Leej Txiv Saum Ntuj Ceeb Tsheej Xav Hais Lus rau Koj

Rau Adas thiab Evas thiab txhua leej txhua tus uas yuav nyob tom qab nkawd, tus tim tswv tau qhia, “[Nej] yuav tsum hloov siab lees txim thiab hu Vajtswv los ntawm Leej Tub lub npe tas mus li” (Mauxes 5:8).

Yexus qhia hais tias “Nej thov, nej thiaj yuav tau; nej nrhiav, nej thiaj yuav ntsib; nej khob, Vajtswv thiaj yuav qhib qhov rooj rau nej“ (Mathais 7:7). “Thaum nej thov Vajtswv, … nej mam li thov nej Leej Txiv … [nyob hauv qhov ntsiag to]” (Mathais 6:6). “Nej yuav tsum thov li no: Peb Leej Txiv tus uas nyob saum ntuj ceeb tsheej; Thov kom sawv daws hwm koj lub npe” (Mathais 6:9).

Yexus rau siab thov Nws Leej Txiv. “Yexus mus thov Vajtswv pem roob, thiab nws nyob pem thov Vajtswv ib hmos” (Lukas 6:12). “Thiab … Yexus nce mus thov Vajtswv pem roob” (Malakaus 6:46). “Yexus nrog nws cov thwj tim mus rau ntawm qhov chaw uas hu ua Khexemanes: Nws hais rau cov thwj tim hais tias, Nej nyob ntawm no kuv yuav mus thov Vajtswv tod” (Malakaus 14:32). Thaum Nws nyob saum tus ntoo khaub lig, Yexus thov Vajtswv rau cov tub rog uas muab Nws ntsia: “Txiv, thov koj zam txim rau lawv; rau qhov lawv tsis paub hais tias lawv ua dab tsi” (Lukas 23:34).

Cov vaj lug kub hais kom peb “thov Vajtswv tas mus li” (Lukas 21:36; 2 Nifais 32:9; 3 Nifais 18:15; Lus Qhuab Qhia thiab Kev Khi Lus 10:5; 19:38; 20:33; 31:12). “Sab laj nrog tus Tswv txog txhua yam uas koj ua, thiab nws yuav coj koj mus rau qhov zoo” (Amas 37:37). Tsis tas li ntawd, peb “yuav hais tag nrho tej kev ua tsaug thiab tej lus qhuas uas muaj nyob hauv nej tus ntsuj plig kom tas nej lub hwj chim” (Mauxiyas 2:20), pom tag nrho tej yam uas peb Leej Txiv ua rau peb.

Thawj Tswj Hwm Russell M. Nelson qhia tias: “Yuav muaj txoj kev xav zoo txog koj sab ntsuj plig thaum nej paub tias txhua hnub yog ib lub txiaj ntsim los ntawm Vajtswv. … Nws tsom kwm saib xyuas peb txhua hnub thiab txhawb nqa peb txhua lub sij hawm (saib Mauxiyas 2:21).”

Nifais hais tias, “Yog tias nej mloog tus Ntsuj Plig uas qhia kom tib neeg thov Vajtswv ces nej yeej paub tias nej yuav tsum thov Vajtswv; vim tus ntsuj plig phem tsis qhia kom tib neeg thov Vajtswv, tiam sis qhia kom nws yuav tsum tsis txhob thov Vajtswv” (2 Nifais 32:8).

Tej qhov los ntawm Yexus Tsa Yailaus tus Ntxhais, los ntawm Greg K. Olsen

Vim muaj peb tus Cawm Seej tus yam ntxwv thiab cov tim tswv thiab cov yaj saub tej lus ntuas ib tiam dhau ib tiam, peb paub thov Vajtswv txhua hnub ua tsaug rau peb cov koob hmoov, thiab paub thov Vajtswv hauv peb lub siab. Peb muaj kev lav ris sib txuas lus nrog peb Leej Txiv.

Tiam sis zoo tshaj plaws, peb Leej Txiv Saum Ntuj Ceeb Tsheej teb peb tej lus thov. Ib lo lus nug zoo hauv lub ntiaj teb no yog, peb yuav ua li cas kom txais tau thiab to taub dua tej lus teb, tej lus qhia, thiab kev nplij siab los ntawm peb Leej Txiv?

Los ntawm kuv lub neej uas tau muaj ntau tshaj xya caum xyoo, kuv paub tias peb Leej Txiv hais lus rau peb. Peb tsis nyob peb ib leeg xwb. Cov neeg nyob saum ntuj ceeb tsheej saib xyuas peb, pab peb thaum peb xav ua raws li tus Cawm Seej.

Kev txais tej lus teb rau peb tej lus thov Vajtswv pib nrog peb txoj kev ntseeg peb Leej Txiv Saum Ntuj Ceeb Tsheej thiab Nws tus Tub, Yexus Khetos. Yexus hais tias, “Tsis txhob ntshai, cia li ntseeg xwb” (Malakaus 5:36). Peb tso siab rau Nws, siv zog ua raws li tej lus txib, thiab xav tau Nws txoj kev pab thaum ua txhua yam. “Neeg yeej tsis ua txhaum Vajtswv ib yam dab tsi li … tsuas yog rau cov neeg uas tsis lees txhua yam uas nws txhais tes tau ua, thiab tsis ua raws li nws tej lus txib xwb” (Lus Qhuab Qhia thiab Kev Khi Lus 59:21).

Vajtswv txhais tes hauv peb lub neej tsis yog txhais tias Nws ua tej yam phem los sis tej xwm txheej uas nyob hauv peb lub ntiaj teb. Tiam sis, qhov ntawd yeej txhais tias thaum koj raug tej yam nyuaj thiab tsis ncaj, Nws yuav nyob nrog koj, pab kom koj ua tau, nplij koj lub siab, thiab “fij koj tej kev txom nyem los ua tej yam uas pab tau koj” (2 Nifais 2:2).

Thaum peb muaj kev ntseeg Nws thiab ua raws li Nws tej lus txib, peb kawm hnov Nws lub suab zoo dua.

Thaum lub Cuaj Hlis Ntuj 1993, thawj xyoo kuv ua ib tug Tuam Thawj Coj, Thawj Tswj Hwm James E. Faust (1920–2007), thaum ntawd nyob hauv Pawg Kaum Ob tug Thwj Tim, tau caw kuv tus poj niam, Kathy, thiab kuv mus xyuas Brigham Young University kev sib ntsib hawm Vajtswv nrog nws. Nco qab, xyoo 1993 twb yog ua ntej muaj cov xov tooj ntawm tes, kev sib tham saum huab cua social media, thiab qhov internet.

Hauv nws zaj lus, hu ua “Tus Ntsuj Plig lub Suab,” Thawj Tswj Hwm Faust ceeb toom: “Nyob hauv nej tiam neeg yuav muaj ntau lub suab qhia nej tias nej yuav tsum ua neej zoo li cas, kom nej ua raws li nej lub siab nyiam, thiab ua li cas kom muaj txhua yam. Nej yuav muaj tsib puas tshooj television uas nej xaiv tau. Yuav muaj ntau yam nyob hauv koospistawj, tshuab xa xov xwm, kev teev xov xwm, thiab chaw sib tham; yuav muaj kev luam tawm hauv koospistawj, lub tshuab txais xov xwm, thiab tej lub tshuab pab sib txuas lus uas yuav ua rau nej txais tau xov xwm ntau dhau. … Lub suab uas nej yuav tsum kawm kom mloog yog tus Ntsuj Plig lub suab.”

Thawj Tswj Hwm Boyd K. Packer (1924–2015), Thawj Tswj Hwm ntawm Pawg Kaum Ob tug Thwj Tim, tau qhia txog lub suab yau yau hais lus uas yog tus Ntsuj Plig thaum nws qhia txog John Burroughs, ib tug uas kawm txog tej yam nraum zoov, thaum nws taug kev nrog ib cov phooj ywg hauv tshav ua si uas muaj coob tus neeg. Ntawm no yog Thawj Tswj Hwm Packer tej lus hais:

“Dhau tej suab ntawm lub nroog [Mr. Burroughs] hnov tus noog zaj nkauj.

“Nws nres thiab mloog! Cov uas nrog nws tsis hnov. Nws ntsia ib puag ncig nws. Tsis muaj leej twg pom.

“Txob nws lub siab tias sawv daws hnov tsis tau ib yam dab tsi uas zoo heev.

“Nws muab ib lub nyiaj npib ntawm nws hnab ris thiab pov rau saum ntuj. Qhov ntawd tau poob hauv av nrog ib lub me nyuam suab nrov li tus noog zaj nkauj. Sawv daws tig; lawv tau hnov qhov ntawd!

“Txoj kev muab tag nrho lub nroog tej suab thiab ib tug noog zaj nkauj sib cais yeej nyuaj heev. Tiam sis yus hnov tau. Yus yeej hnov tau yog tias yus kawm kom txawj hnov.”

Thawj Tswj Hwm Packer tej lus qhia txog tus Vaj Ntsuj Plig Dawb Huv yog thaum xyoo 1979, ib lub caij nyoog thaum yus lub neej ntsiag to me ntsis thiab tej suab ntawm lub ntiaj teb tsis nrov nrov npaum li tam sim no.

Thawj Tswj Hwm Nelson qhia tias, “Yog nej tsom ntsoov rau tej xov xwm ntawm kev sib tham saum huab cua social media tshaj nej mloog tus Ntsuj Plig tej lus ntxhi, ces nej sab ntsuj plig yuav raug xwm txheej.”

Thawj Tswj Hwm Faust hais, “Yog peb yuav mloog tus Ntsuj Plig lub suab, peb yuav tsum qhib pob ntseg mloog, muaj kev ntseeg tig mus rau lub suab, thiab ntsia ntsoov mus rau saum ntuj.”

Tus Ntsuj Plig lub suab yuav los rau peb txoj kev txawj ntse thiab peb txoj kev xav. “Kuv yuav qhia rau koj hauv koj lub cim xeeb thiab hauv koj lub siab, los ntawm tus Vaj Ntsuj Plig Dawb Huv, uas yuav los rau koj thiab yuav nyob rau hauv koj lub siab” (Lus Qhuab Qhia thiab Kev Khi Lus 8:2). Mloog koj lub siab uas paub qhov yog thiab qhov tsis yog—ntau lub sij hawm los kev tshwm sim pib thaum ntawd.

Thov Vajtswv Nrog Ib lub Siab uas Ntseeg

Yuam tsis tau tej lus teb thiab tej kev tshoov siab Peb thov Vajtswv thiab tos nrog ib lub siab uas ntseeg. Tej lus teb yuav tsis los hauv lub neej no, tiam sis rau cov neeg ncaj ncees, tus Tswv yeej yuav muab Nws txoj kev kaj siab lug rau peb (saib Yauhas 14:27). Ntau zaus tej lus teb los rau peb thaum peb thov Vajtswv pab cov uas nyob ib puag ncig peb. Tej lub sij hawm, lawv los “ib nqe lus ntxiv rau ib nqe lus, ib ntsiab cai ntxiv rau ib ntsiab cai” (Lus Qhuab Qhia thiab Kev Khi Lus 98:12).

Lub ntuj lub suab los rau peb thaum lub sij hawm uas peb tsis paub thiab nyob tej qhov chaw uas peb tsis tau xav, tiam sis tej lub cib fim tseem ceeb tshaj yog thaum peb nyob hauv tej qhov chaw ntsiag to thiab tej qhov chaw dawb ceev. Tej hnub sawv ntxov thaum kuv thov Vajtswv thiab xav xav, kuv txais tej koob hmoov uas txawv. Kev nyeem vaj lug kub peb tus kheej tsis tso tseg txhua hnub, txawm zoo nkaus pheej rov qab ua zoo li qub los, tus Ntsuj Plig lub suab nkag tau rau hauv peb lub siab.

Tej lub sij hawm, kev tshoov siab los ntawm tej yam uas peb nyeem, thiab lwm lub sij hawm, los thaum peb xav txog tej lo lus teb rau lwm yam teeb meem. Nco ntsoov Txwj Laug Robert D. Hales cov lus: “Thaum peb xav hais lus rau Vajtswv, peb thov Nws. Thiab thaum peb xav kom Nws hais lus rau peb, peb nyeem cov vaj lug kub.”

Thaum lub ntiaj teb tej lub suab thiab tej yam uas cuam tshuam nyob ib puag ncig peb, tus Tswv tau txib Nws cov yaj saub ua ntau lub tuam tsev ntxiv. Nyob hauv tus Tswv cov tsev dawb ceev no, thaum peb tso peb tej teeb meem tseg rau sab nraud thiab coj peb tej lus thov thiab tej kev txhawj nkag mus haud, peb los kawm txog tej yam tseeb mus ib txhis.

Ib xyoo tas los, Thawj Tswj Hwm Nelson tau cog lus li no rau peb: “Kuv cov kwv tij thiab cov muam, kuv cog lus rau nej li no. Tsis muaj ib yam dab tsi uas yuav pab nej tuav tus nqaj hlau ntau tshaj qhov uas nej hwm Vajtswv hauv lub tuam tsev ntau npaum li nej mus tau. Yeej tsis muaj dab tsi uas yuav pov hwm nej ntau tshaj thaum nej raug lub ntiaj teb tej huab tsaus ntuj. Tsis muaj dab tsi uas yuav txhawb nqa nej zaj lus tim khawv txog tus Tswv Yexus Khetos thiab nws txoj Kev Theej Txhoj ntau tshaj los sis pab nej to taub Vajtswv txoj hau kev zoo kawg nkaus. Thaum nej muaj kev nyuaj siab, tsis muaj dab tsi uas yuav nplij nej lub siab ntau tshaj. Tsis muaj dab tsi uas yuav qhib lub rooj ntug ntau tshaj. Tsis muaj ib yam dab tsi!”

Txhua lub tuam rooj sab laj muaj cov koob hmoov ntau ntxiv. Thaum lub Plaub Hlis Ntuj tom ntej, peb yuav rov qab sib ntsib hauv lub tuam rooj sab laj kom hnov tus Tswv lub suab. Peb twb thov Vajtswv thiab npaj siab thaum peb tuaj rau lub tuam rooj sab laj. Rau peb txhua tus, peb muaj tej kev txhawj thiab tej lus nug. Peb xav txhawb peb txoj kev ntseeg peb tus Cawm Seej, Yexus Khetos, thiab haj yam muaj zog thaum peb tiv kev ntxias. Peb tuaj kom lub ntuj ceeb tsheej qhia peb. Kuv cog lus rau koj tias thaum koj npaj thiab thov Vajtswv ua ntej tuaj rau txhua tuas ntawm lub tuam rooj sab laj, koj yuav hnov tej lus teb rau koj tej teeb meem, thiab koj yuav paub tias “Vajtswv saib xyuas koj”.

Cia li muaj kev ntseeg tias koj Leej Txiv Saum Ntuj Ceeb Tsheej hais lus rau koj. Nws yeej ua li ntawd! Cia koj txoj kev ntseeg Leej Txiv Saum Ntuj Ceeb Tsheej thiab Nws Leej Tub uas Nws Hlub pab koj qhib daim ntaub thaiv thiab txais Leej Txiv lub suab. Kuv ua tim khawv tias Nws yeej muaj txoj sia nyob thiab Nws hlub koj tshaj dua tej lus hais tau.