkararagtayo. Ket no tarigagayantayo nga Isu ti makisao kadatayo, sukisokentayo dagiti nasantuan a kasuratan.”

Idi manglawlaw kadatayo ti arimbangaw ken pakasingaan ti lubong, binilin ti Apo ti propetana a mangbangon iti ad-adu ken ad-adu pay a templo. Kadagitoy sagrado a balay ti Apo, bayat ti panangpanawtayo kadagiti karittayo iti ruar ngem sumrektayo nga addaan kadagiti kararag ken pakaseknantayo, maisuro kadatayo dagiti kinapudno ti kinaagnanayon.

Makatawen ti napalabas, inted kadatayo ni Presidente Nelson daytoy nakaskasdaaw a kari: “Patpatgek a kakabsatko, adtoy ti karik. Awanto ti mangtulong kadakayo nga ad-adda pay a kumpet a naimbag iti landok a pagkaptan ngem iti panagdaydayaw iti templo a masansan no ipalubos dagiti kasasaadyo. Awanto ti mangsalaknib kadakayo nga ad-adda pay no maipasangokayo kadagiti angep ti kinasipnget ti lubong. Awanto ti mangpabileg iti pammaneknekyo ken Apo Jesucristo ken ti Pannubbotna wenno mangtulong kadakayo a mangipaawat iti natan-ok a plano ti Dios nga ad-adda pay. Awanto ti mangep-ep iti ti espirituyo nga ad-adda pay iti panawen ti panagsaem. Awanto ti manglukat kadagiti langit nga ad-adda pay. Awan!”

Tunggal sapasap a komperensia ket mangyeg kadagiti nayon a nawadwad a bendision. Iti umay a bulan ti Abril, maminsan manen, agtataripnongtayto iti sapasap a komperensia tapno mangngegtayo ti timek ti Apo. Umaytayo iti sapasap a komperensia a nakapagkararag ken nakapagsagana. Para iti tunggal maysa kadatayo, adda dagiti nainget a pakadanagan ken napasnek a saludsod. Umaytayo a mangpabaro iti pammatitayo iti Mangisalakantayo, ni Jesucristo, ken mangpapigsa iti kabaelantayo a mangkedked iti sulisog. Umaytayo a masursuruan manipud iti ngato. Ikarik kadakayo a bayat ti panagsagana ken yaayyo a sikakararag kadagiti sesion ti sapasap a komperensia, mariknayonto dagiti sungbat kadagiti pakaseknanyo, ket maammuanyonto nga adda kadakayo ti “ima ti langit.”

Maaddaankayo iti pammati a makisarsarita ti Nailangitan nga Amayo kadakayo. Agpayso dayta! Tulongannakayo koma ti pammatiyo Kenkuana ken iti Ay-ayatenna nga Anak a mangwaknit iti belo ken umawat iti timek ti Amayo. Paneknekak nga adda Isuna sadiay ken ay-ayatennakayo nga ad-adda pay ngem iti maisao dagiti balikas.